18/09/2026
ಪ್ರಿಯ ಸಂಗಾತಿಗಳೇ,
ಕನಿಷ್ಟ ವೇತನದ ಜಾರಿಯ ವಿಚಾರದಲ್ಲಿ ಆಗಿರುವ ಸಕಾರಾತ್ಮಕ ಬೆಳವಣಿಗೆಯನ್ನು ತಮ್ಮೊಂದಿಗೆ ಹಂಚಿಕೊಳ್ಳುತ್ತಿರುವೆ.
ಮಾನ್ಯ ಕರ್ನಾಟಕ ಉಚ್ಚನ್ಯಾಯಾಲಯದ ಮಧ್ಯಂತರ ಆದೇಶ:
ರಾಜ್ಯ ಸರ್ಕಾರವು 22.05.2026 ರಂದು 83 ನಿಗದಿತ ಉದ್ಯೋಗಗಳಿಗೆ ಕನಿಷ್ಠ ವೇತನವನ್ನು ಪರಿಷ್ಕರಿಸಿದೆ. ಹಲವಾರು ಸರ್ಕಾರಿ ಇಲಾಖೆಗಳು ಪರಿಷ್ಕೃತ ವೇತನವನ್ನು ತಕ್ಷಣವೇ ಜಾರಿಗೆ ತಂದವು.
ಆದರೇ, ಹಣಕಾಸು ಇಲಾಖೆಯು 15.07.2026 ರಂದು ಒಂದು ಅಧಿಕೃತ ಪತ್ರವನ್ನು ಹೊರಡಿಸಿತು. ಕನಿಷ್ಠ ವೇತನವನ್ನು ಪರಿಷ್ಕರಿಸುವ ಅಧಿಸೂಚನೆಗೆ ತನ್ನ ಆಕ್ಷೇಪಣೆಗಳನ್ನು ದಾಖಲಿಸಿತು ಮತ್ತು ಹಣಕಾಸಿನ ಹೊರೆ ಮತ್ತು ಹಣಕಾಸು ಹೂಡಿಕೆಯ ಮೇಲಿನ ಪರಿಣಾಮವಮ್ನು ಪರಿಗಣಿಸಿ ಪರಿಷ್ಕೃತ ಕನಿಷ್ಟ ವೇತನದ ಜಾರಿಯನ್ನು ಸ್ಥಗಿತಗೊಳಿಸಲು ಶಿಫಾರಸು ಮಾಡಿತು.
ಹಣಕಾಸು ಇಲಾಖೆಯ ಈ ಸುತ್ತೋಲೆ ಮತ್ತು ಹಣಕಾಸು ಇಲಾಖೆಯ "ಮೌಖಿಕ ಸೂಚನೆಗಳ" ಮೇರೆಗೆ ಕಾರ್ಯನಿರ್ವಹಿಸುತ್ತಾ,
ರಾಜ್ಯ ಲೆಕ್ಕಪರಿಶೋಧನಾ ಇಲಾಖೆಯು 29.07.2026 ರಂದು ಸುತ್ತೋಲೆಯನ್ನು ಹೊರಡಿಸಿ, ತನ್ನ ಇಲಾಖೆಯಲ್ಲಿನ ಕಾರ್ಮಿಕರಿಗೆ ಕನಿಷ್ಠ ವೇತನ ಪರಿಷ್ಕರಣೆಯನ್ನು ಸ್ಥಗಿತಗೊಳಿಸುವಂತೆ ಮತ್ತು ಮುಂದಿನ ಆದೇಶಗಳವರೆಗೆ ಪೂರ್ವ-ಪರಿಷ್ಕೃತ ಹಳೇ ದರಗಳಲ್ಲಿ ಮಾತ್ರ ವೇತನವನ್ನು ಪಾವತಿಸುವಂತೆ ನಿರ್ದೇಶಿಸಿತು.
ಅದೇ ರೀತಿ, ಪೌರಾಡಳಿತ ನಿರ್ದೇಶನಾಲಯವು 10.08.2026 ರಂದು ಸುತ್ತೋಲೆಯನ್ನು ಹೊರಡಿಸಿ, ಮಹಾನಗರ ಪಾಲಿಕೆಗಳು ಮತ್ತು ನಗರ ಸ್ಥಳೀಯ ಸಂಸ್ಥೆಗಳಲ್ಲಿನ ಹೊರಗುತ್ತಿಗೆ ನೌಕರರಿಗೆ ಹಳೇಯ ವೇತನವನ್ನು ಮಾತ್ರ ಪಾವತಿಸುವಂತೆ ನಿರ್ದೇಶಿಸಿತು ಮತ್ತು ಕರ್ನಾಟಕ ಪಂಚಾಯತ್ ರಾಜ್ ಇಲಾಖೆಯು 28.08.2026 ರಂದು ಸುತ್ತೋಲೆಯನ್ನು ಹೊರಡಿಸಿ, ಎಲ್ಲಾ ಗ್ರಾಮ ಪಂಚಾಯಿತಿಗಳು ಹಣಕಾಸು ಇಲಾಖೆಯಿಂದ ಮುಂದಿನ ಆದೇಶಗಳವರೆಗೆ ಪೂರ್ವ-ಪರಿಷ್ಕೃತ ಹಳೇಯ ವೇತನವನ್ನು ಮಾತ್ರ ಬಿಡುಗಡೆ ಮಾಡಬೇಕೆಂದು ನಿರ್ದೇಶಿಸಿತು.
