Negele Borena (Ijoollee Booree)

Directions

Negele Borena (Ijoollee Booree) የነጌሌ ቦረና ፍቅር መረዳጃ ማህበር

የ ፹ ቀን መታሰቢያ​እማሆይ ያምሮት ጌታሁን​የማክበር ሰላምታችንን እያቀረብን የእማሆይ ያምሮት ጌታሁን የ80 ቀን መታሰቢያ እሁድ መስከረም 10 2019 ዓ.ም ስለሆነ በመኖሪያ ቤታችን ከቀኑ ...
17/09/2026

የ ፹ ቀን መታሰቢያ

​እማሆይ ያምሮት ጌታሁን

​የማክበር ሰላምታችንን እያቀረብን የእማሆይ ያምሮት ጌታሁን የ80 ቀን መታሰቢያ እሁድ መስከረም 10 2019 ዓ.ም ስለሆነ በመኖሪያ ቤታችን ከቀኑ 6 ሰዓት ጀምሮ ከ..............ጋር በመገኘት የተዘጋጀውን ጸበል ጻድቅ እንዲቀምሱልን ለማክበር ጠርተንዎታል።

​አድራሻ : ኮዬ ዮሐንስ ቤተክርስቲያን አቢሲንያ ባንክ አጠገብ

ልሳነወርቅ መንገሻን በጥቂቱ ✍️(ታዴሞ)በቀይ አፈሯና የምታውደውና በጨው ውሃዋ የምታስጎነጨዋ ዳር አገሯ ነጌሌ ቦረና መንገዶቿ፣ በዘንፋላዎቿ የእንጀራ ዛፍ ተንዘላፋ በተረጋጋው የበረሃ ንፋ...
16/09/2026

ልሳነወርቅ መንገሻን በጥቂቱ
✍️(ታዴሞ)

በቀይ አፈሯና የምታውደውና በጨው ውሃዋ የምታስጎነጨዋ ዳር አገሯ ነጌሌ ቦረና መንገዶቿ፣ በዘንፋላዎቿ የእንጀራ ዛፍ ተንዘላፋ በተረጋጋው የበረሃ ንፋስ ታጅባ የብዙ ዘመናት የሰላምና ትስስር ማህደር ነበረች። ከተማዋ የንግድ፣ የፍቅርና የሰው ልጅ መናኸሪያ ፣ ለአካባቢው ነዋሪዎች የጸጥታና የእረፍት ጥላ መሆኗ አይዘነጋም። ነገር ግን በግንቦት 1983 ዓ.ም. በሀገሪቱ ላይ የተከሰተው የመንግሥት ለውጥ ድንገተኛ አውሎ ነፋስ፣ የዚችን ሰላማዊ ከተማ የሞቅታ ድባብ በአንድ ጀምበር ወደ ጭንቀትና ስጋት ለወጠው።

​በዚያን ወቅት ሀገሪቱ በለውጥ ማበልበል ውስጥ ትናወጣለች። የቀደመው ሥርዓት ሲፈርስ አዲሱ ጠመንጃ እያምባረቀ ሲገባ፣ በየመንገዱ የነበረው የጸጥታ ሁኔታ እጅግ አደገኛ ደረጃ ላይ ደረሰ። ማን እንደሚያዝ፣ ማን እንደሚተኩስ በማይታወቅበት፣ በየበርሃውና በየቁጥቋጦው ስር የታጠቁ ኃይሎች በጥርጣሬ በሚቃኙበት በዚያ አስጨናቂ ጊዜ፣ ለአሽከርካሪዎች መንገድ መውጣት ማለት ከሞት ጋር ፊት ለፊት የመጋፈጥ ያህል ነበር። ሞተር ማስነሳትና ወደ አውራ ጎዳና መግባት የቆረጠ ልብና ለሕይወት አለመሰሳትን የሚጠይቅ የቁማር ያህል አስፈሪ ሆነ። አሽከርካሪዎች ተሽከርካሪዎቻቸውን ደብቀዋል፤ መንገዶችም ጭልጥ ባሉ ባዶነታቸውና አስፈሪ ጸጥታቸው በድንጋጤ ተዋጡ።

