03/03/2026
გილოცავთ დედის დღეს!
🇬🇪საქართველოს პროფესიული კავშირების გაერთიანება გილოცავთ დედის დღეს 🌷 და მიმართავს სახელმწიფოს, გადადგას ქმედითი ნაბიჯები ორსულობის და მშობიარობის გამო და ბავშვის მოვლის გამო (დეკრეტული) შვებულების ღირსეული ანაზღაურებისა და დედობის დაცვის ეფექტური გარანტიების შესაქმნელად.
❗დღემდე სერიოზულ პრობლემად რჩება დეკრეტული შვებულების ანაზღაურების საკითხი.
📌 მოქმედი კანონმდებლობით:
* საჯარო მოხელეებსა და საჯარო სკოლების პედაგოგებს დეკრეტული შვებულება სრულად უნაზღაურდებათ;
* სხვა ყველა დასაქმებულს სახელმწიფო 183 დღეში უხდის არაუმეტეს 2000 ლარს;
* დამსაქმებელს ამ პერიოდის დამატებით ანაზღაურების ვალდებულება არ გააჩნია.
🚫 დეკრეტული შვებულებითა და შესაბამისი ანაზღაურებით ვერ სარგებლობენ:
* არაფორმალურ სექტორში დასაქმებულები;
* პლატფორმული გზით დასაქმებულები;
* ატიპიური კონტრაქტების მქონე პირები.
⚖ არსებული მოცემულობა ეწინააღმდეგება შრომის საერთაშორისო ორგანიზაციის №183 კონვენციას „დედობის დაცვის შესახებ“, რომლის მიხედვითაც ყველა დასაქმებულს, სექტორის მიუხედავად, უფლება აქვს დეკრეტული შვებულების პერიოდში მიიღოს ანაზღაურების არანაკლებ 2/3, 14 კვირის განმავლობაში.
№191 რეკომენდაციის მიხედვით კი ორსულობისა და მშობიარობის გამო შვებულების ანაზღაურება უნდა გაიზარდოს ქალის წინა შემოსავლის სრულ ოდენობამდე.
📊 2000 ლარიანი სახელმწიფო დახმარება საშუალო ხელფასის მხოლოდ 16.9%-ს შეადგენს
👩👧 დეკრეტული შვებულების ასეთი რეგულირებით უპირატესად ზარალდებიან ქალები, რადგან საქართველოში ოჯახური პასუხისმგებლობის ძირითადი ტვირთი სწორედ მათ ეკისრებათ.
შედეგად:
* დედები ხშირად იძულებულნი არიან გამოეთიშონ შრომის ბაზარს;
* ხდებიან ეკონომიკურად არააქტიურები.
📈 2025 წლის მონაცემებით, ქალების ეკონომიკური აქტიურობა მხოლოდ 55.8%-ს შეადგენს, რაც კაცების მაჩვენებელს 22%-ზე მეტით ჩამორჩება.
შრომის ბაზარზე დაბრუნებას ართულებს:
* დედობის დაცვის არასაკმარისი გარანტიები;
* სამუშაოსა და ოჯახური პასუხისმგებლობის შეთავსების სირთულე;
* ზრუნვის არასათანადო ინფრასტრუქტურა;
* დაბალი ანაზღაურება.
2024 წელს საქართველოში დაიბადა მხოლოდ 39 483 ბავშვი — 2017 წელთან შედარებით 13 810-ით ნაკლები.
⚠ გარდაცვლილთა რაოდენობა (43 971) აჭარბებს დაბადებულთა რაოდენობას, ხოლო მოსახლეობის რაოდენობა კიდევ უფრო მცირდება მიგრაციის უარყოფითი სალდოს ფონზე.
📢 მივმართავთ სახელმწიფოს:
დედობის დაცვის უზრუნველსაყოფად აუცილებელია სოციალური პარტნიორების ჩართულობით:
✔ მოხდეს შრომის საერთაშორისო ორგანიზაციის №183 („დედობის დაცვის შესახებ“) და №156 („ოჯახური პასუხისმგებლობის მქონე დასაქმებულების შესახებ“) კონვენციების რატიფიცირება;
✔ ყველა დასაქმებულს, სექტორის მიუხედავად, მიეცეს დეკრეტული შვებულების სრული ანაზღაურება სახელმწიფოსა და დამსაქმებლის თანამონაწილეობით;
✔ გაძლიერდეს დედობის დაცვის საკანონმდებლო გარანტიები;
✔ შეიქმნას ზრუნვის სათანადო ინფრასტრუქტურა.
🙆♀️დედობის დაცვა სოციალური სამართლიანობის, ღირსეული შრომის და ქვეყნის დემოგრაფიული მომავლის საკითხია.
#დედობისდაცვა #დეკრეტულიშვებულება #შრომისუფლება #პროფკავშირები #დედისდღე
