HK2050isNOW

18/08/2026

12/08/2026

【氣候行動：教師進修互動專班】
全球氣候變化惡化，近日極端酷熱天氣爆燈！教師宜如何指導學生掌握及實踐氣候行動，如減廢減碳？

今個暑期中，進修機會嚟喇！

此進修系列中，關於減廢回收的互動學習專班將在8.19 （星期三），香港中文大學 （CUHK) 主場，思匯政策研究所 （Civic Exchange) HK2050isNOW 合伙：

時：8月19日 （星期三) 早上10點-中午12點
地：CUHK 何添樓 G2
人：環保時尚平台Retrovert創辦人Tiffany + 我

報名宜早：https://forms.gle/r6rgaPNimXfgjCUv8

有緣到時見！

#極端酷熱
#氣候行動
#減廢回收
#環保時尚
#黃錦星

11/08/2026

你有冇試過，明明係夜晚十一點，行到旺角或者銅鑼灣都仲係成身汗，好似條街識發熱？呢個可能係「城市熱島效應」作怪！🥵🌃

城市熱島效應指嘅係市區氣溫明顯高過周邊郊區嘅現象🔍：
♨️溫差喺夜晚尤其係天晴無風嗰陣最明顯
🌡️喺鬧市呢啲超密集地區，街道溫度可以比其他地區高幾度，旺角喺夏天有試過錄得嘅溫度竟然比天文台總部高4°C

「熱夜」暴增嘅危機 📈
熱夜即係全日最低氣溫喺28°C 或以上嘅夜晚：
📊 本地研究指出，城市發展估計佔香港長期暖化趨勢約一半
🌙1970年香港有2晚熱夜，到2000年就22晚，去到2025年已經54晚，但天文台預測，如果碳排放繼續咁高，2050年左右香港每年會有超過80個熱夜
🔥全球氣候變化令整個香港愈來愈熱；熱島效應就令本身已經熱嘅城市夜晚更加難散熱

🧱元兇一：建築物料
點解市區散熱咁慢，睇下我哋用咩起樓就知：
🌳大自然嘅植物會遮擋陽光直接照射地面，靠水分蒸散吸收空氣嘅潛熱，令氣溫降低
🛣️相反，市區周街都係深色瀝青路同石屎，熱容量高，日頭瘋狂吸熱，到夜晚，呢啲儲埋嘅熱力就會慢慢釋放，令周圍繼續熱辣辣

🏢元兇二：屏風樓＋城市峽谷
香港極端嘅高密度垂直發展，完全改變咗空氣流動：
🏙️遮蔽天空：密密麻麻嘅摩天大廈形成「城市峽谷」，阻擋熱輻射散發上太空
🏤屏風樓效應：一排排高樓大廈變成擋風牆，減弱風速，連涼爽嘅海風都吹唔入市區，亦會妨礙市區散熱

🌡️元兇三：人為熱力
人類活動直接為熱島效應火上加油：
🚗繁忙嘅交通、巴士同唔熄引擎嘅車，直接將熱氣噴落街道
🫠夜晚愈熱，家家戶戶愈會開大冷氣，冷氣機排返出街嘅熱氣形成惡性循環。

邊個受影響最深？
熱島效應唔止令人身水身汗，仲係健康同經濟問題：
💔健康風險：夜晚太熱令身體無法從日間嘅熱壓力中恢復，大大增加中暑風險，當香港夏季日均氣溫達到29°C或以上，每升 1°C入院人數就估計會增加4.5%
🏠氣候不公義：住喺市區通風欠佳劏房或籠屋嘅基層市民，往往係最受酷熱煎熬嘅一群，室溫可達40°C以上
💸電費急增：愈熱就愈要開冷氣，拉高整體用電量同電費開支

