19/09/2026
ಅಪ್ಪನೆಂಬ ಸಾಕ್ಷೀಪ್ರಜ್ಞೆ ಚಮಕಿಸುವ ಗುರಿಯ ತಳದಲ್ಲೆಲ್ಲೋ ಗುಳುಗುಳಿಸುತ್ತಿದ್ದ ಕಾಳಜಿಪೂರ್ಣ ಪ್ರಕ್ರಿಯೆಯನ್ನು ಆಸ್ವಾದಿಸಿ, ಆನಂದಿಸಿತು!
ಅಗತ್ಯಗಳು ಎದುರಾಗಿ; ಅದಕ್ಕೆ ಬೇಕಾದ ಪರಿಕರಗಳನ್ನು ಹೊಂದಿಸಲು ಹಗಲು-ರಾತ್ರಿಗಳನ್ನು ಒಂದು ಮಾಡಿಕೊಂಡು ಯೋಚಿಸುತ್ತಾ, ಸಾಕಷ್ಟು ಹೋಂವರ್ಕ್, ಬೇಕಷ್ಟು ಸಂಶೋಧನೆ, ಮನದಟ್ಟಾಗುವಷ್ಟು ಮಾತುಕತೆ, ತೃಪ್ತಿಯಾಗುವಷ್ಟು ಕ್ಷೇತ್ರಕಾರ್ಯ; ಎಲ್ಲ ಆಗಿ ಪದಾರ್ಥಗಳ ಡಬ್ಬಿಗಳು ಕೈ ಸೇರಿದಾಗ ಅನ್‍ಪ್ಯಾಕ್ ಮಾಡುವುದೇ ಒಂದು ದೊಡ್ಡ ಸಂಭ್ರಮ.
ಪ್ಯಾಕಿನಿಂದ ಹೊರಗೆ ಇಣುಕಿದ್ದನ್ನು ನೋಡಿ, ತಡಕಿ, ಮೂಸಿ, ಎತ್ತಿಕೊಂಡರೂ ಸಮಾಧಾನವಾಗುವುದಿಲ್ಲ. ಅಂದುಕೊಂಡದ್ದೆಲ್ಲ ಒಳಗಿದೆಯೇ, ಕಲ್ಪಿಸದ ಲೋಕಗಳೂ ಬಿಚ್ಚಿಕೊಳ್ಳುತ್ತವೆಯೇ? ಎಂಬ ತಹತಹಗಳು ಒತ್ತರಿಸಿಕೊಳ್ಳುತ್ತಿರುತ್ತವೆ. ಜೊತೆಗೆ ವಿಷಯ ತಜ್ಞರು ಇದು ಹೀಗೆ, ಅದು ಹಾಗೆ ಎಂದು ವಿವರಿಸುತ್ತಿದ್ದರೆ, ಒಂದೇ ಗುಕ್ಕಿನಲ್ಲಿ ಎಲ್ಲವನ್ನೂ ಹೀರಿಕೊಂಡುಬಿಡುವ ಆಸೆಯಾಗುತ್ತದಾದರೂ, ಅದು ಅಷ್ಟು ಸಲೀಸಲ್ಲ ಅಂತಲೂ ಮನದಟ್ಟಾಗಬಹುದು. ಅಂಗಡಿಯಿಂದ ಹೊರಬಿದ್ದರೂ ಅರಗಿಸಿಕೊಂಡುಬಿಡುವ ಕಾತರ ಮನೆಗೆ ತಲುಪುವುದನ್ನೇ ಕಾಯುತ್ತಿರುತ್ತದೆ. ಮನೆಗೆ ವಾಪಸ್ ಆದಾಗ ಮತ್ತೊಮ್ಮೆ ಅನ್‍ಬಾಕ್ಸ್ ಸಂಸ್ಕಾರಕ್ಕೆ ಒಳಗಾಗಿ ಊಟ, ತಿಂಡಿ, ನಿದ್ದೆಯ ಪರಿವೆಯೇ ಇಲ್ಲದೇ ಆ ಪರಿಕರದೊಂದಿಗೆ ಆತ್ಮಸಾತ್‍ ಆಗುವ ಪ್ರಕ್ರಿಯೇ ಸಾಗಿಯೇ ಇರುತ್ತದೆ.
