17/04/2026
Prosperity Gospel ကျန်းမာချမ်းသာ ဒေသနာ က မှားတယ်။ စာရှည်ပါမယ် ။
သဘောမတူဘူး ဆိုရင် သေသေချာချာ ဖတ် ပြီးမှသာ ချက်နဲ့လက်နဲ့ ကျမ်းပိုဒ်နဲ့ လာပြီး ကန့်ကွက်စေလိုပါတယ်။ ဒီလိုမှ မဟုတ်ဘဲ ဇွတ် အတင်း လာငြင်းမယ်ဆိုရင် ပုဇွန်ခေါင်း ခရစ်ယန် လို့သာ သတ်မှတ်ပါမယ်။
ဆိုတော့ကာ .... ဘာလို့မှားတယ်လို့ပြောရလဲ ...
၁။ ကျန်းမာချမ်းသာ ဒေသနာ ကို အခြေခံပြီး ဟောတဲ့ လူတွေဟာ အခြားသောယေရှု အကြောင်းကို ဟောနေတာပါ။ ယေရှု ကတိမပေးခဲ့တာတွေကို မပြောခဲ့တာတွေကို သူတို့ ပြောတယ်။ ကျမ်းစာမှာ ယေရှုက ငွေကြေး၊ ကျန်းမာရေး၊ အောင်မြင်မှုတွေအတွက် အာမခံမထားဘူး။
ကျန်းမာချမ်းသာ ဒေသနာ က “ယုံကြည်မှုရှိရင် ယုံကြည်ခြင်း ရှိရင် ချမ်းသာမယ်၊ ကျန်းမာမယ်” လို့ သင်ကြားတယ်။
၂ ကော ၁၁း၄ မှာ “သင်တို့ရှိရာသို့ ရောက်လာသောသူသည် ငါတို့ မဟောမပြောသေးသော ယေရှတပါးကို ဟောပြောသော်၎င်း “ ။ ပေါလုက ကျန်းမာချမ်းသာ ဒေသနာဆရာတွေ ပြောနေတဲ့ ယေရှုက သူတို့ ပြောတဲ့ ယေရှုမဟုတ်ဘူး လို့ သတိပေးထားတယ်။
၂။ ဘုရားသခင်က ကျွန်တော်တို့ကို “သူအလိုရှိသည့်အတိုင်း” “သူ့သဘောတော်အတိုင်း” ကောင်းချီးပေးပါတယ်။God bless us according to His will, not our payment.
ကျန်းမာချမ်းသာ ဒေသနာ က “အလှုငွေထည့်ရင် ဘုရားက မင်းကို မဖြစ်မနေ ချမ်းသာစေမယ် - စမ်းထည့်ကြည့်လိုက်” “ကြွေးကြော်လိုက်ရင် ၊ ဝန်ခံလိုက်ရင် အဲဒီအတိုင်းဖြစ်လာရမယ် ဘုရားက လိုက်လုပ်ပေးရမယ်” ဆိုပြီး သင်ကြားတယ်။ တခါတလေ တိုက်ရိုက်မဟုတ်တောင် သွယ်ဝိုက်ပြီး ဟောတယ်။ ဒါက ခုခေတ်စားနေတဲ့ ကျားဖြန့်နဲ့ သဘောသဘာဝ သိပ်တူပါတယ်။ စလော့ဂိမ်းတွေလိုဘဲ အစပိုင်းမှာ ပေးနိုင်ပါတယ် ။ သတိထားပါ - စာတန်က သင်တို့တွေ လည်တာထက်ကို မရေမတွက်နိုင်အောင် ပိုလည်ပါတယ်။
ကျမ်းစာမှာ ပေတရုက ဘုရားရဲ့ ကျေးဇူးတော်ကို ငွေဖြင့် ဝယ်ယူဖို့ ကြိုးစားတဲ့သူကို တင်းတင်းကျပ်ကျပ် ဆုံးမထားတယ် (တမန်တော် ၈း၂၀)
ဘုရားသခင်ကို ကြိုးကိုင်ခြယ်လှယ် ချင်လို့ မရပါဘူး။ ဟိုဟာလုပ်ပေး ဒီဟာလုပ်ပေး လို့ခိုင်းနေရအောင် ဘုရားသခင်က သင့်ဆီမှာ အလုပ်လာလုပ်နေတဲ့ အလုပ်သမား မဟုတ်ပါဘူး ။
၃။ တစ်ခုခု ဖြစ်ရင် လူတွေကို အပြစ်တင်တယ်၊ လူတွေရဲ့ ယုံကြည်ခြင်းကို အပြစ်ပုံချတယ် ။ ဖျားတာနာတာ ရောဂါတွေ မပျောက်တာဟာ ယုံကြည်မှု မလုံလောက်လို့ ၊ မရှိလို့ ဆိုပြီး ပြောတတ်တယ်။ ဆင်းရဲနေတာဟာ ငွေကြေးမပြည့်စုံတာဟာ သင့်ရဲ့ ယုံကြည်မှု မပြည့်စုံလို့ အပြည့်အဝမယုံနိုင်လို့ ဆိုပြီး ဟောတတ်ကြတယ်။
ဒါဟာ ဝိညဥ်ရေးရာ အနိုင်ကျင့် တာ ပါ ။ spiritual abuse လုပ်တာပါ ။
ပေါလုမှာ အားနည်းခြင်းတွေရှိတယ် ၊ ကိုယ်မှာ စူးနေတဲ့ ဆူး ရှိတယ်။ သူ့မှာ ခရစ်တော်ကြောင့် ခံရတယ့် အားနည်းခြင်း၊ ကဲ့ရဲ့ခြင်း၊ ဆင်းရဲခြင်း၊ နှိပ်စက်ညှင်းဆဲခြင်း တွေ ဒုက္ခ ဝေဒနာတွေ ရှိတယ် (2 ကော ၁၂း၇-၉)
