17/10/2026
🌎 Një fundjavë ndryshe me aromë vjeshte ishte udhëtimi në Festën e gështenjës në Ano Xora Nafpaktias.
🌲Një fshat malor me pamje magjepse në mes të gjelbërimit dhe pyjeve me gështenja e bredha, me shtëpitë prej guri, me rrugicat me kalldrëm, me burimet e çesmat me ujin e ftohtë që zbriste nga mali, me ajrin e pastër, me ushqimet e produktet tradicionale, me mikpritjen, me bujtinat e shumta megjithëse është një fshat që numëron vetëm 12 banorë të përhershëm, me monopatet e veçanta dhe shtigjet e pyllit për pasionantët e natyrës.
🎼 Festa u bë tek sheshi i fshatit i mbushur plot vizitorë dhe ku kumbonte muzika tradicionale.
Na qerasën me ëmbëlsirë të zonës, me gështenja të pjekura dhe raki që ziehej në atë moment enkas për të pranishmit dhe kazanët e rakisë kishin marrë zjarr që herët në mëngjes.
Rreth shesh*t kisha, muzeu laografik dhe një autobus i vjetër si dekor, për të treguar historinë e fshatit.
Përgjatë rrugës kryesore të fshatit shtriheshin dyqane dhe kafe-taverna që shërbenin gatime të zonës me karakteristike byrekët me gështenja.
Teksa bisedonim me vëndasit na spjegonin për aktivitetet e shumta tradicionale gastronomike dhe sportive që organizonin gjatë gjithë vitit,
si festa e gështenjës, e rigonit, e cigaridhës, mbledhjen e gështenjave e kërpudhave, ecjen e organizuar në natyrë nëpër shtigjet e zonës, garat çiklistike dhe 4×4.
🇦🇱❤ Ndërkohë neve na tërhoqi vëmëndjen një tabelë, e ndoqëm atë dhe zbritëm shkallët e gjata pa mbarim që na çuan deri poshtë tek burimi Bukurin dhe u kënaqëm me bukurinë e vëndit.
Përreth burimit vareshin lule shumëngjyrëshe dhe pjergullat e rrush*t me erë, u freskuam me ujin e tij dhe shijuam natyrën e bukur duke kaluar momente të këndshme mes shoqërisë së mrekullueshme.
