12/08/2026
တနံၤအံၤမ့ၢ်၀ဲ မုၢ်နံၤတနံၤလၢ ပဝဲကညီဖိကိးဂၤ သးပ့ၤနီၣ်၀ဲတသ့ဘၣ်န့ၣ်လီၤ. မ့ၢ်မုၢ်နံၤတနံၤလၢ ပခိၣ်ပနၢ်လုၢ်ဒိၣ်ပှ့ၤဒိၣ် ကီၢ်ခိၣ်စီၤဘးအူကၠံဒီး ခိၣ်နၢ်သိၣ်ဒူတဖၣ် ဘၣ်ဟ့ၣ်လီၤကွံၥ်အသးသမူ လၢပကညီဒီတကလုၥ် ကအိၣ်ဒီး နီၢ်ကစၢ် တၢ်စံၣ်ညီၣ်ပၢလီၤသးခွဲးယၥ်အဂီၢ်လီၤ. လၢတၢ်န့ၣ်အဃိ လါအီကူၥ် (၁၂) သီအနံၤအံၤ ဘၣ်တၢ်ပၥ်ပနီၣ်အီၤ ဒ်အမ့ၢ် ကညီဒီကလုၥ်မၤထူရၤအမုၢ်နံၤအသိး ဒီး ဘၣ်တၢ်မၤလၤကပီၤအီၤကိးနံၣ်ဒဲး ဒ်သိး ပကသ့ၣ်နီၣ်ထီၣ်က့ၤ ပကီၢ်ခိၣ် စီၤဘးအူကၠံဒီး ကယဲၢ်ၦၤလၢအလုၢ်ထီၣ်တ့ၢ်အသးသမူ လၢကညီဒီကလုၥ်စုကဝဲၤတၢ်ပၢၢ်ဆၢဒီတကတီၢ်အပူၤ အဂီၢ် န့ၣ်လီၤ .
တနံၤအံၤ ကညီမၤထူရၤမုၢ်နံၤ ပှဲၤထီၣ် ၇၆ ၀ီတ၀ီလံန့ၣ်လီၤ. တၢ်မၤလၤကပီၤ ကညီမၤထူရၤမုၢ်နံၤအံၤ တမ့ၢ်ထဲလၢ တၢ်ကသ့ၣ်နီၣ်မၤလၤကပီၤက့ၤ မၤထူရၤဒီးပှၤဒူပှၤဃိၤလၢ အလုၢ်ထီၣ်တ့ၢ်အသးသမူ လၢထံကီၢ်ဒီး ပှၤကလုၥ်တဖၣ်အဂီၢ်ဘၣ်. မ့ၢ်စ့ၢ်ကီးတၢ်ဂဲၤလိၥ်လၢ အမၤဆူၣ်ထီၣ်ကညီဖိအတၢ်ပၢၢ်ဆၢသးသဟီၣ်တဖၣ် ဒ်သိး ကညီဖိအါဂၤ ကပၣ်ဃုၥ်မၤသကိးတၢ်လၢ တၢ်ပၢၢ်ဆၢအပူၤ လၢခါဆူညါကညီဒီတကလုၥ် ကဒိးန့ၢ်ဘၣ်က့ၤ နီၢ်ကစၢ်တၢ်စံၣ်ညီၣ်ပၢလီၤသးခွဲးယၥ်ဒီးတၢ်သဘျ့အဂီၢ်န့ၣ်လီၤ.
ဒ်သိးကညီဖိ ကအိၣ်ဘၣ်ဒီးတၢ်မုၥ်တၢ်ခုၣ် နီၢ်ကစၢ်တၢ်စံၣ်ညီၣ်ပၢလီၤသးခွဲးယၥ်, ဒ်သိးပကန့ၢ်ပၢဘၣ်က့ၤ ပဟီၣ်ခိၣ်က ပံၥ်ဒီး ပန့ဆၢၣ်တၢ်အိၣ်ယၢၤသ့ၣ်တဖၣ်အဂီၢ်, မၤထူရၤလၢအလုၢ်ဒိၣ်ပှ့ၤဒိၣ်သ့ၣ်တဖၣ် ဘၣ်လုၢ်ထီၣ်တ့ၢ်အသးသမူ အါအါဂီၢ်ဂီၢ်လံ. မ်ပ၀ဲကညီဖိကိးဂၤ ပကမၤလၤကပီၤဒီးသ့ၣ်နီၣ်ထီၣ်က့ၤအ၀ဲသ့ၣ် အတၢ်ဟ့ၣ်လီၤသး ထီဘိတပယူၢ်ဃီ, ဒီးနၤလၢနလီၢ် ယၤလၢယလီၢ် ဒ်တၢ်သ့အိၣ်ဒီးပှၤအသိး ဒီးဒ်မၤထူရၤလၢအလုၢ်ထီၣ်တ့ၢ်အသးသမူတဖၣ် မုၢ်လၢ်ဒီးဂဲၤ လိၥ်တ့ၢ်ဝဲအသိး ပကဂဲၤလိၥ်သကိးလၢ ပကညီဒီတကလုၥ်အတၢ်စံၣ်ညီၣ်ပၢလီၤသးခွဲးယၥ်အဂီၢ် န့ၣ်တက့ၢ်.
___________
© Karen Environmental and Social Action Network [KESAN].
