26/03/2025
【💡破解腦癇症的常見迷思！🤔🧩】
腦癇症（Epilepsy）係一種常見嘅神經系統疾病，但因為大家對佢了解唔多，往往會產生好多誤解，甚至對患者帶來不必要嘅壓力同標籤。以下拆解幾個常見嘅腦癇迷思，幫助大家更好咁了解呢個病症！🙌
迷思1️⃣：腦癇症係傳染病？
事實：腦癇症絕對唔會傳染！
腦癇症係因腦部電波活動異常引起嘅疾病，並唔係由病毒或細菌引起，所以無傳染性。大家係絕對可以放心同腦癇患者一齊生活、工作，唔需要過份擔心。
迷思2️⃣：腦癇症患者一定會抽搐同暈倒？
事實：唔係所有腦癇症發作都係咁
大部分人對腦癇症嘅刻板印象都係「抽筋、昏迷」，但其實腦癇症發作形式好多樣化。部分患者可能只會有短暫嘅發呆、失神，甚至只係感到手腳麻痺，或聞到怪味。呢啲情況都可能係腦癇症發作嘅表現。
迷思3️⃣：腦癇症患者需要完全避免工作及運動？
事實：大部分患者可以正常生活
現時有超過七成患者透過服用醫生處方嘅藥物有效控制發作。只要患者配合醫生治療，大部分情況下係可以參與運動、工作同社交活動。不過，需避免一啲高風險活動，例如潛水或攀岩，並確保身邊照顧者了解急救措施。
迷思4️⃣：腦癇症無得醫？
事實：腦癇症可以透過適切治療來有效控制
雖然現時未有根治腦癇症嘅方法，但透過適合嘅藥物治療，遵從醫生指示，大部分患者嘅發作次數可以大幅減少，甚至完全停止發作。
❤️ 希望透過破解迷思，可以令更多人了解腦癇症，減少對患者嘅誤解，並建立一個更包容嘅社會！如果大家對腦癇症有更多疑問，或者懷疑自己或身邊人患腦癇症，記得盡早向醫生查詢了解！
#腦癇小知識 #破解迷思 #腦癇症 #2025國際腦癇日 #香港腦癇基金會 #香港腦癇學會 #香港協癇會 #香港康健匯創 #香港腦科基金會 #香港腦科學會 #國際腦癇局 #國際抗腦癇聯盟 ILAE - International League Against Epilepsy International Bureau for Epilepsy
