23/06/2025
"კართაგენი უნდა დაინგრეს" - კატონი
საქართველოს დამოუკიდებლობა არის ქართველი ხალხის მონაპოვარი - აშკარა სურვილი, რომ გვსურს ცივილიზებულ, დემოკრატიულ, თავისუფალ და სამართლებრივ სახელმწიფოში ცხოვრება.
სურვილი, რაც არ გვსურს - ავტორიტარიზმი, დრაკონული კანონები, ერთპარტიული დომინაცია, გაყალბებული არჩევნები, ელიტების მმართველობა, კორუფცია, მმართველ ძალაზე დამოკიდებული ინსტიტუტები, შელახული საერთაშორისო იმიჯი და უბრალოდ რუხად ქცეული ყოველდღიურობა - დროებით.
2024 წლის არჩევნებმა არ ასახა ქართველი ხალხის ნება და მივიღეთ ლეგიტიმაციას მოკლებული საკანონმდებლო ორგანო, საერთაშორისოდ არაღიარებული მთავრობა და ტოტალურად დისკრედიტებული სასამართლო შტო.
ნოემბრის ბოლოს, "ქართული ოცნების" წევრი, ირაკლი კობახიძე, აკეთებს განცხადებას და გვამცნობს, რომ 2028 წლამდე არ აპირებენ დღის წესრიგში დააყენონ ევროკავშირში გაწევრიანების საკითხი - ჩვენი და ბევრი ადგილობრივი თუ საერთაშორისო ექსპერტის შეფასებით, ეს არაკონსტიტუციური, ანტიქართული და პოლიტიკურად გაუმართლებელი განცხადება/გადაწყვეტილება იყო. ამ ფაქტს მასშტაბური დემონსტრაციები მოჰყვა, რომლებიც დღემდე გრძელდება.
ამ პერიოდის განმავლობაში დაიწყო ავტორიტარიზმის კონსოლიდაციის ეტაპი, რაც ერთი მხრივ, გამოიხატებოდა პროტესტის დათრგუნვის მცდელობით, მეორე მხრივ, პოლიტიკური ველის მოსუფთავრებით; ეს უკანასკნელი აქტიურ ფაზაშია და საკმაო სისწრაფითა და სიზუსტით მიმდინარეობს, სამწუხაროდ.
რა მოხდა?
ა) 50-ზე მეტი უსამართლო ტყვე;
ბ) 6 პარტიული ლიდერი ციხეში (რაოდენობა მზარდია);
გ) მედიის დევნა (დაიხურა მთავარი არხი, სხვა არასამთავრობო არხები ფინანსური კრიზისისა და სამთავრობო ზეწოლის ქვეშ არიან);
დ) ევროკავშირში ინტეგრაციის პროცესი ოფიციალურად შეჩერებულია;
ე) ეკონომიკურად დამოკიდებული გავხდით რუსეთზე;
ვ) ეტაპობრივად სახელმწიფო ინაცვლებს ავტორიტარულ ბანაკში;
ზ) უსამართლო საკანონმდებლო ცვლილელები - უამრავმა არასამთავრობო ორგანიზაციამ, რომლებიც ემსახურებოდნენ საგანმანათლებლო, ჰუმანიტარულ და სხვა საკეთილდღეო მიზნებს, უბრალოდ შეწყვიტა ფუნქციონირება; შეიზღუდა სიტყვისა და გამოხატვის თავისუფლება;
თ) იგეგმება აკადემიური წრეების წმენდა და მთავრობისადმი არალოიალური კადრების სამსახურიდან გაშვება;
ი) თავს ესხმიან აქტივისტებსა და დიპლომატიური კორპუსის წარმომადგენლებს;
კ) საფრთხე ემუქრება შენგენის ზონაში უვიზო მიმოსვლასა და სხვა სიკეთეებს, რასაც ევროკავშირის კომისია სთავაზობს ქართველებს;
ლ) სია მზარდია . . .
საქართველოს სახელმწიფომ და ხალხმა წლების წინ გააკეთა არჩევანი, ევროპული არჩევანი, რასაც თან მოჰყვება ძლიერი, პროგრესული, მდიდარი, დემოკრატიული, პლურალისტური, ერთიანი და ნათელი საქართველოს იდეა.
ეს იდეა კი დღეს საფრთხის ქვეშაა და რუსული დიქტატურის მორევის პირას მყოფთ, გვმართებს შემართება, განვლილის გადაფასება, ერთიანობა და მომავლისთვის ბრძოლა - როგორ? უნდა გავაკეთოთ ყველაფერი ის, რასაც გავაკეთებდით საკუთარი სამშობლოს გადასარჩენად!
იდეაში, პოსტის წერაც პასუხით დავიწყეთ:
"კართაგენი უნდა დაინგრეს" - ქართველი ხალხი*
