04/09/2026
🗺️ ახალი ეტაპი საქართველოს კარტოგრაფიულ და სამეცნიერო საქმიანობაში
მოხარული ვართ, რომ ჭიათურის მუნიციპალიტეტის მერიასა და საქართველოს კარტოგრაფთა ასოციაციას შორის ურთიერთთანამშრომლობის მემორანდუმი გაფორმდა, რომლის მიზანია ჭიათურის მუნიციპალიტეტის ტერიტორიაზე სამეცნიერო-კვლევითი, კარტოგრაფიული და საგანმანათლებლო საქმიანობის ხელშეწყობა, თანამედროვე კარტოგრაფიული პროდუქტების შექმნა და გეოსივრცითი მონაცემების შეგროვება, დამუშავება და გამოყენება.
ეს თანამშრომლობა განსაკუთრებით მნიშვნელოვანია იმით, რომ იგი აკავშირებს ადგილობრივ თვითმმართველობას, აკადემიურ სივრცეს, სტუდენტურ სამეცნიერო საქმიანობასა და თანამედროვე კარტოგრაფიულ ტექნოლოგიებს.
მემორანდუმის საფუძველზე საქართველოს კარტოგრაფთა ასოციაცია სამეცნიერო-მეთოდოლოგიურ მენტორობას უწევს თბილისის სახელმწიფო უნივერსიტეტის სტუდენტურ სამეცნიერო პროექტს, „ზემო იმერეთისა და ზემო რაჭის მუნიციპალიტეტების ლანდშაფტთა ზაფხულის მდგომარეობების კვლევა და კომპლექსურ-გეოგრაფიული კარტოგრაფირება“. პროექტის სამეცნიერო მენტორები არიან საქართველოს კარტოგრაფთა ასოციაციის პრეზიდენტი თენგიზ გორდეზიანი, გენერალური მდივანი საბა მოდებაძე, ვიცე-პრეზიდენტები ზურაბ ლაოშვილი, თედო გორგოძე და GT Survey-ის დირექტორი გიორგი ხაჩიძე.
2026 წლის 3–10 აგვისტოს განხორციელებული სტუდენტური სამეცნიერო ექსპედიციის ფარგლებში დაგეგმილი იყო ჭიათურის მუნიციპალიტეტის ტერიტორიაზე კომპლექსურ-გეოგრაფიული, ლანდშაფტური და კარტოგრაფიული საველე კვლევები, ბუნებრივ-ტერიტორიული კომპლექსების (ბტკ) შესწავლა, გეოსივრცითი მონაცემების შეგროვება და თანამედროვე დისტანციური ზონდირების ტექნოლოგიების გამოყენება.
კვლევით პროცესში გათვალისწინებული იყო დრონით აეროგადაღება, LiDAR-ტექნოლოგია, GPS-კოორდინატების დაფიქსირება, საველე კარტოგრაფირება და გეოინფორმაციული მონაცემების პირველადი დამუშავება.
ამ თანამშრომლობის ერთ-ერთი მნიშვნელოვანი შედეგი იქნება კვლევის საფუძველზე მომზადებული კარტოგრაფიული და გეოსივრცითი მასალების გაზიარება ჭიათურის მუნიციპალიტეტის მერიისთვის. მიღებული მასალები შესაძლებელია გამოიყენონ მუნიციპალური საქმიანობის, სივრცითი დაგეგმარების, განათლების, კულტურის, ტურიზმისა და საინფორმაციო მიზნებისთვის.
ამასთან, მემორანდუმი მხოლოდ ერთი ექსპედიციის ფარგლებში თანამშრომლობას არ გულისხმობს. მხარეები მიზნად ისახავენ სტუდენტთა პრაქტიკული და სამეცნიერო უნარების განვითარებას, თანამედროვე კვლევითი ტექნოლოგიების გამოყენების ხელშეწყობას და მომავალში ერთობლივი სამეცნიერო, საგანმანათლებლო და კარტოგრაფიული პროექტების განხორციელებას.
ჩვენთვის, როგორც საქართველოს კარტოგრაფთა ასოციაციის წარმომადგენლებისა და პროექტის სამეცნიერო მენტორებისთვის, განსაკუთრებით მნიშვნელოვანია, რომ კარტოგრაფია აღარ დარჩეს მხოლოდ აკადემიური კვლევის ფარგლებში და მისი შედეგები რეალურად დაუკავშირდეს ტერიტორიის შესწავლას, ადგილობრივ განვითარებას, განათლებასა და სივრცით მართვას.
მადლობა ჭიათურის მუნიციპალიტეტის მერიას თანამშრომლობისა და მხარდაჭერისთვის.
განსაკუთრებული მადლობა ყველა სტუდენტს, მკვლევარსა და კოლეგას, ვინც ამ სამეცნიერო პროცესის მონაწილეა.
ეს მხოლოდ ერთი მემორანდუმი არ არის, ეს არის მცდელობა, თანამედროვე კარტოგრაფიული მეცნიერება, სტუდენტური კვლევა და საქართველოს მუნიციპალიტეტები ერთიან სამეცნიერო სივრცეში დავაკავშიროთ. 🌍🗺️
#საქართველოსკარტოგრაფთადაასოციაცია #ჭიათურა #კარტოგრაფია
