Endowment Fund for the Rehabilitation of Tigrai

07/06/2026

ካብ ጋንታ ትራንስ ብሽክሌተኛ ቤተልሄም ዳኒኤል ተዓዊታ

ሻምፕዮና ኦሎምፒክ ሲስተም ውድድር ብሽክሌታ ኮርሶ ትግራይ ሎሚ ብክልቲኡ ፆታ መዛዘሚ ውድድሩ እናካየደ እንትኸውን ኣቐዲሙ ብደቂ ኣነስትዮ 60 ኪሎ ሜትሮ ርሕቐት ዝሸፈነ ምስ መዛዘሚ 4 ቮላታ ዝሓዘ ናይ ከተማ ክሪተርየም (Criterium) ውድድር ዘካየደ ኮይኑ፤ ተቐዳዳሚት ጋንታ ትራንስ ብሽክሌተኛ ቤተልሄም ዳኒኤል ተዓዊታ።

ተቐዳደምቲ ነዚ ርሕቐት ንምዝዛም 1 ሰዓትን 42 ደቒቓን 33 ሰከንድን ዝወሰደለን እንትኾን ብስዓት 34.47 ኪ/ሜ ዝተዓቀነ ናህሪ ተጓዒዘን።

ብመሰረት እዙይ ብሽክሌተኛ ቤቴልሄም ዳንኤል ካብ ጋንታ ትራንስ 25 ነጥቢ ብምርካብ ተዓዋቲት ሜዳልያ ወርቂ፣ ብሽክሌተኛ ኣብረት ገ/ሚኪኤል ካብ ጋንታ ትራንስ 10 ነጥቢ ብምርካብ ተዓዋቲት ሜዳልያ ብሪ፣ ብሽክሌተኛ ቅሳነት ግርማይ ካብ ጋንታ መስፍን 8 ነጥቢ ብምርካብ ተዓዋቲት ሜዳልያ ነሓስ ኮይነን ውድድረን ዛዚመን እየን።

ብዚ መሰረት ድማ ጋንታ ትራንስ 1 ወርቂን 1 ብሪን እንትትረክብ ጋንታ መስፍን ድማ 1 ነሓስ ጥራሕ ረኺባ እያ።

ቀፂሉ ድማ ብደቂ ተባዕትዮ 90 ኪ/ሜ ርሕቐት ዝሸፈነ ውድድር እናተኻየደ ይርከብ ክብል ድወት ሓቢሩ።

05/06/2026

ተወዳደርቲ ጋንታ ፋብሪካ ስሚንቶ መሰቦ ዓወት ኣመዝጊቦም

ትማሊ ኣብ ከተማ መቐለ (ስራዋት) ኣብ ዝተኻየደ 31 ኪሎ ሜትሮ ዝሸፈነ ውድድር ሻምፒዮና ብሽክሌታ ትግራይ ኦሎምፒክ ሲስተም፣ ጋንታ ፋብሪካ ስሚንቶ መሰቦ ቀዳማይ ብምውጻእ ዓወት ኣመዝጊቦም።

ውፅኢት እቲ ውድድር እንትርአ ድማ ቀዳማይ ደረጃ ፋብሪካ ስሚንቶ መሰቦ፣ ዝወሰደሎም ጊዜ 0:36'00''14 እንትኸውን ማእኸላይ ቅልጣፈ 49.74 ኪሎ ሜትሮ ብሰዓት (k/m/hr) እዩ።

እዚ ብፌደሬሽን ብሽክሌታ ትግራይ ዝተዳለወን ብባንኪ ወጋገን ዝተስፖንሰረን ውድድር፣ ናይ ተቐዳደምትና ብቕዓትን ፃዕርን ዘመስከረ እዩ። ንተቐዳደምትናን ደገፍቲ ጋንታን እንኳዕ ደስ በለኩም ክብል እቲ ትካል ኣብ ዕላዊ ገፁ ሓቢሩ።

face book-https://www.fb.com/l/6lp1kJRRR
Telegram - https://t.me/messeboCementPLC
X (Twitter )-
Website -https://www.messebocement.com/

04/06/2026

ሰነዳት ትእምት እንታይ ይብሉ? (ካልኣይ ክፋል)

ኣብ ዝሓለፈ ሕታም ትእምት ካብ ቅድመን ድሕረን ምስረትኡ ጀሚሩ ዝነበረ ከይድን ኣመሰራርታን፣ ዝተጣየሸሉ ዕላማ፣ ሃፍቱ፣ ዋንነቱን ምሕደርኡን ዝብሉን ካልኦትን ዛዕባታት ብምልዓል ንሰነዳት ትእምት ብምውካስ ብንፁርን ግልፅነት ብዝፈጥሩ ጭብጥታትን ተሰንዩ ከምዝቐረበ ይዝከር፡፡

