2006 წელს თბილისში “ფსიქოლოგიური მომსახურების ცენტრი მწვანე სახლი” გაიხსნა, 0-3 წლის ბავშვებისა და მათი მშობლებისთვის, მცირეწლოვანი ბავშვების სოციალიზაციისა და ფსიქიკური განვითარების დარღვევების პრევენციის მიზნით. პირველი “მწვანე სახლი” ფ. დოლტომ (ფრანგი ბავშვთა ფსიქიატრი და ფსიქოანალიტიკოსი) დაარსა პარიზში 1979 წელს, მას შემდეგ მომსახურების ეს მოდელი ფართოდ გავრცელდა და დღეს მსოფლიოს მრ
ავალ ქვეყანაში წარმატებით ფუნქციონირებს.
თბილისის „მწვანე სახლის” მომსახურება 2006 წლიდან დღემდე მნიშვნელოვნად გაფართოვდა; პატარების სოციალიზაციისა და პრევენციისთვის შექმნილ დოლტოს “მწვანე სახლთან” ერთად ის უკვე არაერთ თერაპიულ სერვისს სთავაზობს როგორც ბავშვებს, ასევე მოზარდებს , ფსიქო-ემოციური, ფსიქო-მოტორული , განვითარების, ქცევის, მეტყველების, კომუნიკაციის დარღვევებისა თუ სხვა პრობლემების შემთხვევაში.
თბილისის “მწვანე სახლის” გახსნასა და ფუნქციონირებას საფუძვლად ფრანგი ფსიქოანალიტიკოსებისა და ქართველი ფსიქოლოგების თანამშრომლობა უდევს, რაც 1999 წლიდან დაიწყო და თეორიულ სწავლებას და ერთობლივ კლინიკურ მუშაობას მოიცავს. ESPACE ANALYTIQUE (Association de Formation Psychanalytique et de Recherche Freudienne) არის ის ფრანგული პროფესიული ასოციაცია, რომელთანაც მთელი ამ წლების მანძილზე თბილისის “მწვანე სახლს” მჭიდრო პროფესიული ურთიერთობა აქვს და საიდანაც ის პროფესიულ დახმარებასა და სუპერვიზიებს იღებს.
ფსიქოანალიტიკური თერაპიული მუშაობა სუპერვიზიის თანხლებით “მწვანე სახლის” ძირითადი სპეციფიკაა, რითაც ის განსხვავდება თბილისში არსებული სხვა ცენტრებისგან.
მიუხედავად იმისა, რომ ფსიქოანალიტიკური თერაპიის გარდა დღეს მწვანე სახლში სხვადასხვა თერაპიული მომსახურებაა (მეტყველების თერაპია, არტთერაპია, ქვიშით თერაპია, ფლორთაიმი, მითოდრამა, სპეცპედაგოგი და სხვ.) , თითოეული კონკრეტული შემთხვევის განხილვა და ანალიზი ძირითადად ფსიქოანალიზის ჭრილში მიმდინარეობს და მის საუკუნოვან ცოდნასა და კლინიკურ გამოცდილებას ეყრდნობა. კონკრეტულ თერაპიულ თუ კლინიკურ სტრატეგიას უპირატესობა ენიჭება არა ზოგადად დადგენილი სტანდარტების მიხედვით, არამედ ბავშვისა და ოჯახის რეალური ფსიქიკური საჭიროებებისა და ინდივიდუალობის გათვალიწინებით. აქ ნებისმიერი დიაგნოზის თუ მდგომარეობის მიუხედავად, ბავშვისა და მოზარდის პირად და ოჯახურ ისტორიას, მათ ფსიქო-ემოციურ მდგომარეობას განსაკუთრებული მნიშვნელობა ეძლევა. თუ ბავშვი ვერ ან არ ლაპარაკობს, თერაპევტი უსმენს ნახატით, თამაშით, მიმიკით თუ ქცევით გამოხატულ მის ფსიქიკურ განცდებს, რასაც ანალიზი და ინტერპრეტაცია მოსდევს. ეს არის ბავშვის ურთიერთობის განსაკუთრებული ფორმა ფსიქოთერაპევტთან, რომელიც მისი არც მშობელია, არც ექიმი და არც აღმზრდელი. ამ პროცესში ბავშვი პირდაპირ ან სიმბოლური ფორმით გადმოსცემს თავის ფსიქო-ემოციურ მდგომარეობას, პრობლემას, წუხილს, ფსიქიკურ ტკივილს... ამ ყველაფრის მოსმენა, გაცნობიერება, ანალიზი არის პროცესი, რომელსაც თერაპევტი წარმართავს ბავშვის მდგომარეობის გაუმჯობესებისა თუ განკურნებისთვის.
მწვანე სახლის მომსახურება გარკვეული პრინციპების, წესების დაცვას ითვალისწინებს. სეანსების დრო, ხანგრძლივობა, ურთიერთობა ბავშვებთან თუ მშობლებთან, სეანსების რაოდენობა, საფასური და სხვ. გარკვეულ ჩარჩოებს მოითხოვს, რისი დაცვაც სავალდებულოა როგორც მშობლების, ასევე სპეციალისტების მხრიდან.
მწვანე სახლში არსებულ თითოეულ თერაპიულ მომსახურებას საკუთარი სპეციფიკა, საკუთარი მიდგომა და თერაპიული ჩარჩო აქვს. შერჩევა თითოეულისთვის ინდივიდუალურად ხდება, ინტერესების, საჭიროებების შესაბამისად და მშობლების დამოკიდებულების გათვალისწინებით.
“მწვანე სახლის” პარტნიორია საფრანგეთის საელჩო საქართველოში. ფრანგი სპეციალისტების თბილისში ვიზიტების დროს საფრანგეთის საელჩოსა და თბილისის “მწვანე სახლის” ორგანიზებით 2006 წლიდან დღემდე არაერთი კონფერენცია და საჯარო სემინარი ჩატარდა ფსიქოანალიზსა და ფსიქოპათოლოგიაში, ფსიქოლოგების, სტუდენტებისა და დაინტერესებული საზოგადოების ფართო წრისათვის.
2011 წელს მწვანე სახლმა ფილიალი გაიხსნა ქალაქ ახალციხეში, 2015 წელს კი ახალციხის ფილიალი დამოუკიდებელ ასოციაციად დაარეგისტრირეს “მწვანე სახლის” დამფუძნებლებმა. ახალ ასოციაციას „მწვანე სახლი ახალციხეში“ დაერქვა და 2119 წლიდან დღემდე მის მომსახურებას ახალციხის მუნიციპალიტეტი აფინანსებს.
2024 წლის სექტემბრიდან “მწვანე სახლის” კიდევ ერთი ფილიალი გაიხსნა ქალაქ მცხეთაში, ქ. მცხეთისა და მცხეთა-მთიანეთის რეგიონის მოსახლეობისთვის. ისიც მცირეწლოვან ბავშვებსა და მოზარდებს მოემსახურება როგორც ფსიქიკური დარღვევების პრევენციის, ასევე ფსიქოთერაპიისა და ფსიქორეაბილიტაციის მიზნით.
