04/10/2026
COMHALTAS ULADH-COMÓRADH AN CHÉID. Cuir ceist ar éinne faoi stair an Chomhaltais ó na 1950í ar aghaidh agus is cinnte go ndéanfar trácht ar Ghearóid Mac Giolla Domhnaigh, an Rúnaí dochloíte ó Riverdale Park North a bhí ag plé go toilteanach deonach le: deontais, cúrsaí riaracháin, comhfhreagras, smacht inmheánach, An tUltach, An Dáil Mhór, feiseanna, comórtais na rincí, húdarais, rialtais, an BBC, an Irish News, ballraíocht, bailiúcháin, taighde, coláistí samhraidh, conspóidí, Éigse Oirialla, Comhdháil Náisiúnta na Gaeilge, Bord na Gaeilge, féiltí drámaíochta, cúrsaí foilsitheoireachta, caidreamh achrannach leis an Ard-Oifig i mBÁC agus le cuid de na baill/Craobhacha, agus le feachtais éagsúla Chonradh na Gaeilge. Thaitin rialacha agus rúibricí le Gearóid, ba thábhachtach dó bunreacht an Chomhaltais agus oidhreacht Lorcán Uí Mhuireadhaigh. B'eagraí éifeachtach é agus bhí máistreacht aige ar na mionsonraí. Chosain sé féin agus a chomhbhádóir Seán Ó Labhra C.U. go dtí an deireadh. Lenár linn féin bhain Gerry Downey le Coiste Gnóithe an Chomhaltais - leibhéal níos airde ná stádas s'againne san eagraíocht. Ní dhéanfar dearmad air áfach - fear slachtmhar le carbhat, seaicéad néata, bróga snasta, mála leathair cáipéisí, miontuairiscí réidh do cheadú an mholtóra agus an chuiditheora, agus ar ndóigh mar abhcóide ar son na Gaeilge i 'gceantar dlínse an Chomhaltais'. Ghlac sé tamall orainn grianghraf de Ghearóid a aimsiú - thóg Paul Kavanagh (Dún Dealgan) an ceann seo sa bhliain 1975 (ó Chartlann Ghaeláras Mhic Ardghail).