ንሎሚ ድማ መቐፀልታ ናይቶም ኣብ መመስረቲ ፅሑፍ ትእምት ዝተቐመጡ ዓበይቲ ነጥብታት ማለት እውን ቅርፀ መሓውር (ኣወዳድባ)፣ ሕጋውነት፣ መንነትን ዋንነትን ትእምት፣ ተፀዋዕነት፣ ዝመሓደረሎም ሕግታት ዝብሉን ካልኦትን ዛዕባታት መሰረት ብምግባር ብምትሕብባር ትእምትን ምስንዳእ ጋዜጣ ወይንን ኣብ ዝዳሎ ዓምዲ ትእምት ሕታም 15 ጉንበት 2018 ዓ.ም ከም ዝስዕብ ቀሪቡ ኣሎ።

ትእምት ዝተበገሰሎም ዕላማታት ንምዕዋት ከምኡ እውን ኣብ ከይዲ ምሕደራ ሃፍቲ ግልፅነትን ተሓታትነትን ንምርግጋፅ ብዝምቹ መልክዑ ዝተወደበ ቅርፀ መሓውር ዘለዎ ትካል እዩ፡፡ ቅርፀ መሓውር ኣመራርሓ ትእምት ብዝምልከት ኣብ መመስረቲ ፅሑፍ ዓንቀፅ ትሽዓተ ከምዝተደንገገ ኣብ ላዕሊ ቤት ምኽሪ ትእምት ኣሎ፡፡ ኣብ ትሕቲኡ በዓል ሓደራ ቦርድ ትእምት፤ ኣብ ትሕቲ በዓል ሓደራ ቦርድ ድማ ክልተ ቤት ፅሕፈታት ማለት እውን “ማእኸል ኢንቨስትመንት ትእምት”ን “ቤት ፅሕፈት ስራሕቲ ምግባረ ሰናይ ትእምት”ን ዝሓቖፈ እዩ፡፡ እዞም ክልተ ኣካላት ተፀዋዕነቶም ንበዓል ሓደራ ቦርድ ትእምት ኮይኖም ነናይ ባዕሎም ማኔጅመንት ኮሚቴን ስታፍ ሰራሕተኛታትን ዘለውዎም እዮም፡፡

ቀፂሉ ዝርአ እንታይነትን መንነትን ትእምት ዝምልከት እዩ፡፡ ከምዝፍለጥ ትእምት ማለት “ትካል እግሪ ምትካል ትግራይ” ናይ ዝብል ስም ሓፂር መፀውዒ እዩ፡፡ ኣብ መመስረቲ ፅሑፍ እዚ ትካል ዓንቀፅ ሓደ ስም ትካል ኣብ ዝብል ርእሲ ብትግርኛን ኢንግሊዘኛን ዝተወሃቦ ስም ኣሎ፡፡ ብትግርኛ ዝተውሃቦ ስም “ትካል እግሪ ምትካል ትግራይ” እንትኸውን ብኢንግሊዘኛ ድማ “ENDOWMENT FUND FOR THE REHABILITATION OF TIGRAY (EFFORT)” ዝብል ስያሜ ተዋሂብዎ ኣሎ፡፡ ካብዚ ወፃኢ ብኣምሓርኛ ኣብ ዝተተርጎመ መመስረቲ ፅሑፍ ድማ “የትካል እግሪ ምትካል ትግራይ (ትእምት)” ብዝብል ተተርጕሙ ይርከብ፡፡ ኣብ ካልኦት ናይ ኣምሓርኛ ሰነዳትን ናይ ፌደራል ቤት ፍርዲ መዛግብትን እውን “የትግራይ መልሶ መቋቋም ድርጅት” ዝብል ንረክብ ኢና፡፡

ብዘይካ እዚ ትእምት እንታይ ዓይነት ትካል እዩ? ዝብል እውን ብኣንክሮ ክንርድኦ ዝግባእ ጉዳይ እዩ፡፡ ትእምት እንታይ ዓይነት ትካል ምዃኑ ንምርዳእ ዝተመስረተሎም ሕግታት፤ ብእንግሊዘኛ ተዋሂበዎ ዘሎ ስምን ኣብ መእተዊ እቲ መመስረቲ ፅሑፍ ናይ መጀመሪያ ዓንቀፅ ተገሊፁ ዘሎ ሓሳብን መሰረት ብምግባር ከምኡ እውን ኣብ ዕላማታቱ ዝተቐመጡ ስራሕቲ ምርኣይ የድሊ፡፡

