前線科技人員

24/04/2026

去日本旅行最驚遇到地震，但點解佢哋次次都可以喺劇烈搖晃前，全城手機一齊響？靠嘅就係一套世界級嘅災難警報體系：

1️⃣ EEW（緊急地震速報）：
由日本氣象廳 (JMA) 運作。原理係利用地震波中速度較快嘅 P 波（縱波）搶先偵測，喺破壞力大嘅 S 波（橫波）抵達前，透過演算法計出震級同影響範圍。呢短短幾秒到幾十秒嘅預警，足以等工廠停機、新幹線減速，甚至救你一命。

2️⃣ J-Alert（全國瞬時警報系統）：
呢個係更高層級嘅衛星廣播系統。除咗地震，仲涵蓋海嘯、火山爆發甚至飛彈威脅。佢會直接連動全國嘅防災廣播廣播、電視同手機 Cell Broadcast，確保訊息「無縫覆蓋」。一旦觸發 J-Alert，訊息會透過衛星發送。通知地方政府機構大約只需 1 秒，而將訊息轉發到市民手機或廣播系統，通常需要 4 到 20 秒 之間。2019 年起安裝嘅新一代 J-Alert 接收器，自動處理訊息嘅時間已縮短至 2 秒內（舊款要 20 秒）。

順帶一提，香港政府2020年斥資1.5億元設立緊急警示系統，可在極端天氣、重大公共安全和大型公共衛生事故等緊急情况下，通過流動網絡向市民警示。以往由政府部門擬發警示到發出需約一小時，自宏福苑大火後，有關部門在改善流程及系統機件，現約15分鐘就可發出 👏

17/04/2026

宏福苑火災獨立委員會聽證會揭示，警方火災當日以傳真機將 999 報案資料傳至消防通訊中心，做法被批評落後

其實已經唔係用飛鴿傳書，批評者未免吹毛求疵

31/03/2026

今日係香港科技界嘅大日子！曾成功研發「智能咖啡機」及「磁能線」並令香港名揚海外的趙氏兄弟，剛宣佈收購 Apple 並會將位於加州的總部 Apple Park 整個拆卸並搬到北都科技園，再次引證香港政府及創科局的雄才偉略，成功帶領香港成為世界科技中心！

29/03/2026

大家有無聽過工程界一本神書《The Mythical Man-Month》？入面有個經典道理：「生仔要九個月，你搵九個女人一齊生，都唔會一個月生到出嚟。」 👶

點知今日睇到卓副司長講宏福苑，話派 4 個人入去幫手執 3 個鐘，就等如「12 小時嘅執拾時間」——呢種突破物理限制嘅邏輯，真係令小編流晒冷汗。

📚 科普時間：點解「人 × 時間」唔係咁計？
喺《The Mythical Man-Month》入面，作者 Brooks 提出咗一個好重要嘅觀點：「人月」（Man-month）係一個危險嘅神話。

* 溝通成本（Communication Overhead）：
一間幾百呎嘅屋，塞 4 個人入去。阿 A 執衫、阿 B 執藥、阿 C 搵證件、阿 D 執雜物。大家會唔會撞埋一堆？「喂你執咗未？」「件衫擺邊？」「護照喺邊個櫃？」單係溝通同混亂，已經扣咗一半時間。

* 任務不可分割（Partitioning）：
有啲嘢係「單線程」架嘛！例如諗緊邊件衫要帶、邊份保險單重要，呢啲係腦力勞動。你搵 4 個陌生人企喺度望住你諗，你只會更亂，唔會諗快咗 4 倍。

執屋唔係搬磚，唔係人頭疊人頭就叫效率。4 個人入去搞 3 個鐘，帶嚟嘅係「混亂」同「壓力」。

副司長，下次不如試下搵 3650 個人幫我執，咁我係咪 1 分鐘就執完咗 10 年嘅家當，可以「光速告別」這個家？

23/03/2026

值得留意嘅係，「指明人士」唔一定係物主，亦可以係第三者，例如叫 Facebook 幫警方登入任何人嘅戶口，若拒絕就拉 Mark Zuckerberg 坐一年，真係諗下都興奮

