21/02/2026
Na vaše molbe,objavljujemo tekst karnevala.
🤡🤡🤡🤡🤡🤡🤡🤡
KARNEVOL 2026.
(Đepeto i moli Pinokio)
- Đepeto "dila" komad drva, pokrije ga na kauču, (dječak skriven leži)ispadne dječak Pinokio
Muzika:na melidijuRoko i Cicibela
OMAŠKA
TRČI VRIME, CVILI MAŠKA,
SVAKO MALO SE DOGODI - OMAŠKA,
ŠAKA SUZA, VRIĆA SMIJA,
ČA JE ŽIVOT VENGO PEŠKARIJA.
TO JE BILO KA U PRIČI,
ŽIVILI SU KA GOLUBI,
I NOSILI SVOJE BRIME.
GLUMILI SU I SLADILI,
RIPE RIČI OBEĆALI,
DOK NI DOŠLO PRAVO VRIME.
TO JE BILO KA U PRIČI,
PUNOJ SUMNJI, NEPOTIZMA,
MA JE ISTO PRIČA PROŠLA,
SAD JE JEDAN PROBLEM MANJE,
A NA KRAJU SVEGA OSTA,
IGRALIŠTE ZA NA FRANJE!
TRČI VRIME, CVILI MAŠKA,
UVIK DOBRO POSLUŽI – OMAŠKA,
ŠAKA SUZA, VRIĆA SMIJA,
SADA ZOVE SE STRATEGIJA.
TRČI VRIME, CVILI MAŠKA,
SVAKA GREŠKA PADNE NA KLIJENTE,
ŠAKA SUZA, VRIĆA SMIJA,
ČUVAJTE SE NAŠ PREŠIDENTE!
Đepeto: Ajme, ča je ovo,oživi je , živ si!!!
Bortul: Da živ! Ča ti je potriba učinit? Kako si? Da pometen(mete) Hoću poć u apoteku?Da ti ostrižen nokte? Striže mu nokte na nogamin, Đepeto obojče, gladi ga po glovi ...Hoću u spizu?
Đepeto: Ala, poj kup za obid fažola.
Bortul: Neću fažola, da ne bude eksplozije.
Đepeto: Ma kup ča god hoćeš! (mali Pinokio odlazi)
🤡
Đepeto: I tako je moj Pinokio u početku bi dobar i poslušan. Svak ga je voli.
A onda je nareso...
Fermo je slušat, malo se ote kontroli. Kapi se u sve, umisli da je kroj. Kruto se navuko na FB. Onda po cili donu bulji u mobitel, gledo ko kome lajko , piše pa slo poruke, zvo. Bidan moj, dobotu je oćoravi, ali vid mu je, fala Bogu dobar.
Nojdraže mu se bilo igrat oko prostornega plana i prihitivot svoje u građevinsko, somo 10 mjorih metor, neš ti, a oni brojidu. Voli moj Pinokio i putovat.
U temu je rekorder !!!70 mjorih eurih je istrati na vijaje, vamo tamo. A Starograjani somo 6 -7,six-seven, sramota.Nikud ne gredu.
Obećovo je svima, ča je mogo i ne mogo.Zaposli je koga je mogo i ne mogo. Svoju divojku parvo stavi u TZ, onda odluči poć u Zagreb pa je divojku opet stavi na svoje misto .
I judi moji, uvoli je u kašetu brokav, u govna iz kojih se sad triba izvuć. E, moj Pinokio, nison te tako uči, svih si razočaro, a svak te voli...
(odlazi plačuć)
- dolazi odrasli Pinokio
🤡
veli Pinokio:
Ča ovin stori moj oba meni govori?!! Ko će nego svoj protiv svoga.?!! Sad ću jo svima objasnit, snimit ću, ka i obično, filmić da svit kapi, da ih urazumin.
(Blesimetar, snimatelj, namišča se, čisti zube, uređije )
Dragi moji JešoOni, PitovjOni, Vrisničoni, Svirčoni, Varbovjoni, Zavalljnoni, Pojičoni, Zastražišćeoni!