ኣብ ዝሓለፈ ሕታም ከምዝገለፅናዮ ትእምት ዝተጣየሸሉ ሕጊ ብ1952 ዓ/ም ዝወፀ ፍታብሄር ሕጊ ምዕራፍ ሰለስተ (፫)፤ ክፍሊ ሓደ (፩) “የበጎ ኣደራጎት ድርጅት” ዝብል ርእሲ ዓንቀፅ 483 ከምኡ እውን ቀፂሎም ብዘለው ድንጋገታትን መሰረት እዩ፡፡ እዚ ዝተጠቐሰ ዓንቀፅ ንትካል ምግባረ ሰናይ (የበጎ አድራጎት ድርጅት) ዝሃቦ ትርጉም እንትንርኢ ድማ “የበጎ ኣድራጎት ድርጅት ተግባር ማለት አንድ ሰው አንድ ሃብት ወይም ብዙ ሃብቶች ትርፍ ለማግኘት ሳይሆን በማይመለስ አኳኋንና ለዘለዓለም አንድ የተወሰነ የጠቅላላ ጥቅም ግብ ላለው የሚያውልበት ስራ ነው” ዝብል እዩ፡፡ ኣብቲ ናይ ኢንግሊዘኛ ቅዳሕ ድማ “An act of endowment is an act whereby a person destines certain property irrevocably and perpetually to a specific object of general interest other than the securing of profits.” ብዝብል ተገሊፁ ንረኽቦ፡፡

ስለዚ ትእምት ክጣየሽ እንተሎ እዚ ሕጊ እዚ ጥራሕ እዩ ነይሩ፡፡
ምስዚ ብተዛማዲ ዝወፁ ካልኦት ኣዋጃት እንተርኢና እውን ትካላት ገበርቲ ሰናይን ማሕበራትን ንምምዝጋብን ምምሕዳርን ዝወፀ ፌደራል ኣዋጅ ቁፅሪ 621/2001 ዓ/ም ነይሩ፡፡ እዚ ግና ብፌደራል ኣዋጅ ቁፅሪ 1113/2011 ዓ/ም (የሲቨል ማህበረ ሰብ ድርጅቶች አዋጅ) ተሳዒሩ እዩ፡፡ ኣብዚ ኣዋጅ ዓንቀፅ ክልተ ንኡስ ዓንቀፅ ኣርባዕተ “የበጎ አድራጎት ድርጅት” ንዝብል ዝሃቦ ትርጉም “ለጠቅላላው ህዝብ ወይም ለሶስተኛ ወገን መስራትን አላማ አድርጎ የተቋቋመ ድርጅት ነው” ዝብል እዩ፡፡ እዚ ሕጊ እዚ ንናይ ፈደራል ትካላት ዝገዝእ ሕጊ እንትኸውን ብሄራዊ ክልላዊ መንግስቲ ትግራይ እውን ክልላዊ ትካላት ዝመሓዳደራሉ ናይ ባዕሉ ክልላዊ ሕጊ ኣውፂኡ እዩ፡፡ ንኣብነት፣ ቁፅሪ ኣዋጅ 327/2011 ዓ.ም ምዝገባን ምሕደራን ማሕበራትን ትካላት ገበርቲ ሰናይን ብሄራዊ ክልላዊ መንግስቲ ትግራይ ንምውሳን ዝወፀ ኣዋጅ እዩ፡፡

ኣብዚ ኣዋጅ ኣብ ዓንቀፅ ክልተ ንኡስ ቁፅሪ 12 ንትካል ገባሪ ሰናይ ዝሃቦ ትርጉም “ንጠቕላላ ህዝቢ ወይ ንሳልሳይ ወገን ምስራሕ ዕላማ ገይሩ ዝተጣየሸ ትካል እዩ” ብዝብል እዩ ዝገልፆ፡፡ ቀፂሉ ኣብዚ ኣዋጅ ኣብ ክፍሊ ኣርባዕተ ኣጣይሻ ትካል ኣብ ዝብል ርእሲ ኣንቀፅ 12 ክልል በቆል ትካል ምጥያሽ ከምዝከኣል ደንጊጉ ይርከብ፡፡ ክልል በቆል ትካላት ኮይኖም ክጣየሹ ዝኽእሉ ድማ ሓሙሽተ ዓይነታት ከምዝኾኑ እዩ ኣቐሚጡ፡፡ ካብኣቶም ሓደ “ዘላቒ ገባሪ ሰናይ ትካል” ዝበሃል እንትኸውን ኣብቲ ኣዋጅ ክፍሊ ኣርባዕተ ዓንቀፅ 13(3)ን ንኡስ ክፍሊ ክልተ ዓንቀፅ 16(1)ን ከም ዝተገለፀ “ዘላቒ ገባሪ ሰናይ ትካል፤ ንብረት፤ ገንዘብ ብውህበቶ ወይ ብኑዛዜ ንሓዋሩን ብዘይምለስን ኩነታት ተፈልዩ ንዝተገለፀ ዕላማ ሰናይ ተግባር ጥራሕ ዝውዕለሉ ተግባር እዩ” ብዝብል ተገሊፁ ኣሎ፡፡

