08/05/2026
सोनदरा गुरुकुलातील विद्यार्थ्यांचे शालांत परीक्षेत सोनेरी यश !
गेल्या ३९ वर्षांपासून मराठवाड्यातील ग्रामीण विद्यार्थ्यांना उत्तम शिक्षण देणाऱ्या सोनदरा गुरुकुल, डोमरी या संस्थेतील दहावीच्या विद्यार्थ्यांनी शैक्षणिक वर्ष २०२५-२६च्या शालांत परीक्षेमध्ये उत्तम यश मिळवले आहे. गेल्या अनेक वर्षांप्रमाणेच या वर्षीही शाळेचा निकाल १००% लागला आहे.
(1) 90 % पेक्षा जास्त गुण घेणारे - 08 (2) 80 % ते 90% गुण घेणारे - 20 (3) 65 % ते 80 % गुण घेणारे - 11 या प्रकारचे गुण मिळवून विदयार्थी उत्तीर्ण झाले आहेत.
1) प्रतीक संतोष सौंदर याने ९४.४% गुण मिळवून पहिला, प्रतीक दिलीप मिसाळ याने ९२.२% गुण मिळवून दुसरा तर सचिन बलराम झुंबड याने ९२% गुण मिळवून तिसरा क्रमांक मिळवला आहे.
भारतरत्न नानाजी देशमुख यांच्या प्रेरणेतून डोमरी गावातील सुदामकाका भोंडवे यांनी १९८६मध्ये सुरू केलेल्या या निवासी गुरुकुल पद्धतीच्या शाळेची सुरुवात ३ झोपड्या व ऊसतोड कामगारांची २३ मुले अशी झाली होती. आज या शाळेत मराठवाडा व परिसरातील १४ जिल्ह्यातून सुमारे २२३ विद्यार्थी निवासी पद्धतीचे शिक्षण घेत आहेत. गेल्या दोन वर्षांपासून येथे परिसरातील विद्यार्थिनीसुद्धा दिन गुरुकुल प्रकारचे अनिवासी शिक्षण घेत असून यंदा १७ विद्यार्थिनी आहेत. गेल्या वर्षीपासून बालवाडी व प्राथमिक वर्गातील शिक्षणासही आरंभ झाला आहे.
पहाटे साडे पाचपासून रात्री दहापर्यंतच्या अतिशय शिस्त आणि संस्कारयुक्त दिनक्रमामध्ये या विद्यार्थ्यांच्या मानसिक, शारीरिक, बौद्धिक आणि सामाजिक विकासासाठी प्रयत्न केले जातात. स्वावलंबन, व्यायाम व खेळ, गटामध्ये कामे व अभ्यास करणे, पाठांतराऐवजी विषय समजून घेणे, एकमेकांशी स्पर्धेऐवजी स्वतःची क्षमतावृद्धी अशा आधुनिक शिक्षणपद्धतीतील तत्त्वांच्या आधारे या विद्यार्थ्यांना सोनदरा गुरुकुलात घडवले जाते. या साऱ्यामुळे उत्तम संस्कारित झालेले शेकडो विद्यार्थी आज समाजात वैद्यकीय, अभियांत्रिकी, शासकीय सेवा, शिक्षण, व्यावसायिक कंपनी, संरक्षण, शेती तसेच उद्योग व्यवसाय अशा क्षेत्रात उत्तम नागरिक म्हणून कार्यरत आहेत.