外國城市其實已經開始出招：
🇸🇬 新加坡：2017年起同研究機構合作推動「新加坡降溫計劃」，以交通、工業、建築能源、地形同氣候等數據喺GIS平台建構模型，就可以模擬唔同城市規劃情境🏙️，計算需要邊種建築類型同高度去設置城市風廊等措施，以便為城市降温，同時提升規劃效率

🇦🇺 墨爾本喺極端高溫嗰陣會為無家者提供24小時開放同有免費膳食嘅社區咖啡室避暑，仲有免費電影門票同泳池入場證！

🇨🇦 多倫多2009年已立法「綠化屋頂條例」，大型新發展項目一定要有綠化屋頂，有案例估計，大規模推行可令周邊氣溫下降約 1.5至 2°C ，屋頂表面更可降溫約 5°C！仲有「酷熱紓解網絡」，夏天會開放300+個免費避暑點俾市民

香港雖然都有做綠化同海綿城市規劃，但仲有好多空間可以學：
🌳 多種樹，等街道多啲樹蔭，為行人路遮擋陽光，靠植物水分蒸發自然降溫，樹蔭比露天地面涼10 °C以上
🏙️ 推動綠化／反光屋頂，將深色天台改做反光塗層或種植植物，阻止熱力滲透大廈
🌬️ 預留通風廊，喺大廈之間預留空間，引入自然風，為擠迫嘅內街吹走熱氣
🚶 行人友善街道：更多遮蔭、飲水位同避暑空間，為劏房戶、長者等高風險群組提供更多避暑空間與支援

講到底，熱到瞓唔着、冷氣費爆升、街上行5分鐘就出汗，全部都同都市微氣候、城市設計同氣候變化有關💨
你住嗰區夜晚有幾「焗」？留言講下你心目中香港最熱嘅地方👇

#熱島效應 #氣候變化 #熱夜 #極端天氣

07/08/2026

【低碳你識揀】你每次沖熱水涼，究竟「沖走」咗幾多電費？🚿⚡️14 分鐘熱水澡 = 約 HK$3.80？（以即熱式電熱水爐計）

夏天熱辣辣，沖個靚涼係常識吧 🚿，但你每次沖熱水涼，究竟「沖走」咗幾多電費？ 👀
研究指出香港人平均每日沖多過一次涼，每次平均14分鐘左右，我哋計過條數，如果用緊普通花灑（即水務署二級用水效益級別 ）加 10 kW 即熱式電熱水爐🔥，單單係沖一次熱水涼，就已經用咗：
💦154 公升水
⚡️約 2.33 度電
💸約 HK$3.8 電費
💨約41.2公斤二氧化碳
（以港燈 2026 年平均淨電費 HK$1.633／度估算，只計喺屋企煲熱啲水呢part，未計用水同輸水過程嘅碳排放）

如果你一日沖一次涼，每個月就係用大約70度電同114蚊電費，而70 度電大約可以：
🚗 令電動車行 350至420 公里（大約係由東京去仙台嘅距離）
💡 令 10W LED 燈長着近十個月
小數怕長計，如果以夏天每日沖涼 1.5 次計算，每人每個月甚至會用咗過百度電！

香港約61%溫室氣體排放來自發電；而根據香港能源最終用途數據，住宅用戶喺2023年至少有9%用電係用喺熱水度，所以每少開一陣熱水，或者沖涼快少少，都係幫自己慳電費得嚟又減碳！

想幫個地球（同張電費單）降吓溫？🥶今個夏天試下沖涼快閃挑戰：
1️⃣ 沖快少少：唔係叫你以後只可以用3分鐘沖涼，不如試下比平時沖少3分鐘先啦🙌
2️⃣ 校啱溫度：試下沖暖水甚至凍水涼，皮膚會更靚，精神百倍，仲慳超多電🧊
3️⃣ 升級裝備：試下轉用一級用水效益標籤花灑，平均比一般花灑每分鐘少用至少2公升水 💧