ኣብ መመስረቲ ፅሑፍ ትእምት መእተዊ ክፋሉ ተገሊፁ ዘሎ እውን ትእምት ትካል ገባሪ ሰናይ (Endowment Fund) ምዃኑ እዩ ዝገልፅ፡፡ ኣብቲ መመስረቲ ፅሑፍ ዓንቀፅ ኣርባዕተ ተዘርዚሮም ዘለው ዕላማታት እውን ንህዝብን ዓድን ኣብ ዝጠቕሙ ስራሕቲ ክሳተፍ፤ ክሰርሕን ክሕግዝን ዝተጣየሸ ትካል ምዃኑ እዩ ዘረድእ፡፡ እዚ ማለት ትእምት ንትርፊ ወይ ንመኽሰብ ዝተጣየሸ ዘይኮነስ ትካል ገባሪ ሰናይ ምዃኑ ብግልፂ ኣቐሚጡዎ እዩ፡፡ ብመሰረቱ ግና ትእምት ዝብሃል ትካል መን እዩ? ኣብ ዝብል ግልፂ ንምግባር ማለት ትእምት ክበሃል እንከሎ ገሊኡ ነቲ ኣብ ውሸጡ ዘሎ ማእኸል ኢንቨስትመንት ዝመስሎ፤ ገሊኡ ድማ ነቲ ስራሕቲ ምግባረ ሰናይ ዝጥምት ኣካል ወይ “ቤት ፅሕፈት” ዝመስሎ፤ ገሊኡ እውን ትእምት ከም ጥምረት ትካላት (Holding company) ገይሩ ዝርድኦ ኣሎ፡፡ ውሱን ሰብ እውን ትእምት መንግስታዊ ኣካል እዩ ኢሉ ዝሓስብ ኣይሰኣንን፡፡ ካሊእ ዓይነት ርድኢት ዝህልዎ ሰብ እውን ክህሉ ይኽእል እዩ፡፡ ኮይኑ ግና ትእምት እዞም ዝተጠቐሱ ኣካላት ኣይኮነን፡፡

እንታይነት ትእምት ብሓፂሩ ንምርዳእ፣ ብፍትሃ ብሄር ሕጊ ዓንቀፅ 483 መሰረት ዝተመስረተ፣ ኣብ መመስረቲ ፅሑፍ ትእምት ዓንቀፅ ሓደ ብዝተወሃቦ ስም ዝፅዋዕ፤ ኣብ ዓንቀፀ ኣርባዕተ ዝተዘርዘሩ ዕላማታት ንምስራሕ ዝተጣየሸ፤ ብቤት ምኽሪ ትእምት ዝምራሕ ትካል እዩ፡፡ ኣብ ትሕቲኡ ናይቲ ቤት ምኽሪ ውክልና ሒዙ ዝተጣየሸ በዓል ሓደራ በርድ ዘለዎ እዩ፡፡ እዚ እዩ ትካል እግሪ ምትካል ትግራይ ወይ “Endowment Fund For the Rehabilitation of Tigray” ዝበሃል ዘሎ፡፡ ኣብዚ ክፍለጥ ዘለዎ ትእምት ብቢሮ ፍትሒ ክልል ትግራይ “ትካል ገባሪ ሰናይ” ተባሂሉ ዝተመዝገበን ፍቓድ ዝረኸበን ትግራይ በቆል ገባሪ ሰናይ ትካል እዩ፡፡ ማእኸል ኢንቨስትመንት ትእምት ይኹን “ቤት ፅሕፈት ምግባረ ሰናይ ትእምት” ድማ ኣብ ውሽጢ ትእምት ዘለው ፈፀምቲ ኣካላት ወይ ክፍልታት እምበር ዓርሶም ዝኸኣሉ ትካላት ከምዘይኮኑ ምርዳእ ኣገዳሲ እዩ፡፡