​ይህ በሆነበት ወቅት፣ በርካታ የነጌሌ ቦረና ነዋሪዎች ለተለያዩ ጉዳዮች፣ ለህክምና፣ ለንግድና ለትምህርትና ለውትድርና ከቤታቸው ወጥተው በሻሸመኔ በአዋሳ፣ በዲላና በተለያዩ ከተሞች ተበታትነው ነበር። የትራንስፖርት መስመሮች በአንድ ጊዜ በመዘጋታቸውና መንገዶች አደገኛ በመሆናቸው፣ እነዚህ ወገኖች እንደወጡ የቀሩ ሀገርኛ ስደተኞች ሆኑ። ከትውልድ ቀያቸው ሩቅ ሆኖ የስጋትና የችግር ዜና ማዳመጥ፣ ከቤተሰብ ጋር መገናኘት አለመቻል፣ የመመለሻ መንገድ ማጣት—በየከተማው እንደ ወጡ የቀሩትን ነዋሪዎች ልብ በጭንቅና በትካዜ ሰበረው።

የነጌሌ ቦረና ቤተሰቦችም በበኩላቸው "ወጥተው የቀሩት ልጆቻችን፣ ወላጆቻችንና ወንድሞቻችን ወዴት ይሆኑ?" እያሉ በስጋት ቀናትና ሌሊቶችን ይቆጥሩ ነበር። ​ነገር ግን አንድ ሰው ሊኖረው የሚችለውን ያህል በርካታ ማንነቶች በአንድ አካል ውስጥ አጣምሮ ያጨቀ ድንቅ የጥበብ ሰው በዚያ ጭንቅ ጊዜ ውስጥ እንደ መሲህ ተነሳ።

በሕይወት ዘመኑ የብዙ የሙያ መስኮችን ደጅ አጠናቆ፣ በተለያዩ የሥራ አውዶች ውስጥ አልፎ የተለያዩ ተሞክሮዎችን ሊያከማች የቻለ ነው። በአንድ በኩል በቴክኒክና ምህንድስና ዕውቀቱ ውስብስብ ነገሮችን የሚተነትን መሀንዲስ፣ በሌላ በኩል ደግሞ የመንገዱንና የጉዞውን ፈተና ተቋቁሞ ተሽከርካሪን የሚያንቀሳቅስ ሾፌር ሆኖ የሚሾፍር። በእንጨትና በግንባታ ጥበብ ተፈጥሮአዊ ቁሳቁሶችን ቅርጽ የሚያስይዝ አናጢ፣ ዕውቀትና ልምዱን ለትውልድ የሚያስተላልፍ መምህር፣ እንደዚሁም ቡድንንና የሥራ ሂደትን የሚመራ ማኔጀር በመሆን የኃላፊነት ድርሻውን የሚወጣ። በተጨማሪም የቴክኒክ ብልሽቶችን የሚፈታና የሚያድስ መካኒክ፣ እንዲሁም ሀገርና ወገንን በጽናትና በዲሲፕሊን የሚጠብቅ ወታደር ሆኖ የሚያገለግል፣ በተለያዩ የሕይወት አጋጣሚዎች ውስጥ የያዛቸውን ሁለገብ አቅሞች፣ የተለያየ የሥራ ባህል ልምዶችና ተለዋዋጭ የሕይወት ተሞክሮዎችን አጣጥሞ የወጣ ባለብዙ ክህሎት ባለቤት የሆነ ሰው ነው።

የእጁ ጣቶች ማታ ማታ የመጽሐፍ ገጾችን በሚገለብጡበት ቅጽበት፡ ጠዋት ላይ ደግሞ የብረት ቁራጮችን የሚገጣጥሙ፣ የሞተር ድምፅ የሚያደምጡና ህይወት የሚዘሩ መካኒክ ነበረ። በአንድ በኩል የቀለም አባትና መምህር፣ በሌላ በኩል የላላውን የሚያጠብቅ የተፈጥሮ መሀንዲስ፣ የአናጢነትን ጥበብ የተካነ፣ ተሽከርካሪዎችን የሚያስነሳ ሾፌር፣ የስራ መሪ፣ አልፎም በዲሲፕሊን የታነጸ ወታደር ነበር።

​ያንን አስፈሪ የጦርነትና የጸጥታ ስጋት ድባብ፣ የተዘጋውንና አደጋ የተደቀነበትን መንገድ በድፍረት ለመጋፈጥ ቆረጠ። አውቶቡሱን አስነስቶ፣ ተስፋ ቆርጠውና ተጨንቀው በየከተማው የተበተኑትን የነጌሌ ቦረና ነዋሪዎች ከሻሸመኔ አዋሳና ከመንገድ ላይ እያሰበሰበ በሙሉ ፍቅርና ኃላፊነት መጫን ጀመረ። ከቤታቸው ወጥተው መመለሻ ላጡት፣ መንገድ ጠፍቷቸው ለተከፉት ተጓዦች የአውቶቡሱ ሞተር መነሳትና የእርሱ በቆራጥነት መሪውን መጨበጥ በራሱ ትልቅ የልብ እረፍትና የተስፋ ምንጭ ነበረ።