ಇದು ಕೇವಲ ಕಲ್ಪನಾ ಲೋಕದ ವಿಹಾರವಲ್ಲ. ನಿನ್ನೆ ರಾಷ್ಟ್ರೋತ್ಥಾನ ಸ್ಟುಡಿಯೋಕ್ಕೆ ವೀಡಿಯೋ ಕ್ಯಾಮೆರಾ ಪರಿಕರಗಳ ಡೆಲಿವರಿ ಪಡೆಯುತ್ತಿದ್ದಾಗ ಅಂಗಡಿಯ ಮೂಲೆಯೊಂದರಲ್ಲಿ ಕೂತ ಸಾಕ್ಷೀಭಾವವೊಂದು ಸಂಭ್ರಮಿಸುತ್ತಿದ್ದ ರೀತಿಯದು. ಪ್ರಾಯಪ್ರಬುದ್ಧರಾದ ಮಕ್ಕಳು ಅಳೆದು-ತೂಗಿ ಸ್ಮಾರ್ಟ್ ಆಗಿ ವ್ಯವಹರಿಸುವುದನ್ನು ಕಂಡ ಅಪ್ಪನೊಬ್ಬ ಹೆಮ್ಮೆಯ ಆನಂದದೊಳಗೆ ಬೀಗುತ್ತಾ ಅಭಿಮಾನಿಸುವಂತಿತ್ತು ಆ ಸನ್ನಿವೇಶ. ಇಷ್ಟಪಟ್ಟು, ಕಷ್ಟಬಿದ್ದು, ಜೋತಾಡಿ ಖರೀದಿಸಿದ ಬ್ರಾಂಡೆಡ್ ವಾಚು, ಚಪ್ಪಲಿ, ಬಟ್ಟೆ ಏನೇ ಇರಲಿ, ಕಲಾ-ನೈಪುಣ್ಯವನ್ನು ಆಸ್ವಾದಿಸುತ್ತ, ಬಾಕ್ಸನ್ನು ಅಂಗಡಿಯವರಿಗೇ ಕೊಟ್ಟು, ಅನ್-ಬಾಕ್ಸ್ಡ್ ಪದಾರ್ಥದ ಆನಂದವನ್ನು ಮೈಗೇರಿಸಿಕೊಂಡು ಹೊರಟೇ ಬಿಡುವುದು ಆ ಅಪ್ಪನ ಖಯಾಲಿ.
ಅಂತಿಪ್ಪ ಆ ಅಪ್ಪನೆಂಬ ಸಾಕ್ಷೀಭಾವ ಬುಡದಿಂದಲೂ ನೋಡುತ್ತ, ಒಳೊಳಗೇ ಖುಷಿಯ ಬುಗ್ಗೆಗಳೊಂದಿಗೆ ನಲಿಯುತ್ತಲೇ ಇತ್ತು.
ರಾಷ್ಟ್ರೋತ್ಥಾನದ ಕೇಂದ್ರ ಕಚೇರಿ, ಕೇಶವಶಿಲ್ಪದಲ್ಲಿ ಸ್ಟುಡಿಯೋ ನಿರ್ಮಾಣ ಆಗಬೇಕು, ಆಗಬೇಕು ಅಂತ ಎರಡು-ಮೂರು ವರ್ಷಗಳಿಂದ ಅಂದುಕೊಳ್ಳುತ್ತಾ, ಮುಂದೆಹಾಕುತ್ತಾ, ಅಂತೂ ನಾಲ್ಕು ಗೋಡೆಗಳು, ನೆಲ, ಮೇಲು ಹಾಸುಗಳು, ಶಬ್ದ ನಿಯಂತ್ರಣ, ಗ್ರೀನ್‍ ಸ್ಕ್ರೀನ್, ಕಪ್ಪು ಪರದೆ, ಲೈಟಿಂಗ್, ಎಸಿ, ದಪ್ಪ-ದಪ್ಪದ ಮೂರು ಬಾಗಿಲುಗಳು, ಮತ್ತುಳಿದ ಅಗತ್ಯ ಪರಿಕರಗಳೊಂದಿಗೆ ಎದ್ದುನಿಂತೇಬಿಟ್ಟಿತು. ರಾಷ್ಟ್ರೋತ್ಥಾನದ ಇಡಿಯ ಸಮೂಹದ ಮಟ್ಟಿಗೆ ಸ್ಟುಡಿಯೋ ಎಂಬ ಈ ವ್ಯವಸ್ಥೆ ಮೊದಲನೆಯದ್ದೇ. ಎಷ್ಟು ಮಾಡಿದರೆ ಹೆಚ್ಚು, ಎಷ್ಟು ಮಾಡಿದರೆ ಕಡಿಮೆ, ಖರ್ಚು ಜುಡೀಷಿಯಸ್ ಹೌದೋ, ಅಲ್ಲವೋ ಎಂದು ಕೊರೆಯುತ್ತಲೇ ಇತ್ತು. ಈ ಭಯದ ಬೆಂಗಾವಲಿನಲ್ಲಿಯೇ ಸ್ಟುಡಿಯೋ ಬಳಕೆಯ ಯೋಜನೆಯೊಟ್ಟೊಟ್ಟಿಗೆ ಗರಿಷ್ಠ ಪ್ರಮಾಣದಲ್ಲಿ ಘನಿಷ್ಠ ಮಟ್ಟದ ಸದ್ವಿನಿಯೋಗಕ್ಕೆ ಒಡ್ಡಿಕೊಳ್ಳಲಿ ಎಂಬುದು ಅನುಕ್ಷಣದ ಪ್ರಾರ್ಥನೆ ಕೂಡ ಆಗಿದೆ.