一齊行動，救地球順便拯救銀包！🌍💰
👇 留言話我哋知，你今日敢唔敢挑戰沖凍水涼？🧊

#氣候變化 #慳電 #慳錢 #凍水涼

31/07/2026

【活動宣傳】 今年 ReThink HK 將會喺2026年9月10至11號喺香港會議展覽中心舉行，我哋好榮幸可以成為其中一個專題合作夥伴！

📅我哋會喺第一日舉辦專題座談會，探討香港可以點樣幫助亞洲區內氣候轉型🌏

—

🌱ReThink HK係香港具抱負又進取嘅可持續發展企業盛會，旨在促進城市邁向更具氣候韌性、低碳同再生經濟嗰陣，可以帶嚟更大影響力同加強業界協作。

🤝如果你對未來發展有興趣，今次活動設有五個專題主題區（城市、能源、創新、影響力和資源），一齊了解多啲: https://rethink-event.com/2026-conference/

✍喺8月3號前可以用我哋嘅優惠碼PP20HK2050報名，期待喺 ReThink HK 2026同你見面: https://register.rethink-event.com/general

#氣候轉型 #氣候變化

28/07/2026

【綠色16型人格指南】做完16型人格測試，知自己係I人定E人，噉你知唔知自己性格適合點樣應對氣候變化？🤔只要用啱你嘅性格優勢，一樣可以輕鬆減碳！即刻睇下你嘅性格可以點做，今期講下既係行動派又鍾意隨機應變嘅🟡「SP」探索者組✨👇

🔧 ISTP「鑒賞家」
你哋係✅手作達人、✅鍾意嘗試、✅坦率直白
不如試下：
1️⃣ 親身參與唔同低碳活動，例如植樹、淨山、參加極端天氣應急訓練等🌿
2️⃣ 修理壞咗嘅電器，拒絕即棄文化
3️⃣ 研究點樣將廢物升級改造，例如將廚餘變成肥料♻️

🎨 ISFP「冒險家」
你哋係✅活在當下、✅鍾意探索、✅隨遇而安
不如試下：
1️⃣ 行山做運動嗰時順手執垃圾，再同朋友宣傳「山野無痕」概念🚮
2️⃣ 淨灘之後參加工作坊用海廢整首飾／小物，令垃圾都可以重生
3️⃣ 支持慢時尚，去二手店尋寶，或者自己落手修補衣物🪡

🏃 ESTP 「企業家」
你哋係✅行動派、✅足智多謀、✅精力旺盛
不如試下：
1️⃣ 有時間嗰陣行路或踩單車返工返學，感受零碳出行💨
2️⃣ 挑戰自己「一個月唔買新嘢」，檢視自己平時有咩係「需要」，有咩係「想要」
3️⃣ 同朋友一齊比賽：「睇下邊個慳到最多電！」🔋

🎭 ESFP「表演者」
你哋係✅人氣王、✅活力四射、✅鍾意同朋友一齊玩
不如試下：
1️⃣ 拍搞笑短片去介紹低碳綠色知識，例如素食／減塑／惜物等🕺
2️⃣ 嘗試膠囊衣櫥，再將唔同穿著配搭打卡，證明唔使買新衫都可以好時尚
3️⃣ 搞環保市集party，一齊同朋友玩到盡興🤣

🌱 小編唔係心理學專家，16型人格／MBTI都唔係精密科學，未必講得準㗎，唔知大家覺得準唔準呢？但無論你係邊種性格，都一定有最適合你嘅減碳方式！🌍✨
記住，唔需要做到100分，每個人做適合自己又做地球好嘅嘢，已經好有意義！每個小行動都係改變嘅開始 🌈

