19/05/2026
2026 წლის 2–5 მაისს თბილისში გაიმართა ალერგიის, ასთმისა და კლინიკური იმუნოლოგიის XV საერთაშორისო კონგრესი - „GAACI meets WAO 2026“, რომელმაც თავი მოუყარა მსოფლიოს სხვადასხვა ქვეყნის 500-ზე მეტ დელეგატს, მეცნიერს, კლინიცისტსა და ახალგაზრდა მკვლევარს. აღნიშნული კონგრესი იქცა რეგიონში ერთ-ერთ ყველაზე მასშტაბურ და მაღალი აკადემიური სტანდარტის მქონე სამეცნიერო პლატფორმად ალერგოლოგიისა და კლინიკური იმუნოლოგიის მიმართულებით.
კონგრესის ფარგლებში, საქართველოს ალერგოლოგიისა და კლინიკური იმუნოლოგიის ასოციაციის (GAACI) მოწვევით, საზეიმოდ აღინიშნა ალერგიის მსოფლიო ორგანიზაციის (WAO) 75 წლისა და ევროპის ალერგოლოგიისა და კლინიკური იმუნოლოგიის აკადემიის (EAACI) 70 წლის იუბილე, რაც განსაკუთრებულ სიმბოლურ და ისტორიულ მნიშვნელობას ანიჭებდა ღონისძიებას.
კონგრესი ევროპული აკრედიტაციის საბჭოს მიერ შეფასდა 24 ევროპული CME კრედიტ-ქულით, რაც წარმოადგენს უმაღლეს შეფასებას. აღნიშნული შედეგი უპრეცედენტოა საქართველოს სამეცნიერო-სამედიცინო სივრცისთვის, ვინაიდან მსგავსი მოცულობის ევროპული აკრედიტაცია საქართველოში ჩატარებულ არც ერთ სამეცნიერო კონგრესს მანამდე არ მიუღია.
კონგრესს ესწრებოდნენ და მონაწილეობდნენ მსოფლიოში აღიარებული მეცნიერები და საერთაშორისო პროფესიული საზოგადოების ლიდერები, მათ შორის: აარონ ჩეხანოვერი, მარიო მორაის ალმეიდა, ალენ კაპლანი, ბრაიან მარტინი, ჯორჯიო ვალტერ კანონიკა, ლენი როსენვასერი, იგნასიო ანსეტოგუი, ლუსიანა ტანო, ელხამ ჰოსნი, მელინდა რატკოფი, ანდრე მორეირა, კამალ მაურისე ჰანა, სევდეთ ოზდემირი და მრავალი სხვა საერთაშორისო ექსპერტი.
კონგრესის ერთ-ერთ უმნიშვნელოვანეს მოვლენად იქცა ის ფაქტი, რომ World Allergy Organization-მა თბილისის სახელმწიფო სამედიცინო უნივერსიტეტსა და წყალტუბოს ალერგიის, ასთმისა და კლინიკური იმუნოლოგიის ცენტრს მიანიჭა „ბრწყინვალების ცენტრის“ (Center of Excellence) სტატუსი. აღნიშნული აღიარება წარმოადგენს უმაღლეს საერთაშორისო შეფასებას და ადასტურებს ამ ინსტიტუციების მსოფლიო სტანდარტებთან შესაბამისობას როგორც კლინიკური, ისე სამეცნიერო-კვლევითი მიმართულებით.
ასევე განსაკუთრებული მნიშვნელობის იყო ის გარემოება, რომ საქართველოს ეროვნული უნივერსიტეტმა (SEU) ნობელის პრემიის ლაურეატს პროფესორ აარონ ჩეხანოვერს მიანიჭა საპატიო დოქტორის წოდება საერთაშორისო სამეცნიერო საქმიანობასა და ბიომედიცინის განვითარებაში შეტანილი გამორჩეული წვლილისათვის.
კონგრესის ფარგლებში ასევე ჩატარდა „საერთაშორისო სკოლა ალერგოლოგიასა და იმუნოლოგიაში“, რომელიც მოიცავდა პრაქტიკულ ვორქშოპებს, მასტერკლასებსა და ინტენსიურ საგანმანათლებლო სესიებს. სკოლის მთავარი მიზანი იყო სტუდენტების, რეზიდენტებისა და ახალგაზრდა მკვლევრებისათვის თანამედროვე კვლევითი მეთოდოლოგიის, კლინიკური პრაქტიკისა და მტკიცებულებებზე დაფუძნებული მედიცინის უახლესი სტანდარტების სწავლება, რაც მნიშვნელოვნად უწყობს ხელს პრაქტიკული უნარ-ჩვევების განვითარებასა და საერთაშორისო სტანდარტების შესაბამისი სამეცნიერო კვლევების დაგეგმვა-განხორციელებას.
საქართველოს ალერგოლოგიისა და კლინიკური იმუნოლოგიის ასოციაცია მადლობას უხდის შემდეგ უნივერსიტეტებსა და დაწესებულებებს:
თბილისის სახელმწიფო სამედიცინო უნივერსიტეტი, თბილისის სამედიცინო აკადემია, საქართველოს ეროვნული უნივერსიტეტი, ევროპის უნივერსიტეტი, კავკასიის უნივერსიტეტი, კავკასიის საერათაშორისო უნივერსიტეტი, კენ ვოლკერის საერთაშორისო უნივერსიტეტი, აღმოსავლეთ-დასავლეთ უნივერსიტეტი, ბათუმის საერთაშორისო უნივერსიტეტი, თბილისის სახელმწიფო უნივერსიტეტი, საქართველოს აგრარული უნივერსიტეტი, სამედიცინო ცენტრი - "მრჩეველი" - ლიმბახის დიაგნოსტიკის ევროპული ჯგუფი, სამედიცინო ბიოტექნოლოგიის ინსტიტუტი, იოველ ქუთათელაძის ფარმაკოქიმიის ინსტიტუტი.
საქართველოს ალერგოლოგიისა და კლინიკური იმუნოლოგიის ასოციაცია ასევე გულწრფელ მადლობას უხდის ყველა საერთაშორისო და ადგილობრივ სპიკერს, პარტნიორ ორგანიზაციასა და სპონსორს, რომლებმაც მნიშვნელოვანი წვლილი შეიტანეს კონგრესის წარმატებით განხორციელებაში და კიდევ ერთხელ დაადასტურეს საქართველოს მზარდი როლი საერთაშორისო სამეცნიერო და სამედიცინო თანამშრომლობის სფეროში.
შევხვდებით მალე - ახალი სამეცნიერო იდეებით, საერთაშორისო თანამშრომლობის კიდევ უფრო ფართო შესაძლებლობებითა და მედიცინის განვითარების საერთო მიზნის ირგვლივ გაერთიანებული პროფესიული საზოგადოებით.
World Allergy Organization
EAACI
კონგრესის პროგრამა შეგიძლიათ იხილოთ ჩვენს ოფიციალურ ვებ-გვერდზე: https://gaaci.ge/event-detail.html?id=12&type=upcoming
კონგრესის შესახებ სიუჟეტი შეგიძლიათ იხილოთ შემდეგ ბმულზე: https://www.facebook.com/share/v/1CgHnikExq/