တိမောသေမှာ ကျန်းမာရေးပြဿနာ ရှိတယ် (1 တိမောသေ ၅း၂၃)
ယောဘ က သန့်ရှင်းသူဖြစ်တယ် ဘုရားနဲ့မှန်ကန်တဲ့သူ ဖြစ်ပေမယ့် ဒုက္ခအကြီးနဲ့ အကျယ်ကြုံခဲ့ရတယ်။
နုတ်ကပတ်တော်က “ဒုက္ခ = ယုံကြည်မှုအားနည်းခြင်း ” လို့ မပြောဘူး။
၄။ ယေရှုက သူ့နောက်ကို လိုက်မယ့်လူတွေကို သင်ကြားထားခဲ့တာနဲ့ တိုက်ရိုက် ဆန့်ကျင်တယ်
ယေရှုက
ကမ္ဘာမှာ ဒုက္ခတွေ ရှိမယ် ။ “သင်တို့သည် လောက၌ ဆင်းရဲဒုက္ခကို ခံရကြလိမ့်မည်” လို့ ယေရှုကိုယ်တိုင် ပြောခဲ့တယ်။ (ယောဟန် 16:33)
မင်းရဲ့ လက်ဝါးကပ်တိုင်ကို ထမ်းပြီး ငါ့နောက်ကိုလိုက် လို့ ယေရှုက ဒီလိုပြောခဲ့တယ် “ငါ၌ ဆည်းကပ်လိုသောသူဖြစ်လျှင် ကိုယ်ကိုကိုယ် ငြင်းပယ်ရမည်။ ကိုယ်လက်ဝါး ကပ်တိုင်ကို နေ့တိုင်းထမ်း၍ ငါ့နောက်သို့ လိုက်ရမည်။” (လုကာ 9:23)
မြေကြီး ဘဏ္ဠာတွေ မမက်ကြနဲ့ လို့ယေရှုက ဒီလိုပြောခဲ့တယ်။ “သံချေးပိုးရွဖျက်ဆီး ၍ သူခိုးထွင်းဖောက် ခိုးယူရာ မြေကြီးပေါ်မှာ ဘဏ္ဠာကို မဆည်းဖူးကြနှင့် “ (မသဲ 6:19)
ကျန်းမာချမ်းသာဒေသနာ prosperity gospel က ဒီလိုဟောတယ်
“ယေရှုနောက် လိုက်ရင် ဒုက္ခမရှိတော့ဘူး၊ အားလုံးအေးဆေး ၊ ငွေလား ၊ အိမ်လား ၊ ကားလား ... ဘုရားပေးလိမ့်မယ်”
“ချမ်းသာချင်လား ဘုရားနောက်လိုက်”
“ဘုရားက မင်းအတွက် ငွေကြေးပြည့်စုံစေမယ်” “ပိုက်ဆံအိပ်ထဲမှာ သူ့အလိုလို ပြည့်လာမှာ “ ဒီလိုမျိုး ပြောတတ်တယ်။
ကောင်းချီးမဂ်လာကို ငွေကြေး ပစ္စည်း ကြွယ်ဝခြင်းတွေနဲ့ တိုင်းတာတယ်။
ဒါတွေဟာ ယေရှု သင်ကြားခဲ့တာတွေနဲ့ ဆန့်ကျင်နေတယ်။
၅။ ပြောင်းလဲလာခါစ လူတွေနဲ့ ဝိညာဥ်ရေးရာ နုနယ်သူတွေကို အလွန် လွယ်ကူစွာ လမ်းလွဲမှားစေတတ်တယ် ။
Prosperity gospel က
လွဲမှားတဲ့ မြှော်လင့်ချက်တွေကို ဘုရားအပေါ်မှာ ထားမိစေတယ်
ဆုတောင်းတာ မပြည့်လာရင် ဘုရားကို စိတ်ကောက်တယ်၊ ဘုရားကို မယုံကြည်တော့ဘူး
ဆုတောင်းတာ မပြည့်ရင်၊ ဒုက္ခရောက်ရင် ငါ့ယုံကြည်မှုအားနည်းလိုက်တာ ဆိုတဲ့ ကိုယ့်ကိုကိုယ် အပြစ်တင်တဲ့စိတ်ကို ဖြစ်စေတယ်
ဘုရားဆီက တခုခုလိုချင်လို့ တခုခုကို ပေးတဲ့ အပေးအယူ အခြေခံတဲ့ ယုံကြည်ခြင်းမျိုးဖြစ်စေတယ် ၊ ကျေးဇူးတော် အပေါ် အခြေမခံထားတဲ့ စိတ်ထား ကို ဖြစ်စေတယ်။
ချမ်းသာမှ ဘုရားက ကိုယ့်ကို ချစ်တယ် ဆိုတဲ့စိတ်ကို ဖြစ်စေတယ်
ဒါတွေဟာ ခရစ်ယန်တယောက်အတွက် လွဲမှားတဲ့ စိတ်ထားကို ဖြစ်စေပါတယ်။
၆။ ကမ္ဘာတစ်ဝှမ်းရှိ ခရစ်ယာန်အသင်းတော်အများစုက Prosperity Gospel ကျန်းမာချမ်းသာဒေသနာကို ငြင်းပယ်ထားတယ်
Baptist churches
Evangelical churches
Reformed churches
Anglican churches
Methodist churches
Catholic teaching
Global missions organizations
Most seminaries and Bible colleges
It is considered false teaching across the Christian world.