// 港府今日（23 日）刊憲修訂《香港國安法》第四十三條實施細則，即日生效。

今次修訂新增了關於電子設備的補充條文，列明警務人員可以要求任何「指明人士」向該警員提供電子設備所需的密碼或其他解密方法。如果該「指明人士」未遵從有關要求，即屬犯罪，最高可處罰款 10 萬元及監禁 1 年。

要求交密碼時作虛假陳述可囚 3 年

今次修訂亦提到，在警務人員要求任何人提交電子設備密碼時，如果該人作出虛假或有誤導成分的陳述，即屬犯罪，最高可處罰款 50 萬元及監禁 3 年。//

04/03/2026

最近見到 CNN 報導，話連伊朗最高領袖哈梅內伊（Khamenei）咁深藏不露、層層保護嘅人物，結果都輕易被皇天，呀唔係，係美以，擊殺，其中一個原因就係以色列早已 Hack 入伊朗街道上嘅天眼鏡頭，故此對所有重要人物嘅行蹤都瞭如指掌。

小編就突然諗起，我哋香港警方最近先申請豪擲 40 億港幣安裝幾萬組「天眼」。但既然連伊朗「最高級別」嘅保安都可以有漏洞，同樣嘅漏洞又會唔會反而對一眾高官甚或至小市民帶來安全威脅呢？

大家覺得，到底呢幾萬個鏡頭裝咗之後，大家會覺得安全咗，定係覺得背脊涼颼颼咁呢？

伸延閱讀：

Hacked traffic cameras and US intelligence: How a plot to kill Iran’s supreme leader came together
https://edition.cnn.com/2026/03/03/middleeast/us-israel-plot-kill-iran-khamenei-latam-intl

銳眼計劃CCTV｜申40.6億擴「天眼」　鄧炳強：全無水份已壓縮使費
https://www.hk01.com/article/60324495?utm_source=01articlecopy&utm_medium=referral

30/01/2026

「Fail Fast」（快速失敗）聽起來像是某種詛咒，但在 Agile（敏捷開發）的世界裡，它其實是一個非常聰明的風險管理策略。

簡單來說，「Fail Fast」的核心並不是追求「失敗」，而是追求「及早發現問題」。如果一個想法或產品注定會失敗，我們寧願在投入大量資金和時間的「第一週」就知道，而不是在開發了兩年、燒了幾千萬後的「上線當天」才發現。

今次的巴士安全帶事件就是香港政府具體實踐 Agile 的好例子。與其在立法階段花時間討論及諮詢，倒不如草草立法，立法會快速通過，連適用範圍都不需要搞清楚，馬上就立法並實施，讓市民直接反映意見。當政府發現連傳統支持者都怨聲載道之後，就火速縮沙止蝕，這些步驟都完美體現 Fail Fast 的精神，充分顯示由治入興的高效率施政優勢 👍

23/01/2026

關鍵基礎設施條例已經生效，負責 infra 嘅同業快啲睇下有咩地方需要留意

《關鍵基礎設施（電腦系統安全）條例》已於本月1日生效，專責辦公室亦同步成立。保安局強調法例可保障電腦系統安全穩定，辦公室專員陳永安早前受訪時稱若系統失守，會對民生構成威脅。有意見指，關於辦公室調查權力.....

