30/04/2026
“ვეგან ჯორჯიას” ოფიციალური განცხადება
გვსურს, ბოლო პერიოდში მომხდარ მოვლენებთან კავშირში, სოლიდარობა გამოვუცხადოთ ვეგან აქტივისტებს და გამოვეხმაუროთ ჩვენი ორგანიზაციის დისკრედიტაციის მცდელობას.
⚠️ ჩვენი ორგანიზაციის წევრები და ვეგანი აქტივისტები გახდნენ “საზოგადოებრივი ორგანიზაცია აისი”-ს მხრიდან დისკრიმინაციული მოპყრობის მსხვერპლნი. ჩვენ ვგმობთ “აისის” მმართველი რგოლის მხრიდან განხორციელებულ დისკრიმინაციულ მოპყრობას. ასევე, ვგმობთ ფეისბუქ გვერდი “გარისა”-ს მხრიდან განხორციელებულ ცხოველებზე ძალადობის ფაქტს და მასში არასრულწლოვანთა ჩართულობას.
⛔️ “აისის” ქმედების მომხრეთა და “გარისა” -ს მმართველი პირის მიერ, განხორციელდა ჩვენი ორგანიზაციის მიზანმიმართული დისკრედიტაცია. კერძოდ - სოციალურ ქსელში ვრცელდება ჩვენი ორგანიზაციის რეგისტრაციის ოფიციალური დოკუმენტი, სადაც გამგეობის წევრებად ქართველ და უკრაინელ წევრებთან ერთად, არიან რუსეთის მოქალაქეებიც. საქართველოს კანონმდებლობა უფლებრივად არ უზღუდავს უცხო ქვეყნის მოქალაქეებს ა(ა)იპ-ში გაერთიანებას. ვეგან ჯორჯიას რეგისტრაციის დოკუმენტი არის საჯარო და ხელმისაწვდომი დაინტერესებულ პირთათვის.
✅ მიგვაჩნია, რომ ადამიანის ეთნიკურობასა და მოქალაქეობაზე აპელირება არის ქსენოფობიისა და შოვინიზმის გამოხატულება, რაც ცალსახად დასაგმობია. გვჯერა, რომ ადამიანის პიროვნებას განაპირობებს მისი არჩეული პოზიცია და ქმედებები, და არა ეთნიკური თუ სხვა ნიშანი. ჩვენ მკაცრად დავიცავთ ჩვენ აქტივისტებს და მათ ეთიკურ პოზიციას ჩვენს ხელთ არსებული სამართლებრივი და ინფორმაციული საშუალებებით.
🟢 “ვეგან ჯორჯია” არის ამაყი, რომ ათწლეულზე მეტია წარმოადგენს მულტინაციონალურ ორგანიზაციას, რომელიც აერთიანებს ადამიანებს სამართლიანობისა და ცხოველთა თავისუფლების იდეის გარშემო. გარდა ცხოველთა უფლებების დაცვისა, ჩვენ გვაქვს სოციალური პასუხისმგებლობა, პოზიცია გამოვხატოთ ირგვლივ მიმდინარე მოვლენებზე.
⬇️ ჩვენი პოზიცია ყოველთვის იყო ცხადი და საჯარო:
⭕️ რუსეთი ოკუპანტია.
⭕️ საქართველოს მომავალი პრო-ევროპულია.
⭕️ ქვეყანაში მიმდინარე რეპრესიები დასაგმობია.
⭕️ “არა რუსულ კანონს” - თავისუფლება არასამთავროებს და მედიას.
⭕️ თავისუფლება და მხარდაჭერა პოლიტ-პატიმრებს.
⭕️ წინააღმდეგობა ნაციზმს, ყოველ მჩაგვრელობით იდეოლოგიას და მათ მიმართ ტოლერანტობას.
⭕️ წინააღმდეგობა ცხოველსა და ადამიანზე ძალადობას. უარი ამ ძალადობის ნებისმიერი სახის მხარდაჭერას ან გამართლებას.
