21/10/2026
【藥劑師話你知：鈣片💊點樣揀❓】
成日聽人講「補鈣」，行入藥房見到不同嘅鈣片產品，有碳酸鈣、檸檬酸鈣、乳酸鈣、海藻鈣……究竟佢哋有咩分別❓❓係咪人人都需要補鈣呢❓今日藥劑師同你簡單拆解！😊
點解要補鈣❓
鈣質係維持骨骼🦴同牙齒🦷健康嘅關鍵。如果日常飲食攝取不足（例如少飲奶、乳糖不耐症、素食者），或者係骨質流失較快嘅長者，醫生或藥劑師可能會建議以鈣片作補充。但係請記住，鈣片只係作為「補充」，唔可以取代均衡飲食。
常見鈣片比拼 :
• 碳酸鈣 (Calcium Carbonate) - 鈣離子含量約 40%。特點係鈣含量最高、最常見、價錢平。但需要胃酸幫助吸收，建議飯後食。容易胃脹或便秘人士要留意。
• 檸檬酸鈣 (Calcium Citrate) - 鈣離子含量約21%。特點係吸收唔受胃酸影響，空肚或飯後食都可以。適合胃酸分泌較少嘅長者或正在服用胃藥人士。
• 乳酸鈣 (Calcium Lactate) - 鈣離子含量約 13%。特點係鈣含量較低，來源多數係奶製品。乳糖不耐症者要留意。
• 海藻鈣 (Algae Calcium) - 鈣離子含量約 32%。特點係天然來源，素食者啱用。但要注意產品來源同海洋污染風險。
點樣選擇鈣片💊❓
1. 腸胃正常人士 → 經濟實惠嘅碳酸鈣係唔錯嘅選擇，記得飯後🍚食
2. 腸胃敏感、胃酸少嘅人士 → 可揀檸檬酸鈣，減低腸胃不適的機會
3. 素食者🌿 → 可考慮海藻鈣或檸檬酸鈣（確認產品標示為全素）
4. 根據美國國立衛生研究院膳食補充劑辦公室（NIH Office of Dietary Supplements） 的建議，一次劑量唔好超過 500mg 鈣離子嘅含量。因為身體嘅吸收有限。如果需要服用多過500mg 鈣離子，可分開兩次食（例如早晚各一次），效果會更好。
配合維他命 D，效果更理想 ❓
維他命 D 有助腸道吸收鈣質。保持足夠維他命 D 狀態，補鈣效果會更理想。所以，少接觸陽光☀️或長者，可考慮含維他命 D 嘅鈣片配方，方便補充。但請記住，補充劑只屬輔助，均衡飲食同適量陽光☀️先至係基礎。
加入鎂同維他命K2會更好❓
鎂同維他命K2可加強鈣的吸收及整體骨骼健康嘅關係證據仍然有限。對一般街坊嚟講，建議優先確保鈣同維他命 D 足夠。如果飲食中缺乏綠葉蔬菜🥬、堅果（鎂來源）或發酵食品 （維他命K2來源），可以考慮揀含有鎂同維他命K2嘅複方鈣片，方便同時攝取，但要繼續保持均衡飲食。
⚠️ 藥劑師溫馨提示：
• 鈣片有機會影響部分藥物吸收，包括喹諾酮類抗生素、四環素類抗生素及甲狀腺藥（Levothyroxine）。服藥間隔按藥物而定，建議先向醫生或藥劑師查詢。
• 部分患有慢性疾病的人士，例如嚴重心臟病❤️或腎病患者，不宜自行服用鈣補充劑，應先諮詢醫生意見。
如想了解更多鈣補充產品相關資訊，歡迎親臨社區藥房查詢 ☺️。
——————————————————————————————————
ℹ️服務詳情
☎️電話：3590 5766
📱WhatsApp：5950 6880 💬
📍地址：元朗光華廣場9樓905室 🏢
🕒服務時間
🗓️星期一至五｜09:00 – 19:00
🗓️星期六｜09:00 – 17:00
🚫星期日及公眾假期休息
#鈣片 #鈣補充產品 #碳酸鈣 #檸檬酸鈣 #乳酸鈣 #海藻鈣 #藥劑師專業建議 #健康教育
#香港賽馬會慈善信託基金 #賽馬會藥健同心藥物支援網絡 #社區藥房 #藥健同心博愛醫院社區藥房 #藥物諮詢 #配藥服務 #小病小痛 #藥物 #藥物管理 #藥劑師 #元朗光華廣場9樓905室 #元朗社區藥房 #元朗藥房
