31/08/2024
გინდათ უშველოთ ქვეყანას და პრეზიდენტს?
მართლა გინდათ?
ამისთვის მოიკლებთ რამეს? მაშინ:
1. ორგანიზებულად დატოვეთ პარლამენტი.
2. ორგანიზებულად დატოვეთ საკრებულოები.
3. გამოაცხადეთ ტოტალური სამოქალაქო დაუმორჩილებლობა.
4. გამოაცხადეთ მხარდამჭერთა საყოველთაო მშვიდობიანი მობილიზაცია.
5. შექმენით წინააღმდეგობის მოძრაობის შტაბი,რომელიც გახსნის თანხების მოსაზიდად შემოწირულობების ფონდს,რაც ასე აუცილებელია ორგანიზებული მშვიდობიანი მასობრივი პროტესტისთვის. ანუ უნდა შეიქმნას ლოჯისტიკური ჯაჭვი.
6. ნაცმოძრაობამ სასწრაფოდ ჩაატაროს მისივე წესდებით განსაზღვრული 4 წელიწადში ერთხელ ჩასატარებელი ყრილობა,რომლის დელეგატებიც პოლიტსაბჭოს წევრებს აირჩევენ არა ისე,როგორც 2017 წლის 20 იანვარს აირჩიეს-გაურკვეველ პირთა მიერ ნაცნობობითა და პირადი “ბლატით” სიაში ჩაწერილი 100-ზე მეტი (!!!) ადამიანით და მერე ერთიან “პაკეტად” დელეგატების მიერ დადასტურებული პოლიტსაბჭოს წევრთა სიით,არამედ პარტიის შიდა დემოკრატიისა და გამჭვირვალობის სრული დაცვით,რომელიც “ზემოდან” კი არ დანიშნავს რეგიონალურ თუ ცენტრალურ ლიდერებს,არამედ ისინი “ქვემოდან” პირდაპირ და ინდივიდუალურად აირჩევიან პარტიის დელეგატების მიერ,რაც უშუალოდ ასახავს ქვეყნის ყველაზე მსხვილი ოპოზიციური პარტიის მხარდამჭერთა ნებას. რაც რეალურად შექმნის ჯანსაღ შიდა კონკურენციას და გაზრდის რეგიონალურ თუ ცენტრალურ ლიდერთა ანგარიშვალდებულებას საკუთარი მხარდამჭერების/ამომრჩევლების წინაშე.
აი ეს იქნება ნამდვილი შიდაპარტიული დემოკრატია,რომელსაც ეყოლება ნამდვილად არჩეული და არა პარტიის პოლიტსაბჭოს ვიწრო კლანურად დანიშნული ფსევდო-ლიდერი! ნამდვილ,დემოკრატიულად არჩეული პოლიტსაბჭოს დემოკრატიულად არჩეულ თავმჯდომარეს კი რეალური ბრძოლის სტრატეგია აუცილებლად ექნება,რაზეც ჩვენი ქვეყნის მომავალია დამოკიდებული!
მაგრამ დათმობს კი ვინმე თბილ სავარძლებს ან პარლამენტში,ან საკრებულოში და ანაც პოლიტსაბჭოში?
მაშინ ბიძინას რაღას ვერჩით?!
და თუ ვერჩით-პირადი მაგალითი საუკეთესო მოტივატორია იმ ხალხისთვის,რომელიც მეათე წელია უძლებს დევნას,გაჭირვებასა და შიმშილს საქართველოს ერთგულების სახელით!
რომელიც მეათე წელია ერთგული გაფაციცებით შემოგცქერით,მაგრამ მუდამჟამ იმედგაცრუებული რჩება!
და მაშინ პარტია არასოდეს გაუცხოვდება ხალხისგან,ის მისი ორგანული ნაწილი და მედიატორი გახდება,რაც ნამდვილი ერთობის და გამარჯვების საწინდარია!
აი ამ ყველა პუნქტს თუ შევასრულებთ-მერე ნახეთ ბიძინას შიში,რადგან ეს პრაქტიკულად უარია მისი წესებით თამაშზე,სადაც მას ვერასოდეს მოვუგებთ. ამიტომ წესები ჩვენ უნდა დავადგინოთ!
დიახ, ვინმე ან რაიმე რომ გაანთავისუფლო,ჯერ თავად უნდა იყო თავისუფალი კონფორმიზმისა და გარიგებების სენისგან!
სწორედ ესაა უეჭველი გამარჯვების რეცეპტი-ტოტალური შეურიგებლობა არსებული რეჟიმის მიმართ,ოღონდაც საქმით და არა მხოლოდ ხმამაღალი,შინაარსგამოცლილი მოწოდებებითა და მუშტებით ჰაერის შეზანზარებით!
გააკეთებთ ამას-ყველანი ერთად გავიმარჯვებთ!
არ გააკეთებთ-ესე იგი პირადი კეთილდღეობა თქვენთვის უფრო მაღალი პრიორიტეტია,ვიდრე ქვეყნის გათავისუფლებისთვის ნამდვილი ბრძოლა! და მაშინ ბოდიში,მაგრამ მორალურ უფლებას კარგავთ ამ ქვეყნის ავ-კარგზე გვესაუბროთ და ვინმეს რაიმესკენ მოუწოდოთ!