🔴 ჩვენი ინფორმაციით, ორგანიზაცია “აისი”-ს და “გარისა”-ს მხრიდან ოფიციალური განცხადება საქართველოში მიმდინარე მოვლენებზე არ გაკეთებულა.
⬇️ მეორე მხრივ, რამდენიმე ფაქტობრივი მტკიცებულება “ვეგან ჯორჯიას” მულტინაციონალური გუნდის და აქტივისტების მიერ განხორციელებული მოხალისეობრივი ქმედებების შესახებ:
✅ რუსეთ-უკრაინის სრულმასშტაბიანი ომის დაწყებიდან, 2022 წლის 4 მარტს, შეგროვდა 967$ (+1000$ ერთი აქტივისტისგან) უკრაინაში აქტივისტებისგან ინიცირებული სოციალური ვეგანური სასადილოს მხარდასაჭერად, რომელიც უფასო საკვებს აწვდიდა ომისგან დაზარალებულ ადამიანებსა და ცხოველებს.
✅ 2024 წლის 15 დეკემბერს, ვეგან ჯორჯია შეუერთდა პროევროპულ “ცხოველთამოყვარულების მარშს”.
✅ 2024 წლის 20 დეკემბერს, ვეგან ჯორჯიამ ჩაატარა პროევროპული “ვეგანთა მარში თავისუფლებისთვის”.
✅ 2024 წლის 29 დეკემბერს, ვეგან ჯორჯიას ინიცირებით ჩატარდა საქველმოქმედო ხელოვნების აუქციონი, საიდანაც შემოსული თანხის 100% (870 ლარი) გადაირიცხა საქართველოში პოლიტ-პატიმართა დახმარების ფონდში.
✅ ჩვენი აქტივისტები, პროევროპული აქციების მიმდინარეობისას, თვეების მანძილზე, თითქმის ყოველდღიურად იდგნენ რუსთაველის გამზირზე პროტესტანტებისთვის უფასო ცხელი სასმელების და ვეგანური საკვებით დასახმარებლად. საკვების თანხა იფარებოდა აქტივისტების პირადი რესურსით, ან შემოსული დონაციების 100%-ით.
✅ პროევროპული აქციებისას გაფიცულ სტუდენტების მხარდასაჭერად, ვსტუმრობდით უნივერსიტეტებს, რათა მიგვეწოდებინა ჩვენივე ხელით, სახლში დამზადებული მცენარეული საკვები.
✅ დარბევებისას, ჩვენი ვეგანური მაგიდა და მოხალისეები, არაერთხელ მოყოლილან მომწამვლელი გაზისა და წიწაკის სპრეის ეპიცენტრში; ჩვენი აქტივისტები გამხდარან ძალოვანი სტრუქტურებისგან ცემის მსხვერპლნი. პარალელურად, დაშავებულებს ვუწევდით პირველად სამედიცინო დახმარებას ფიზიოლოგიური ხსნარების მეშვეობით.
✊ ჩვენს მიერ შეტანილი წვლილი დოკუმენტირებულია მრავალი მედია საშუალების მიერ. ცხოველთა თავისუფლება და ადამიანთა თავისუფლება ერთმანეთთან მჭიდროდ დაკავშირებული საკითხებია. ჩვენი ბრძოლა მიემართება ყოველგვარ უსამართლო ჩაგვრას.
⚠️თუ თქვენ გახდით დისკრიმინაციული მოპყრობის მსხვერპლი თქვენი ეთიკური შეხედულებების გამო, ან განიცდით ზეწოლას, გთხოვთ მიმართოთ შესაბამის ორგანოებს, ან დაგვიკავშირდეთ. ანონიმურობა დაცულია.
💚 🌱 მადლობა ადამიანებს, რომლებიც იცავენ ცხოველებს და აქტივისტებს, რომლებიც წარმოადგენენ ცხოველთა ხმას.
#ვეგანჯორჯია