ቀፂሉ ክለዓል ዘለዎ ትእምት ናይ መን እዩ? ዝብል እዩ፡፡ ትእምት ናይ መን ምዃኑ ምርዳእ ዝከኣል ሓደ፣ ኣብ መመስረቲ ፅሑፍ ትእምት ዓንቀፅ 7(1ን 2ን) ዝተገለፀ “ተጠቃማይ ሃፍቲ ትእምት ህዝቢ ትግራይ እዩ” ዝብል ኣሎ፡፡ ከምኡ እውን “ህዝቢ ኣብ ኣፈፃፅማን ኣወፋፍራን ሃፍቲ ትእምት ቅሬታ እንተሃልይዎ ሕጋዊ ብዝኾነ መንገዲ ቅሬትኡ ናብቲ ቤት ምኽሪ ከቕርብን ክምርምርን ይኽእል እዩ” ብዝብል ግልፅነትን ተሓታትነት ብዘረጋግፅ መንገዲ ገሊፁዎ ይርከብ፡፡ ብተወሳኺ እውን ኣብ ዓንቀፅ 12 ስራሕን ሓላፍነትን ቤት ምኽሪ ትእምት ንኡስ ቁፅሪ ሓደ “ቤት ምኽሪ ትእምት ብስም ህዝቢ ትግራይ ብሕድሪ ዘዋፍሮ ገንዘብን ንብረትን ብዝለዓለ ተኣማንነት ሕድሩ ኣፅኒዑ ብምሓዝ ኣብ ናይቲ ክልልን ህዝብን ቀፃላይ ልምዓት ምውዓሉ የረጋግፅን ይቆፃፀርን” ብዝብል ኣቐሚጡዎ ኣሎ፡፡

ትእምት ዝመሓዳደረሎም ሕግታት ዝምልከት እውን ናይ ፌደራል ሲቪል ማሕበራት (ORGANIZATIONS OF CIVIL SOCEITIES) ብኣዋጅ ቁፅሪ 1113/2011 ዓ/ም ዝመሓዳደራ እንትኾና ብብርኪ ክልል ትግራይ ድማ ብቑፅሪ ኣዋጅ 327/2011 ዓ/ም “ምዝገባን ምሕደራን ማሕበራትን ትካላት ምግባረ ሰናይን ብሄራዊ ክልላዊ መንግስቲ ትግራይ ንምውሳን” ብዝወፀ ሕጊ እየን ዝመሓዳደራ፡፡ ከምኡ እውን ብናይ ባዕለን መተሓዳደሪ ደንብን ውሽጣዊ መመርሒታትን እየን ዝመሓዳደራ፡፡ ስለዚ ትእምት እውን ሓደ ኣካል እዞም ትካላት ማሕበረ ሰብ ኮይኑ ዝተጣየሸ ስለዝኾነ በዞም ዝተጠቐሱ ሕግታት ዝመሓዳደርን ብናይ ባዕሉ መመስረቲ ፅሑፍን መተሓዳደሪ ደንብን ከምኡ እውን ብናይ ውሽጢ መምርሕታትን ኣሰራርሓታትን ይመሓደር፡፡

ኣጠቓሊልካ እንትርአ፣ ትእምት ውፅኢት መሪርን ነዊሕን ቃልሲ ህዝቢ ትግራይ ዝኾነን ብደምን ዓፅምን ተጋሩ ዝተሃነፀን ክልል በቆል ህዝባዊ ትካል ምግባረ ሰናይ እዩ፡፡ ዕላማ ትእምት ትግራይ ንምሕዋይን ንምህናፅን ኣብ ዝግበሩ ዓበይቲ ንጥፈታት ምስታፍ፤ ኩለመዳይ ስራሕቲ ልምዓት ምስላጥን ምሕጋዝን እዩ፡፡ ትእምት ዋንነት ህዝቢ ትግራይ ዝኾነ፤ ዘይመንግስታዊ፤ ብሕጊ ሲቪል ማሕበራት ወይ ገባሪ ሰናይ ዝተመስረተን ዝመሓዳደርን ህዝባዊ ትካል ምዃኑ ምርዳእ የድሊ፡፡ ኣብዚ ክፍለጥ ዘለዎ ትእምት ናይ ውልቀ ሰብ ትካል እውን ኣይኮነን፡፡ ናይ ኩሉ ህዝቢ ትግራይ ትካል እዩ፡፡ ስለዝኾነ ናይ ኩሉ ህዝቢ ትግራይ ሓለዋን ከለላን ክግበረሉ ዝግባእ ዓብዪ ትካል ብምዃኑ ዕላማ ፀላእቲ ንምብርዓን መላእ ህዝቢ ትግራይ ኣብ ጎኒ ትካላት ትእምት ኮይኑ ክሕልወንን ንስራሕተን ክድግፍን ይግባእ፡፡

