23/07/2025
चांगला कलाकार होण्यासाठी मुलांना जे आवडते ते मनापासून करू द्या- अभिनेत्री विभावरी देशपांडे
स्व. सेठ शामसुंदरजी बिहाणी स्मृती कथाकथन
स्पर्धेत समर्थ शाळेने पटकावला सांघिक करंडक
नगर – नगरची बॅकस्टेज आर्टिस्टस् असोसिएशन लहान मुलांसाठी सातत्याने २२ वर्ष मनापासून करत असलेले काम हे कौतुकास्पद व अभिनंदनीय असून मुलांसाठी करत असलेल्या कामातून पैसा, ग्लॅमर मिळत नसले तरी मानसिक समाधान निश्चितच मिळते. पालकांनी मुलांना चांगला कलाकार होण्यासाठी त्यांची आवड लक्षात घेऊन जे आवडते ते मनापासून, अस्सल व दर्जेदार करण्यास पाठिंबा दिल्यास ,ही कलाच मुलांना व्यावसायिक जीवन व उज्ज्वल भविष्य देईल, असे प्रतिपादन प्रसिद्ध चित्रपट अभिनेत्री विभावरी देशपांडे यांनी केले.
अहमदनगर बॅकस्टेज आर्टिस्टस् असोसिएशनच्या वतीने घेण्यात आलेल्या स्व. सेठ शामसुंदरजी बिहाणी स्मृती कथाकथन स्पर्धा व स्व. मनिष कुलकर्णी स्मृती सुगम संगीत स्पर्धेचे पारितोषिक वितरण प्रसिद्ध अभिनेत्री विभावरी देशपांडे यांच्या हस्ते रावसाहेब पटवर्धन स्मारक सभागृहात झाले. यावेळी संस्थेचे अध्यक्ष प्रसिद्ध अभिनेते मिलिंद शिंदे, स्पर्धेचे प्रायोजक राघवेंद्र बिहाणी यासह दोन्ही स्पर्धांचे परीक्षक व्यासपीठावर उपस्थित होते. स्व.मनीष कुलकर्णी यांना श्रद्धांजली वाहून कार्यक्रमास सुरूवात झाली. यावेळी बॅकस्टेज आर्टिस्ट्स असोसिएशनचे सर्व सदस्य, विविध क्षेत्रातील नागरिक व सहभागी स्पर्धक मोठ्या संख्येने उपस्थित होते. या दोन्ही राज्यस्तरीय स्पर्धांना मोठा प्रतिसाद मिळाला.
स्पर्धेचे मुख्य प्रायोजक राघवेंद्र बिहाणी म्हणाले, दरवर्षी बॅक स्टेज आर्टिस्टस् असोसिएशनच्या उत्कृष्ट व नियोजनबद्ध टीम वर्कमुळे या स्पर्धा यशस्वी होत असतात. अशा सांस्कृतिक क्षेत्रात चांगले काम करणाऱ्या या संस्थेला प्रायोजकत्व देऊन या चळवळीत आमच्या परिवार सहभागी होत आहे.
अभिनेते मिलिंद शिंदे म्हणाले, नगरची बॅकस्टेज आर्टिस्ट असोसिएशन सांस्कृतिक क्षेत्रात नवी वाट कोरत कलाकार घडविण्याच्या कामात खारीचा वाटा उचलत आहे. शहराचे सांस्कृतिक आरोग्य चांगले राहावे यासाठी योगदान देत आहे. या चळवळीचे स्वरूप एक दिवस फार मोठे होणार असून , विद्यार्थी -पालक अनेक वर्षे नव्या उत्साहात स्पर्धेत सहभागी होत आहेत, हेच आमचे यश आहे. कार्यक्रमाचे प्रास्ताविक अमित काळे यांनी तर सूत्रसंचालन राधिका कुलकर्णी यांनी केले. श्रीनाथ केसकर, संतोष बडे, प्रा ज्ञानेश कुलकर्णी यांनी परीक्षकांचा परिचय करून दिला. अभिजित क्षीरसागर यांनी निकालपत्राचे वाचन करून आभार मानले.
यावेळी बॅकस्टेज आर्टिस्टस् असोसिएशनचे विक्रांत मनवेलीकर, गौरव मिरीकर, सागर जोशी, दादासाहेब बेरड, अमोल दाते, कामोद खराडे, योगेश कुलकर्णी, मनीष घोलप, प्राची कुलकर्णी गरूड, शिल्पा देशपांडे,उपेंद्र कुलकर्णी, मंगेश देवचके यांनी स्पर्धेच्या यशस्वीतेसाठी परिश्रम घेतले.
स्पर्धेचा निकाल नियतकालिकांमध्ये प्रसिद्ध झाला आहे.
स्पर्धे दरम्यानची काही क्षणचित्रे खालील प्रमाणे.