​ተሽከርካሪውን እያሽከረከረ፡ ያንን በጸጥታ የተዋጠውን አውራ ጎዳና ሰንጥቆ አልፎ ከሻሸመኔ አዋሳ ዲላ፣ ከዚያም ወደ ሞያሌ በሚወስደው አቅጣጫ ተፈተለከ። መንገዱ ህይወት እንዳጣ በበረሃማው ጸጥታና ስጋት ሲዋጥ፣ እርሱ ግን የተጨነቁትን ወገኖቹን ተስፋ በተሸከመችው አውቶብሱ ገሠገሠ። አሬሮ ላይ ታጥፎ፡ ባዶነቱንና አሸዋማው የሆነውን ነጩ አቧራውን እያሰነጠቀ በዋጭሌ በኩል አቆራረጠ። መልከ ጉባ ድልድይን ተሻግሮ፣ አየር ማረፊያውን አልፎ፣ በላሚሶ ሰፈር በኩል የሞተሩን ድምፅ እያሰማ ሲቃረብ፡ ከአውቶቢስ ድምጽ በዝምታ ተሸብባ የከረመችው የነጌሌ ከተማዋ የአውቶቡሱ ጡሩንባ ላሊላሊላሊላሊላሊላላ እያለ ከሩቁ እያስተጋባ ጠሰገሰ። ተሽከርካሪዋ በኪዳነ ምሕረት ቤተክርስቲያን በኩል ቁልቁል አጥፋ ወደ ከተማዋ ስትገባ፣ የመንገድ ዝግነቱን የሰበረ፣ ናፍቆትና ጭንቀቱን ያበሰረ የፋኖስ ብርሃን ሆኖ ታየ። በየሰው ሀገር ቀርተው የነበሩትን ወገኖች በሰላም ከቤተሰቦቻቸው ጋር ሲያገናኛቸው የነበረው ደስታና የልብ እረፍት በቃላት የሚገለጽ አልነበረም።

​ያ በፅናትና በድፍረት የተሞላ፣ የከተማዋን በር ለመጀመሪያ ጊዜ ከፍቶ ተስፋና ወገኖቿን ያበሰረ አባወራ፣ በርካታ ሙያዎችን በአንድ አካል አጣጥፎ የኖረው ያ ድንቅ ሰው—ልሳነወርቅ መንገሻ—ዛሬ ግን ወደማይቀረው የዘላለም እንቅልፉን አንቀላፍቷል። ታሪኩ፣ የቆራጥነት አሻራውና ለወገኖቹ ያደረገው ውለታ ግን በነጌሌ ቦረና ህዝብ ትዝታ ውስጥ ለዘላለም ታስቦ ይኖራል።

ነፍስህ በሰላም ትረፍ።

ለነጌሌ ቦረና ፍቅርና መረዳጃ ማኅበር አባላት፣ ለነጌሌ ቦረና ተወላጆችና ለወዳጅ ዘመዶች በሙሉ​የነጌሌ ቦረና ተወላጅ የነበሩት አቶ ልሳነወርቅ መንገሻ፤ የአቶ መርድ መንገሻ ወንድም ከዚህ ዓ...
15/09/2026

ለነጌሌ ቦረና ፍቅርና መረዳጃ ማኅበር አባላት፣ ለነጌሌ ቦረና ተወላጆችና ለወዳጅ ዘመዶች በሙሉ

​የነጌሌ ቦረና ተወላጅ የነበሩት አቶ ልሳነወርቅ መንገሻ፤ የአቶ መርድ መንገሻ ወንድም ከዚህ ዓለም ድካም ማረፋቸውን ስንሰማ የተሰማን ሐዘን ጥልቅ ነው።

​በመሆኑም የሟች ስርዓተ ቀብር ነገ መስከረም 6 ቀን 2019 ዓ.ም ከቀኑ 4:30 በፊሊጶስ ቤተ ክርስቲያን በአዲስ አበባ የሚፈጸም በመሆኑ፣ የማኅበሩ አባላት፣ ተወላጆችና ወዳጆች በሙሉ በመገኘት የመጨረሻ ሽኝት እንድታደርጉላቸው አክብሮት እንገልጻለን።