02/06/2026

ተወዳዳርቲ ጋንታታት ፋብሪካ ስሚንቶ መሰቦን ትራንስ ኢትዮጵያን ተዓዊቶም

ኣብቲ ብኣሰናዳእነት ፌደሬሽን ብሽክሌታ ትግራይ ብስፖንሰር ባንኪ ወጋገን ዝካየድ ዘሎ ውድድር ሻምፒዬና ብሽክሌታ ትግራይ ኦሎምፒክ ሲስተም ቀፂሉ ሎማዓንቲ ኣብ ከተማ መቐለ ስራዋት መበገሲን መዛዘምን ዝገበረ 31 ኪሎ ሜትሮ ዝሸፈነ ኮርስ ደቂ ተባዕትዬን 25 ኪሎ ሜትሮ ዝሸፈነ ኮርስ ውድድር ፈተነ ውልቀ ሰዓት ተኻይዱ።

ብመሰረት'ዚ ተወዳዳራይ ጋንታ መሰቦ ሲሚንቶ ፋብሪካ ተመስገን ፍትዊን ተወዳዳሪት ጋንታ ትራንስ ኢ/ያ ኣብረሀት ገ/ሚካኤል ተዓዊቶም ። ከም ዕላዊ ገፅ ፋብሪካ ስሚንቶ መሰቦ።

02/06/2026

ላዕለዎት ኣመራርሓ መስፍን ሜታልስ ኤንድ ኢንጅንሪንግን ፋብሪካ ሲሚንቶ መሰቦን ኣብ ዝርገሐ መሰረተ ልምዓት ፓወር ኢንጅነሪንግ ዘድሃበ ሓበራዊ ዘተ ኣብ ምስላጥ ይርከቡ።

ኣሓት ትካላት መስፍን ሜታልስ ኤንድ ኢንጅነሪንግን ፋብሪካ ሲሚንቶ መሰቦን መቐፀልታ ናይቲ በዚ መዳይ ዘካየድዎ ሓበራዊ ዘተ እዩ ሎሚ ዕለት ብሰፊሕ ኣብ ምዝታይ ዝርከቡ ዘለዉ። ከም ዕላዊ ገፅ መስፍን ሜታልስ ኤንድ ኢንጅንሪንግን።

Mesfin Metals and Engineering
ኣሰር ፅንዓት

02/06/2026

ኣብ ማእኸል ኢንቨስትመንት ትእምት ሲነርጅን ፓርትነርሺፕን ጠሚቱ ሰርትፍኬት ምስግና ተበርኪቱ።

ኣብ ሲነርጂ ኣይተ ጠዓመ ከበደ፣ ኣብ ፓርትነርሺፕ ኣይተ መርሃዊ ደስታ ካብ ማእኸል ትእምት ክሳብ ኩባንያ ንዘለው ላዕለዎት ኣመራርሓን ሰራሕተኛታትን ንዝሃብዎ ስልጠናን ንዘርኣይዎ ዉፍይነትን ሰርትፍኬት ምስጋና ካብ ኢድ ሓላፊ መምርሒ ፓርትነርሺፕን ሲነርጅን ማእኸል ኢንቨስትመንት ትእምት ኣይተ ይትባረክ ኣማሃ ተቐቢሎም ።

30/05/2026

ትእምት ትእምርቲ- ፅንዓት /ሰነዳዊ ፊልሚ
https://youtu.be/8zMutY7AEEI?si=6YsP57MBXu8Xg5gy

28/05/2026

ብምኽንያት መበል 35 ዓመት በዓል ዓወት 20 ጉንበት ካብ ት.እ.ም.ት ዝተውሃበ መልእኽቲ ሰናይ ትምኒት

ቅድሚ ኹሉን ልዕሊ ኹሉን ኣብ ውሽጥን ደገን ንዝርከብ መላእ ህዝቢ ትግራይን ጀጋኑ ኣመራርሓን ኣባላትን ሰራዊት ትግራይን እንኳዕ ንመበል 35 ዓመት በዓል ዓወት 20 ጉንበት ኣብፀሐኩም ኣብፀሐና ብምባል ትካል እግሪ ምትካል ትግራይ ፣ ብሽም መላእ ማሕበረሰብ ትእምት ሰናይ ትምኒቱ እንትገልፅ ዝለዓለ ሓጎስ ይስምዖ።