💬 留言話俾我哋知你係邊種類型，同埋你最想試邊個綠色行動！
📢 Tag埋朋友一齊搵到最啱自己嘅減碳方法！
📥 Save 低呢個 Post，逐步實踐綠色生活！

圖片來源： 16Personalities

#16型人格 #氣候行動

24/07/2026

🦜 「嘩！隻雀仔咁靚，識唔識講嘢㗎？」大家行過旺角雀仔街，或者平時碌IG，實見過色彩斑斕嘅金剛鸚鵡（Macaw）🌈。但你又知唔知，就係因為佢哋太靚，反而成為咗非法寵物貿易嘅搶手貨？😱

其實野生金剛鸚鵡一直係非法捕獵者嘅熱門目標，因為太多人想買返屋企打卡做寵物，搞到非法貿易極度猖獗！😢有啲幼鳥會被直接由巢穴捉走，再經地下渠道賣去海外。喺18至19世紀期間，已經有足足5種金剛鸚鵡因為過量捕獵而從地球上永遠絕種📉

聽落好似離香港好遠？其實唔係。香港過去亦曾有人因非法進口瀕危鸚鵡蛋而被判監👮‍♂️。野生動物貿易從來唔只係外國嘅事，每一次購買，都可能係供應鏈嘅一部分⚖️

好多金剛鸚鵡生活喺南美洲森林，包括亞馬遜流域，佢哋食果實嗰陣會順便傳播種子，幫手令植物喺其他地方生長🌱
當非法捕獵加上砍伐森林、山火同極端乾旱，鸚鵡少咗，森林復原能力都可能受影響。森林健康受損，儲存碳嘅能力亦會下降，間接加劇氣候變化問題🌳

想養雀、想親近動物，完全明白💛 但記住：
🙅‍♂️ 堅拒購買來歷不明或瀕危嘅野生動物做寵物
✅ 飼養前了解物種來源同合法文件，瀕危物種受《瀕危野生動植物種國際貿易公約》（CITES）規管
📱 見到網上有懷疑非法野生動物交易，可向漁農自然護理署舉報
♻️ 關注氣候變化，實踐低碳生活
💌 Share呢條片俾你身邊鍾意小動物嘅朋友，等更多人知道真相！

下次如果見到有人賣非法稀有寵物，不妨諗吓背後嘅代價，如果鍾意，不如俾啲鸚鵡可以喺天空自由飛翔🪽
👇 留言話俾我哋知，你最鍾意咩雀仔？一齊討論下啦！

#金剛鸚鵡 #非法寵物貿易 #亞馬遜雨林 #氣候變化

16/07/2026

⚽下個星期一就係2026世界盃決賽啦！🏆 大家最近捱夜睇波之餘，有冇發覺今屆比賽多咗好多水break，球員仲踢到大汗疊細汗？🥵

今屆美加墨 2026世界盃面對熱浪，採取咗幾項應對措施：
⚽️ 盡量減少正午開波，安排部分賽事喺有頂棚或冷氣嘅球場舉行（但決賽偏偏揀當地7月19日下午3點喺冇遮蓋球場踢，有人話係為咗遷就轉播🤔）
💧 上、下半場各設一次約 3分鐘降溫飲水休息時間
🩺 成立防暑降溫工作小組，監測天氣、加強場邊急救同預警
🌱 要求多個原有人工草場館轉用混合天然草，減低過熱及球員受傷風險，原來人造草喺烈日下曝曬，表面溫度可升到高達93°C，球員剷個波分分鐘受傷！換做天然草加灑水，正正就係最有效嘅降溫機制❄️

飲水暫停阻住睇波？
😒有唔少球迷甚至球員同教授都抱怨，話呢啲防暑措施好阻住地球轉，硬生生打亂咗比賽節奏。🇵🇹葡萄牙中場祖奧菲歷斯都話「傾向一氣呵成完成整個半場賽事，而唔係喺中間刻意停頓」，不過有21位頂尖科學家反而聯署話呢啲措施唔夠，建議降溫休息時間最少延長到6分鐘，同埋將考慮停賽嘅氣溫門檻應該喺由FIFA現時嘅32°C降至28°C ！🔥