ಗೋಡೆ ಕಟ್ಟುವಾಗ ಅಷ್ಟೊಂದು ಅನಿಸಲಿಲ್ಲ. ಅನುಭವದ ಊಟೆ ಬೆನ್ನಿಗಿತ್ತು, ವಿಶ್ವಾಸ ಮಂಡೆಯೊಳಗಿತ್ತು. ವೀಡಿಯೋ ಕ್ಯಾಮೆರಾ, ಆಡಿಯೋ ವ್ಯವಸ್ಥೆಯನ್ನು ಹೊಂದಿಸಿಕೊಳ್ಳುವುದೇ ಸ್ವಲ್ಪ ಸವಾಲಾಯಿತು.
ಕಾರ್ಯಕ್ರಮಗಳಲ್ಲಿ ಕ್ಯಾಮೆರಾ ಬಳಸಿದ್ದು ಬಿಟ್ಟರೆ, ಈ ಉದ್ದೇಶಕ್ಕೆ ಇದೇ ಕ್ಯಾಮೆರಾ ಆಗಬೇಕು ಎಂದು ತೀರ್ಮಾನಿಸುವಷ್ಟು ಮಾಗಿರಲಿಲ್ಲ ನಮ್ಮ ಅಂತರಂಗದ ವ್ಯವಸ್ಥೆ. ಮಾಗಿದ ಒಬ್ಬೊಬ್ಬ ತಜ್ಞರದ್ದು ಒಂದೊಂದು ಸಲಹೆ. ಒಬ್ಬರು PTZ (ಬಿಗ್‍ಬಾಸ್‍ನಲ್ಲಿ ಬಳಸುವಂಥದ್ದು) ಅಂದರು, ಮತ್ತೊಬ್ಬರು Cinema Line, ಮಗದೊಬ್ಬರು Sony series, Canon family, ಎಂಬ ಬಗೆಗೆ ಸಾಧ್ಯತೆಗಳನ್ನು ಹೇಳುತ್ತಿದ್ದರೆ, ತಲೆ ಕೆಟ್ಟು ಕೆರವಾಯಿತು.
ಅಷ್ಟಾದರೂ ನಮ್ಮ ಹುಡುಗರು ಬಿಡಲಿಲ್ಲ. ನಮಗೇನು ಬೇಕು, ನಮಲ್ಲೆಷ್ಟು ಜಾಗ ಇದೆ, NGO ಆದ ರಾಷ್ಟ್ರೋತ್ಥಾನಕ್ಕೆ ಹೆಚ್ಚು ಭಾರ ಆಗದೇ ಮುಂದುವರೆಯುವುದು ಹೇಗೆ, ಈಗ ಕೊಂಡ ಕ್ಯಾಮೆರಾದ ಭವಿಷ್ಯ ಹೇಗೆ, ಸದಾ ಬೆಳವಣಿಗೆಯಲ್ಲಿರುವ ತಾಂತ್ರಿಕತೆಗೆ ಹೊಂದಿಸಿಕೊಳ್ಳುವ ಸಾಧ್ಯತೆಗಳ ಹೋಂವರ್ಕ್ ಕೂತಲ್ಲಿ, ನಿಂತಲ್ಲಿ ನಡೆಯುತ್ತಿತ್ತು. ಅದೆಷ್ಟು AI ಮಾಹಿತಿಗಳನ್ನು ತಡಕಾಡಿದರೋ, ಸ್ಪಷ್ಟೀಕರಣಗಳನ್ನು ಕೇಳಿದರೋ, ಒಂದಕ್ಕೊಂದು ತಾಳೆ ಮಾಡಿಕೊಂಡು ಅಭ್ಯಾಸ ಮಾಡಿದರೋ, ತಜ್ಞರನ್ನು ಅದೆಷ್ಟು ಕಿರಿಕಿರಿಯಾಗುವಷ್ಟರ ಮಟ್ಟಿಗೆ ಕೇಳಿದರೋ, ಸ್ಟುಡಿಯೋ ಕ್ಷೇತ್ರದರ್ಶನ ಮಾಡಿದರೋ, ಗೊತ್ತಿಲ್ಲ! ತುದಿಯಿಂದ ಬುಡದವರೆಗೆ ಕಂಡದ್ದು ಒಂದೇ, ಕಣ್ಣಲ್ಲೊಂದು ಹೊಳಪು ಮತ್ತು ನನ್ನದೇ ಕೆಲಸವೆಂಬ ಅಭಿಮಾನದ ಬಿಸುಪು.
