26/05/2026
1918 წლის 26 მაისს ქართველი ხალხი საუკუნოვანი რუსული ბორკილებისგან გათავისუფლდა. დაიწყო ხანმოკლე, მაგრამ საამაყო მიღწევებით დახუნძლული ეპოქა, რომელსაც საქართველოს უახლესი ისტორიის ოქროს ხანად ითვლება.
პირველი რესპუბლიკა მრავალი თვალსაზრისით სანიმუშო სახელმწიფოს წარმოადგენდა, რომელიც არაერთი დემოკრატიული მახასიათებლით, ადამიანის უფლებათა დაცვით, მოქალაქეთა თანასწორობის უზრუნველყოდით, ქალებისთვის საარჩევნო უფლების მინიჭებითა და მოქალაქეთა პოლიტიკური თავისუფლების ხარისხით ბევრ განვითარებულ დასავლურ ქვეყანას უსწრებდა.
საბჭოთა ოკუპაციის შემდგომ, რომელიც რუსეთ-საქართველოს 5-კვირიან სამამულო ომს მოყვა, ბოლშევიკურმა რეჟიმმა 1918-21 წლების მემკვიდრეობის ერის კოლექტიური მეხსიერებიდან ამოშლა განიზრახა. საქართველოს ისტორიაში ერთ-ერთ ყველაზე წარმატებულ ეპოქას მტრის პროპაგანდამ "სისხლიანი 3 წელი" უწოდა, ამ ეპოქის შემოქმედთ კი "მკვლელებად, ჯალათებად და მწამებლებად" მოიხსენიებდნენ. იმასაც წერდნენ, რომ საქართველოს დამოუკიდებლობის მოსპობის შემდგომ, ქართველმა მშრომელებმა "თავისუფლად იწყეს სუნთქვა".
ეს მაგალითებიც მოწმობს, რომ ისტორია ცოცხალია, ისტორია მეორდება და ისტორია არასდროსაა მხოლოდ წარსული.
დამოუკიდებლობის გამოცხადებიდან 108 წელი გავიდა. ამ პერიოდში ქართველი ხალხის კოლექტიურ მეხსიერებაში არაერთი ძალადობრივი წყვეტა მოხდა. ყველა შემთხვევაში ძალადობრივი წყვეტის მიზეზი ერთი იყო. სწორედ ამიტომ, ქედს ვიხრით რუსეთის წინააღმდეგ ყველა ეპოქაში მებრძოლი პატრიოტების ხსოვნის წინაშე. დაე, აღსრულდეს ნება მათი. გაუმარჯოს თავისუფალ, დამოუკიდებელ, ძლიერ, ერთიან საქართველოს - საქართველოს რუსეთის გარეშე!
