10/03/2026
🌸 ქალები, რომლებიც ჭიათურას აძლიერებენ
👉 ჩვენი კამპანიის ფარგლებში წარმოგიდგენთ ქალებს, რომლებიც საკუთარი შრომით, პროფესიონალიზმითა და პასუხისმგებლობით ყოველდღიურად აძლიერებენ ჩვენს ქალაქს.
👩🏫 კამპანიის ბოლო მონაწილე გახლავთ მარინა ბედინაშვილი— ქართული ენისა და ლიტერატურის პედაგოგი, რომელიც მრავალი წლის განმავლობაში ემსახურება ახალგაზრდების განათლებას, მათი აზროვნებისა და ღირებულებების ჩამოყალიბებას.
💬 მარინა ამბობს:
„ჩემთვის ცნება ძლიერება უფრო სულის ძალასთან მიდის, ვიდრე ფიზიკურთან. ხშირად ფიზიკურად ძლიერი ადამიანი სულიერ სიძლიერეს ვერ ავლენს. არც სიმძიმეა სიძლიერის პირობა. ნოდარ დუმბაძისა არ იყოს: „ადამიანის სული გაცილებით მძიმეა, ვიდრე სხეული“. ჰოდა, ყველა ჩვენებურად ვცდილობთ ამ სიმძიმის სიძლიერით ზიდვას. ალბათ, არც მე ვარ გამონაკლისი.
დღეს ძლიერი ქალი ჭიათურაშიც და ყველგან ჩემთვის რეალიზებულ, შემდგარ, საკუთარ საქმეს სიყვარულით შეჭიდებულ ადამიანს ჰქვია. ასეთები კი ღვთის მადლით მრავლად არიან ჩვენს ქვეყანაშიც და ჩვენს მშობლიურ ჭიათურაშიც. თითქმის ყველა დასაქმებული ქალის უკან დგას ოჯახი, მასზე ზრუნვა და თან ის საქმე, რასაც ემსახურება. ეს მისია ადვილი არაა. ის თანაბრად ითხოვს ქალისგან სულიერ და ფიზიკურ გამძლეობას, შრომას. მით უმეტეს, პატარა ქალაქში, სადაც ყველა ოჯახს სოფელი და იქაური მეურნეობა აქვს. არც ამ მძიმე შრომაზე ამბობენ უარს ქალები. მეტიც, თვალს ახარებს ჩვენი სოფლების კოპწიად მოწესრიგებული ეზო-კარმიდამო. ამაში დიდი წვლილი ხომ ქალებისაა.
მინდა ვისარგებლო შემთხვევით და რვა მარტი, ქალთა დღე, მივულოცო ჩემს თანაქალაქელ ქალბატონებს. ვუსურვო ჯანმრთელობა, მშვიდობა, მათი შრომის დაფასება. ჩვენი, ქალების, მხრებზე იდგა და დგას ქვეყნის მომავალი. მომავალს კი სულიერად ძლიერი ქალები, დედები ქმნიან.
რაც შეეხება სირთულეებს. მეტნაკლებად ყველას გვიწევს ცხოვრებაში ჩვენი წილი ჯვრის ზიდვა. აქედან გამომდინარე, ეს ჯვარი ვიღაცისთვის მსუბუქია, ვიღაცისთვის — მძიმე. მე იმ თაობას ვეკუთვნი, რომელიც საბჭოთა კავშირიდან მოდის. ამიტომ სირთულეს უკვე სკოლის დამთავრებისთანავე შევეჯახე, როცა უმაღლეს სასწავლებელში სწავლის გაგრძელებაზე მიდგა საქმე. მეც იმ მრავალთა შორის ვიყავი, რომელთაც საკუთარი ცოდნით უწევდათ ფონს გასვლა. ამას კიდევ წლები და ნერვები დასჭირდა. თუმცა შევძელი და დღეს ცხოვრების თავდაღმართში მდგარი ვფიქრობ, რომ ყველაფერი გამომივიდა. თუ სულ ზუსტად არა, ძალიან მიახლოებით მაინც: მივიღე განათლება, მყავს ოჯახი, შვილები, მაქვს საყვარელი საქმე, ვემსახურები ახალგაზრდების აღზრდას, რითაც ბედნიერი ვარ. მიყვარს ბავშვები და ძალიან ბევრისგან იმავეს ვგრძნობ. იმაზე ბედნიერება რაა, როდესაც მიდიხარ და წლების წინ შენი ნამოწაფარი შეგხვდება, სიყვარულით მოგიკითხავს და მთელი დღის საყოფ სითბოს გაგაყოლებს თან. მიდიხარ და რაღაც მანძილის შემდეგ აღმოაჩენ, რომ იღიმები. ეს ღიმილი კი შენი ადამიანობის, პროფესიონალიზმის ჯილდოა და ხვდები: ესაა იმ წვრილმანების ბედნიერება, რისთვისაც ღირდა ცხოვრება.“
✨ სწორედ ასეთი ადამიანები ქმნიან საზოგადოების ნამდვილ საყრდენს — გამოცდილებით, ცოდნითა და იმ სითბოთი, რომელსაც მომავალ თაობებს გადასცემენ.
🤝 მარინა ბედინაშვილი ჩვენი კამპანიის ბოლო მონაწილეა, თუმცა იმ ქალების სია, რომლებიც თავიანთი შრომით აძლიერებენ ჭიათურას, გაცილებით დიდია. სწორედ მათზე დგას ჩვენი ქალაქის დღევანდელობა და მომავალი.
#ძლიერიქალიჭიათურიდან
#ერთადჭიათურისთვის 💙