ಕೊನೆಯಲ್ಲಿ, ಹಲವು ವರ್ಷಗಳಿಂದ Canonನ ಸಂತುಷ್ಟ ಕುಟುಂಬದ್ದೇ ಭಾಗವಾಗಿರುವ ರಾಷ್ಟ್ರೋತ್ಥಾನ ಅದರೊಂದಿಗೇ ಮುಂದುವರೆಯುವ ತೀರ್ಮಾನ ಮಾಡಿ, ಎರಡು ಬ್ರೈನ್‍ಗಳು (Canon C50, Canon R6V), ಎರಡು ಲೆನ್ಸ್-ಗಳನ್ನು (28-70mm F2.8 STM IS, 85mm Macro F2 STM) ತನ್ನ ಮಡಿಲಿಗೆ ಹಾಕಿಕೊಂಡಿತು.
ಮಡಿಲಿಗೆ ಬರುವ ಮುನ್ನ ಪರಿಕರಗಳ ಮುಡಿಯಲ್ಲಿ ಕಂಗೊಳಿಸಿದ ಒಂದಷ್ಟು ಅಂಶಗಳು…
• ಸದ್ಯ, 4K ಗುಣಮಟ್ಟದಲ್ಲೇ ಚಿತ್ರೀಕರಿಸಲಾಗುತ್ತಿದ್ದರೂ 7K ಚಿತ್ರೀಕರಣಕ್ಕೆ ಏರುವ ಸಾಧ್ಯತೆ
• Full Frame Sensor
• Open Gate Technology
• In Body Image Stabilisation (IBIS)
• Bokeh ಎಫೆಕ್ಟ್ (ಫೋಕಸ್ ಆದ ಪದಾರ್ಥವನ್ನು ಬಿಟ್ಟು ಹಿನ್ನೆಲೆಯ/ ಅಕ್ಕ-ಪಕ್ಕದ ಉಳಿದ ಅಂಶಗಳನ್ನು ಅಸ್ಪಷ್ಟ ಮಾಡುವ ಸ್ವಭಾವ)
• XLR ಹ್ಯಾಂಡಲ್
• ಡೈರೆಕ್ಟ್ ಪವರ್
• 4:2:2 ಕಲರ್-ಗ್ರೇಡ್ 10 ಬಿಟ್
• ಡೈನಾಮಿಕ್ ರೇಂಜ್ 15 Stops (ಫೋಕಸ್ ಆದ ಪದಾರ್ಥದ ಚಿತ್ರದ ಹಿನ್ನೆಲೆಯಲ್ಲಿನ ಅತಿ ಬೆಳಕಿನ ನಿಯಂತ್ರಣ)
• NETFLIX ಅಪ್ರೂವಲ್, ಹೀಟಿಂಗ್, ಫ್ಯಾನ್ ಸೌಲಭ್ಯ
ಎಷ್ಟೇ ತಾಂತ್ರಿಕತೆ, ಸೌಲಭ್ಯ ಅಂತ ಯೋಚಿಸಿದರೂ ಇವಿಷ್ಟೂ ನಮಗೆ ಬೇಕೇ? ಈ ಸೌಲಭ್ಯಗಳಿಗೆ ನ್ಯಾಯ ಒದಗಿಸಲು ಸಾಧ್ಯವೇ? ಅತಿಯಾದ ಬಜೆಟ್‍ ಕಡೆಗೆ ವಾಲುತ್ತಿದೆಯೇ? ಎಂಬ ಪ್ರಶ‍್ನೆಗಳನ್ನು ಹಂತಹಂತದಲ್ಲಿ ಹಾಕಿಕೊಂಡು ಕಾರ್ಯಸಾಧು ವರದಿಯನ್ನು ರಾಷ್ಟ್ರೋತ್ಥಾನ ಆಡಳಿತ ಮಂಡಳಿಗೆ ಅಂತಿಮವಾಗಿ ಕೊಡಲಾಯಿತು.