ብፍላይ ኣብ ፅባሕ ፣ ትካላት ትእምት ካብቲ ብሰንኪ ኲናት ዝበፅሐን ዕንወት ንምውፃእ ዘይሕለል ፃዕሪ ብምክያድ ፣ ዝሐሸ ቑመና ክህልወን ዝካየዱ ዘለዉ ስራሕቲ ተጠናኺሮም ንክቕፅሉ ፣ ትካላዊ ዋንነትን ሕጋውነትን ማእኸል ገይረን ምስራሕ ዝብሉን ካልኦት ዓበይቲ ውሳነታትን ዘሕለፈ ዕዉትን ታሪካውን 8ይ ህፁፅ ጉባኤ ቤት ምኽሪ ትእምት ኮይኑ ሰናይ ትምኒቱ እንትገልፅ ዝስመዖ ፍናን ዝለዓለ እዩ።

ኣብዚ ፈታኒ እዋን ኮይንኩም ትካላት ትእምት ገጢምወን ካብ ዘሎ ከቢድ ሓደጋ ንምውፃእ ቀትርን ለይትን ትቃለሱ ንዘለኹም ኣባላት ቤት ምኽሪ ፣ በዓል ሓደራ ቦርድ ትእምትን መላእ ኣመራርሓን ሰራሕተኛታትን ኩለን ትካላት ፤ ትካል እግሪ ምትካል ትግራይ በዚ ኣጋጣሚ ዘለዎ ክብሪን ልዑል ናእዳን ክገልፅ ይፈቱ።

ህዝቢ ትግራይ ብደሙን ዓፅሙን ዝሃነፀን ሃፍቲ ህዝቢ ትግራይ ዝኾና ትካላት ትእምት ካብ ፅባሕ ምስረትአን ጀሚረን ኣብ ዝተፈላለዩ እዋናት ብሰብ ስራሕን ተፈጥሮኣውን ሓደጋታት ዝደቐቐ ቁጠባ ትግራይ ብምድጋፍን ብምሕዋይን ማእገር ማሕበረ-ቁጠባዊ ሕዉየትን ዕብየትን ምዃነን ብምርግጋፅ ኣብ ዕብየትን ምዕባለን ኢንዳስትሪ ህዝቢ ትግራይ እወንታዊ እጃመን እናበርከታ ከምዝመፃ ይፍለጥ።

ይኹን እምበር ኣብ ልዕሊ ህዝቢ ትግራይ ዝተፈፀመ ጄኖሳይዳዊ ኲናት ፅንተት ኣብ ልዕሊ ትካላት ትእምት እውን ትሉም ስርዓታዊ ዕንወትን ብርሰትን ክበፅሐን ዝተገበረሉ ኩነታት ተፈጢሩ እዩ። በዚ ጄኖሳይዳዊ ኲናት ኣቢሉ ኣብ ልዕሊ ትካላትን ሰራሕተኛታትን ትእምት ካብ ዝበፅሐ ሞራላዉን ስነ-ኣእምሮኣዉን በሰላ ብተወሳኺ ብኣማኢት ቢልዮናት ቅርሺ ዝግመት ኣብ ንብረት ዕንወትን ብርሰትን ከምዝበፅሐ ክሳብ ሐዚ ብዝተኻየደ መፅናዕቲ ተረጋጊፁ ኣሎ።

ድሕሪ ምፍራም ዉዕሊ ፕሪቶርያ እውን ትግራይ እንተለሚዓ ዓይኖም ደም ዝነብዑ ፀላእቲ ህዝቢ ትግራይ ንኸብዶም ብዝሓድሩ ኣብ ዉሽጥና ብዝርከቡ ተለኣኣኽቶም ኣቢሎም ትካላት ትእምት ሙሉእ ንሙሉእ ንምጥፋእን ንምዉራርን ቀትርን ለይትን እናሰርሑ ይርከቡ። ብኣንፃሩ ድማ ቤት ምኽርን በዓል ሓደራ ቦርድን ትእምት ምስ መላእ ኣመራርሓን ሰራሕተኛታትን ትእምት ብምዃን ሕጋውነትን፣ ትካላውነትን ዋንነት ህዝብን ትካላት ትእምት ብምምላስ ኣብ ሕዉየትን ዳግመ-ህንፀትን ትግራይ ዝዓዘዘ ግደ ንክህልወን ብዝለዓለ ትግሃት እናሰርሐ ከምዝርከብ እንትገልፅ ናይ መላእ ህዝቢ ትግራይ ሙሉእ ደገፍን ክትትልን ከምዘይፍለዮ ብምትእምማን እዩ።

