28/08/2026
रसुवाको भोटेकोशी बाढीप्रति हार्दिक श्रद्धाञ्जली तथा ऐक्यबद्धता!
रसुवाको भोटेकोशी नदीमा २०८३ भदौ १० गते आएको भीषण बाढीका कारण भएको अकल्पनीय मानवीय तथा भौतिक क्षतिप्रति बेलायत छन्त्याल संघ अत्यन्त दुःखी र मर्माहत भएको छ।
यस अकल्पनीय तथा विनाशकारी प्राकृतिक विपत्तिको पीडादायी क्षणमा रसुवावासी लगायत प्रभावित क्षेत्रका सम्पूर्ण नागरिकहरूले भोग्नुपरेको दुःख, पीडा र त्रासप्रति हामी हार्दिक सहानुभूति तथा ऐक्यबद्धता प्रकट गर्दछौँ।
यस विनाशकारी बाढीमा परी अमूल्य जीवन गुमाउनुहुने सम्पूर्णप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनमा हार्दिक समवेदना व्यक्त गर्दछौँ। साथै, बाढीका कारण बेपत्ता हुनुभएका सम्पूर्ण नागरिकहरूको यथाशीघ्र सकुशल खोज तथा उद्धार होस् भन्ने कामना गर्दछौँ। बेपत्ता नागरिकका परिवारजनलाई यस दुःखद घडीमा धैर्य, साहस र शक्ति प्राप्त होस् भन्ने प्रार्थना गर्दछौँ।
यो विपत्ति केवल रसुवा र प्रभावित क्षेत्रका नागरिकहरूको मात्र पीडा होइन; यो सम्पूर्ण नेपाली समाजको साझा दुःख र पीडा हो। त्यसैले बेपत्ता नागरिकहरूको तत्काल खोज तथा उद्धारलाई उच्च प्राथमिकतामा राख्न, घाइतेहरूको शीघ्र तथा निःशुल्क उपचारको व्यवस्था गर्न, साथै विस्थापित तथा प्रभावित नागरिकहरूका लागि तत्काल राहत, सुरक्षित, आश्रय र दीर्घकालीन पुनर्स्थापनाको प्रभावकारी प्रबन्ध गर्न हामी नेपाल सरकार तथा सम्बन्धित सबै निकायसमक्ष हार्दिक आग्रह गर्दछौँ।
विपत्तिपछिको उद्धार, राहत र पुनर्स्थापना केवल राज्यको दायित्वमा मात्र सीमित रहन सक्दैन। यस्तो कठिन र संवेदनशील घडीमा मानवीयता, सहकार्य, सहयोग र राष्ट्रिय एकताले नै पीडितहरूको दुःखमा साथ दिने तथा उनीहरूको घाउमा मलम लगाउने आधार निर्माण गर्न सक्छ।
त्यसैले राज्यका सम्बन्धित निकाय, सामाजिक तथा मानवीय संघसंस्था, निजी क्षेत्र, सञ्चारमाध्यम, प्रवासी नेपाली समुदाय तथा देश–विदेशमा रहनुभएका सम्पूर्ण नेपाली दाजुभाइ तथा दिदीबहिनीहरूलाई आ–आफ्नो सामर्थ्य र क्षमताअनुसार राहत, उद्धार तथा पुनर्स्थापनाका मानवीय कार्यमा एकजुट भई सहयोग गर्न हार्दिक अपिल गर्दछौँ।
यस दुःखद घडीमा बेलायत छन्त्याल संघ, रसुवालगायत सबै प्रभावित क्षेत्रका नागरिक तथा समुदायसँग काँधमा काँध मिलाउँदै उभिएको छ। पीडितहरूको उद्धार, राहत, पुनर्स्थापना तथा पुनर्निर्माणका लागि भइरहेका र आगामी दिनमा गरिने हरेक मानवीय प्रयासप्रति हाम्रो निरन्तर ऐक्यबद्धता रहनेछ।
"नेपाल आमाको दुःखमा हामी पनि सँगै छौँ।"
नर्सिङ घरब्जा छन्त्याल
अध्यक्ष
बेलायत छन्त्याल संघ
मिम प्रसाद खडका छन्त्याल
महासचिव
बेलायत छन्त्याल संघ
