22/11/2025
Com’è tutti l’anni, appuntamentu pà San Prosparu, sabatu chì veni à 5 ori di sera à U Tarraghju ! 🍬🍫🍂
San Prosparu hè fistighjatu u 29 di nuvembri in Cutuli è Curtichjatu. Cuntrariarmenti à a Sant’Andria u lindumani (pà i maiò), sò i ziteddi chì facini u ghjiru di i casi.
I spurteddi o i sacchitteddi in manu, si principia tandu u ghjiru di u paesi. A pricantula hè ditta da i ziteddi. I paisani devini aspittà a fini di a pricantula pà ghjapra a porta è rigalà tandu un calcuseddu à i ziteddi.
L’usu voli chì i ziteddi fichini u ghjiru di a tola prima di piglià i rigali.
Hè ringraziatu ogni paisanu chì rigala calcosa, pà pricaddi riescita è saluta. Inveci, sò ghjastimati quiddi ch’ùn aprini micca.
Ind’i tempi, i ziteddi erani mascarati è si purtavani a raccolta in casa, pà sparta la in famiglia.
Erani sopratuttu rigalati noci, fichi o frutti. Oghji ch’hè oghji, sò bumbò, biscotti è cicculati, chì sò missi in cumunu è spartuti.
Issa tradizioni chì ci veni da luntanu hè una ricchezza maiò ch’eddu ci tocca à fà campà, segnu di una leia suciali è interghjiniraziunali forti è bedda viva in paesi !
𝐃𝐚 𝐬𝐩𝐚𝐫𝐭𝐚 !