Jo znon da vi ne virujete u sve ovo ča ona opskurna , sramotna stranica Jelsa bez cenzure oba meni piše. Takove laži ,gadosti, neistine! Ajmeee!
(onda ga zaboli nos i montira veli nos)
Jo nison kriv za hostel i Arape. Nison bi sa njima u Svetu Nediju po obidima, i to.
Ali , judi, jo nison već bi načelnik kad su oni ovo lito poslali mail da bidu grodili. Ča jo imon sa tin?
(opet ga boli nos, reste)
Majko moja, ča mi je sa ovin noson, reste ka lud?
Da se vrotin:
Somo 800 radnicih, bokun škurjih bi bilo, ali vi to niste tili. Ok. Neće se grodit. Sad će to moja Nadalina sve riješit. Di je? Hod ovamo,silo nečista, ne srom se. Rec judima obo hostelu, ono ča smo dogovorili doma i vjžboli.
(dolazi Nadalina, na melodiju pjesme Nije htjela)
🤡
NISAM ZNALA
Nisam znala, nisam znala,
važan detalj prostornog plana,
nisam znala je li hostel
il sa tri zvizice hotel,
nisam znala!!!!!!
Pinokio; Lipo van je rekla da ni znala!
A vi sad virujte kome hoćete.
Nadalina: Jo ništa nison znala. Mislin, znala san da je došo tin mail, nismo odgovorili, ni bilo kad.
I pensali smo judima sve reć, ali opet oni sa Jelse bez cenzure, boje reć bez pameti sve iznili vonka!
Pinokio: (gleda u mob.)
Evo ti, opet pišedu obo meni, da san zaposli 136 svita! Vrtić 44, Općina 16, 3-4 u Muzej, Tz, i Knjižnicu. 55 Jelkom.
(Nadalina gleda s njim u mob)
Nadalina: Muč, falili su, nisu još ubrali i rodicu u kancelariji, 137 ih je!
Pinokio: Tiše govor, da ko ne čuje!
🤡
(Dolaze Arapi sa devom,zovu ga, on se pravi da ih ne vidi):
Arap 1: EEEE, Pinokio, di si, ča se praviš da nas ne poznaješ?
(Pinokio okreće glavu)
Arap 2: Ma ne more se isprid svita jovit!
Arap 1: A zno jaho je na devi!
Nadalina: Ajme,deva! Jo bi jahola! Jo bi se slikola!!!
Arap 1: Hod ovamo! Ooo ,to si ti, pa poznajemo i tebe! Uzjaš!!! (penju je na devu)
Nadalina: Neka me kogod slika!
(Nadalina na devi, načenlik je slikoje)
Nadalina: Jo znon jahot! Điha, điha konjiću!
Arap 2 : To se ne govori devima! Pomaloooo!
Nadalina: Šo tovare! De! Šo tovare!
Arap 1: Ni ovo toovor , ovo je deva, njima se reče: Keš, keš, KEŠŠŠŠŠŠ!!!!
Nadalina: Kešš, keššš, keššššš!!! Ajme ča je lipo! Keš! KešššššŠ!!!!
(jaše na devi)
Arap 2 : Hoćemo mi onda grodit gore ili ne?
Arap1: Keš, keš!!! Muč, neka jaše!
Arapi:Keš , keš!!!! ( publici motoju Keš keš...), skandiranje
(odlaze sa pozornice sa devom i načelnicom)
🤡
Pinokio:
I tako von je , drogi moji Jelšoni to bilo.
A onda su oni javli sa Jelse bez cenzure opet sve zamorsili. Dojoli se skule!
A ravnateljica i jo sve smislili, Kolnago nacrto,a onda oni poludili. Još nas optužili da smo MI odredili lokaciju. Ne, ne, Županija to naredila!
Ajme ča me nos boli, reste ajme opet, ča je ovo!
Sad ćemo van reć kako je to bilo: šefice, hod ovamo:
Ravnateljica: Bome jo son sa tebon govorila da bismo mogli lipo u dvoru i na igralištu ugrodit novu skulu, imo mista, sve stane, kad non veĆ dojedu šolde.
