09/01/2026
U nostr'associu CORSICA DIASPORA, creatu in u 2004 da u puvarettu Edimondu SIMEONI, è u so presidente, l'amicu Tumasgiu LINALE, ci rammentanu chì ghjè oghje stu 9 di Ghjennaghju "A GHJURNATE MUNDIALE DI A CORSICA" è diceraghju di i Corsi di u mondu.
Navighendu nantu à e rete suciale, sò cascatu nantu à un articulu esciutu ind'è u CORSE MATIN di u 21 di ferraghju di u 2020, parlendu di a famosa "tariffa diaspora" ind'è i trasporti aerii trà a nostr'isula è u cuntinente.
Eramu 5 anni fà, nunda hà cambiatu dipoi, malgradu 3 deliberazione vutate à a nostra assemblea di Corsica chì danu 5 critarii precisi pè difinisce ci, noi, i corsi di a spalluzzera. È ne simu sempre à listessu puntu, "tariffa diaspora" ùn si ne vede mancu stampa !
Noi, i corsi di a spalluzzera chì simu nati in Cursichella, noi chì ci avemu campatu à tempu pienu à u minimu nanzu di parte à mare in là pè l'università o pè stantà ci u nostru pane, noi ch'avemu i nostri genritori è i nostri parenti in paese, noi chì ci avemu fattu i nostri studii primarii è secundarii, noi chì ci avemu e nostre tombe, noi chì ci paghemu parechji impositi, noi chì ci vutemu pè tutte l'elezzione, noi chì ci vultemu u più à spessu pussibule, noi, PÈ RIENTRE IN CASA NOSTRA, paghemu sempre listessa tariffa cà i turisti.
U paradossu hè chì i "GHJUNGHJITICCI", elli, anu accessu à a tariffa "Résident", à u solu mutivu chì paganu l'impositu nantu à u rivenutu in Corsica.
Ghjè vera chì noi ùn ci paghema cà l'impositi nant'à e nostre case paterne, a mubiglia, a tassa nantu à e rumenzule, a TVA nantu à tuttu ciò chi cunsumemu, e tasse nantu à i biglietti d'aviò è di batellu...
In sta ghjurnata di i Corsi di u mondu, mi pongu isse quistione :
À quandu a messa in ballu di a "TARIFFA SPALLUZZERA" digià vutata dipoi u 2021 ?
À quandu una vera ricunniscenza di a nostra spalluzzera ?
Ghjuvanni Dal Colletto,
Presidente di a Casa di a Corsica di Marseglia
