香港精英運動員協會 HKEAA, 新界沙田美林邨美楓樓 B 座地下36及38號, Hong Kong (2026)

30/09/2026

歷時2個月嘅暑假，我哋香港精英運動員協會同香港賽馬會攜手合作，推出嘅Jockey Club Elite Connect Summer Programme終於順利完成啦！🎉

多謝每一位參與嘅小朋友、教練，仲有喺背後默默付出嘅每一位夥伴。因為有大家嘅熱情同投入，令呢個夏天變得無比精彩！☀️

活動之後，我哋收到小朋友親手畫嘅感言卡。睇住一張張充滿童趣嘅畫作同文字，每一個筆觸都記錄住佢哋喺活動中嘅歡笑，佢哋用最純真嘅視角，為呢一段旅程畫上最完美嘅句號。💌

呢個夏天，我哋同孩子帶住呢份暖心嘅祝福並肩同行，見證佢哋喺運動中嘅蛻變同成長！🌟快啲睇下咁多位小朋友嘅感言卡啦！

#香港精英運動員協會 #香港賽馬會 #香港學生輔助會

28/09/2026

🥋 Team Up, Beat Drugs! 展現空手道精神，擊退毒品 💪

由香港精英運動員協會主辦、禁毒基金撥款支持嘅「抗毒同行者」校園推廣計劃，第二場「運動員分享會」順利完成啦！🎉

今次我哋好榮幸邀請到前香港空手道代表、亦係我哋香港精英運動員協會委員嘅Ho B李振豪嚟到聖公會聖紀文小學！Ho B同同學仔分享咗自己在榻榻米上拼搏嘅奮鬥故事，以及面對傷患與低潮時，點樣憑著堅毅不屈嘅「武德」精神重新站起來。

Ho B亦鼓勵同學仔，空手道講求極高自律，喺面對壓力或同儕影響時要堅決拒絕毒品，切勿「走捷徑」破壞自己嘅前途！運動教我哋要愛惜身體，一齊做個充滿正能量嘅青少年！🌟

#香港精英運動員協會 #禁毒基金 #抗毒同行者

25/09/2026

名古屋亞運火熱進行中，香港隊撐你撐到底！🔥
我哋香港運動員已經喺賽場上搏盡，為香港爭光💪🏻！

今屆港隊派出約580名運動員出戰38個項目，仲有板網球、現代五項(劍擊（重劍）、障礙跑、游泳、跑步、射擊5項運動)同摔跤三個項目係港隊首次登場！無論係游泳、劍擊、空手道定係其他項目，每一位運動員都代表住香港人嘅拼搏精神❤️

截至今日，港隊已經奪得4金11銀11銅佳績：
🥇金牌
何詩蓓 — 游泳：女子200米自由泳
何詩蓓 — 游泳：女子100米自由泳
沈曉榆 — 武術：女子長拳
趙顯臻 — 賽艇：男子輕量級單人雙槳艇

🥈 銀牌
劉慕裳 — 空手道：女子個人形
何甄陶 — 游泳：男子50米自由泳
蔡俊彥 — 劍擊：男子花劍個人賽
劉子龍 — 武術：男子南拳南棍全能
曾綺婷 — 空手道：女子組手 50公斤以下級
馬紫玲、何詩蓓、李芯瑤、簡綽桐、王欣桐 — 游泳：女子4×100米自由泳接力
梁宇航 — 武術：男子散打
洪詠甄 — 賽艇：女子輕量級單人雙槳艇
張菀珊、梁穎桉 — 賽艇：女子輕量級雙人雙槳艇
何詩蓓 — 游泳：女子50米自由泳
張家朗、蔡俊彥、何承謙、梁千雨 — 劍擊：男子花劍團體賽

🥉 銅牌
洪晧崴 — 空手道：男子個人形
洪晧崴、鄧宇軒、李智剛 — 空手道：男子團體形
黃卓莉 — 空手道：女子組手 68公斤以下級
簡綽桐 — 游泳：女子100米蝶泳
梁穎儀 — 單車：女子個人公路賽
陳紫晴 — 武術：女子散打 52公斤級
韋祺、奧斯卡、彭詩雅、羅競賓 — 三項鐵人：混合接力
陳迪麟、林新棟— 賽艇：男子輕量級雙人雙槳艇
方凱申— 劍擊：男子個人重劍
吳家祺— 體操：競技體操男子跳馬
黃育祥、葉文豪、李衍熙— 電競：綜合格鬥：街頭霸王6，鐵拳 8，拳皇