Pinokio: Eeee, imamo zemje okolo, ko će tratit i kupovat novo zemljište, nimo već ko poklonit.
(dolazi Nadalina)
Ravnateljica: Dica se ionako ne igrodu na igralištu, ča će in? Je tako?Meni se baš svidjo ovin projekt! Kruto mi se svidjo! A oni da in se ne svidjo.
Nadalina: I jo san poludila radi te skule. Sve dogovorili, a onda Jelsa bez cenzure i kumpanija,počela burdižat, da ovo, da ono...
Ravnateljica: Ništa mi ne govor. Homo mi o bitnima stvorima: Ča ćeš ti obuć kad se bude rizola traka nove skule, ono iz Dubrovnika? Jo son već parićala veštu na cvitiće i na lipe takiće.
Nadalina: A ako bude u zimski štajun?
Ravnateljica: Onda ću bundu, ali provu, od bilega zečića i šubaru od nercića!
Pinokio: Ostavte se tega ča čete obuć. Jeste nošle novu lokaciju , ka ča von je premijer, još u Dubrovniku naredi?
Ravnateljica: Ajme ča je bi jidan, viko!!!
Nadalina:Somo ča nismo, ni problem. Barž će kogod i poklonit.Vajo okrenit ploču i glumit da slušomo svit.
Pinikoio: I nojvažnije je reć da smo MI to sposili, ne oni. Triba i predsjednik vijeća malo govorit obo temu da mi nismo želili da se grodi tote.
Govor predsjednika vijeća sa balkona: Dragi moji Ješani! Slušojte nacelnicu,i mene.Nemojte pić polit lampinjene usprid skule,slušojte nos ,a ne ove druge...(snimka)
Nadalina:Boje da on snimi film, kako onin za izbore, to mu dobro gre. (počinje plakati)
Dobro si me uvoli u sve, sad me iškapuloj kako znos!
Ravnateljica: I mene si lipo uvoli. (odlazi)
Pinokio: Uvolila si te si soma! Izi te ambicijun!
Nadalina: Oba boja pok ste na mene sve napartili!
Pinokio: Čapa se sad TZ i sve to lipo naštimoj, jo ću ti slat poruke pa ćeš štit ka na sjednici, ne straš se. Znoš da ću ti sve napisat.
Nadalina: Da, da, ča si žvelat.
Pinokio: Ne id se Nadalina moja, sve će bit dobro, znoš da judi imaju Ajzenhauera, sve zaboravidu.
(Pisma:)
NADALINA
1.
OVO VAN JE ŠTORIJA O NADALINI.
VI SVI DOBRO ZNOTE NADALINU,
TO VON JE ONA MOLO IZ ZAVALE.
A JEMA JE , DA VAN PRAVO REČEN, ČO I VIDIT,
NI NI ČUDO DA JE SMANTALA NOJVEĆEGA MUŠKARDINA,
A DI NEĆE I GLASAČE KA ČA SMO MI.
NOJBOJA JE KAD VOZI ROMOBIL, AJMEEEE
KAD NADALINA ROMOBIL VOZI,
SVE SE ZA NJOM PRAŠI,
JURI KAO METAK,
ZA MOBITEL SE MAŠI.
SVI GLEDAJU U TAKIĆE LIPE,
ČAK I BARBA STIPE,
JER SLAJA JE OD ZRILE KRUŠKE,
ZALUDI ONA MUŠKE.
NADALINA, NADALINA,
TI SI BILA CURA FINA,
U ŠTA SI SE UVALILA,
BIDNA NAŠA NADALINA
2.
E , ČA BI ONA BEZ MOLEGA NAPOLEONA!
ČOVIK IPO JE TO, SLADAK KO BOMBONA!
MENAĐER OD TEĆE, MUZEJA I PARKINGA,
KANTIH, BANDIRIH I ŠAHTINGA!
CILA JESA POLUDI KAD ON RIČE KA TOVOR DOK DILI BAKALOR, AJMEEEEEE
MAČO JE BAŠ PROVI,
RJEŠAVA SVE STVORI.
ON JE ĐOKER ZA SVE,
VEŽIJE I POSTOLE.