ብድማር ውፅኢት ሓያል ቃልስን ከቢድ መስዋእትን ህዝቢ ትግራይ ዝኾነ ትእምት ሕውየትን ዳግመ ህንፀትን ትግራይ ኣብ ምቅልጣፍ ፣ማሕበረ-ቁጠባዊ ፀገማት ህዝቢ ትግራይ በብ ብርኩ ንክፍትሑ ኣብ ምድጋፍ ፣ ጀጋኑ ሓርበኛታትን ስድራ ስውኣትን ኣብ ምሕጋዝ ፤ ኮታስ ማሕበራዊ ፣ ቁጠባውን ባህላውን ልምዓት ኣብ ዘረጋግፁ ዓውድታት ብምስታፍ ቁልፊ እጃሙ እናበርከተ ካብ ምቕፃል ብተወሳኺ ፤ ሕግን ስርዓትን ኣኽቢሩ ብምንቅስቓስ ፤ ፅፉፍ ምሕደራ ሃፍትን ንብረትን ብምዝርጋሕን ስርዓት ፋይናንስን ኦዲትን ብምትእትታውን ካልኦት ስራሕቲ ብምትግባርን ኣበርቲዑ ከም ዝቕፅለሉ የረጋግፅ።

ደጊምና እንኳዕ ንመበል 35 ዓመት ዓወት 20 ጉንበት ኣብፀሓኩም ኣብፀሓና ንብል።

ክብርን ሞገስን ጀጋኑ ስውኣትና!
ትእምት ንሕውየትን ዳግመ-ህንፀትን ትግራይ !
ትካል እግሪ ምትካል ትግራይ (ትእምት)

26/05/2026

ትካል እግሪ ምትካል ትግራይ (ትእምት) ንኹሉኹም ተኸተልቲ እምነት እስልምና እንኳዕ ንመበል 1447 በዓል ዒደል ዓረፋ ኣብፀሓኩም ይብል።

ዒድ ሙባረክ !

ትእምት ንሕውየትን ዳግመ ህንፀትን ትግራይ !
ትካል እግሪ ምትካል ትግራይ (ትእምት)

22/05/2026

ስራሕቲ ምንፃፍ ኣስፋልት ከተማ ዓዲ-ግራት ተጀሚሩ

ሱር ኮንስትራክሸን ብዝተፈላለዩ ምኽንያታት ተዛሓሒሉ ዝፀነሐ ስራሕቲ መንገዲ ኣስፋልት ከተማ ዓዲ-ግራት ብዝተረኸበ ውሱን ነዳዲ ሎሚ 14 ጉንበት 2018 ዓ/ም ስራሕቲ ምንፃፍ ኣስፋልት ጀሚሩ።

ነበርቲ ህዝቢ ከተማ ዓዲ-ግራት ካብ ንመሰረተ ልምዓት ዘለዎም ባህግን ፃምእን ዝብገስ ኣብ ሰለጤኑ ብዙሕ ቅሬታታት እናልዐሉ ከም ዝፀንሑ ዝሓበሩ ኣብ ሱር ኮንስትራክሽን ኣካያዲ ስራሕ እቲ ፕሮጀክት ዝኾኑ ኢንጅነር ብርሃነ ገ/መድህን ቀንዲ ምኽንያት ምድንጓያት እቲ ፕሮጀክት ግና ሕፅረት ነዳዲ ከም ዝነበረ ብምሕባር፣ ኣብ መወዳእታ ምምሕዳር እታ ከተማ ኣብ ክሊ ብዙሓት ፀገማት ኮይኑ ነቲ ፀገም ንምፍታሕ ዝወሰዶ ተበግሶ ምስግና ይግበኦ ኢሎም።

ብተወሳኺ ኢንጅነር ብርሃነ፣ ሱር ሕዚ ብሰንኪ ሰእነት ነዳዲ ዳርጋ ኣብ መብዛሕትእን ዓበይቲ ከተማታት ትግራይ ሒዝዎ ዘሎ ስራሕቲ መንገዲ ኣስፋልት ሰራሕ ጠጠው ናብ ዘብለሉ ብርኪ በፂሑ ከም ዝርከብ ብምሕባር ካልኦት ምምሕዳራት ከተማታት እውን ካብዚ ተሞክሮ ብምውሳድ ነቲ ኣጋጢሙ ዘሎ ፀገም ንምፍታሕ ኣብ ጎኒ እቲ ትካል ኮይኖም ካብ ዝኾነ እዋን ንላዕሊ ጠመተ ሂቦም ክሰርሕሉ ተላብዮም ክብል ኮሚኒኬሽን ሱር ኮንስትራክሸን ሓቢሩ።

Endowment Fund for the Rehabilitation of Tigrai - ትእምት

07/06/2026

05/06/2026

04/06/2026

02/06/2026

02/06/2026

02/06/2026

30/05/2026

28/05/2026

26/05/2026

22/05/2026

Address

Telephone

Website

Alerts

Contact The Organization

Shortcuts

Share

Category