黃永威 Ray

21/10/2026

【⚡綠色能源要超前部署、🤖工程監察要智慧透明、🌧️防洪設計要應對極端天氣】
今日（10月21日）喺立法會工務小組委員會，Ray支持將軍澳第137區及第132區對出發展工程，為香港未來能源轉型、城市發展同基建配套做好準備。

不過，大型基建工程唔應該只係「填好塊地、起好條橋」，更重要係有冇長遠規劃、善用創新科技，以及確保公帑用得其所。今次Ray就提出三方面建議：

🔹 ⚡ 綠色能源要超前部署，避免日後重複施工
將軍澳第132區將預留約5.6公頃土地作電力設施，支援香港未來接收區域零碳電力，係實現碳中和嘅重要基建。
Ray建議，政府應趁填海及基建設計階段，預先考慮大型儲能系統嘅發展空間，同時協調海底電纜登陸及接駁兩電嘅走線，盡量做到「一次規劃、一次施工」，避免將來重新開挖道路，增加成本同影響市民。

🔹 🤖 引入AI及無人機監察，工程效率與資訊透明並重
第132區工程涉及約2.5公里海上高架橋，工程規模龐大，環境監察及相關緩解措施亦涉及近兩億元開支。
Ray認為，工程監管應該與時並進，唔可以單靠傳統人手巡查。建議積極引入無人機、AI影像識別及物聯網感應器，提升施工安全、監察效率同成本效益。
更重要嘅係，應該將水質、塵埃、噪音等環境監測數據透明化，讓杏花邨、小西灣及將軍澳居民都可以及時掌握工程對周邊環境嘅影響，真正做到「智慧監管、數據公開、市民安心」。

🔹 🌧️ 加入海綿城市設計，提升極端天氣應對能力
近年極端天氣愈來愈頻繁，暴雨、水浸對城市基建構成更大挑戰。
Ray建議，將軍澳第137區發展應積極參考海綿城市概念，善用雨水滲透、蓄水及排水等設計，從規劃階段提升防洪排澇能力，減少日後水浸風險，令新發展區更加安全、更具氣候韌性。

✅ 政府回應：加強跨部門協調，推動智慧施工
發展局常任秘書長回應指，政府正與兩間電力公司緊密協調，確保第132區電力設施用地嘅前期設計，盡量配合日後設施建造需要。
土木工程拓展署亦表示，新大型工程會引入「4S」智慧工地安全系統，並應用無人機等創新科技，提升施工安全、質量及效率。至於氣候變化方面，署方確認工程設計已考慮最新氣候變化要求。

Ray認為，大型基建既要建得快、建得好，更要規劃得遠、監管得精、資訊夠透明。 未來會繼續跟進儲能設施預留、環境數據公開及海綿城市設計等建議，推動香港基建工程朝住綠色化、智慧化同高韌性方向發展！💪

#黃永威 #立法會 #工務小組委員會 #將軍澳 #將軍澳137區 #將軍澳132區 #新型工業化 #綠色能源 #零碳電力 #碳中和 #智慧工地 #人工智能 #無人機 #物聯網 #智慧監管 #工程安全 #環境監察 #資訊透明 #海綿城市 #極端天氣 #防洪排澇 #基建發展

20/10/2026

【🏭新田科技城注資100億：招商引資要提速，公共資產要把關！💰】
新田科技城係北部都會區發展新型工業化、培育新質生產力嘅重要引擎。今日（10月20日）喺立法會工商及創新科技事務委員會，政府提出向新田科技城有限公司注資100億元，加快土地平整、創科用地發展同前期營運。

Ray支持政府加快新田科技城發展，亦樂見當局考慮透過「土地參股」、股份制等創新模式，引入私人資本參與建設。不過，政府以土地換取產業落地，唔單止要計招商引資嘅經濟帳，亦要計清楚公共資產嘅效益帳同風險帳！

內地合肥透過「土地參股」等創新招商模式，成功吸引龍頭企業落戶，帶動上下游產業鏈集聚，值得香港借鑑。但股權投資涉及長期回報同市場風險，制度設計必須審慎。

Ray喺會上提出三方面關注：
🔹 一、土地作價要透明，公共資產要有合理回報 📊
政府以土地參股，究竟點樣釐定土地估值、出資比例同股權分配？Ray建議引入獨立估值，清楚訂明收益分配同退出條件，確保政府投入嘅公共資源得到合理回報。

