賽馬會樂齡同行計劃 JC JoyAge

08/10/2026

【識心小教室（三）｜轉化一個想法】
前兩日我哋學咗留意自己嘅情緒反應，同埋分清楚咩係「事實」、咩係「想法」。今日我哋再行多一步，一齊練習「轉化想法」。
「轉化想法」唔係刻意要逼自己諗得「正面」啲，而係嘗試為同一件事，換一個同樣合理、但可以令自己舒服一啲嘅「解讀」。

例如：
🔸 原本想法：「我咩都做唔好」
❇️ 轉化後：「呢件事我而家覺得難，但我都有一啲部分做得到」
🔸 原本想法：「冇人會理我」
❇️ 轉化後：「呢一刻我覺得孤單，但我可以主動聯絡一個人」

轉化想法嘅重點，唔係否定自己原本嘅感受，而係俾自己多一個角度、多一個選擇。當我哋願意試吓用另一個方式睇同一件事，情緒可能就會有多啲空間放鬆落嚟，亦可能出現新出路。

💡今日小練習： 你有冇一個想法，令你覺得「卡住咗」？不如試吓用呢個句式轉化佢：
「雖然_________________（事實），但我可以_________________（一個微小嘅行動或新角度）。」

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #你我他的療癒日常 #認知行為治療

07/10/2026

【識心小教室（二）｜一齊分清楚「事實」同「想法」】
尋日我哋學咗點樣「解讀」一件事，今日我哋一齊練一樣好重要嘅嘢：分清楚咩係「事實」，咩係「想法」。
📌事實 ＝ 可以觀察到、記錄到、大家都見到嘅，客觀發生咗嘅事
💬想法 ＝ 我哋喺腦海入面對件事作出嘅解讀、推測或者判斷
例如：
🔸 「佢今朝冇同我打招呼」← 事實
🔸「佢一定係對我有意見」← 想法
🔸 「今次覆診報告未出」← 事實
🔸 「一定係壞消息先唔講」← 想法

當我哋個腦不斷預演負面情境，呢啲「想法」喺腦海入面諗得愈多，就愈容易變得好似真實一樣。慢慢地，我哋可能會將想法當成事實，情緒亦會被呢啲「想法」牽住走。唔係話我哋嘅「想法」唔重要，而係當我哋睇得清楚，邊個係事實，邊個係想法，我哋就唔會俾一個未經證實嘅想法牽住我哋嘅情緒走。

當我哋將負面想法當係事實，情緒會好似滾雪球咁愈滾愈大，身體亦可能會跟住有啲反應，例如瞓得唔好。我哋嘅行動同溝通，亦有機會受呢啲未經證實嘅想法影響，容易誤解對方嘅意思。

💡今日小練習：試吓寫低一個令你不安嘅念頭，然後問吓自己：「呢個係事實，定係我對件事嘅想法？」

你仲可以做吓以下「事實」與「想法」小測試，睇吓自己分唔分得清！

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #活學活用知多啲 #認知行為治療

06/10/2026

【識心小教室（一）｜同一件事，點解會有唔同情緒反應？】
你有冇發現，有時同一件事，唔同人嘅情緒反應可以好唔同？原來，令我哋難過嘅，好多時唔係件事本身，而係我哋點樣「解讀」。

情緒嘅出現，通常有條路徑嘅：
📌 事件（發生咩事）
↓
📌 當刻嘅想法（我點睇呢件事）
↓
📌 情緒（我有咩感受）
↓
📌 身體反應（身體有咩感覺）
↓
📌 行為（我點樣回應）

💡 但呢五個部分唔係單向流動，佢哋仲會互相影響、互相牽引！

例如：一個負面嘅想法可能會引發焦慮情緒、令我哋心跳加速；而身體嘅不適，又可能會令我哋更加擔心，令人想逃避。

舉個例：如果體檢報告顯示有一項指數偏高
💬想法 A：「我身體開始差，遲早出大事」→感到焦慮、成日諗、甚至瞓唔著。
💬想法 B：「呢個係一個提醒，我可以同醫生傾吓，睇吓點樣調整飲食同運動」→ 雖然都有啲擔心，但會比較願意採取行動

所以，點樣「解讀」同一件事，可能會帶嚟完全唔同嘅情緒同回應。

你哋都可以試吓回想今日一件令你有情緒嘅事，再用呢五格拆解一下：
⭐事件：發生咗咩事？（只寫事實，唔加形容）
⭐當刻嘅想法：我點睇呢件事？（腦入面第一句浮現嘅說話係咩？）
⭐情緒：我有咩感受？（例如：失落、緊張、憤怒等）
⭐身體反應：身體有咩感覺？（例如：心跳快咗、手震、頭暈等）
⭐行為：我點樣回應？（例如：避開、爭辯、沉默等）
唔使急住改變任何嘢。先停一停，睇到自己由事件、想法、情緒、身體反應同行為之間嘅關係，已經係釐清情緒好重要嘅第一步。