​ለቤተሰቦቻቸው፣ ለወዳጅ ዘመዶቻቸውና ለመላው ወዳጆቻቸው መጽናናትንና ፈጣሪ ብርታትን እንዲሰጥ እንመኛለን።

​ከነጌሌ ቦረና ፍቅርና መረዳጃ ማኅበር

የጋራ የአዲስ ዓመት የመልካም ምኞትና የአጋርነት ጥሪ🌼🌼🌼🌼🌼🌼🌼🌼🌼🌼🌼🌼🌼🌼🌼​ከአንድ የጋራ መነሻና ጥልቅ ማኅበራዊ ፍቅር የተወለዱት «ቮይስ ኦፍ ነጌሌ ቦረና» እና «የነጌሌ ቦረና ፍቅርና መ...
14/09/2026

የጋራ የአዲስ ዓመት የመልካም ምኞትና የአጋርነት ጥሪ
🌼🌼🌼🌼🌼🌼🌼🌼🌼🌼🌼🌼🌼🌼🌼

​ከአንድ የጋራ መነሻና ጥልቅ ማኅበራዊ ፍቅር የተወለዱት «ቮይስ ኦፍ ነጌሌ ቦረና» እና «የነጌሌ ቦረና ፍቅርና መረዳጃ ማኅበር»፣ የወገንን ደኅንነትና የማኅበረሰብ ዕድገት ለማረጋገጥ የየራሳቸውን የተልዕኮ ዘርፎች በመቃኘት የሕዝባችን ምሰሶ ሆነው በመንቀሳቀስ ላይ ይገኛሉ። ቮይስ ኦፍ ነጌሌ ቦረና በታላቅ ዓላማና ቁርጠኝነት በመሰለፍ፣ አባላትንና መላውን ሕብረተሰብ በማንቀሳቀስ በትምህርት፣ በልማትና በሰብዓዊ ድጋፍ መስኮች ለትውልድ የሚሻገር ሕያው አሻራ ያኖረ ሲሆን፤ የነጌሌ ቦረና ፍቅርና መረዳጃ ማኅበር በበኩሉ የማኅበራዊ ደኅንነት አወቃቀርንና የዕድር ባህላዊ እሴትን በማጠናከር በደስታም ሆነ በችግር ጊዜ የሕዝባችን መከታና አለኝታ ሆኖ ሲያገለግል ቆይቷል።

እነዚህ ሁለቱ እህት ማኅበራት አንዱ በልማትና በሰብዓዊ አገልግሎት፣ ሌላው ደግሞ በማኅበራዊ መረዳዳትና ደኅንነት ላይ ትኩረት አድርገው መሥራታቸው የተሟላ የማኅበረሰብ እድገት እንዲረጋገጥ የጎላ ሚና ተጫውቷል። አሁንም ከዘመነ ማርቆስ ወደ ዘመነ ሉቃስ ስንሸጋገር፣ ሁለቱም ማኅበራት አዲሱ ዓመት የሰላም፣ የፍቅርና የስኬት እንዲሆንልን መልካም ምኞታቸውን እየገለጹ፣ በአዲሱ ዘመንም የተሳትፎና የግንኙነት አድማሳቸውን ይበልጥ በማስፋት፣ ለጋራ አንድነት፣ ለልማትና ለዘላቂ እድገት በትብብርና በአጋርነት አብረው የሚሰለፉ መሆናቸውን ያረጋግጣሉ።

🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼🌼
የነጌሌ ቦረና ፍቅርና መረዳጃ ማህበር!

ከቀብር መልስ​የመምህር ከበደ ጀምበሬንና የዶ/ር አብዲናስር ሽኝት ለማድረግ በስፍራዎቹ ስደርስ ለዓመታት ያላየኋቸውን የቦረና ልጆች አገኘሁ፤ ደስ በሚያሰኝም ሞቅታ ሰላምታ ተለዋወጥን። ብዙ ጊ...
05/09/2026

ከቀብር መልስ

​የመምህር ከበደ ጀምበሬንና የዶ/ር አብዲናስር ሽኝት ለማድረግ በስፍራዎቹ ስደርስ ለዓመታት ያላየኋቸውን የቦረና ልጆች አገኘሁ፤ ደስ በሚያሰኝም ሞቅታ ሰላምታ ተለዋወጥን። ብዙ ጊዜ አንዱ ወይ አንዷ በሞት ሲለዩን ከየትም ይሁን ከየት እንገናኛለን። እንዲያውም አንዳንድ ጊዜ ቀብር የሀዘንተኞች ሳይሆን የናፋቂዎች መገናኛ እስኪመስል የቀብር ሥፍራው በደራ ሰላምታና ወግ ይታጀባል። በቅጽበቶቹ እግረ ኅሊናዬ ወደተለያዩ ሺህዎች ነጉዶ ነበር።

