03/10/2026
ተስፋ | ክፍል 4
ተስፋ የሕይወት ሽታ የሚሆነው ምንጭ እና መሠረቱ እግዚአብሔር ሲሆን ነው ። ተስፋ የሕይወት ሽታ ብቻ ሳይሆን የሕይወት ውሃ ወንዝ ነው ። ወንዝ ደግሞ ምንጭ አለው ። ምንጩም እግዚአብሔር ነው ። ወንዝ የተጓዘበት መንገድ ሁሉ ልምላሜን ይቸራል ። ከወንዝ አጠገብ ያለ ተክል ፍሬያማ ፣ ቅጠሉም እንደማይረግፍ ሁሉ በተስፋ የሚደረግ ጉዞ ሕይወት እና ስኬታማነትን ይጎናጸፋል ። መሠረቱ ምንጭ የሆነ ወንዝ የማይቆም ወንዝ ነው ። የማይቆም ወንዝ ደግሞ ድንጋዩን ሰንጥቆ ያልፋል ። ድንጋዩን ሰንጥቆ የሚያልፈው ግን በጉልበቱ ሳይሆን በጽናቱ ነው ። ለዚህም ጽናትን ወልደ ተስፋ ልንለው እንችላለን ። ያለተስፋ ጽናት እንዲሁ የሚመጣ ነገር አይደለም ። የምንጸናው በተስፋ ነውና ። ተስፋ ከእግዚአብሔር ስለሚመነጭ ተስፋ ቢስ ሆኖ ለደከመው የሰው ልጅ ልምላሜ እንዲሆን እግዚአብሔር አስቀድሞ የማይጠፋ ተስፋን ሰጠው ።
ባለመታዘዝ ጠንቅ በሠራው ኃጢአት ምክንያት ለወደቀው የሰው ልጅ እግዚአብሔር የሰጠው ሀብት ተስፋን ነበር ። ርሱም ተስፋ በክርስቶስ በኩል ዳግመኛ ወደ እግዚአብሔር መንግሥት የመምጣት ተስፋ ነበር ። ተስፋን የሰጠ የታመነ አምላክ ነውና እንደተናገረው ተስፋውን ፈጸመው ። በርግጥም ቀቢጸ ተስፋነት ባየለበት ዓለም ፤ በኃጢአታችን ከዛልንበት ድካም ብርቱ ሆነን ምንቆመው ፥ ሞታችን ተሽሮ ሕያውነትን ምንጐናጸፈው እግዚአብሔር በላከው አንዲያ ልጁ ኢየሱስ ክርስቶስ ስናመን ነው ። አምነን የዳንበት ወንጌል ቀድሞ የተሰጠ ተስፋም ነው ።
ይህ ተስፋ ዛሬም በክርስቶስ ኢየሱስ ባለማመን በብዙ ተስፋ መቁረጥ ላሉት ሕይወትን የሚሰጥ ወንጌል ነው ። የምንሰብከው ፥ ያመነው ፣ የምንኖርበት ወንጌል እግዚአብሔር የሰጠው የዘላለም ተስፋ ነው ። ለምውቱ ሰው ሕያውነትን የሚዘራ ተስፋ በክርስቶስ መሆን ነው ። ዘለዓለማዊው ዕረፍት በዘለዓለሙ ተስፋ በክርስቶስ ኢየሱስ ማመን ነው ። ሰው በክርስቶስ ኢየሱስ ካላመነ በቀር ከተስፋ መቁረጥ ስሜት ነጻ ሊሆን አይችልም ።
ተስፋችን ፍጹም የሚሆነውም የምንጠበቀው ተስፋችን ኢየሱስ በክብር በመላእከት ታጅቦ ሲመጣ ነው ። ዳሩ በክርስቶስ ኢየሱስ አምነንም መከራ በበዛበት ዓለም ስላለን ፤ አንዳንዴ ቀድሞ በዓለም እንዳለው ያይደለ የተስፋ መቁረጥ ስሜት ልናስተናግድ እንችል ይሆናል ። እንዲህ ባለ ሁናቴ ብዙዎቹ ቅዱሳን እንዳሳለፉ በቅዱሱ መጽሐፍ ተጽፏል ። አብርሃም እንዲህ ባለ ሁኔታ ውስጥ ሲሆን ነገሩን ለእግዚአብሔር ያዋየዋል ። መበርቻ የሚሆንም ቃል ከእግዚአብሔር ሰምቶ ይጸና ፥ ይጽናና ነበር ። ኤልያስንስ ብናነሣው ከኤልዛቤል በደረሰበት ዛቻ በከፍተኛ ተስፋ መቁረጥ እና ሀዘን ሆኖ ፥ ፍረኃቱን በእግዚአብሔር ፊት በማቅረብ ሞቱን እስኪመኝ በደረሰ ጊዜ ዳግመኛ ታድሶ እና በርትቶ ለብዙዎች የመነሣት ምክንያት ሲሆን እንመለከታለን ። ደካማውን እና ተስፋ በመቁረጥ የዛለውን ልብ እግዚአብሔር በተስፋ ሞልቶ ማስነሣቱ ድንቅ ነው ።
ይቀጥላል ...
ተጻፈ በጌታሁን አያኖ