點解要咁緊張？美國組織Climate Central研究指出，⚠️今屆世界盃104場比賽入面有97場都有機會俾氣候變化熱到影響表現，例如🇬🇧英格蘭喺世界盃8強對戰🇳🇴挪威嗰陣，當日氣溫有成33°C，濕度仲好高，體感溫度估計超過37°C，有人認為當日球員表現有受到天氣影響💭

另外有報告估計今屆有26場比賽嘅濕球黑球溫度（WBGT，簡單講就係人體喺高溫高濕環境實際感受到嘅熱壓力）可能達到或超過 26^∘ C😵‍💫 ，有 5場 更會超過 28°C。國際職業足球員協會認為，WBGT 到 26^∘ C應安排降溫休息；而28°C已經係「唔安全」水平，應該暫停比賽😨

有研究指出，WBGT每升1°C，球員就會：
⚠️高速跑動距離每分鐘少0.182米
⚠️中速跑動距離每分鐘少0.336米
即係話——你鍾意睇嘅快速反擊等戰術都可能因為太熱令到啲球員未必做到😮‍💨
而高溫高濕唔止令球員跑少咗、節奏慢咗，更會增加脫水、熱衰竭同中暑風險🚨

當然，都有隊伍利用水break去當成中場修正戰術嘅時間，例如🇦🇺澳洲隊喺D組分組賽對戰土耳其嗰陣，兩度喺飲水Break後入波，所以都證明咗只要好好利用，水break都可以係致勝之道！

高溫唔止令球員辛苦，球迷都有風險！2025年美國世冠盃已經有球迷因為高溫而排長龍買水，甚至暈倒🤒。而喺今屆世界盃，美國侯斯頓就有過百人喺開幕當日球迷慶祝活動中因酷熱天氣感到不適。有組織警告，球迷體質通常唔及球員，加上飲酒同年紀因素，中暑風險其實更高🥵

原來今屆世界盃本身都係碳排放大戶🤯？
🌍 今屆世界盃主辦方估計賽事排放約 360萬噸二氧化碳；有研究以較完整嘅假設保守估算，或可達至少 900萬噸二氧化碳當量，約等於成個盧森堡🇱🇺一年嘅排放量，淨係搭飛機嘅碳排放估計最高佔總量86%！
✈️點解咁多碳排放？今屆賽事由三國合辦，跨越加拿大、美國、墨西哥 3個幅員遼闊嘅國家，破天荒擴充到48隊，賽事由上屆 64場增至 104場，球迷同球隊喺三個大國飛來飛去，航空運輸嘅碳排放非常之高！

所以，未來大型運動賽事要問嘅，唔應只係「有冇冷氣」，而係：
🏟️ 可唔可以減少跨越半個大陸嘅賽程？
🚆 可唔可以優先用鐵路等公共交通連接主辦城市？
📅 可唔可以避開氣候唔穩定嘅時段舉辦（例如酷暑或寒冬），而唔係每次靠冷氣或暖氣開住頂硬上？
🌍 可唔可以控制賽事規模，同時公開而完整咁計算碳排放？

為咗避開夏天熱浪，2034年沙特世界盃好大機會好似卡塔爾嗰屆咁，改喺冬天踢🥶。雖然會搞亂各大歐洲聯賽賽程，但喺極端氣候面前，商業利益都要讓路。氣候行動唔係叫大家唔好睇波、唔好享受運動；反而係想令我哋仲可以喺安全嘅天氣下，繼續睇到真正高水平嘅比賽⚽️🌍
今個夏天，你會唔會因為天氣太熱而改變咗運動、睇波或者出街嘅習慣？留言講下。👇

相片來源：David Ramos, Alex Slitz, Michael Reaves, Getty Images, AFP, AP Photo, 天文台

#氣候變化 #世界盃2026 #熱浪 #飲水休息