NOJBOJI SLADOLED JE MAČO,
BOJI NEGO BAČO,
I SVI ŽELE BITI ON,
MOLI NAPOLEON.
NADALINA, NADALINA,
TAJNICU SI NJEMU DOLA,
DA SE MAČO NE UMORI,
I DA UVIK LIPO ZBORI.
3.
PUHI SE, TO CILI SVIT ZNO,
MOREDU NA MILIJUN MOLIH NOČINIH
PARIĆAT:
I NA ŽERAVU , I NA RAŽNJIĆ, I NA TEĆU,
A MOREDU SE I PODUŠIT.
I U LEPINJU, I U BUBLICU, I U KRUH,
VAŽNO JE DA JE PUH!
I SA SVON MOGUĆON SPIZON SE NE MOREDU USPOREDIT.
ALI KADA NOVI DIREKTUR TURISTIČKE PARIĆOJE PUHE,
KAD IH ONO POMAŽIJE PINELON,
TO VAN JE ONDA PROVA FEŠTA OD PUHIH, AJMEEEEE
KAD MILAN PUHE PEČE,
NAVAR VELE TEĆE,
VIZIJE ON IMA,
KAKO JESA ŠTIMA,
SPREMAN JE ZA SEZONU,
CRTA TURIST ZONU,
MILANČE, ČEKAMO TEEE,
ZASUČI RUKOVEE!
NADALINA, NADALINA,
PUHA TI SI ULOVILA
U ŠTA SI NAS UVOLILA,
VIDIT ĆEMO NADALINA
Nadalina: Lako je tebi kantat, ti se šetoš po Zagrebu, a jo ode soma, u kašeti brokav.
Pinokio: Ni to ništa istina ča govoridu. Rec ti meni je ti viruješ svojima ili mojima očima?
Nadalina: Tvojima, Matane.
Pinokio: I di je onda problem. Ne obazir se ča pišedu na JBC. Štufat će ih.
Nadalina: A ča ću in reć za vrtić, obećovo si ga od parvega dona.
Pinokio: Pa rec da se grodi.
Nadalina: Ma skužili su da se grodidu jaslice i kuhinja. Ča ću in reć kad će vrtić?
Ne more naš moli u onin stori di još kanalizacija ni spojena. Tufinjo. Neću da se moli razboli.
Pinokio I za to imon rješenje. Nemoj nikome reć, skontro san nikidan Trumpa i zvo ga da dojde.
Nadalina: Ovod, u Jesu?Nis mi reko.
Pinokio:(ispod glosa) Puno tega jo tebi ne govorin.
E, došo je. Donalde, ver ar ju?
Trump: Here I am! Hello evrybody! Ovo me, u ova vaša lipa misto.
You knew that I love islands so much,Grenland is my favorite. But I want to buy you one small Island , your Zečevo. Grenlan mi puni veli, jo bi moli., Zečevo taman! Ja kupiti!
Pinokio: Nema problema, prodat ćemo ti ga, jefino( smije se i šapće Nadalini)
Evo rješenja za sve probleme!
Trump : How much to pay?
Pisma (Tata kupi mi auto)
Trumpe , kupi mi zemljište za skulu i starački,
jedan veliki vrtić i bazen, još veći!
Trumpe, vrati nam vodovod, da bude vodovod Hvar,
neću da nigdi piše slovima vodovod Brač!
Trumpe, kupi mi depadans od tvorince čarapa Ključ
ali nikom ne govori, daj mi keš i muč!
Trump: No problem, to je sitnica!
Melanija: Govor snimljen
Pinokio: E moja Nadalina, a ti trtariš...a JO sve riješi, ka i obično! Jeson ti reko?
Nadalina: A jes,jes, keš, keš, moj Matane!
Niko od nos za ništa ni kriv.Kriv je ,ka i uvik Jure Karnevol kojemu je ovo godišće veeeeeli nos,ka Pinokiotu.
A sada,sa devon ,svi gremo na isprid Tvornice čarapa ključ Sarajevo takat Jureta!
🤡🤡🤡🤡🤡🤡
