13/08/2026
Vetëm 11 vjeç, por emri i tij po dëgjohet gjithnjë e më shumë në skenat ndërkombëtare të muzikës klasike. Triumf Lupçi, talenti shqiptar i lindur në Vjenë dhe që jeton në Kosovë, po korr njëra pas tjetrës arritje të rëndësishme në piano.
Suksesi i radhës vjen nga Austria, ku pas paraqitjes së tij në një konkurs prestigjioz, Triumfi ka siguruar një ftesë për të performuar në muajin nëntor në Mozarthaus në Vjenë, një vend i lidhur ngushtë me historinë e Wolfgang Amadeus Mozart.
Pavarësisht moshës së vogël, 11-vjeçari numëron çmime në Kosovë, Shqipëri, Maqedoninë e Veriut, Poloni, Itali, Spanjë, Austri dhe Mbretërinë e Bashkuar. Në prill të këtij viti ai interpretoi gjithashtu në një Gala Koncert në Madrid.
Triumfi është pjesë e Piano Balkan Academy “Sigismund Thalberg”, ku ka përfunduar vitin e parë të programit “Virtuoso – Piano” me rezultatin maksimal 10.10.
Arritjet nuk ndalen këtu. Pianisti i vogël ka fituar edhe bursë për të vazhduar studimet në Trinity College London, ndërsa ka marrë ftesa për të performuar në Romë dhe Vjenë.
Aktualisht ai ndjek mësimet në Shkollën e Muzikës “Prenk Jakova” në Kosovë, ndërsa krahas pianos ka nisur të tregojë interes edhe për kompozimin.
Në vetëm 11 vite jetë, Triumf Lupçi ka arritur të ndërtojë një rrugëtim që shumë artistë e ëndërrojnë, duke e çuar talentin shqiptar në disa prej skenave më të njohura të Europës.