အားလုံးက ကျန်းမာချမ်းသာဒေသနာ ကို မှားယွင်းတဲ့ သင်ကြားချက် လို့ သတ်မှတ်ထားတယ်။
ဒါဆို ဘာလို့ တန်ခိုးတွေ နမိတ်လက္ခဏာတွေ ပြနိုင်ကြတာလဲ ဖြစ်နေတာလဲ ။ - ဒါကလဲ ရေးရင် အရှည်ကြီးပါ ၊ ဒါကြောင့် နောက် တစ်ခေါက် ရေးဖြစ်တဲ့အခါ ရေးပြပါအုံးမယ်။ တန်ခိုးနဲ့ နမိတ်လက္ခဏာတွေကို အခြားသော ဝိညာဥ်တွေ ကလဲ လုပ်နိုင်တယ်ဆိုတာ လေးတော့ အရိပ်အမွက်လေး ဘဲပြောခဲ့ပါ့မယ်။ (အရှည်ကြီး ထပ်ရေးပါအုံးမယ်)
ယေရှုပြောခဲ့တာက ကယ်တင်ခြင်း အလုပ် ပြီးသွားပါပြီ ထပ်လုပ်ပေးစရာ မလိုတော့ပါဘူး မရှိတော့ပါဘူး ကယ်တင်ခြင်းအမှု ပြီးသွားပါပြီ "ဤအမှုပြီးပြီ" တဲ့ ။ ကမ္ဘာမှာ ဒက္ခတွေ မရှိတော့ဘူး ၊ ငွေကြေး စည်းစိမ် ကြွယ်ဝ ချမ်းသာ ကျန်းမာနေကြရမယ် လို့ မပြောထား ခဲ့ဘူးနော် ။
ယေရှုကိုယ်တိုင်မှာ ငွေကြေးမရှိဘူး ၊ အိမ်မရှိဘူး ၊ ကြွယ်ဝမနေဘူး ။ ချမ်းသာခြင်း ကြွယ်ဝခြင်းက ယုံကြည်ခြင်းရဲ့ အထောက်အထားတခု သာဆို ယေရှုကိုယ်တိုင် ဘာဖြစ်သွားမလဲ ?
အချုပ်အားဖြင့် ပြောရရင် prosperity gospel ကျန်းမာချမ်းသာဒေသနာ က သမ္မာကျမ်းစာ နဲ့ မကိုက်ညီဘူး။ ယုံကြည်မှုကြီးရင် ယုံကြည်ခြင်းရှိရင် ချမ်းသာမယ်၊ ရောဂါတွေမရှိတော့ဘူး လို့ သင်ကြားတတ်တယ်။ ဒါက လူငယ်တွေကို လွဲမှားစေပြီး ဝိညာဉ်ရေးရာအခြေခံ နဲ့ ခရစ်ယန်တယောက် ထားသင့်တဲ့ စိတ်ထား စိတ်ဓါတ်ကို ပျက်စီးစေတတ်ပါတယ်။
ကျွန်တော်တို့ က ဘုရားသခင်ကို ကြိုးကိုင်ချယ်လှယ် လို့ မရပါဘူး ။ ဘုရားသခင်က ကျွန် တော် တို့ကို သူ့သဘောတော် အတိုင်း ၊ သူ့ အချိန် အတိုင်း၊ သူ့ ကရုဏာ တော် အတိုင်း ကောင်းချီးပေးနေပါတယ်။ ဒါဟာ သမ္မာကျမ်းစာ အတိုင်း ဖြစ်ပါတယ်။
ငြိမ်းချမ်းကြပါစေ
Rev Tana Nawiya
April 16, 2026
