02/10/2026
心跳好快、成個人好緊？試吓留 1 分鐘畀自己！
唔知大家會唔會有一啲時刻，突然間個心跳得好快
可能係賭念突然冒起，個腦一直催你「去啦去啦」； 又或者係作為家人，見到對方一個動作、接到個電話，個心頓時沉咗落去，火氣同不安一下子湧上嚟。
嗰種時候，無論身邊人講咩「冷靜啲」、「唔好諗」，真係完全聽唔入耳，因為你個身體已經繃緊到極點。
如果呢個時候你唔知可以做咩，不妨試吓呢個「4-7-8 呼吸法」。佢唔係咩神奇魔法，但可以幫你喺最失控嘅幾秒鐘，拉返住個煞車掣：
用鼻吸氣 4 秒
閉住呼吸 7 秒
用嘴巴慢慢呼氣 8 秒
做個 3 至 4 次，大約一分鐘。
點解要咁做？ 因為「想賭嘅衝動」同「崩潰嘅情緒」，好多時侯就好似一個突如其來嘅大浪，最猛烈其實只係開頭嗰幾分鐘。
對當事人嚟講：呢一分鐘係幫你「買時間」，將嗰股衝動感冷卻少少，避免一衝動就做出後悔嘅決定。
對家人嚟講：呢一分鐘係幫你「留個空間」，喺你準備大爆發或者陷入恐慌之前，先幫自己吸口氣，保護返自己嘅情緒。
作為香港人壓力大係好正常嘅～ 今晚返到屋企，不妨先試一次，感受吓自己嘅呼吸，如果覺得自己平時撐得好辛苦，你唔需要一個人死頂㗎，隨時搵我哋傾吓！
#戒賭 #賭博成癮 #財務自由 #理財 #生活壓力 #找數 #上岸 #心理健康 #欠債 #明愛展晴中心 #1834633 #按2字 #24997828 #不賭怡情生活光明 #香港明愛家庭服務 ＃ #478呼吸
