11/09/2024
PRESS RELEASE
Dated: 11th September, 2024
SSU IN SELF-SUPPORT AWARD HLAN
Students’ Self-Support Union (SSU), General Headquarters, Aizawl chuan k*m tina an lo tih thin angin Zirlai mahni inchawm zo te hnenah Self-Support Award a hlan.
Self-Support Award hi September ni 10, 2024 (Thawhlehni) zan dar 8:00 khan Ignite Studio ah hlanna hun hman a ni a. He Programme-ah hian Pu B. Lalchhanzova, Hon'ble Minister chuan Khuallian niin hun a hmanpui a, Pu John Lalpeka, 3:16 Plan Solution chuan Khualtha niin hun a hmanpui bawk.
Kumin 2024 hian Self-Support Ward hi mi pathum hnenah hlan a ni a, he chawimawina hi pakhatna, pahnihna siam loin, mi pathumte hnenah hlan a ni. Award dawngtu te chu:
1. Pachhunga University College a I Semester BA, Geogrphy zir mek Lalnunkima, Pu J. Lalrinmawia leh Pi Neihchangi te fapa niin a ni hian pawl 9 a zirlai atangin a mamawh tur tuak tanin pawl 11 atang khan chhungte ti buai lo in a zirna leh admission fee leh thil hrang hrangah zirlai ni chungin a lo inhlawh tawh thin a ni.
2. Hrangbana college atangin V Semester BA, Political Science zir mek Esther R. Zoremtluangi, Pu R. Lalthatluanga leh Pi Lalruatkimite fanu niin k*m 8 mi chauh a nihin pa tello a khawsa an ni a. A rem rem thawkin mi in tifai te, class kal paha pickle zawrh te, tuition pe leh mi in a awmpui hna thawk tein a inhlawh thin a ni.
3. Cindy Zonunmawii hi Pu C. Lalhmunliana (L) leh Pi Rebek Vanlalzuii te fanu niin tunah hian Govt. Hrangbana College-ah V Semester BA, Economics a zir mek a. A ni pawh hi kuhva khehin dawrah a pe kual thin a, tuition pe te, miin tifai te leh a rem rem thawkin a inhlawh thin a ni.
He hunah hian Darhmingliana, SSU President chuan thusawiin SSU chu k*m 1985 a Hrangbana College a din a nih atang khan, Zirna tana mahni intodelh tih leh K*t hnathawh chawisan tih chu thupui ah hmangin, mizo thalai te hnenah k*t hnathawh zahthlak loh zia te, intodelh a pawimawh zia te vawiin thlengin a la zirtir thin thu a sawi a. Thalaite chu hlauhna dahbo a mahni inrintawkna nei turin a chah bawk. Beidawng lo a bei tang tang tur leh tih tak takna nun nei tur te, Pathian duhzawng leh lawm zawng hre reng turin a chah a. Ram leh hnam a changkan a, a dam theih nan intodelh theuh thei turin thalai leh zoram mipui te a chah bawk a ni.
Khuallian Pu B. Lalchhanzova’n thusawiin |halaite hnenah sorkar hna thawk kherlo pawh a, a dam khawchhuah theih thu a sawi a. Tin, zirlai kalkhawm te bulah dinhmun harsa leh khirh tak hnuaia lo piang te dinhmun sawiin an thil tawn a piang hmachhawn dan thiam tur leh, sum hlutna hria a, thawhchhuah leh hman dan thiam tur te, thil te tham te te pawh hlutna chang hria a hlim pui zel thei tur te, zelthel lo tur tein a chah bawk a. Hun harsa karah pawh tawrhchhelna nei a, thlen chin apianga nun dan thiam tur leh inrenchem thiam taka nung turin a chah bawk.
Award dawngtu te chu a lawmpui thu leh fakawm a tih thu sawiin, an chawimawina dawn chu an bul tanna chauh a ni tih hria a, an zirlaipuite leh mi tam tak tan a êng chhit saktu ni turin a chah bawk.
Khuallian chuan sokar emaw mimal emaw pawl anga min duhsak a, min khai chhuah tumtu te ti thlawn lo a, chu hun remchang chu hmang tangkai a, mahni ke a dinchhuah nan hman na chang hre turin zoram mipuite a chah bawk a. Hun harsa tak karah pawh beidawnga tlu chhe mai lo tur leh tuarchhel turin a chah bawk a ni.
Thalai zawng zawng te hnenah rilru huaisen nei a, pangchang lo tur leh tun hun zel hman that a tul zia a sawi bawk a. Mi hlawhtling ni tur a kalkawng pawimawh tak a nih thu a sawi tel bawk.
Khualtha Pu John Lalpeka chuan thu sawi lehin midangte nun buaipui lo a, mahni nun ngaih pawimawh hmasak atul zia thu a sawi a. Keimahni ah midangin beiseina an neih theihna tur zawk a mahni dinhmun siam rem hmasa tur leh chu chu Pathian malsawmna leh a rawngbawlna pawimawh tak tur zawk a ni tih hriat a pawimawh zia a sawi bawk.
Pu John-a chuan Aia upa zah tura inzirtir thar hle angaih zia thu sawi bawkin, kan chenna zoram hmangaih a tulzia a sawi a. Tin, sum hlutna hriatthiam a tul thu sawiin, thil thalo titu te avanga lungngai lo tur leh rinawm leh dik taka Pathian rinchhan a nung a, a hnenah lawm chunga nitin a hnathawk turin kalkhawm te a chah bawk a ni.
Tin, Chin Unity Forum, Tahan te hnen atangin SSU hmalakna ropui an tih avangin hemi zan hian SSU chuan chawimawina thuziak an dawng bawk a ni.
He Chawimawina hian Lawmpuina thilpek bakah tangka fai Cheng 20000/- (singhnih) a keng tel a ni.
Sd/-
(GORDON C. VANLALHRUAITLUANGA)
Joint Secretary
Copy to :-
1) The Editor, News Editor_______ Daily News paper
Khawngaiha min puanzarsak turin ka ngen a che.
2) The Editor, News Editor_______ AIR/DDK/ZONET/LPS
Khawngaiha min puanzarsak turin ka ngen a che.
3) Mizoram Journalists Association.
Khawngaiha min puanzarsak turin ka ngen a che.
4) Guard File.
Sd/-
(LAWRENCE LALHMANGAIHZUALA)
Information Secretary