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #精神資訊全面睇 #認知行為治療

05/10/2026

【照顧者學習調節心態，接受人生最後一個階段的挑戰】
照顧患上腦退化嘅另一半，呢條路真係唔容易。如果連照顧者自己都病倒，壓力更加難以想像……

文章中嘅謝太，即使自己患上第四期癌症，仍然努力照顧患病嘅丈夫。幸好，佢選擇向社區團體求助，安排丈夫到日間護理中心接受照顧，令自己可以騰出時間同空間，安心接受治療。

👴👵 以老護老，唔代表要一個人捱。面對漫長嘅照顧之路，唔需要凡事都自己一個承擔。學識適時求助、善用社區服務同日間護理資源，可以減輕壓力，亦令自己有時間照顧身心，先可以更好咁陪伴摯愛。

如果你或身邊嘅中高齡人士，同樣正面對照顧者壓力、情緒低落或失眠困擾，歡迎聯絡本計劃嘅合作機構尋求支援。https://www.jcjoyage.hk/community-resources

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #是他也是你和我

以老護老是本港高齡社會的寫照，如何好好走過人生最後一個階段，考驗不少年長夫婦。五年前79歲的謝先生確診阿茲海默症，由77歲的太太堅負照顧重任

05/10/2026

【葵青區「樂齡友里」義工培訓證書課程開始招募啦🎉】

如果你對了解長者精神健康有興趣，並且希望陪同受情緒困擾的長者，參加課程讓你能認識長者面對不同精神健康情況，學習關心同處理情緒嘅技巧💪🏻💕

培訓當中包括：計劃簡介、精神健康急救(關懷長者版)、社區資源介紹、地區服務參觀

詳情如下：
日期：2027年1月7、12、14、 19、 21、26、28日 (星期二及四)
時間：上午10:00至下午1:00（每節共3小時）
地點：葵涌大窩口邨富安樓地下21-22號（安泰軒(葵涌)）
對象：50歲或以上人士、懂得閲讀及書寫中文
費用：全免
*備註：報名後須經簡易問卷評估與甄選

查詢及報名方法：
✍🏻網上報名連結：https://forms.gle/umfQYBHzwukEDLDs8
📞致電 2652 1868 或 WhatsApp 5500 4757 與呂姑娘聯絡

期待你加入及參與🥰

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #長者抑鬱 #長者心理健康 #晚年抑鬱 #晚年心理健康 #樂齡友里 #義工服務 #安泰軒葵涌 #新生精神康復會 #葵青區

02/10/2026

【同行十月・「識」心有你】
有時打開新聞或者社交媒體，睇到一啲令人難過嘅消息，無力感、焦慮，甚至對未來嘅擔憂，好似不知不覺就湧上心頭。其實，我哋嘅大腦一直都好努力保護緊我哋。但有時，佢又會自動預演好多情境、諗咗好多故事。由於呢啲畫面實在太真實，好容易令我哋一不小心就信以為真。

心理學研究指出，人類大腦天生有「負面偏誤」（negativity bias）——我哋會比較容易留意到危險同負面訊息，因為咁樣有助我哋保護自己、應對風險。但當呢個機制過分活躍，就可能令我哋陷入焦慮、反覆思考，甚至將想像當成現實。

今年 #世界精神衞生日（10 月 10 日）嘅主題係「Lived Experiences Heard: Real Voices, Real Change」，提醒我哋：除咗聆聽精神復元人士嘅親身經歷，更要真正重視佢哋嘅聲音，由聆聽走向行動，讓佢哋嘅經驗帶嚟真實嘅改變。 呢個十月，我哋一齊學習照顧自己嘅心，亦都學吓停一停，看見同聽見身邊人嘅需要。

我哋唔需要一次過解決所有問題。只要肯停一停、察覺一吓自己嘅感受，已經係好好嘅開始。

記得留意住我哋FB專頁嘅分享，等我哋用多啲連結、多啲溫柔，陪伴彼此，一齊同行每段路。

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #今日鬆一鬆

28/09/2026

【精神科醫生細味人生】
行醫近 40 年嘅精神科醫生曾繁光，醫治過無數病患，但原來近年佢自己都經歷緊數場病痛嘅夾擊。曾醫生嘅情緒唔單止冇受影響，反而繼續談笑風生，細味人生。

一齊嚟睇下佢嘅分享啦！

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #是他也是你和我

66歲的曾繁光除了是香港知名精神科專科醫生、作家及畫家，近年亦多了一個病者的身份。本集《 》帶你走進曾醫生的內心...

