19/05/2026
NEET UG 2026 च्या प्रश्नपत्रिका फुटीविरोधात डॉ.बाबासाहेब आंबेडकर मराठवाडा विद्यापीठ, छत्रपती संभाजीनगर येथे SFI चे आंदोलन!
छत्रपती संभाजीनगर : स्टुडंट्स फेडरेशन ऑफ इंडिया (SFI) जिल्हा समितीच्या वतीने NEET UG 2026 च्या प्रश्नपत्रिका फुटीविरोधात दि. १३ मे २०२६ रोजी सायंकाळी ७:३० वाजता विद्यापीठ गेट, डॉ. बाबासाहेब आंबेडकर मराठवाडा विद्यापीठ येथे आंदोलन करण्यात आले.
यावेळी “NTA बरखास्त करा, विद्यार्थ्यांना न्याय द्या” अशा घोषणांनी परिसर दणाणून गेला. आंदोलनात विद्यार्थ्यांनी मोठ्या संख्येने सहभाग घेत केंद्र सरकार आणि NTA विरोधात तीव्र संताप व्यक्त केला.
NEET UG 2026 परीक्षेतील कथित प्रश्नपत्रिका फुटीमुळे देशभरातील सुमारे २२ लाख विद्यार्थ्यांच्या भविष्याशी खेळ करण्यात आल्याचा आरोप एसएफआय च्या वतीने करण्यात आला. विद्यार्थ्यांच्या मेहनतीवर पाणी फेरणाऱ्या या प्रकाराची निष्पक्ष चौकशी करून दोषींवर कठोर कारवाई करावी, तसेच NTA बरखास्त करून विद्यार्थ्यांना न्याय द्यावा, केंद्रीय शिक्षण मंत्री धर्मेंद्र प्रधान राजीनामा द्या अशा मागण्या आंदोलनकर्त्यांनी केल्या.
एसएफआय चे अरुण मते यांनी सांगितले की,भाजप सरकार विद्यार्थ्यांच्या आकांक्षांची लूट करत असून शिक्षण क्षेत्रात सातत्याने होत असलेला भ्रष्टाचार आणि परीक्षा व्यवस्थेतील निष्काळजीपणामुळे विद्यार्थ्यांचा विश्वास डळमळीत होत आहे. विद्यार्थ्यांच्या भविष्यासोबत होणारा हा अन्याय थांबवण्यासाठी एसएफआय पुढेही तीव्र आंदोलन उभारणार असल्याचा इशाराही यावेळी देण्यात आला.
या प्रसंगी कॉम्रेड नितीन वाव्हळे, रोहिणी नवले, एसएफआय जिल्हा अध्यक्ष सुरज देवकर, जिल्हासचिव मनिषा बल्लाळ, शितल चोपडे, विजय उमाळे, प्रदीप तेलंग, सलमान खान, जीवन मोरे, प्रकाश ढाले, गणेश अमरूळे,आतिक्षा लांडगे,प्रतिक्षा लांडगे व शहरातील विद्यार्थी मोठ्या संख्येने उपस्थित होते.
