06/08/2026
【蟲鼠隊員甚艱難 聯署改制要力撐】
平時行街，除咗見到街道清潔工打掃，你有冇留意到有一班拉住裝滿「架罉」車仔、喺坑渠撒藥嘅工友？或是戴住「豬嘴」、喺迷霧裏辛勤工作嘅身影？
佢哋就係守護香港清潔嘅另一道防線——食環署外判防治蟲鼠組嘅工友！💪 佢哋日常工作五花八門：灑蚊沙噴蚊油、清理雜草垃圾、孭fog機（滅蚊噴霧器）、捉老鼠、消滅蜂巢……統統都係由佢哋一手包辦。
經過呢幾星期嘅深入訪問同觀察，我哋發現咗蟲鼠隊鮮為人知嘅 6大工作困境：
💧 1. 與老鼠藥為鄰嘅桶裝飲用水，你飲唔飲？
政府外判標書雖要求外判公司提供飲用水，但有部分公司疑「捉字虱」，只提供桶裝水而非瓶裝水。結果，桶裝水同有毒化學藥物（滅蚊噴霧、蚊沙）長期一齊擺喺車尾箱，極易受到污染！工友為免飲「毒水」，寧願每日自費買水……
🎽 2. 防暑裝備全自備，雨衣工鞋唔好使！
工友長時間戶外工作，公司理應提供足夠防暑裝備。但現實係：
🚫 帽、毛巾等基本物資要自費。
🔋 公司提供的風扇續航力欠佳，連續用一個多小時就無電，工友「焗住」自費買更大電量的風扇。
🌧️ 新雨衣又唔透氣又滲水，公司更強制要求「新雨衣外面穿舊雨衣」，令工友焗上加焗！
👟 新工鞋防震不足、而且是平底的設計，對足弓位保護不足，工友長時間在戶外走動，苦不堪言，想著私家鞋卻又不准許！
🌳 3. 夏日炎炎，正好曬住唞？
蟲鼠隊冇休息室，食環署規定必須喺規定時間內留在巡查點（locate）候命，唔准離開。烈日當空下冇遮冇掩，工友驚返車上休息會被食環突擊檢查，指控在車上「偷懶」而收 DN（失責通知書），唯有「曬住唞」；工作暑熱警告及休息時間的指引，原意為減低工人中暑的風險，卻因為制度僵化，主管為免休息「超時」，未抖足15分鐘就要催促工友繼續工作，淪為限制休息時間嘅計時器⏱️！
🏃 4. 無替工，好陰公
有道「吊頸都要抖下氣」，但對工友而言想請假極難。外判標書列明每車隊需4人，有工友請假就需替工。然而，外判公司規定替工每月只能工作6天，再多就要「過冷河」（翌月停工），導致大量替工流失！公司因「請唔到替工」拒絕批假，工友亦因心理壓力而唔敢請假，應有權益被嚴重剝削，農曆新年、中秋等傳統節日也要照常開工。
🚔 5. 抄牌失責二選一
蟲鼠隊冇專職司機，工友要兼任司機同滅蟲員。偏偏大部分巡查點冇車位，工友留喺車上睇車，隨時驚食DN；但如果落車去滅蟲，轉頭又隨時食「牛肉乾」（告票），而且罰款入司機數！實在左右為難，百詞莫辯。
📉 6.人手縮locate增，工友煉成無影手 ？
自2023年起，蟲鼠隊人手大幅縮減，部分地區由19隊縮減至9隊，每隊人數由6人減至4人。但工作量不減反增，前線工友唯有疲於奔命，先至勉強維持到服務質素。
=======================
📝 【一齊為前線工友發聲！】
就住以上種種困境，我哋同工友開會後，共同商討並撰寫咗給食環署嘅正式意見書，提出三大核心建議：
1️⃣ 全面檢視外判標書條款，將前線職安健裝備列為承辦商強制合約責任！
2️⃣ 改革監察機制，建立「人性化與彈性執法指引」！
3️⃣ 建立定期諮詢管道，確保各項惠民措施切合前線需要！
👇 改變需要你嘅聲音！ 意見書完整版可到以下連結查閱，如果你認同同支持前線工友，請喺閱讀後留下你的名字同聯絡方式進行聯署，集結公眾力量，為工友爭取合理權益！✊
🔗 立即參與聯署 / 閱讀意見書： https://forms.gle/cdRoXnrWRVJNH8mF9
#防治蟲鼠組 #外判工友 #食環署 #勞工權益 #職安健 #抗暑 #守護香港 #推動改變 #前線心聲 #聯署爭取