25/09/2026

中秋賞月圖鑑 🌕✨】
每逢中秋，傳統習俗都係「賞月、玩燈籠、食月餅」。而家仲有太空人飛上月球「賞月」！🚀🌕距離月球幾十萬公里都可以過中秋，用咩方法過節仲點會有標準答案呢！

不如睇吓你屬於邊一種「中秋 Style」：
💻【遠程連線型】
隔住個 mon，一邊同遠方嘅人乾杯，一邊傾吓偈。
✨ 圓滿指數： 🌕🌕🌕🌕🌕（心繫對方，時差都唔係問題！）
🎧【極致Me-Time型】
關掉社交模式，開套好戲、戴上耳機，獨享一個月餅。
✨ 圓滿指數： 🌕🌕🌕🌕🌕（獨處嘅自由，就係最高級嘅節慶感！）
🏠【居家儀式感型】
唔想出去同人迫，喺屋企窗邊掛個燈籠、吹陣涼風，享受悠閒嘅一個夜晚。
✨ 圓滿指數： 🌕🌕🌕🌕🌕（最舒服嘅地方，就有最好嘅景致！）
💭【記憶思念型】
抬頭望住同一個月亮，喺心入面默默同重要嘅人講聲「中秋節快樂」。
✨ 圓滿指數： 🌕🌕🌕🌕🌕（有想念嘅人，月光特別有溫度！）

🌕 中秋節最重要嘅，從來唔係「地點」或者「形式」，而係你心入面嗰份感覺。無論你今年喺邊度、以咩狀態過，只要自己舒服，就係最美好嘅中秋節！

👇 歡迎留言講吓你係邊一種？或者 Tag 你嘅親朋好友，同佢講聲中秋節快樂！❤️

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #今日鬆一鬆 #中秋節

23/09/2026

【給努力咗好耐嘅自己一個無聲嘅讚賞】
唔經唔覺，今日已經係「秋分」，代表著秋天已經過咗一半。喺傳統上，秋天係收穫同整理嘅季節。

回望呢大半年，你係唔係都默默咁處理咗無數件事、撐過咗好多唔容易嘅時刻？ 有時我哋總係習慣將目光放喺「仲未做好嘅事」，或者介意「成果夠唔夠完美」，卻遺忘咗嗰個一直努力嘅自己。

不論目前嘅成果如何，單單係「冇放棄、走到今天」，就已經好值得俾自己一個大大嘅讚賞。

今日咁啱係「 #國際手語日」，不如我哋一齊學下呢幾個代表「讚美」嘅手語：
⭐「好 / 叻」 👍肯定自己「已經做得好好」
動作：單手握拳，大拇指向上豎起。
⭐「多謝」 🙇‍♂️ 感謝那個默默堅持到今天嘅自己
動作：單手豎起大拇指放喺胸前，大拇指像鞠躬一樣向下彎曲兩下。
⭐「 加油」✊給自己力量，繼續按著自己嘅節奏前行
動作：單手握拳舉至耳旁，向下輕輕一傾。

不妨俾自己（或身邊人）一個「無聲嘅讚賞」，一個溫暖嘅肯定。今晚食自己鍾意食嘅嘢，好好休息，明天繼續按自己嘅節奏前行。

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #活學活用知多啲

21/09/2026

【銀髮族有生之年的心底話】
「道謝、道愛、道歉、道別」——呢「四道人生」看似簡單，但要親口對家人講出口，又談何容易？💬

由明愛沙田長者中心舉辦嘅生命教育活動中，一班精靈嘅銀髮族化身攝製隊，親自拎起鏡頭、肩負打燈同訪問嘅角色，幫其他長者拍攝「生前的話」短片🎥。唔少長者藉著呢個機會，勇敢向至愛講出藏喺心底好耐嘅說話。用行動話俾大家知：愛要及時，唔好留有遺憾呀！

#賽馬會樂齡同行計劃 #香港賽馬會慈善信託基金 #香港大學社會工作及社會行政學系研究 #抑鬱 #情緒管理 #心理健康 #精神健康 #中年好生活 #康泰人生 #是他也是你和我

#道謝、 #道愛、 #道歉、 #道別，這「四道人生」，知易行難。明愛沙田長者中心就策劃了 #生命教育 活動，包括繪本創作及拍攝「生前的話」短...