15/12/2025

唔知仲有幾多人記得 Palm Pilot？又或者記得一個叫 AvantGo 嘅 software？

喺仲未有 mobile internet 嘅年代，如果想出街睇新聞，方法其實好「原始」：要先喺電腦度裝 AvantGo，駁住部 Palm Pilot，預先將網頁 download 落部機，先可以 offline 拎出街慢慢睇。

因為 Palm 只係黑白畫面，解像度又低，根本顯示唔到新聞圖片，於是就出現咗一樣叫 AvantGo Channel 嘅嘢：專門為 Palm 而設、以純文字為主嘅新聞頁面。

當年 AvantGo 剛出嘅時候，有一份好具代表性、好多香港人每日必睇嘅報紙，其實仲未有官方 Channel。於是小編用 PHP 寫咗個 crawler，將佢哋當時嘅新聞網頁轉做純文字版本，轉門俾 Palm 用。

最初只係自己睇，後來發現唔少人都有呢個需要，都試過 host server 俾其他人用。不過幾個月之後，呢份報紙終於推出咗官方 AvantGo Channel，小編自然就冇再維護自己嗰個版本。

事情本來到此為止。

但有趣嘅係，因為小編知道佢哋 AvantGo Channel 背後嗰條 URL，所以去到第一代 iPhone、仲用緊 2.75G 上網嘅年代，小編依然係直接駁入嗰個 Channel 睇新聞。原因好簡單：

純文字、冇圖、load 得快。

喺嗰個網速慢到令人懷疑人生嘅年代，呢樣嘢其實非常重要。

如是者睇咗幾年，直到有一日，條 link 突然之間失效咗。

小編心諗：會唔會只係搬咗 URL？於是厚住面皮 send email 去問。

結果，呢份報紙嘅 IT 部門搵咗個專人回覆小編：

「其實我哋已經冇再 maintain 呢個 webpage 好多年喇，一直都唔知道仲有人用緊。最近因為搬 server，就順便熄埋部機……真係幫唔到你，sorry。」

就係咁，一個冇人記得、冇人維護，但被小編默默用咗好多年嘅服務，就咁無聲無息咁消失咗。

一如好多香港人珍重嘅嘢一樣

08/12/2025

今日想同大家講講 Theranos 呢間公司

當年 Theranos 呢間「血檢革命公司」點解會爆到咁大鑊？其實嚟龍去脈講穿咗，只係一個典型「為咗靚數據而縮細分母」嘅科技騙局。

故事要由 2014 年講起。Theranos 創辦人 Elizabeth Holmes 高調宣傳話，只要「一滴血」就可以檢測幾百種疾病，仲話準確、快速又便宜。聽落超級科幻，投資者當然蜂擁而至。

但係，真正嘅內部實驗結果一開始完全唔掂。Theranos 原本用幾千份血樣本去測試，結果 false positive、false negative 多到嚇親人，準確率遠低過醫療標準。

於是，佢哋開始縮細「分母」。先由幾千個樣本縮到剩返幾十個，仲係揀啲佢哋「預先知道結果」嘅完美樣本——健康嘅好健康，有病嘅又好典型。為咗再靚啲，佢哋再將樣本縮到淨係得幾個最靚嘅案例，最後成功率「奇蹟地」變咗 99% 以上。

就係靠呢堆明知唔具代表性、甚至唔合醫療科學標準嘅極細母體數據，Theranos 拍宣傳片、見投資者、上《Fortune》封面，被吹捧成矽谷最勁嘅生物科技奇蹟。

但現實係，佢哋所謂嘅革命性機器根本唔work。99% 嘅血檢其實偷偷送去後面房，用傳統西門子儀器做返普通化驗。患者以為自己用緊尖端科技，實際上只係比人呃。

最終，內部員工爆料、記者調查，整個帝國倒塌。2022 年，Elizabeth Holmes 因詐騙罪成被判入獄 11 年。

呢件事提醒咗大家：數據可以造假，大家唔好咁易畀表面上嘅數字蒙蔽。

06/12/2025

今日係12月7號，所有香港人都知道今日係一個好重要嘅日子。

冇錯，今日就係阿波羅17號發射53週年

12月7號係1972年阿波羅17號（Apollo 17）正式發射嘅日子，呢一刻喺人類太空史上有重大象徵意義。要理解今次任務嘅來龍去脈，首先一定要放返喺冷戰與太空競賽嘅歷史背景當中。當時美國同蘇聯喺科技、軍事同國家威望度處處較量，而登陸月球就係其中一個最標誌性嘅競賽。阿波羅計劃本身最初唔單止係為科學探索，而係一個國力展示。到1972年，美國已經完成多次登月，但國內對太空計劃嘅興趣同支持度開始下降，戰爭開支巨大，社會改革壓力亦大，令航天預算不斷縮減，所以阿波羅17號最終被定為最後一次載人登月任務。