🔹 二、引入私人資本，更要釐清風險由邊個承擔 ⚖️
政府應比較自行建設、土地出租同土地參股等模式嘅成本效益。如果項目超支、延遲投產甚至經營虧損，責任應該點樣分擔？最重要係避免「企業賺錢有份分，項目蝕錢公帑埋單」！

🔹 三、招商唔止睇企業落戶，更要睇產業真正落地 🚀
企業承諾帶來幾多投資、創造幾多職位、引入幾多先進技術同上下游企業，都應該有具體指標。如果企業最終未能履行承諾，政府亦需要有土地及設施回收、重新配置嘅機制，避免寶貴嘅創科用地被長期佔用，卻無法發揮應有效益。

💬 政府點回應？
創新科技及工業局局長孫東教授回應時強調，現階段北都發展要「看大數」，首要係盡快推動土地開發同招商引資，為香港帶來經濟增長同就業機會。

局長指出，土地價值會參考市場情況，政府亦會考慮企業未來十年嘅產值、就業貢獻，以及係咪符合重點科技產業發展方向。現階段政府主要承擔土地開拓成本，即使企業日後退出，已平整嘅土地仍然可以供其他企業使用。

Ray認同，新田科技城正處於「開荒拓土」階段，必須有速度、有魄力，先可以搶佔產業發展先機。但「看大數」之餘，亦要「計細數」；招商要有速度，投資要有制度，產業落地更要有實效。

期望政府喺加快新田科技城發展嘅同時，進一步完善土地估值、投資風險同產業績效管理機制，真正做到以土地引產業、以產業帶投資、以投資創就業，將北都土地資源轉化為香港新型工業化嘅長遠競爭力！🇭🇰

#黃永威 #立法會 #工商及創新科技事務委員會 #北部都會區 #新田科技城 #新型工業化 #招商引資 #土地參股 #創新科技 #產業發展 #新質生產力 #公共財政 #產業鏈 #香港工業 #經民聯

20/10/2026

19/10/2026

【寓教於樂！共建平安社區🚒🧯】

Ray日前到場參與維港滙消防安全嘉年華。活動內容豐富，設有消防車及救護車展覽、消防機械人示範、VR消防體驗、AED與CPR急救教學、消防制服體驗以及趣味攤位遊戲，同場亦舉辦消防安全講座，讓住戶們同小朋友透過多元互動體驗，輕鬆學習防火及急救知識。

Ray亦提提大家，日常生活要時刻留意家居防火安全，定期檢查電器，遠離火災隱患，保護自己同屋企人！感謝維港滙會所同香港消防處籌辦今次咁有意義的社區活動✨

#社區安全 #消防安全 #家居防火 #平安社區 #黃永威 #消防處

18/10/2026

【重陽慎終追遠，致敬保港先烈🕊️】

Ray今日出席特區政府喺香港大會堂紀念花園舉行嘅重陽紀念儀式，莊嚴悼念為保衞香港而捐軀嘅英烈。🕯️

重陽向來有登高思遠、慎終追遠嘅傳統，除咗敬老探親，亦係我哋緬懷先烈、傳承愛國愛港精神嘅時刻。先烈為守護香港付出寶貴生命，佢哋嘅犧牲我哋時刻銘記。緬懷過去，立足當下。🙏

#重陽節 #緬懷先烈 #銘記歷史 #愛國愛港 #黃永威

18/10/2026

【🌟 薪火相傳．攜手同行！共創青年美好未來 🚀】

Ray日前出席了九龍社團聯會專業委員會「友您為師 邁向明天」師友計劃 2026 啟動禮暨專業論壇 。🤝

是次師友計劃將專業前輩與青年配對，透過經驗傳承為年輕人引路，幫助他們裝備自己、規劃前路 。💡一對一師友同行之下，前輩分享所見所聞與實戰心得，啟迪新一代，讓青年發掘不同領域的機遇，為香港儲備年青新力量 。💪

感謝九龍社團聯會專業委員會用心籌辦是次活動，期待一眾友師陪伴青年一起邁向明天 ！👏

#黃永威 #工業界 #友您為師邁向明天 #師友計劃 #青年培育

16/10/2026

【⚓粵艇南下｜灣區遊艇雙向互通】

Ray 今日出席大嶼山遊艇會「粵艇南下」首航儀式，親身見證大灣區遊艇自由行邁向雙向互通新階段！🌊

繼今年 6 月「港澳遊艇北上廣東」落實之後，首批 5 艘來自廣東嘅遊艇今日順利抵達大嶼山遊艇會，帶同 30 多位訪客來港，標誌粵港跨域海上通道正式開通，實現「港艇北上、粵艇南下」雙向通航。部分訪港旅客已預訂本地酒店，親身感受香港優美海岸同獨特城市魅力。🚢✨

