Sinnisbati

10/04/2026

🌟NÝGGJ NEVND Í SINNISBATA🌟

Aðalfundur hjá Sinnisbata varð hildin 17. mars, og tríggir nevndarsessir stóðu fyri vali.

Í nevndini hjá Sinnisbata skulu sjey nevndarlimir veljast og tveir tiltakslimir. Til aðalfundin valdi Oddbjørg Johansen at takka fyri seg. Oddbjørg hevur sitið í nevndini í Sinnisbata í tvey ár, og vit takka henni fyri hennara góða arbeiði hesi árini, málbólkinum at frama. Elisabeth Carlsson og Joan B. Poulsen tóku við afturvali og Monika Hjelm Joensen er nýggj í nevndini. Vit ynskja teimum hjartaliga til lukku við valinum og Moniku vælkomnari í nevndina.

Á fyrsta nevndarfundi eftir aðalfundin skipaði nevndin seg soleiðis:
- Súsanna Olsen, forkvinna
- Oda Jóhansdóttir, næstforkvinna
- Joan B. Poulsen, kassameistari
- Minna Sólfinnsdóttir, skrivari
- Elisabeth Carlsson, nevndarlimur
- Nuka Heinrich Eidesgaard, nevndarlimur
- Monika Hjelm Joensen, nevndarlimur
- Margretha Poulsen, tiltakslimur
- Vivian Sjóðklett, tiltakslimur

Nýggja nevndin hevur sett sær fleiri mál fyri og er til reiðar at fara til verka til nevndarárið 2026/2027. Í 2026 fór Sinnisbati undir nýggja fyrilestrarrøð, og fara vit at halda áfram við hesum leisti og hava tiltøk runt í Føroyum. Nýggja Ungdómsráðgevingin er á gáttini, og fer hetta serliga at eyðmerkja nevndarárið. Vit eru takksom fyri allan stuðulin og álitið, og gleða okkum at skapa eitt fyribyrgjandi tilboð, ið kann vera við til at basa á mistrivnaði millum ung.

01/04/2026

Vilt tú vera við til at menna og standa á odda fyri nýggju Ungdómsráðgevingini og gera ein veruligan mun í lívinum hjá ungum í Føroyum?

Vilt tú vera við til at menna og standa á odda fyri nýggju Ungdómsráðgevingini og gera ein veruligan mun í lívinum hjá ungum í Føroyum? Eitt áhugavert og avbjóðandi starv er leyst at søkja hjá Sinnisbata. Um Ungdómsráðgevingina Sinnisbati setur á stovn eina ungdómsráðgeving v...

12/03/2026

Nuka Heinrich Eidesgaard, nevndarlimur í Sinnisbata:

“Eg sum brúkari ynski so inniliga, at tey, sum stilla upp til løgtingsvalið veruliga raðfesta sálarheilsu og arbeiða fyri at hjálp eru til tey, ið hava tørv á henni, og at tey steðga sparingini á einum øki, har tørvurin bara sær út til at veksa.”

Í Føroyum er talið av innleggingum í psykiatriini økt við umleið 12% frá 2016 til 2024. Tað merkir, at fleiri enn nakrantíð stríðast so mikið sálarliga, at tey hava brúk fyri einari innlegging. Men samstundis skal psykiatriski depilin spara. Hvussu kann eg, sum brúkari á psykiatris...

06/03/2026

Kom í avvarðandibólk hjá Sinnisbata 💚
melda til á [email protected]

04/03/2026

Takk fyri góða undirtøku í Klaksvík og í Vágum til sýning av heimildarfilminum Mammuskepilsið eftir Mariu Tórgarð 👏👏 Vit í Sinnisbata eru sera fegin um samstarvið og møguleikan at vísa Mammuskepilsið, ið viðgerð sera týdningarmikil evni um sálarsjúku, skisofreni og at vera avvarðand. Vit síggjast vónandi til fleiri sýningar seinni í ár ☺️

03/03/2026

“Tað hevur hjálpt øgiliga nógv, at fólkini rundanum meg hava verið opin og prátað um tað. At tað ikki hevur verið goymt burtur”

Ársins geytavinnari varpar ljós á sálarsjúku í persónligum heimildarfilmi, og hetta kann hjálpa fleiri, sigur aðalskrivari í Sinnisbata

14/12/2025

HEADSPACE Á FÍGGJARLÓGINI 👏

Hetta er ein kærkomin jólagáva til øll ung í Føroyum! Á fíggjarlógini fyri 2026 eru settar 500.000 kr av til Sinnisbata at fyrireika Headspace lággáttartilboð saman við viðkomandi myndugleika.

Í Føroyum uppliva vit eina vaksandi avbjóðing við mistrivnaði millum ung, og tí hevur Sinnisbati í rúma tíð arbeitt við at seta á stovn eina ungdómsráðgeving til ung í øllum landinum.

Vit eru sera fegin og takksom um stuðulin frá landinum, ið ger tað møguligt hjá okkum at seta ráðgevingina í verk í næstum.

09/12/2025

Vit eru sera takksom fyri stuðulin frá Ólavsøkuframsýningini, og at Lions Club Tórshavn vil stuðla tilgongdini at menna eitt Headspace tilboð í Føroyum 👏👏

Lions stuðlar Sinnibata

Lions Tórshavn hevur atið Sinnisbata 180.000 krónur í stuðli, sum serliga er ætlaður arbeiðinum við Headspace-skipanini, ið vendir sær til ungdómin.