ಆಡಳಿತ ಮಂಡಳಿಯವರೂ ಹಾಗೇ ಬಿಡಲಿಲ್ಲ. ಅಳೆದು-ಸುರಿದು, ಬಗೆಬಗೆಯಾಗಿ ಪ್ರಶ್ನಿಸಿ, ಹಿತೈಷಿಗಳ ತೀರ್ಮಾನವನ್ನು ಸಂಗ್ರಹಿಸಿದ ನಂತರದಲ್ಲಿಯೇ ಅಸ್ತು ಅಂದಿದ್ದು. ಪ್ರಕ್ರಿಯೆಗೆ ಒಂದೆರಡು ತಿಂಗಳು ಹಿಡಿದರೂ ಸಮಾಧಾನದ ಮನೋವ್ಯಾಪಾರವಾಗಿ ಸಂದೇಹದ ಕೊಸರೇ ಉಳಿಯಲಿಲ್ಲ.
ಮುಂದೆ ಉಳಿದಿರುವುದು ಆಡಿಯೋ ವ್ಯವಸ್ಥೆ. ಅದಕ್ಕೂ ಅದೇ ಮಟ್ಟದ ಶ್ರಮ ಹಿನ್ನೆಲೆಯಲ್ಲಿ ಬೆವರಾಗಿ ಹರಿದಿದೆ. ಕೆಲವೇ ದಿನಗಳಲ್ಲಿ ಅದರ ಸಾಕಾರವೂ ಆಗಿ, ಈ ನವರಾತ್ರಿಗೆ ರಾಷ್ಟ್ರೋತ್ಥಾನ ಸ್ಟುಡಿಯೋ ಲೋಕಮುಖಕ್ಕೆ ತೆರೆದುಕೊಳ್ಳಲಿದೆ.
ಶ್ರಮ ಫಲ ಕೊಡುತ್ತಿದೆ ಎಂಬ ಸಂತೋಷ ಇದ್ದೇಇದೆ. ಆ ಶ್ರಮಕ್ಕೊಂದು ಶ್ರದ್ಧೆಯ ಪ್ರಕ್ರಿಯಾ ಸುಗಂಧ ಹತ್ತಿಕೊಂಡಾಗ ಅಂತಿಮ ಫಲ ಕೈಗೆ ಸಿಗುವುದರೊಳಗೇ ಸುಫಲಗಳು ಕಂಗೊಳಿಸಲು ಶುರುವಿಟ್ಟುಕೊಳ್ಳುತ್ತವೆ. ಗುರಿಯೆಡೆಗಿನ ದಾರಿಯೇ ಹೀಗಾದಾಗ ಆ ಗುರಿ ಗುರುತರವಾಗುತ್ತದೆ, ಮತ್ತದರ ಪುರನಾವರ್ತನೆಗೂ ಮನಸ್ಸು ಅಂಜದಾಗುತ್ತದೆ. ಇದನ್ನೆಲ್ಲ ಆಗುಮಾಡುತ್ತಿರುವ ರಾಷ್ಟ್ರೋತ್ಥಾನದ ಕಾರ್ತೀಕ, ಸಿದ್ಧಾರ್ಥ್; Foto Circleನ ಕೇಶವ್; Canonನ ಬಾಲುಂಕೇಶ್ವರ್ (Balunkeswar Jena); Insync Studiosನ ವಿಕ್ರಂ ವಸಿಷ್ಠ ಹಾಗೂ ಇನ್ನೂ ಅನೇಕರಿಗೆ ಪ್ರೀತಿಯ ಪ್ರಶಂಸೆಗಳು ಹಾಗೂ ಹೃದಯ ತುಂಬಿದ ಧನ್ಯವಾದಗಳು!
