09/11/2026
میاں محمد سعید مرتضائی (مرحوم) کے ایصالِ ثواب کے لیے محفلِ ختمِ قل شریف کا انعقاد
نیک اور دعاگو اولاد والدین کے لیے صدقۂ جاریہ اور بلندیِ درجات کا ذریعہ ہے: علامہ ظہیر احمد نقشبندی
ناظمِ اعلیٰ خرم نواز گنڈاپور، الحاج عبدالغفور قادری، ڈائریکٹر نظامتِ امورِ خارجہ شکیل احمد طاہر، صدر MWF یورپ راجہ بابر حسین، صاحبزادہ میاں غلام مرتضیٰ مرتضائی سمیت مرکزی قائدین، علماء و مشائخ اور معزز شخصیات کی شرکت
لاہور: منہاج القرآن انٹرنیشنل کے سینئر مرکزی رہنما و ممبر سپریم کونسل میاں غلام مرتضیٰ مرتضائی کے والدِ محترم میاں محمد سعید مرتضائی (مرحوم) کے ایصالِ ثواب، مغفرت اور بلندیِ درجات کے لیے المرتضائیہ ہاؤس لاہور میں محفلِ ختمِ قل شریف کا انعقاد کیا گیا۔
محفل سے خصوصی خطاب کرتے ہوئے نائب ناظمِ نظامتِ دعوت تحریک منہاج القرآن صاحبزادہ علامہ ظہیر احمد نقشبندی نے کہا کہ نیک اور دعاگو اولاد والدین کے لیے صدقۂ جاریہ اور بلندیِ درجات کا ذریعہ ہوتی ہے۔ والدین کی زندگی میں ان کی خدمت اور احترام، جبکہ ان کے وصال کے بعد ان کے لیے دعائے مغفرت کرنا اولاد کی اہم ذمہ داری ہے۔
انہوں نے کہا کہ حضرت ابراہیم علیہ السلام کی دعا ہمیں اپنی ذات، والدین اور تمام اہلِ ایمان کے لیے مغفرت طلب کرنے کا درس دیتی ہے۔ نماز انسان میں عاجزی و انکساری پیدا کرتی اور اسے اللہ تعالیٰ کی رحمت کا امیدوار بناتی ہے۔ میاں محمد سعید مرتضائی (مرحوم) مصطفوی مشن سے وابستہ تھے اور تحریک منہاج القرآن کے وابستگان دنیا بھر میں ان کے لیے دعاگو ہیں۔ اولاد کی ذمہ داری ہے کہ وہ نیک اعمال اور خدمتِ دین کے مشن کو جاری رکھے تاکہ یہ اعمال والدین کے لیے اجر و ثواب اور بلندیِ درجات کا وسیلہ بنتے رہیں۔
حافظ خرم شہزاد، ڈپٹی ڈائریکٹر نظامتِ امورِ خارجہ نے محفلِ ایصالِ ثواب میں شرکت کرنے والے معزز مہمانوں کا خیرمقدم کیا۔ انہوں نے کہا کہ تحریک منہاج القرآن کے تمام وابستگان اس غم کی گھڑی میں اہلِ خانہ کے ساتھ ہیں اور مرحوم کی بخشش، مغفرت اور بلندیِ درجات کے لیے دعاگو ہیں۔
محفل کا آغاز قاری محمد کاشف القادری نے تلاوتِ قرآنِ مجید سے کیا۔ صدر منہاج القرآن لاہور اقبال حسین باجوہ، عالمی شہرت یافتہ نعت خواں شہباز قمر فریدی اور شہباز سمی نے بارگاہِ رسالت مآب ﷺ میں گلہائے عقیدت پیش کیے، جبکہ قاری ریاست علی چدھڑ نے ختمِ قرآن کی سعادت حاصل کی اور مرحوم کے ایصالِ ثواب، کامل بخشش و مغفرت اور بلندیِ درجات کے لیے خصوصی دعا کروائی۔
محفل میں ناظمِ اعلیٰ منہاج القرآن انٹرنیشنل خرم نواز گنڈاپور، الحاج عبدالغفور قادری، راجہ بابر حسین صدر منہاج ویلفیئر فاؤنڈیشن (MWF) یورپ، ڈائریکٹر نظامتِ امورِ خارجہ شکیل احمد طاہر، صاحبزادہ میاں غلام مرتضیٰ مرتضائی، راجہ زاہد محمود قادری، تسلیم احمد صابری، نائب ناظمِ اعلیٰ میڈیا افیئرز نوراللہ صدیقی، حمزہ نوشاہی، ڈاکٹر فاروق رانا، علامہ غلام مرتضیٰ علوی، حافظ سعید رضا بغدادی، رانا وحید شہزاد، علامہ عین الحق بغدادی، منشاء الاسلام، چوہدری عارف، عابد بشیر قادری، حاجی محمد اسحاق، اورنگزیب رضا خان اور ذکاء اللہ طاہر سمیت مرکزی قائدین، علماء و مشائخ، سماجی شخصیات، اہلِ خانہ اور اہلِ علاقہ کی بڑی تعداد نے شرکت کی۔
اللہ تعالیٰ مرحوم کی کامل مغفرت فرمائے، ان کے درجات بلند فرمائے اور تمام پسماندگان کو صبرِ جمیل عطا فرمائے۔ آمین۔
