02/08/2026
希望全球都可以用人道手段處理野鴿🐦🐦問題
❗️知多啲有關「野鴿安置暨教育中心」❗️
https://www.facebook.com/100594708608090/posts/185441040123456/?d=n
倫敦交通局（Transport for London，簡稱 TfL）被揭發喺 2024 年 3 月至 2026 年 3 月期間，喺倫敦多個地鐵站同車廠展開至少 123 次深夜射殺鴿子行動，共殺害最少 655 隻鴿子，並清除 17 個活躍鳥巢同埋移除多隻雛鳥。動物權益團體 Manchester Pigeon Rehab 批評有關行動殘忍，並已向英國鐵路警察（British Transport Police）舉報，指控行動涉嫌唔必要地虐待動物。
根據 Manchester Pigeon Rehab 獲取並向英國媒體 Metro 同 Evening Standard 公布嘅 TfL 公開資料（FOI）文件顯示，呢啲射殺行動通常喺午夜至凌晨 5 點之間進行，由 TfL 嘅外判服務商 AGS One 負責執行。記錄顯示，最少有 7 隻雛鳥喺行動中被殺或被移走，部分被使用「人道鳥類派遣器」（humane bird dispatchers）折斷頸部致死。
團體指出，射殺行動涉嫌違反 Natural England 建議「避免喺繁殖季節進行致命控制」嘅指引。此外，報告披露喺 12 次事件中，鴿子本身已經被困喺地鐵站嘅防鳥網入面，但清潔人員無將佢哋放返出嚟，而係直接用氣步槍將佢哋射殺，其中喺 Woodford 地鐵站就發生過三次。
文件亦揭示部分鴿子無被即時擊斃，因而承受額外痛苦。例如喺 Arnos Grove 地鐵站嘅一次行動中，工作報告記錄顯示清潔人員向同一隻鴿子開咗四槍先將佢射殺。喺 Ruislip 車廠同 New Cross Gate 車廠，亦有報告指出有鴿子被射中受傷之後飛走咗，甚至飛向有高壓電軌嘅軌道，搵唔返，生死未卜。
Manchester Pigeon Rehab 表示，鴿子係具有高度社交能力嘅動物，唔應該被簡化為必須根除嘅「有害生物」。該團體要求 TfL 立即停止致命控制手段，改為使用調整棲息地、人道驅鳥器等非致命管理方式。
TfL 回應指，官方非常重視避免虐待動物，並強調一直以非致命嘅預防措施為主要手段。然而，喺少數情況下預防措施未必有效，由於鴿子糞便帶有細菌同昆蟲傳播風險，且鳥巢同排泄物會構成火災隱患同損害建築結構，為咗保障乘客、職員同合約員工嘅健康與安全，喺所有其他驅鳥方法失效之後，先會將射殺作為最後嘅手段。
(資料來源源自Metro及The Standard，連結在留言區)