​« አሸብርቆ ደምቆ እንደ ፀሐይ
ተውቦና አጊጦ የሚታይ
የዛሬው አበቧ ገላችን
ነገ ያፈር ቀልብ ነው ሥጋችን።
ምንም ብንጓጓለት
ብንስገበገብለት
ይፈርሳል በጊዜያቱ
ሥጋ ነውና ከንቱ......» የሚለው የብዙነሽ በቀለ እንጉርጉር በልቡናዬ ውልብ ብሏል። በሥጋ ከአንድ አፈር ወጣን፤ በነፍስም ወደ አንድ ሠማያዊ መንግሥት እንሄዳለን።

በምድር ሳለን በመዐልትም ሆነ በሌሊት ወደ ሕጉ እስከተወሰነልን ዘመን እንሄዳለን፤ ሕጉ ወደ እኛ በሚመጣ ቀን፤ ሠዓት፤ ደቂቃና ሴኮንድ ግን የሁሉም ነገር ፍጻሜ ይሆናል። በፍቅርና ርህራሔ አልባ ሕይወት ነፍሳችንን በማሳዘን ለምንኖር ለኛው ለራሳችን እናልቅስ። የወንድሞቻችንን ነፍስ ይማር!
​
✍️ ወርቅዓለማሁ ንጋቱ

የዶክተር አብዲናሲር አህመድ ኢብራሂም የመጨረሻ የሽኝት እና የዱዋ መርሃ-ግብር​«إِنَّا لِلَّهِ وَإِنَّا إِلَيْهِ رَاجِعُونَ»(“እኛ የአላህ ነን፤ ወደ እርሱም ተመ...
03/09/2026



የዶክተር አብዲናሲር አህመድ ኢብራሂም የመጨረሻ የሽኝት እና የዱዋ መርሃ-ግብር

​«إِنَّا لِلَّهِ وَإِنَّا إِلَيْهِ رَاجِعُونَ»
(“እኛ የአላህ ነን፤ ወደ እርሱም ተመላሾች ነን።”)

​ለሀገራችን ከፍተኛ የትምህርት ዘርፍና ለጅጅጋ ዩኒቨርሲቲ ምስረታ የላቀ አሻራ ላበረከቱት ላቀዱትና ለደከሙት ታላቁ ምሁር ዶክተር አብዲናሲር አህመድ ኢብራሂም የመጨረሻ የክብር ሽኝት፣ የሐዘን ሥነ-ሥርዓት እና የጸሎት መርሃ-ግብር

​ ፩፦ የዶ/ሩ አስከሬን አቀባበል (ዛሬ ምሽት)

​ቀን፦ ሐሙስ ነሐሴ 27 ቀን 2018 ዓ.ም
​ሰዓት፦ ከምሽቱ 1:00 ሰዓት (19:00 LT)
​ቦታ፦ አዲስ አበባ ቦሌ ዓለም አቀፍ ኤርፖርት (Bole International Airport)

​የመርሃ-ግብሩ ዝርዝር፦
​የዶክተር አብዲናሲር አህመድ አስከሬን ከሕንድ ሀገር አዲስ አበባ ቦሌ ዓለም አቀፍ ኤርፖርት ይደርሳል።

