28/01/2026
落馬洲河套區 成批路牌都超錯！
隨住政府推行落馬洲河套區發展，鄰近嘅道路基建都漸見雛形。本社近日進行實地觀察，發現有關項目喺新田一帶新安裝嘅路牌質素頗爲參差，與運輸署現行《運輸策劃及設計手冊》（TPDM）嘅標準有唔少出入；無論喺設計、排版定係物料上，都可以話係「超錯」。
超錯嘅位喺邊？大致上可以分爲六大問題：
①用錯顏色
路牌嘅底色代表唔同意思，例如主要區域性目的地會使用藍色、取道快速公路前往嘅目的地使用綠色，而區內目的地就會使用白色。但今次我哋發現至少有三塊路牌都錯誤使用路牌底色。圖 3 、圖 5 兩塊路牌成塊用咗白色，錯誤將「深圳（皇崗）」、「新田」、「元朗」等主要目的地視爲區內目的地，有違 TPDM 有關嘅顏色分類指引。圖 5 更加喺全部目的地都用咗白色底色嘅情況下，畫蛇添足咁為右轉嘅三個目的地加咗一個不必要嘅黑色框。
而圖 7 嘅路牌雖然有用到藍、綠、白三隻顏色，不過細心留意會發現指向快速公路嘅綠色方塊淨係得「九龍」而無「元朗」；但參照右轉之後見到嘅路牌，九龍同元朗方向都係指向快速公路，所以「元朗」應該同九龍一齊要用綠色方塊框起。另外圖 7 中嘅「粉嶺」其實係一塊「膏藥貼紙」，懷疑因爲原先係用錯藍色而要補貼紙，不過呢塊貼紙異常淺色，而且物料唔反光，可讀性無論日夜都非常低。
②字體大小不當
另一個問題就係字體大小。喺圖 3 下面嘅路牌入面，中文字莫名其妙地被放大，加上三個目的地嘅字數比較多，出現咗「搶 fo」嘅情況。其實只要縮返細少少啲字，就會容易閲讀好多。
③地圖式路牌設計問題
圖 5 係一塊地圖式路牌（Map type sign），除咗用錯顏色之外，「主綫」亦都畫得太短。無論係香港定係英國標準，「主綫」必須拉到最底，以便駕駛者認出現時身處嘅位置及行駛方向。
④僭建路牌導致視覺混亂
圖 9 兩塊路牌位於新田迴旋處，當局整咗細細塊嘅「港深創科園」路牌，尤如僭建物咁釘喺原有路牌嘅右下角，如果跌落路面，隨時會引致道路安全問題；其次就係視覺混亂（Visual clutter），尤其是本身分開咗好幾塊路牌，駕駛者霎時間無法理解究竟有幾多個目的地同內容。其實本身應該借住呢次機會，整合相同方向嘅路牌，避免視覺混亂嘅情況。不過因爲排版同尺寸所限，旗形路牌唔一定要整合做一塊牌，話雖如此，本社都覺得應該要審視一下字體大小同排版，例如「落馬洲支綫管制站（祇准認可車輛）」呢個目的地，不論中英文都好長，適當調節字體大小同排版可以增加可讀性。
⑤三塊路牌兩個設計
圖 10 裏面三塊路牌位於落馬洲路，雖然都係指去元朗，不過短短 200 米內就有兩個唔同嘅設計。其中一塊係跟足 2022 年前 TPDM 所定嘅設計指引，而其餘兩塊無論係邊框、箭咀以及字體大小都係唔啱標準。唔知係由唔同部門分別安裝，定係同一個承建商喺唔同批次下安裝嘅路牌呢？
⑥物料成疑
本社翻查路牌背面，部份並未發現一般路牌常見嘅物料標準貼紙，亦無標明路牌係咪由懲教署工業組（CSi）製造。本社亦有喺夜間對呢幾塊問題路牌（圖 11）進行觀察，發現反光性能似乎未如理想。近年喺香港公家路面設置嘅路牌一般都採用貼上反光物料嘅鋼板，如果物料未及規格，除咗未能夠保證路牌鋼板可以達到設計所需嘅性能，亦會對夜間嘅內容可視性造成一定影響。
責任誰屬？
一般而言，喺工程開始施工之前，由政府部門聘請嘅顧問公司會將需要永久安裝同改動嘅路牌交俾運輸署以及唔同嘅持份者審核，經各方同意無問題之後先可以擺入工程合約；完工後都需要多方確保有按圖同埋按標準施工。不過即使顧問公司幅 endorse 咗嘅圖紙畫得有幾靚，第一次起貨嘅樣式有幾啱心水，都要靠承建商按圖施工嚟配合，而喺今次「超錯」嘅情況下，承建商就好明顯無盡責。
就今次問題，本社據悉有關合約早於 2021 年批出，相信其中一部分按舊 TPDM 字框製作嘅路牌屬於「按圖施工」嘅一批路牌；而本社亦發現河套區附近嘅路牌無論喺用料同設計上，都有按標準起貨。而唔按圖施工亦都唔係單一例子，就例如喺屯門至赤鱲角連接路工程入面，喺龍富路就出現咗一個合約圖則無出現過嘅「墜機 icon」，最後一度需要動用交通警用黑色膠袋，大規模笠住全港路牌上所有錯方向嘅飛機圖示。
其實近年 social media 盛行之下，路牌整得差就恐怕逃唔過會被本社公諸於世嘅命運（誤）；運輸署近年將 TPDM 免費公開，唔再需要承建商買 CD 睇例書之餘，亦可以俾市民大衆一齊檢視周邊嘅路牌設計，所以近年嘅路牌質素普遍都有所提升。
公道講句，好似呢幾塊咁錯得咁緊要嘅路牌，喺近年實屬少見；近年唔少道路工程（例如大埔公路擴闊工程、中九龍繞道等）嘅路牌設計都相當唔錯，證明如果各方用心，絕對有能力可以做得靚靚仔仔。本社喺截稿前都已經聯絡土木工程拓展署同運輸署嘅相關工程師，希望可以早日換返一批符合規格又容易理解嘅路牌。同時，本社都希望監管同統籌工程嘅各方汲取之前嘅經驗，以及參考運輸署幾年前內部結集而成嘅「收貨要點」，加以監督並盡快修正。