多謝每一位教練、支援團隊同埋默默付出嘅工作人員，更要感謝所有香港運動員，你哋嘅汗水同堅持就係香港嘅驕傲🏆！

賽事會一直去到10月4日，我哋一齊繼續為港隊打氣，見證更多歷史時刻📣！香港運動員勁揪💪🏻❤️

📸 相片來源：港協暨奧委會

#香港精英運動員協會 #名古屋亞運 #香港隊加油 #亞運2026

17/09/2026

🎾Team Up, Beat Drugs! 精英同行，擊退毒品💪

由香港精英運動員協會主辦、禁毒基金撥款支持嘅「抗毒同行者（Athletes Beat-Drug Companionship）」校園推廣計劃正式展開啦！🎉 我哋希望透過精英運動員嘅親身分享同互動體驗，陪伴青少年建立正向價值觀、強化心理抗逆力，從身心健康出發，一齊遠離毒品誘惑！

早前第一場「運動員分享會」於馬鞍山靈糧小學順利舉行！我哋非常榮幸邀請到前香港女子網球「一姐」、亦係我哋香港精英運動員協會委員嘅張玲嚟到同同學仔分享 🎾。

張玲曾連續 12 年蟬聯香港網球女子單打第一，更被獲選為「十大傑出青年」。喺分享會上，佢親身講述自己多年職業網壇嘅奮鬥故事—面對極高壓嘅國際大賽，點樣憑着自律、專注同堅毅不拔嘅心態克服低潮。

張玲更加以職業運動員對身體「100% 嚴謹」嘅自律態度，鼓勵同學仔喺面對壓力時，可以做運動去紓緩情緒，千祈唔好因為一時好奇或誤信謠言而接觸毒品🛡️。運動從來唔止係競技，更加係人生最好嘅教室！每一次練習、每一場比賽，都教我哋堅持、紀律同愛惜自己嘅身體。

呢個學年，我哋將會走入更多校園，將正能量與抗毒訊息傳遞開去，期待我哋之後更多嘅活動啦！🌟

#香港精英運動員協會 #禁毒基金 #抗毒同行者

11/09/2026

香港精英運動員協會主辦嘅Jockey Club Elite Connect Summer Programme，今次安排左荷蘭宿舍既宿生參加今次嘅動感思維課程。💪

今次邀請到武術運動員黃礎惟 (Gabriel Wong) 同宿生分享。😆結合運動員嘅親身經歷，帶領大家喺呢短短一小時嘅課程當中，學習點樣管理思緒同埋嚟一個正向自我對話。

睇住大家小組練習當中互相認真對話、互相激發並鼓勵對方，真係令人感受到滿滿嘅能量。希望今日嘅解說同實踐活動，可以成為宿生日常生活中隨時可用嘅「心態工具箱」。

呢個夏天，我哋同孩子並肩同行，見證佢哋喺運動中嘅蛻變同成長！🌟

#香港精英運動員協會 #香港賽馬會 #香港學生輔助會

09/09/2026

香港精英運動員協會主辦嘅Jockey Club Elite Connect Summer Programme健球體驗課堂已經圓滿完結！見到巨型粉紅健球喺空中飛舞，場面既壯觀又熱鬧，多謝小朋友嘅熱情參與同教練們嘅專業帶領❤️

面對呢個比自己仲要大嘅健球，小朋友由學習叫號喊出「Omnikin」、三人托球到合作擊球，一步步體會到呢項運動團隊合作嘅精神。課堂上只有團隊默契！由一開始手忙腳亂、配合唔到，到後來大家手牽手同心協力接到每一球，小朋友唔單止學識咗技巧，仲收穫咗真摯嘅友誼與信任😍

呢個夏天，我哋期待同孩子並肩同行，見證佢哋喺運動中嘅蛻變同成長！🌟

#香港精英運動員協會 #香港賽馬會 #香港學生輔助會

07/09/2026

香港精英運動員協會主辦嘅Jockey Club Elite Connect Summer Programme安排一班小朋友去玩劍擊。啱啱過去嘅劍擊堂已經喺賽馬會馬可紀念之家、順利完成啦！多謝每一位小朋友嘅全情投入，仲有一班教練嘅專業指導❤️

🤺 小朋友由基本步法、進攻防守開始學起，短短一堂已經出劍有板有眼，個個都好認真！ 😍 現場氣氛超開心～由最初怕怕醜醜，到後來主動舉劍挑戰教練，睇住佢哋慢慢建立自信，真係好感動。

未來仲有健球、圓網球等一系列精彩運動體驗等緊大家，記得留意我哋嘅更新，一齊俾小朋友透過運動發掘潛能啦💪✨

呢個夏天，我哋期待同孩子並肩同行，見證佢哋喺運動中嘅蛻變同成長！🌟

#香港精英運動員協會 #香港賽馬會 #香港學生輔助會

04/09/2026

香港精英運動員協會主辦嘅Jockey Club Elite Connect Summer Programme運動之旅繼續進行！今次一班小朋友嚟到賽馬會馬可紀念之家，挑戰充滿活力同反應力嘅圓網球！特別多謝每位全力以赴嘅小朋友，同埋一班耐心教導嘅專業教練❤️