業界多年以來一直爭取粵港遊艇雙向通行，今日成果，有賴中央支持、粵港兩地各部門同業界長期協調、通力合作。🤝

「粵艇南下」不單帶動跨境航行同休閒產業發展，更開拓高端消費新模式。政府將聯同旅發局，持續發掘更多具特色嘅海上旅遊路線。正如署理財政司司長喺儀式致辭時提到，香港正積極打造成為亞洲遊艇樞紐。國家「十五五」規劃綱要提出發展郵輪、遊艇等休閒消費；特區政府嘅海運同旅遊發展藍圖，亦將遊艇經濟列為重點方向。預計到 2032 年，全球超級遊艇產業市場規模將達約 3,500 億港元，香港憑藉獨特優勢，有能力和實力喺呢個龐大市場入面分一杯羹。👏

今次首航只係起點，經民聯會繼續跟進泊位配套、監管細節、海關及口岸服務等安排，持續收集業界意見，優化營運環境，配合全新海上旅遊路線嘅開發，吸引更多大灣區遊客及產業投資匯聚香港，推動水上經濟持續增長，進一步發展大灣區海上旅遊同海事產業！💪🇨🇳🇭🇰

#黃永威 #工業界 #經民聯 #粵艇南下 #大灣區遊艇自由行 #粵港合作 #水上經濟 #海事發展 #互聯互通

15/10/2026

【 落實愛國者治港，以專業所長推動香港經濟發展】

2021 年，中央依法完善香港選舉制度，從制度機制上全面落實「愛國者治港」原則，堵塞過往制度漏洞，為香港實現「由亂到治、由治及興」奠下堅實基礎，保障「一國兩制」行穩致遠。完善選舉制度的核心舉措之一，是重構選舉委員會，並為其賦予全新職能。
在新選舉制度下，選委會成員人數由 1200 人增至 1500 人，劃分為五大界別，廣泛涵蓋社會不同層面：第一界別為工商、金融界；第二界別為專業界；第三界別為基層、勞工和宗教等界；第四界別為立法會議員、地區組織代表等界；第五界別則是香港特別行政區全國人大代表、香港特別行政區全國政協委員和有關全國性團體香港成員的代表界。五大界別的設計，拓闊社會參與層面，達致各界均衡參與，充分體現香港多元社會結構。

選委會成員透過三種方式產生：包括界別分組內指明職位人士出任當然委員、指定界別分組的合資格團體提名產生，以及由界別分組的合資格團體投票人或個人投票人選出。與此同時，選委會獲賦予新職能，除繼續負責提名行政長官候選人及選出行政長官外，亦會選出 40 名選委會界別立法會議員，並負責提名全部立法會候選人，鞏固行政主導體制，促進行政與立法良性互動。

新選制締造穩定的政治環境，讓議會擺脫過往無謂爭拗，重新聚焦經濟發展與民生事務。作為立法會議員，我堅定支持完善選舉制度。這套制度匯聚工商、專業、基層等各界愛國人才，讓有志服務香港的人士，運用自身專業所長參與管治。過去一段時間，我與不少有意參選人士深入交流，聆聽其政綱與施政抱負，見到他們普遍具備優秀專業素養及強烈社會承擔。展望未來，我們可集中力量推動產業升級、支援中小企、發展創科、完善知識產權體系，善用香港國際化優勢，積極對接國家發展大局，推動香港經濟高質量發展，切實改善市民生活，共同書寫「一國兩制」成功實踐的新篇章。

#愛國者治港 #選委會選舉 #黃永威 #工業

14/10/2026

【💉 唔好等！而家就係打流感針嘅黃金期 🛡️】

今日Ray同約40位立法會同事一齊，參與本屆立法會首次議員接種流感疫苗活動。今年政府再優化接種疫苗安排，擴大「醫生疫苗採購先導計劃」、新增醫健通電子同意書，透過區議會、關愛隊推社區接種，打針比以前更方便。Ray同各位議員一齊呼籲：保護自己同家人，快啲去打流感針啦！💪

