Heilsurøktarafelagið

11/05/2026

Spennandi kunningarkvøld um nýggja útbúgvingarleistin verður í hølum felagsins mikukvøldið 13/5-26 🤩🤩

04/05/2026

Heilsurøktaraútbúgvingin byrjar í viku 33.
Umsóknarfreistin, at søkja inn á hesar leistir, er tann 22. mai 2026.

Hygg inn á www.heilsuskulin.fo fyri nærri kunning.

Útbúgvingar Leigubústaðir Heilsuskúli Føroya arbeiðir fyri at gera tað lættari fyri okkara næmingar at finna góðar leigubústaðirmeðan teir ganga á skúlanum. Finn tín komandi leigubústað her. Nýmótans skúli í vøkrum […]

01/05/2026

Góðan altjóða arbeiðaradag!

1. mai snýr seg um at fagna felagsskapi, samanhaldi og rættvísi, eins og frælsinum frá kúgan og armóð.
Dagurin í dag minnir okkum á týdningin av at standa saman, týdningin av, at verja okkum sjálvi og hvørt annað móti órættvisi.

Nógv er vunnið í stríðnum, men nýggj mál verða allatíðina sett - tí er stríðið ikki av.

25/04/2026

Heilsurøktarafelagið ynskir øllum føroyingum ein góðan flaggdag

20/04/2026

Nevndin í Heilsurøktarafelagnum heldur fram

Aðalfundur var hildin í vikuskiftinum, og tveir limir stóðu fyri vali; Elsebeth Samuelsen og Elisabeth Eið Eliassen. Báðar stillaðu upp aftur.
Aftur at teimum báðum stillaðu eisini Beinta Simonsen og Alvin Joensen upp til nevndarval.
Úrslitið var, at Elsebeth og Elisabeth vóru afturvaldar til eitt tvey ára skeið afturat.

Seinastu árini hevur Heilsurøktarafelagið havt talgilt nevndar- og forfólkaval.
Forkvinnan stóð eisini fyri vali hesaferð, og av tí, at sitandi forkvinna varð tann einasta, ið stillaði upp til tað valið, var skjótt greitt, at Bingerð H. Fossagil heldur fram sum forkvinna í Heilsurøktarafelagnum komandi trý árini.

Ein tiltakslimur skuldi kortini veljast á sjálvum aðalfundinum. Til tað valið vóru tað trý, ið bjóðaðu seg fram; Vár Hansen, Alvin Joensen og Jakoba Winther.
Úrslitið var, at Alvin Joensen var valdur tiltakslimur í eitt tvey ára skeið. Hann er sostatt annar tiltakslimur saman við Ellu Norðberg Heinesen, ið var vald tiltakslimur í eitt tvey ára skeið á seinasta aðalfundi.

Nevndin í Heilsurøktarafelagnum er sostatt: Bingerð H. Fosságil, forkvinna, Linda Arnfríðardóttir, Annika E. Breiðaskarð, Elsebeth Samuelsen og Elisabeth Eið Eliassen, nevndarlimir og Ella Norðberg Heinesen og Alvin Joensen, tiltakslimir.

14/04/2026

Síðsti dagur at velja til nevndarvalið.

Um tú enn ivast í, hvør skal mynda felagið komandi tíðina, vil eg nýta høvið at koma við hesari síðstu valgreinini.

Eg stilli upp, tí eg veruliga brenni fyri at styrkja okkara yrki og tryggja betri arbeiðsumstøður fyri allar heilsurøktarar. Tað er týdningarmikið fyri meg, at vit fáa eitt felag, sum veruliga umboðar limirnar, lurtar eftir tykkum og arbeiðir miðvíst fyri tykkara rættindum og trivnaði.

Nýtt landstýri er farið til arbeiðis, og tað ger tað enn týdningarmiklari, at vit sum felag eru klár at samstarva, ávirka og seta okkara mál á dagsskránna.

Okkara felag má og skal vera sjónligt í samfelagnum – ein greið rødd, sum verður hoyrd, tá avgerðir verða tiknar, ið ávirka okkara arbeiðs-og livikor.

