30/12/2025
Ялагчийг тодруулах бидэнд амаргүй байсныг энд нуухгүй ээ.
Оролцогч бүрийн бүтээсэн түүх өөр өөрийн онцлогтой,унших, сонсох бүрт бахархах сэтгэл төрүүлж байлаа.
Гэсэн ч бид цорын ганц ялагчийг тодруулах ёстой байсан тул зарим оролцогчдоос нэмэлт мэдээлэл тодруулж, мөн сошиал орчинд хэрхэн олон хүнд хүрсэн байдал зэрэг хэд хэдэн үзүүлэлтийг харгалзан үзсэн юм.
Үүний үндсэн дээр ердөө гурав хүрэхгүй жилийн дотор хэлний курсээс эхлэн магистрын (мастерын) эрдмийн зэргээ хамгаалж, мэргэжлээрээ ажиллангаа Ирландад бизнес эрхлэгч Монгол бүсгүй болж, Монгол ноолуурыг Ирланд болон Европт таниулахыг зорин тууштай хөдөлмөрлөж буй Oko Lkham-Osorjin ОКО-гийн амжилтыг үнэлэн ялагчаар тодрууллаа.
Мөн зорилгоо тодорхойлж, өөрсдийн үнэн түүх, бодит амьдралын ахиц дэвшлээ зоригтойгоор хуваалцсан
“Best Achievement” ангилалд оролцсон нийт 12 оролцогчдоо чин сэтгэлийн талархал илэрхийлье.
Тэдний хичээнгүй бас тууштай байдал нь олон залууст маань эрч хүч, итгэл найдвар, урам зориг өгсөн гэдэгт итгэлтэй байна.
Сайн байцгаана уу?
Намайг Лхам-Осоржин (Око) гэдэг. Би 2022 оны 11 сард Ирланд улсад ирж, өнгөрсөн хугацаанд магистрын зэргээ амжилттай хамгаалж, мэргэжлээрээ ажиллангаа Монгол брэндээ Ирландын зах зээлд нэвтрүүлээд явж байна.
Хэлний бэлтгэл, мастерт сурах хугацаандаа бусдын л ажил зөөгч, худалдагч, цэвэрлэгч зэрэг олон төрлийн ажлыг үүрээс удэш хүртэл тасралтгүй хийж байсан бөгөөд одоо ч хийж л байна ххэ. Энэ хугацаанд хүмүүстэй уулзаж, ярилцаж, зөвлөгөө авах нь ялангуяа гадаадад амьдарч буй хүнд сэтгэл зүйн асар том дэм болдгийг гүнзгий ойлгосон.
Миний бизнес эхлүүлэх хамгийн гол зорилго бол Монголдоо ядаж нэг ч гэсэн хүнийг тогтвортой ажилтай, орлоготой болгох ажлын байр бий болгох байсан. Өнөөдөр 1 хүний ард 3–4 хүний амьдрал, итгэл найдвар байдаг гэдгийг би гүн гүнзгий ухамсарлаж ажилладаг.
Монгол гэдэг нэр, Монголын брэндийг үнэ цэнтэйгээр дэлхийд таниулах нь миний хувьд том зорилго. Монгол Улсын “цагаан алт” болсон ноолуураар дамжуулан дотоодын үйлдвэрлэлийг дэмжих нь Монголын хөгжлийн нэг гарц гэж би итгэдэг. Тиймээс “Made in Mongolia” гэдэг ойлголтыг чанар, өв соёл, үнэ цэнтэй нь хамт таниулахын төлөө ажиллаж байна.
Энэ хугацаанд:
Kildare Business Expo 2025 (Kildare Chamber),
Hope Foundation Fashion Show,
Kildare Inclusivity Festival 2025 (Kildare County Council),
Gifted – RDS
зэрэг арга хэмжээнүүдэд оролцож, Монгол ноолуурын бүтээгдэхүүнийг Ирландын олон нийтэд танилцууллаа.
Мөн Kildare Enterprise, county Kildare Chamber зэрэг байгууллагуудын жижиг, дунд үйлдвэрлэлийг дэмжих төсөл хөтөлбөрүүдэд хамрагдаж, үнэтэй нэтворкинг бий болгосон нь Монгол брэндээ таниулах чухал суурь болсон.
Миний ойрын зорилго бол Ирланд улсад “Made in Mongolia” дэлгүүр нээж, цаашлаад Европын орнуудад Монголын чанартай, өв соёлыг шингээсэн бүтээгдэхүүнүүдийг тогтмол нийлүүлэх явдал юм.
Цаашид зорилгодоо үнэнч байж, илүү их хичээл зүтгэл гарган, Монгол брэндийн үнэ цэнийг дэлхийд таниулахын төлөө шаргуу ажиллах болно.
Энэхүү түүх минь мөрөөдлийнхөө төлөө тэмцэж буй хэн бүхэнд урам зориг өгч, хэрэгтэй хүндээ хүрээсэй гэж чин сэтгэлээсээ хүсэж байна.
