10/05/2025
BUKAS NA LIHAM
Sa lahat ng aking mga KAIBIGAN,
Nang aking tinanggap ang hamon, panawagan at imbitasyon na kumandidato upang pamunuan ang tunay at maisug na oposisyon sa senado, naging tapat ako sa paglahad sa ating limitasyon sa usaping materyal at pinansyal.
Subalit sa kabila ng paglalahad na ito, mulat at kolektibo natin pinagpasiyahan na tumuloy sa laban dahil wala ng hihigit pa sa pagmamahal sa ating Bansa, kapwa Pilipino at kinabukasan ng ating mga Kabataan.
Tinapos at nakumpleto ko ang 90 araw ng kampanya ng hindi nadama kahit isang saglit na tayo ay salat sa mga bagay na kinakailangan para sa isang matagumpay, organisado at seryosong national campaign.
Ito po lahat ay dahil sa inyong tiwala, kumpiyansa at paniniwala sa aking pagkatao at layunin na maging abang lingkod ninyo.
Sa lahat ng tumulong, nagsakripisyo, umunawa at sumama sa dakilang layunin ito, MARAMING SALAMAT po!
Ano man ang maging resulta ng halalan sa Lunes, ika-12 ng Mayo, 2025, habang buhay ko pong tatanawin ang inyong kabutihan, pagmamahal at ginintuang kalooban.
Mabuhay po kayong lahat at patuloy natin mahalin ang Pilipinas, respetuhin ang Saligang Batas at pagmalasakitan ang kapwa natin Pilipino.
Lubos na gumagalang at nagmamahal sa inyo,
Atty. Vic Rodriguez
Pilipino, Abugado, Maisug🇵🇭