Vit hava øll tørv á einum sterkum felagsskapi,einum felagi, sum arbeiðir fyri:
•góðum arbeiðsumstøðum
• virðing fyri fakligheitini
• møguleika at brúka okkara kompetansur fult út

Eg vil arbeiða fyri, at tín rødd verður hoyrd, og at tú kennir, at felagið er fyri teg.

Tí vóni eg, at tú vilt vísa mær tín stuðul við at velja meg í nevndina.

Takk fyri títt álit og gott val🌺

Beinta Simonsen
valevni

13/04/2026

09/04/2026

Heilsu- og arbeiðsmarknaðarmál ikki gloymd 💚

Nevndin í Heilsurøktarafelagnum ynskir nýggju ABC-samgonguni blíðan byr, nú samgonguskjalið er undirskrivað, og nýggja stjórnin av álvara fer til verka mánadagin 🇫🇴

Vit hava kagað í skjalið, og fegnast millum annað um hesar orðingarnar, ið viðvíkja heilsu- og arbeiðsmarknaðarmálum:

- Dentur skal leggjast á fyribyrging og heilsufremjan.

- Saman við heilsustarvsfólkum skulu vit orða eina heildarætlan fyri førleikamenning og víðari útbúgving.

- Í samráðingum við fakfeløg eiga vit at verða opin fyri møguleikanum at stytta arbeiðsvikuna.

- Samgongan vil virka fyri, at fleiri velja størv í umsorganar- og røktarøkinum.

Í Heilsurøktarafelagnum eru vit altíð fús at hjálpa við ráðgeving og kunning í teimum málum, limir okkara og vit hava best innlit í.

Samgonguskjalið er viðheft sum leinki í fyrstu viðmerking til hetta uppslagið.

04/04/2026

Hví er nevndarval týdningarmikið?

Í einum fakfelag er nevndin hjartað í arbeiðinum. Tað er nevndin, sum tekur avgerðir, leggur kósina og arbeiðir fyri limirnar. Tí er tað eisini avgerandi, at vit javnan hava nevndarval og geva rúm fyri nýggjum kreftum.

Men hví er tað so týdningarmikið at skifta nevndarlimir út?

Fyri tað fyrsta, gevur tað nýggja orku og nýggjar hugsanir. Samfelagið broytist alla tíðina, og tað gera arbeiðsumstøður og avbjóðingar eisini. Við nýggjum fólkum í nevndini fáa vit ofta nýggj sjónarmið, sum kunnu styrkja arbeiðið og tryggja, at fakfelagið fylgir við tíðini.

Í øðrum lagi er tað ein spurningur um demokrati. Eitt fakfelag eigur at umboða limirnar, allar limirnar. Við regluligum vali fáa limirnir møguleika at siga sína hugsan og velja tey fólk, sum best umboða teirra áhugamál.

Men eru limirnir nøgdir við felagið?

Tað er ein spurningur, sum vit øll mugu seta okkum sjálvum. Kanska eru nógvir nøgdir, men eru tað eisini nøkur, sum ikki kenna seg hoyrd? Eru tað limir, sum sakna betri arbeiðsumstøður, greiðari samskifti ella sterkari umboðan? Um so er, so er valið ein gyltur møguleiki at gera nakað við tað.

Tí er tað eisini týdningarmikið at hugsa seg væl um, áðrenn man setur sín kross.

Ein krossur er ikki bara ein formalitetur, hann er ein rødd. Tað snýr seg ikki um at velja vinfólk ella kend andlit, men um at velja tey fólkini, sum hava vilja, førleikar og dirvi at arbeiða fyri felagsskapinum og limunum.

Spyr teg sjálvan:
Hvør arbeiðir fyri betri arbeiðsumstøðum?
Hvør lurtar eftir limunum?
Hvør hevur nýggjar hugsanir og torir at taka ábyrgd?

Tá ið vit velja við umhugsni, styrkja vit fakfelagið.