#黃永威 #工業 #經民聯 #流感疫苗 #預防勝於治療 #社區健康

14/10/2026

【就"積極配合國家《十五五規劃綱要》，促進粵港澳大灣區港口、機場和軌道交通協同發展"議案 之發言】

主席，
首先，我感謝林銘鋒議員提出呢項議案。對於議案內容，我同經民聯都係支持嘅。

國家《十五五規劃綱要》明確提出要鞏固提升香港國際航運中心同國際航空樞紐嘅地位；而香港《第一個五年規劃》亦主動對接國家「幹支通、全網聯」民航發展戰略，全力推動港口、機場同軌道交通嘅協同發展。呢樣唔單止係交通基建嘅佈局優化，更係香港工業對接大灣區產業生態、融入國家發展大局、提升全球競爭力嘅重要支撐，工業界高度期待相關政策能盡快落地。

就如何深化「港、航、軌」三大交通系統嘅協同發展，我哋提出以下三點意見：

第一，以 AI 科技賦能港航軌協同，全面升級智慧物流樞紐。
我好同意鄧銘心議員嘅修正案，要推動智慧港口同智慧機場建設，提升整體客貨運流轉。
智慧港口方面，政府已於今年 1 月推出港口社區系統，實現海陸空貨物實時追蹤，並聯通廣東電子口岸。我認為應進一步將 AI 技術應用於集裝箱智能調度、貨物自動識別、無人集卡運營同泊位動態規劃，配合葵青貨櫃碼頭智能化改造，大幅提升作業效率、縮短貨物滯港時間。同時利用 AI 優化航線規劃同靠泊時序，配合綠色航運通道建設，有效降低航運碳排放，助力本港綠色轉型。

智慧機場方面，透過 AI 優化貨運航班調度、貨站智能分揀同通關預檢核驗，可進一步提升香港國際機場嘅貨物周轉效率，鞏固全球最繁忙貨運機場嘅領先地位。結合大數據預測貨運需求、靈活調配運力，能精準匹配 AI 硬件、生物醫藥同精密製造等高時效性產業嘅物流需求，並配合東莞空港中心嘅海空聯運模式，充分釋放多式聯運嘅潛力。

多式聯運方面，運用 AI 優化軌道交通班次調度，打通「港口 — 軌道 — 機場」之間嘅數據壁壘。透過搭建一站式 AI 協同調度平台，整合海、陸、空貨運數據，自動匹配最佳運輸方案，實現鐵海聯運與空鐵聯運嘅無縫對接，配合「鐵海陸江」立體聯運體系，大幅減少中轉環節嘅時間同成本。

第二，完善協同機制同配套，釋放產業發展紅利。

三大交通體系協同升級，將為工業界帶來實質利好，一方面壓縮貨物中轉時間同營運成本，提升時效敏感產業嘅供應鏈韌性，強化傳統出口產業嘅價格競爭力，協助企業降低安全庫存、釋放營運資金；另一方面亦能優化「研發在港、製造在灣區、銷售在全球」嘅跨境產業佈局，助力企業透過高效物流網絡快速接觸全球市場，同時降低中小企出海嘅成本同門檻。

為進一步協調大灣區港口群關係、提升整體競爭力，我哋建議參考美國三藩市灣區委員會嘅模式，成立半官方或民間性質嘅大灣區航運協調平台，讓各港口營運者透過平台訂立合作原則、確定發展重點、制定長遠路線圖，引導區內競爭走向良性有序，推動錯位分工協同發展。同時大灣區內地方政府可透過平台發布投資環境同產業狀況，配套政策資源，全面提升灣區企業嘅國際市場競爭力。

第三，借鑒國際先進經驗，長遠優化治理架構

鄰近新加坡嘅智慧港航模式值得借鑒，當地以 AI 驅動碼頭調度提效超兩成，整合「港航軌」數據打造統一多式聯運平台，對大灣區極具參考價值。而荷蘭鹿特丹港亦透過高效嘅港口社區系統同現代化裝卸設施，創造可觀嘅經濟效益，相關經驗都值得我哋參考。

長遠而言，隨住大灣區合作持續深化，若需要政府進一步介入，當局可考慮將現有合作聯盟升格為「大灣區港口管理局」，發展出集儲存、包裝、裝卸、流通、加工同配套於一身嘅新型國際航運聯盟，全面提升區域航運競爭力。

主席，「港航軌」協同發展係香港鞏固國際航運同航空樞紐地位嘅關鍵着力點，助力國家提升全球航運同空運戰略佈局之餘，將來定必為香港工業提升競爭力、推進新型工業化嘅高質量發展注入持久動能。

本人謹此陳辭，多謝主席。