​በቤተሰቦቻቸው፣ ቅርብ ወዳጆቻቸው እና በስራ ባልደረቦቻቸው በክብር ታጅቦ ቦሌ ቡልቡላ ወደሚገኘው የመኖሪያ ቤታቸው ያመራል።

​በቤተሰብ መኖሪያ ቤት የሌሊት ጸዱዋና የእንግዶች አቀባበል ይከናወናል።

​፪፦ የመጨረሻ የሽኝት እና የቀብር ሥነ-ሥርዓት (ነገ ከሰዓት)
​
ቀን፦ አርብ ነሐሴ 28 ቀን 2018 ዓ.ም
​ቦታ፦ ቱሉ ዲምቱ የሙስሊሞች መቃብር ስፍራ (Tulu Dimtu Muslim Cemetery)
​
የጊዜ ሰሌዳ (Agenda)፦
​ከቀኑ 6:30 – 7:00 ሰዓት፦
​የሟች አስከሬን ከመኖሪያ ቤታቸው ተሸኝቶ ወደ ቱሉ ዲምቱ የቀብር ስፍራ መድረስ።
የቤተሰብ፣ የምሁራን፣ የመንግስት ተወካዮች እና የህዝብ ስብሰባ።
​ከቀኑ 7:00 – 7:30 ሰዓት (የሰላተል ጀናዛ / የጸሎት ሥነ-ሥርዓት)፦
​የጀናዛ ጸሎት (የአስከሬን ሶላት) መፈጸም።
​በምሁሩ ህይወትና አገልግሎት ላይ ያተኮሩ አጫጭር የሙስሊም علماء (ዑለማዎች) ምክርና ዱዓ።
​ከቀኑ 7:30 – 8:15 ሰዓት (የቀብርና የክብር ሽኝት)፦
​የከበረ አስከሬናቸውን በካፍን (ክፈን) የማሳረፍና የማስቀበር ሥነ-ሥርዓት።
​የቤተሰብ፣ የባልደረቦች እና የእንግዶች የጋራ ዱዓ (ጸሎት)።
​ከቀኑ 8:15 – 8:30 ሰዓት (የአክብሮትና የሐዘን መግለጫ)፦
​የቤተሰብ ተወካይ የትውስታና የምስጋና ንግግር።
​ለቤተሰቡ መጽናናትን የመመኘትና የታዝያ (መጽናኛ) ሥነ-ሥርዓት ማጠቃለያ።
​
​በሥነ-ሥርዓቱ ላይ የሚታደሙ ታዳሚዎች የሥነ-ሥርዓቱን ቅዱስነትና የሀዘኑን ባጠበቀ መልኩ በሰዓቱ እንድትገኙ እና አስተዋፅኦ እንድታደርጉ ጥሪ ቀርቧል።

​አላህ ለሟቹ ዶክተር አብዲናሲር አህመድ ኢብራሂም ጀነተል ፊርደውስን ይወፍቃቸው፤ ለቤተሰቦቻቸው፣ ለወዳጆቻቸው እና ለመላው የትምህርት ማህበረሰብ መጽናናትንና ሶብሩን ይስጥ።

የዕውቀት ፋኖስና የትውልድ ቅርስ፡(ታዴሞ እንደ ከተበው)​የሰው ልጅ ሕይወት ከሥጋዊ ህልውናው በላይ በሚተክለው አስተሳሰብ፣ በሚቀርጸው ትውልድና በሚያበራው የዕውቀት ብርሃን ይለካል። በአንድ ...
02/09/2026

የዕውቀት ፋኖስና የትውልድ ቅርስ፡
(ታዴሞ እንደ ከተበው)

​የሰው ልጅ ሕይወት ከሥጋዊ ህልውናው በላይ በሚተክለው አስተሳሰብ፣ በሚቀርጸው ትውልድና በሚያበራው የዕውቀት ብርሃን ይለካል። በአንድ ሀገርና ማህበረሰብ ውስጥ እውነተኛው ሀብት ወርቅና ብር ሳይሆን የሰለጠነና የታነጸ አዕምሮ ያለው ምሁር ነው። በጅግጅጋ ዩኒቨርሲቲ ውስጥ ረጅም ዓመታት በፕሬዚዳንትነትና በትምህርት መሪነት ያገለገሉት ዶክተር አብዲናስር አህመድ፣ ይህንን ሀገራዊ አደራ በትከሻቸው የተሸከሙ፣ የብዙ ምሁራን አባትና የዕውቀት መቅደስ አናፂ ነበሩ።

​ዶክተር አብዲናስር አህመድ የዩኒቨርሲቲ አመራርነትን እንደ አስተዳደራዊ ሥልጣን ሳይሆን፣ የትውልድ ህሊናን እንደሚቀርጽ የሸክላ ሠሪ ጥበብ አድርገው ይመለከቱት ነበር። በተቋሙ ውስጥ በተቀመጡበት ዘመን ሁሉ ድንጋይና ሕንፃ ከመገንባት በላይ የአእምሮ ማዕከላትን፣ የጥናትና ምርምር ባህልን እንዲሁም የነፃ አስተሳሰብ መድረኮችን ለመገንባት ሌት ተቀን ደክመዋል።

እንደ መሪ—ወጣት መምህራንና ተመራማሪዎች ወደ ከፍተኛ ትምህርትና ምርምር እንዲያምሩ መንገድ በመክፈት፣ አቅማቸውን እንዲያሳድጉና ለሀገር የሚጠቅሙ በሳል ምሁራን ሆነው እንዲወጡ በማድረግ ረገድ ያልተቆጠበ ጥረት አድርገዋል። በሳቸው እጅና አመራር ሥር ያለፉ በርካታ አዕምሮዎች ዛሬ በየሀገሩና በየተቋማቱ የዕውቀት ብርሃን በመሆን ያገለግላሉ፤ ይህም የዶክተር አብዲናስርን ስም ከጊዜ ወሰን በላይ ሕያው የሚያደርገው ታላቅ ተቋማዊና አዕምሮአዊ ውርስ ነው።