Eitt sterkt fakfelag krevur bæði kontinuitet og nýhugsan. Tí er nevndarval ikki bara ein skylda, tað er ein møguleiki at ávirka framtíðina.

Lat okkum brúka møguleikan rætt.

Við hesum orðum, vil eg ynskja hinum valevnunum gott val, og ynski tykkum øllum einar gleðiligar páskir.

Vinarliga

Beinta Simonsen
valevni.

03/04/2026

Tíðin er komin til broytingar

Vit, sum arbeiða innan heilsurøkt, vita betur enn tey flestu, hvussu týdningarmikið okkara arbeiði er, bæði fyri borgaran og fyri samfelagið sum heild. Men tíverri er veruleikin tann, at okkara arbeiðsumstøður ikki altíð endurspegla hendan týdning.

Eg stilli upp til nevndarvalið, tí eg ynski eina greiða og sterka rødd fyri okkum øll.

Fyrst og fremst vil eg siga, at tað arbeiðið, sum felagið longu hevur gjørt, er gott og hevur havt stóran týdning fyri okkara fak. Men tíðirnar broytast, og krøvini frá limunum broytast við teimum. Tað er bæði natúrligt og sunt, at vit støðugt menna okkum og laga okkum eftir nýggjum avbjóðingum og væntanum.

Arbeiðsumhvørvið má raðfestast nógv hægri. Tað skal vera trygt, mennandi og virðiligt at fara til arbeiðis. Vit skulu ikki bara “halda út” – vit skulu trívast. Tað krevur, at vit fáa betri karmar og møguleika at brúka okkara fakligu førleikar til fulnar.

Samstundis havi eg eina greiða visión um eitt meira sjónligt, opið og atkomuligt felag. Eitt felag, sum ikki bara er til staðar á pappírinum, men sum veruliga sæst og hoyrist – og sum byggir á gott samstarv, bæði innanhýsis millum limir og úteftir við myndugleikar og arbeiðsgevarar. Vit standa sterkari, tá vit standa saman.

Eitt annað týðandi mál er hvílitíðin millum vaktir. Vit kenna hvussu tungt tað er at fara av kvøldvakt og síðan upp tíðliga morgunin eftir á dagvakt. Tað er als ikki haldbart, at starvsfólk arbeiða undir treytum, har tey ikki fáa nóg góða hvíld. Tað gongur út yvir bæði heilsuna hjá starvsfólkunum og góðskuna í arbeiðinum.

Lønin er eisini ein av okkara størstu avbjóðingum. Nógvir av okkara limum eru undirløntir, tvs verða ikki løntir eftir sáttmálanum, og tað ikki rættvíst og tað skulu vit ikki góðtaka!

Serliga skeivt kennist tað, tá arbeiði um høgtíðir ikki verður lønt eftir veruliga virðinum. Í dag enda tímarnir fyri td jóladag í avspáking, sum síðani verður útgoldin sum vanlig tímaløn. Tað merkir í praksis, at tað ikki kostar nógv meira at hava okkum til arbeiðis um høgtíðir enn ein vanligan dag – og tað er ikki í lagi. Tað eigur at vera dýrari, tí vit lata okkara frítíð, okkara familjutíð og okkara høgtíðir.

Eg vil arbeiða fyri, at vit fáa møguleika at fáa slíkar vaktir útgoldnar beinleiðis í pengum í staðin. Tað hevði givið bæði størri virðing og størri rættvísi.

Vit standa eisini framman fyri eini framtíð, har tørvurin á heilsurøktarum bara fer at vaksa. Tí er tað avgerandi, at vit gera yrkið meira attraktivt – bæði fyri tey, sum longu eru í fakinum, og fyri tey, sum umhugsa at velja tað.

Eg stilli upp, tí eg trúgvi upp á, at vit kunnu byggja víðari á tað góða arbeiðið, sum longu er gjørt, samstundis sum vit tora at hugsa nýtt og taka neyðugu stigini fram á leið.

Vel eina rødd, sum vil broytingar.

Vel meg 🤞

Beinta Simonsen