喺黃色小圓網面前，小朋友由最基本嘅上手跳發球、隊友之間嘅快傳，學到點樣靈活圍住圓網360度走位。雖然呢項運動極考眼手協調，但短短一堂時間，小朋友已經配合大家默契、迅速出擊！現場歡呼聲同笑聲此起彼落！由起初捉唔到彈網節奏，到後面互相鼓勵，嗰種團結同自信真係令人好難忘😍

運動體驗仲未完！接下來仲有更多精彩內容等緊大家，記得密切留意我哋嘅最新消息，一齊見證小朋友嘅潛能大爆發💪✨

呢個夏天，我哋期待同孩子並肩同行，見證佢哋喺運動中嘅蛻變同成長！🌟

#香港精英運動員協會 #香港賽馬會 #香港學生輔助會@hkjc_community

03/09/2026

又嚟到Jockey Club Elite Connect Summer Programme嘅時間，今次安排左賽馬會馬可紀念之家同兒童之家既小朋友參加今次既運動員分享會。💪好開心今次邀請到拯溺運動員－郭蕙霖女士以自身經歷及背景同宿生分享。😆

在呢次嘅分享會入面，呀霖親身講述自己從小由游泳運動員轉變成為拯溺運動員，更代表香港參加全國賽嘅過程。儘管佢喺多年嘅運動生涯面對低潮同埋傷痛，但佢都一直冇放棄到，更加係佢隊友和家人嘅鼓勵下重新調整心態、找回對運動嘅初衷。✨

呀霖透過自身經歷寄語小朋友－「心態決定高度」，就算每個人嘅背景同家庭環境唔同，但在遇到困境時，多啲正面嘅想法，辦法總比困難多。希望鼓勵小朋友喺生活上遇到任何困難，都可以用樂觀和正面嘅心態去面對。

呢個夏天，我哋期待同孩子並肩同行，見證佢哋喺運動中嘅蛻變同成長！🌟

#香港精英運動員協會 #香港賽馬會 #香港學生輔助會

02/09/2026

🚨 【最後召集】各位校長、老師留意啦！ ⏰

新學年想為同學仔帶嚟一個熱血又充滿正能量嘅校園體驗？2026/27「抗毒同行者 Athletes Beat-Drug Companionship」計劃現正接受最後階段報名！🔥

由香港精英運動員協會主辦、禁毒基金 (Beat Drugs Fund) 撥款支持，我哋跨界別邀請到香港精英運動員、香港都會大學、中國香港運動禁藥管制機構、專業體育教練以及專業社工，將會透過趣味團體體育運動、心理學培訓以及與精英運動員交流，提升大家嘅自信心、自律性同抗逆力！面對逆境或誘惑時，自然學識堅定拒絕！🚫💪🏻

計劃包含三大核心活動，學校可把握機會一次過為學生帶嚟精彩嘅校園體驗：
🎤 活動一：運動員分享會
精英運動員聯同「香港基督教服務處 PS33尖沙咀中心」及「香港聖公會福利協會新念坊」嘅專業社工與學生同場互動，以自身拼搏故事剖析抗壓方法，帶嚟滿滿嘅正能量！

🏆 活動二：抗毒同行領袖訓練
團體運動訓練：由專業體育教練帶領，喺動感揮汗中培養團隊默契！⚽️
動感思維工作坊：由香港都會大學陳勁聰博士團隊帶領，透過心理與思維培訓提升自信及抗壓能力！🧠
精英運動員同行計劃：由精英運動員及中國香港運動禁藥管制機構帶領，建立運動誠信與堅定拒絕誘惑嘅態度！👥

🚌 活動三：延伸家庭外展活動
帶領同學仔同家長走出校園，參觀「賽馬會禁毒資訊天地」或「住院戒毒治療及康復中心」，拉近親子關係！😍💥
💡 特別提醒：有意參與「活動三：延伸家庭外展活動」嘅學校，將會獲優先考慮納入本年度計劃之權利！

⏱️即刻 Scan 圖中嘅 QR Code報名啦！如有任何查詢，歡迎隨時與本會聯絡：
📞 查詢電話：3705 7801 / 6790 6917
📧 電郵：[email protected]

新學年，期待帶住各大專業團隊進駐貴校，同咁多位同學仔見面！✨

香港精英運動員協會 HKEAA

30/09/2026

28/09/2026

25/09/2026

17/09/2026

11/09/2026

09/09/2026

07/09/2026

04/09/2026

03/09/2026

02/09/2026

Address

Telephone

Website

Alerts

Contact The Organization

Shortcuts

Share

Category

Listing takedown request