20/10/2025
जीवन लाईफ सेवा संस्था आणि कर्तव्य - एक सामाजिक जाणीव या संस्थेतर्फे रविवार दि-१९/१०/२०२५ रोजी प्रति वर्षी प्रमाने आगळी वेगळी दिपावली साजरी करण्यात आली.
दिपावली संदेश देते प्रकाशाचा मग तो फक्त दिव्यांचा नसून आर्थिक, सामाजिक, शैक्षणीक व सर्वांगीण व्हावा हाच संस्थेचा उद्देश असतो.
बदलापूर - सावरे येथील या संस्थेच्या आसपास जवळ जवळ ४ ते ५ आदीवासी पाडे आहेत. जे शहराच्या जवळ असले तरीही मानवी मूलभूत साधनेही अजूनही पुरेशी तिथपर्यंत पोहोचलेली नाहीत. जीवन लाईफ सेवा संस्थेचे कार्यकर्ते गेले अनेक वर्ष या भागांची पाहणी करतात व आपल्या सहकार्याने त्यांना मार्गदर्शन करतात. याचं आत्मियतेने ही संस्था दरवर्षी आपल्या दिवाळी सणाची सुरुवात या गोड बांधवांसोबत करतात. दरवर्षी संस्था या पाड्यांमध्ये दिवाळी फराळ वाटप तसेच मुलांसाठी शैक्षणिक साधनांचे वाटप करूनच सण साजरा करतात. जीवन लाईफ सेवा संस्था तसेच कर्तव्य - एक सामाजिक जाणीव या दोनही संस्थांचे सर्व सभासद या मुलांसोबत सांस्कृतिक कार्यक्रम, पारंपरिक खेळ व विविध मनोरंजनाचे कार्यक्रम करून त्यांच्यासोबत सणाचा आनंद द्विगुणित करतात.
या वर्षी साजरा करण्यात आलेल्या या समारंभात श्री. चेतन सुरावरकर, उद्योजक श्री. प्रेमानंद कांबळे, श्री. विक्रम कसबे, डॉ. चेतन महाजन, पत्रकार अजय जोशी अशा अनेक मान्यवरांचीही उपस्थिती लाभली.
या सर्व मान्यवरांच्या हस्ते दिपावली फराळ आणि शैक्षणिक साहित्य वाटप करण्यात आले. या कार्यक्रमा दरम्यान आदिवासी बांधव तसेच लहान मुलांच्या मुखावरील आनंद हा या सामाजीक कार्यकर्त्यांकरिता अनमोल क्षण असतो.
अखेर कार्यक्रमाची सांगता मान्यवरांचे आभार मानून व माऊलीचे पसायदान पठण करून करण्यात आली.
आमच्या मदतीच्या हाकेला आपल्या देणगी रुपी मदतीमुळे हे शक्य झाले. सर्व सामाजिक भान असलेल्या आमच्या हितचिंतक यांचे मनस्वी आभार🙏