Lions Tórshavn vil stuðla tilgongdini hjá Sinnisbata at byrja eina sokallaða Headspace-skipan, sum er eitt fyribyrgjandi lággáttartilboð til ung, við lættari sálarligum avbjóðingum.

Við Headspace kunnu tey ungu tosa um ivamál og avbjóðingar í einum skipaðum og opnum felagsskapi. Líknandi tilboð er í fleiri norðurlondum og nú skjótt eisini í Føroyum.

Um dagarnar handaði Leif Ellingsgaard, forseti í Lions Tórshavn, Sinnisbata stuðulin á limafundi. Stuðulsupphæddin upp á 180.000 krónur var ágóðin frá árligu ólavsøkuframsýningini hjá Lions Tórshavn í Müllers pakkhúsi.

Súsanna Olsen, forkvinna í Sinnisbata, tók ímóti stuðlinum, og Ninna Reinert Simonsen, sum starvast á skrivstovuni hjá Sinnisbata, greiddi frá virkseminum hjá felagnum, við serligum denti á Headspace, sum arbeitt verður við løtuni.

MYNDATEKSTUR:
Ninna Reinert Simonsen og Súsanna Olsen frá Sinnisbata tóku ímóti stuðlinum frá forsetanum í Lions Tórshavn, Leif Ellingsgaard

19/11/2025

"VIT VITA, HVAT VIT SKULU GERA, OG LATIÐ OKKUM HUGSAVNA OKKUM UM AT GERA TAÐ"

Orðini eigur Poul Nyrup Rasmussen, stovnari av Headspace Danmark, í setanarrøðu síni á Nordic Headspace ráðstevnuni 2025. Á ráðstevnuni savnaðust felagsskapir, ung, politikarar og serfrøðingar við tí endamáli at deila vitan, royndir og at saman finna loysnir at basa mistrivnaða millum ung. Umboð úr Sinnisbata luttóku á ráðstevnuni, sum í ár varð hildin á Christiansborg í Keypmannahavn.

Á ráðstevnuni varð nýggjasta granskingin um sálarheilsu hjá ungum løgd fram. Granskingin staðfestir enn einaferð, at tað riggar at seta tíðliga inn – bæði í mun til tann einstaka og í mun til samfelagið. WHO hevur í novembur í ár útgivið slóðbrótandi frágreiðing um sálarheilsuna hjá ungum í Evropa. Fyri fyrstuferð hava vit drúgvar dátur, ið vísa eina signifikanta øking á mistrivnaðinum hjá ungum, somuleiðis sum vit síggja eina gjógv í mun til atgongdina til hjálp og stuðul. Við frágreiðingini heitir WHO á landsins stjórnir um at syrgja fyri, at øll ung hava atgongd til hágóðsku sálarheilsutilboð og at endurhugsa tænasturnar, soleiðis at tær hóska til tørvin hjá tí unga.

“Headspace er meira enn bara eitt stað at leita sær hjálp”. Soleiðis segði Lærke, ein av teimum ungu, ið luttóku í ungdómspanelinum á ráðstevnuni. Lærke greiddi frá, at Headspace eisini er eitt stað, har ung hugna sær við vinum og bara sleppa at vera, sum tey eru, uttan nakað trýst ella væntanir frá øðrum. Øll, sum luttóku í panelinum, vóru samd um, at hjálpin til ung eigur at vera skjót. Tað eigur at vera eitt stað, har mann eisini kann slappa av og hugna sær, og tað er alt avgerðandi, at staðið kennist trygt.

Nýggj gransking hjá Region Hovedstadens Psykiatri staðfestir somuleiðis, at Headspace ráðgevingartilboðið veruliga kann betra sálarheilsuna og trivnaðin hjá ungum. Headspace spælir ein avgerðandi leiklut í at stuðla ungum og fyribyrgja, at sálarheilsan ikki versnar.

Vit hava í alt ov langa tíð bíðað eftir almennum skipanum, og nú vita vit, at átøk hjá sivilsamfelagnum rigga, og at tað hjálpur at seta tíðliga inn við fyribyrging og stuðli. Íløgan í fyribyrging er lítil, men ein sera týdningarmikil íløga í okkara ungdóm. Øll ung, ið stríðast, hava rætt til skjóta og góða hjálp og stuðul.

Sinnisbati er sinnað at átaka sær uppgávuna at lyfta í felag saman við landi og kommunum at skapa eitt tilboð, ið gevur okkara ungdómi bestu líkindi at trívast og mennast. Hósdagin 20. novembur fer Sinnisbati á fund í fíggjarnevndini í løgtinginum, har vit fara at leggja fram okkara verkætlan at seta á stovn eitt føroyskt ungdómsráðgevingartilboð, sum hevur íblástur frá góðum royndum í Íslandi, Danmark og Noregi.

Okkara vón er, at fíggjarnevndin velur at stuðla verkætlanini. Tí, vit vita, hvat vit skulu gera, og latið okkum hugsavna okkum um at gera tað.

- Sinnisbati

📸 Lars Svankjær

30/10/2025

Ninna er í løtuni í Stockholm, har hon umboðar Sinnisbata og MEGD í Nordic Youth Disability Summit 👏