​በነጌሌ ቦረና ተለኩሶ የበራው ሕይወት፣ የትምህርትንና የፅናትን ድልድይ በመሻገር ከፍተኛውን የአካዳሚክ ማዕረግና የዩኒቨርሲቲ ፕሬዚዳንትነት ማዕረግ ጨብጦ ማጠናቀቅ፣ ለቋሚውና ለተኪው ትውልድ ትልቅ የሕይወት ፍልስፍና ነው። ዶክተር አብዲናስር ያሳዩን እውነት፡- የሰው ልጅ ታላቅነት በልደት ቦታው ሳይሆን በአዕምሮው ጥልቀትና ለማህበረሰቡ በሚያበረክተው ብርሃን እንደሚወሰን ነው። ያፈሯቸው ምሁራን፣ የተከሏቸው የዕውቀት ችግኞችና የገነቧቸው ሳይንሳዊ መሠረቶች ሞት ሊያጠፋቸው የማይችላቸው ሕያው ድሎች ናቸው።

በታሪክ ውስጥ የብርሃን ሰዎችን ሕልፈት አስመልክቶ የዓለማችን ታላላቅ ነጻ አሳቢዎችና ምሁራን የሰጧቸው ምስክሮችም ይህንኑ እውነት ያጸናሉ። ታዋቂው የፊዚክስ ሊቅ አልበርት አንስታይን፣ ታላቁ ህንዳዊ የሰላም መሪና አሳቢ ማሃትማ ጋንዲ በተሰዉ ጊዜ እንደተናገሩት፦ “ምናልባት የሚመጡት ትውልዶች እንደዚህ ያለ በሥጋና በደም የተበጀ ሰው በዚህች ምድር ላይ ተመላልሶ ነበር ለማለት እንኳን ያጠራጥራቸው ይሆናል” ብለው ነበር።

በተመሳሳይ መልኩ፣ የደቡብ አፍሪካው ታላቅ መሪ ኔልሰን ማንዴላ ስለ ሳይንቲስቱና የትምህርት ታጋዩ ጆን ደብሊው ጋርድነር ሕልፈት ሲናገሩ፦ “እውነተኛ ምሁራን የራሳቸውን ታላቅነት ለማሳየት አይደክሙም፤ ይልቁንም በዙሪያቸው ባሉት ሰዎች ውስጥ ያለውን ታላቅነት አውጥተው ይቀርፃሉ” ሲሉ የምሁራን ዋና ተግባር ትውልድ ማነጽ መሆኑን አብራርተዋል። ታዋቂው አሜሪካዊ ፈላስፋ ራልፍ ዋልዶ ኤመርሰንም የምሁራንን ዘላቂ አሻራ ሲገልጽ፦ “የአንድ ድርጅት ወይም ተቋም ረጅም ጥላ፣ የዚያ ተቋም መሪ ወይም ስራ አመራር ህያው ማንነት ነው” በማለት የተቋማት ጥንካሬ የፈጣሪዎቻቸው መንፈስ ውጤት መሆኑን መስክሯል።

ዶክተር አብዲናስር አህመድም በጅግጅጋ ዩኒቨርሲቲ የተከሉት አሻራ፣ ያፈሯቸው ምሁራንና የገነቧቸው የትምህርት መሠረቶች ከጊዜ በላይ ሆነው የሚኖሩት በእነዚሁ ታላላቅ የምሁራን ሕግጋት መሠረት ነው። ሞት የሥጋን ጉዞ ያቆማል እንጂ ያበሩትን የዕውቀት ፋኖስ ማጨልም አይችልም።

​ይሁን እንጂ "ሞት" የተፈጥሮ የማይቀየር ሕግ ሆኖ፣ ይህ ታላቅ የምሁራን አባትና የትምህርት መሪ ዶክተር አብዲናስር አህመድ በሕንድ ሀገር በሕክምና ሲረዱ ቆይተው ነሐሴ 26/2018 ዓ/ም ከዚህ ዓለም ድካም አርፈዋል። የአካዳሚክ ማህበረሰቡንና መላውን ሀገራችንን መጽናናትን እየተመኘን፤ አስከሬናቸው ከሕንድ ሀገር ዛሬ ሌሊት ወይም ነገ ጠዋት ወደ ኢትዮጵያ ሀገራቸው የሚገባ ሲሆን፤ ለወዳጅ ዘመዶቻቸው፣ ላፈሯቸው ምሁራንና ለሥራ ባልደረቦቻቸው በሙሉ መጽናናትን እንመኛለን።