ಈ ಎಲ್ಲಾ ಮೂರು ಸುತ್ತೋಲೆಗಳು ಕಾನೂನುಬಾಹಿರವಾಗಿದ್ದು ಮತ್ತು ಕಾರ್ಮಿಕರಿಂದ ಪರಿಷ್ಕೃತ ಹೊಸ ಕನಿಷ್ಠ ವೇತನವನ್ನು ಕಸಿದುಕೊಳ್ಳುವ ಉದ್ದೇಶವನ್ನು ಹೊಂದಿದ್ದವು.
ಆದ್ದರಿಂದ CITU ರಾಜ್ಯ ಸಮಿತಿಯು , ಅದರ ಅಂಗವಾಗಿರುವ ನಾಲ್ಕು ಕಾರ್ಮಿಕ ಸಂಘಟನೆಗಳೊಂದಿಗೆ ಸೇರಿ, ಈ ಸುತ್ತೋಲೆಗಳನ್ನು ಕರ್ನಾಟಕದ ಮಾನ್ಯ ಹೈಕೋರ್ಟ್‌ನಲ್ಲಿ ರಿಟ್ ಅರ್ಜಿಯ ಮೂಲಕ ಪ್ರಶ್ನಿಸಿ, ಪರಿಷ್ಕೃತ ಹೊಸ ಕನಿಷ್ಠ ವೇತನವನ್ನು ಜಾರಿಗೆ ತರಲು ಸರ್ಕಾರಕ್ಕೆ ನಿರ್ದೇಶನಗಳನ್ನು ನೀಡಬೇಕೆಂದು ಕೋರಿತು.
ಈ ವಿಷಯವನ್ನು 18.09.2026 ರಂದು ವಿಚಾರಣೆಗೆ ತೆಗೆದು ಕೊಂಡ ಮಾನ್ಯ ನ್ಯಾಯಾಲಯವು, "ಪರಿಷ್ಕೃತ ಕನಿಷ್ಠ ವೇತನ ಪಾವತಿಯನ್ನು ಸ್ಥಗಿತಗೊಳಿಸಿದ ಈ ಮೂರು ಸುತ್ತೋಲೆಗಳಿಗೆ ತಡೆ ಆಜ್ಞೆ ನೀಡಿ ಮಧ್ಯಂತರ ಆದೇಶವನ್ನು ನೀಡಿದೆ.
ಮಾನ್ಯ ಹೈಕೋರ್ಟು ಈ ವಿಚಾರಣೆಯನ್ನು ಮತ್ತೆ ಸೆಪ್ಟೆಂಬರ್ 21ರಂದು ವಿಚಾರಣೆಯನ್ನು ಮುಂದುವರಿಸಲಿದೆ.
ಪರಿಷ್ಕೃತ ಕನಿಷ್ಠ ವೇತನವನ್ನು ರಾಜ್ಯಾದ್ಯಂತ ಎಲ್ಲಾ ಕಾರ್ಮಿಕರಿಗೂ ಲಭ್ಯಗೊಳಿಸಬೇಕೆಂಬ CITU ಸಂಘಟನೆಯ ಕಾನೂನು ಪ್ರಯತ್ನದಲ್ಲಿ ಇದು ಬಹಳ ಮುಖ್ಯವಾದ ಸಕಾರಾತ್ಮಕ ಬೆಳವಣಿಗೆಯಾಗಿದೆ.
ನ್ಯಾಯಲಯದಲ್ಲಿ ಈ ವಿಚಾರದಲ್ಲಿ AITUC ಹಾಗು AICCTU ಕಾರ್ಮಿಕ ಸಂಘಟನೆಗಳು ಎರಡು ಸುತ್ತೋಲೆಗಳನ್ನು ಪ್ರಶ್ನಿಸಿ ರಿಟ್ ಅರ್ಜಿ ಸಲ್ಲಿಸಿದೆವು.
ಕಾರ್ಮಿಕರ ಹಿತ ರಕ್ಷಣೆಗಾಗಿ ನ್ಯಾಯಾಲಯದಲ್ಲಿ ವಾದ ಮಂಡಿಸಿದ ವಕೀಲರಾದ ಕಾಂ. ಮುರಳೀಧರ ಪೇಶ್ವಾ ಹಾಗು ಇತರೆ ಎಲ್ಲಾ ವಕೀಲರುಗಳಿಗೆ ಸಿಐಟಿಯು ರಾಜ್ಯ ಸಮಿತಿಯು ಅಭಿನಂದನೆಗಳನ್ನು ಸಲ್ಲಿಸುತ್ತದೆ.
ಈ ಕಳಗಿನ ಸುತ್ತೋಲೆಗಳ ಜಾರಿಗೆ ನ್ಯಾಯಾಲಯವು ತಡೆ ಆಜ್ಞೆ ನೀಡಿರುವ ಕಾರಣ, ಪರಿಷ್ಕೃತ ಹೊಸ ವೇತನವನ್ನು ಪಡೆಯಲು ಕಾರ್ಮಿಕರು ಕಾನೂನು ಬದ್ಧ ಹಕ್ಕನ್ನು ಹೊಂದಿದ್ದಾರೆ.