12月7號嘅發射其實係經過漫長嘅技術與經驗累積所得。由阿波羅11號第一次登月，到12、14、15、16號嘅試驗與突破，美國太空總署（NASA）已經一步步提升對月球地質、太空船系統同月面活動嘅技術掌握。阿波羅17號因此被設計成整個計劃裡面技術最成熟、科學性最強、裝備最齊嘅一次。太空船配置更完善、登月點選得更有科學價值，第三次使用月球車，使太空人活動範圍更大。呢啲都係前幾次任務鋪路而來嘅成果。

12月7號嘅發射亦承載住另一層重要訊息：NASA 特意安排地質學家哈里遜·施密特（Harrison Schmitt）上陣，佢係美國首位真正受過專業科學訓練、又成功踏足月球嘅太空人。由佢登月，象徵住登月任務由軍事展示逐漸過渡到科學探索。施密特嘅加入，令阿波羅17號特別集中做月球地質採樣同觀察，希望以科學角度解答更多關於月球起源同演化嘅問題，而唔再單純係「到此一遊」。

12月7號當太空船升空嗰一刻，人類最後一次離開地球，踏上月球。雖然當時社會對登月熱潮已經降溫，但阿波羅17號依然喺任務上帶來不少突破。例如今次登月地點「金牛谷—利特羅區域」包含古老火山同深刻山谷，提供珍貴地質資訊。太空人帶返超過110公斤嘅岩石同土壤樣本，當中包括非常著名嘅「橙色土壤」，令科學界對月球火山活動有全新理解。呢啲研究成果直到今日仍然被引用。

12月7號嘅發射後，阿波羅17號嘅成功亦迅速成為冷戰科技比拼當中嘅重要里程碑。雖然蘇聯喺無人探測器方面有強勢發展，但美國成為唯一成功多次載人登月嘅國家，鞏固咗佢喺太空科技嘅領導地位。喺國際政治層面，美國以阿波羅17號畫上完美句號，向世界展示佢具備強大科技能力同組織動員能力，進一步鞏固美國形象。

12月7號觸發嘅影響唔只喺冷戰政治同科技範疇，對人類文明嘅影響更深層。阿波羅17號帶返地球嘅「藍色彈珠（Blue Marble）」全景地球相片，成為史上最廣泛流傳嘅地球影像。呢張相片第一次真真正正讓人類用肉眼見到自己嘅星球，帶嚟強烈嘅環保與全球意識。好多研究指，呢張相片影響咗日後嘅環保運動、太空教育甚至世界觀，讓人類意識到地球嘅脆弱同獨特。

12月7號亦帶嚟反思同爭議。阿波羅17號之後，美國再冇進行載人登月，原因包括預算縮減、社會優先次序改變、科技計劃轉向太空穿梭機。有人批評停止登月係失去人類探索精神嘅象徵，但亦有人認為當時嘅科技與成本已經唔值得繼續投入。無論如何，阿波羅17號成為一個分界線，象徵人類嘅月球探索由「直接派人」轉向以無人探測器為主。

12月7號最後留低嘅意義係：佢係一段歷史嘅句號，同時亦係另一段旅程嘅起點。阿波羅17號嘅數據、樣本同經驗成為之後所有月球研究嘅基礎，而今日美國再度推行「阿提密斯計劃（Artemis）」、準備重返月球，正正係建立喺五十年前嘅成果上。阿波羅17號代表住人類曾經登上月球嘅最高成就，而未來嘅太空探索會延續呢個故事。