በአንድ ወቅት በነጌሌ ቦረና ምድር የሚነፍሰው ንፋስ የትምህርት ቤቱን ደወል ሲያወዛውዝ፣ በክፍል ውስጥ የሚሰማው ድምፅ የፊደላትና የቁጥሮች ንባብ ብቻ አልነበረም። የነፍስ ቀረጻ፣ የህሊና ውቅ...
01/09/2026

በአንድ ወቅት በነጌሌ ቦረና ምድር የሚነፍሰው ንፋስ የትምህርት ቤቱን ደወል ሲያወዛውዝ፣ በክፍል ውስጥ የሚሰማው ድምፅ የፊደላትና የቁጥሮች ንባብ ብቻ አልነበረም። የነፍስ ቀረጻ፣ የህሊና ውቅርና የሰው ልጅን አእምሮ ከድንቁርና ጨለማ ወደ እውቀት ብርሃን የማሸጋገር ታላቅ ምሥጢራዊ ጥበብ እንጂ።

​መምህርነት ቀለል ያለ የዕውቀት ማስተላለፍ ሂደት ብቻ አይደለም፤ ባዶ በሆነ የሰው ልጅ ሸክላ ላይ የህይወትን ትርጉም፣ የሞራል ከፍታንና የማሰብን ጥበብ የመቅረጽ ጥልቅ የነፍስ ኬሚስትሪ እንጂ። ይሄኛውን ኬሚስትሪ መምህር ከበደ ጀንበሬ በበሰለ እጃቸውና በለሰለሰ አንደበታቸው በሚገባ ተገብረውታል።

በተለይም በ1970ዎቹ እና በ1980ዎቹ መጀመሪያ በነጌሌ ቦረና በነበሩት ውብና የፍቅር ዓመታት፣ በመቀጠልም በአዲስ አበባ የምድር ውጣ ውረድ ውስጥ በሚሊዮኖች ልብ ላይ ዕውቀትን ሳይሆን ራሱን ሰውን ሲፈጥሩ ኖረዋል። መምህር ማለት ራሱን እንደ ሻማ እያቃጠለ ለሌሎች ብርሃን የሚሰጥ ፍጡር ነው እንደሚባለው ሁሉ፣ እሳቸውም ዘመናቸውን ሙሉ ለትውልድ ግንባታ ሲገብሩ የኖሩ የህይወት ጠቢብ ነበሩ።

​ይህ ታላቅ የሰው ቅርጽ ጠቢብ፣ የተሰጣቸውን ምድራዊ እሩጫ ሙሉ በሙሉ ፈጽመው፣ ዛሬ ሐምሌ 26 ቀን 2018 ዓ.ም ከዚህ ዓለም ድካምና በሰላም አርፈዋል። የእሳቸው ህልፈት የአንድ ሰው ብቻ ሳይሆን፣ የአንድ ሙሉ ትውልድ መብራት ማደብዘዝን ያህል የከበደ ሀዘን ነው። በመሆኑም ለቤተሰቦቻቸው፣ ለወዳጅ ዘመዶቻቸው፣ ላፈሯቸው ደቀ መዛሙርቶቻቸውና ለመላው የትምህርት ማህበረሰብ ጥልቅ መጽናናትን እንመኛለን።

​የመምህር ከበደ ጀንበሬ የሽኘትና የስርዓተ ቀብር ስነ-ስርዓት ነገ ነሐሴ 27 ቀን 2018 ዓ.ም ከጠዋቱ 4:00 ሰዓት ላይ በቱሉ ዲምቱ ቅዱስ ጊዮርጊስ ቤተክርስቲያን ይፈጸማል። የዚህን ታላቅ መምህር የህይወት ታሪክና ውለታ እያሰብን፣ በቦታው ተገኝተን የመጨረሻውን ሽኘት እናደርግላቸው ዘንድ ጥሪያችንን እናቀርባለን።

​ነፍሳቸውን በአብርሃም፣ በይስሐቅና በያዕቆብ ዕቅፍ ያኑርልን።

ማህበሩ!

Address

Beyene
Addis Ababa

Website

Alerts

Be the first to know and let us send you an email when Negele Borena (Ijoollee Booree) posts news and promotions. Your email address will not be used for any other purpose, and you can unsubscribe at any time.

Shortcuts

Share