https://www.facebook.com/104676385226811/

Bethel E Geletu Foundation, Addis Ababa (2026)

09/08/2026

ዓለምን የነቀነቁት ሁለቱ ትውልደ ኢትዮጵያዊያን
========= (አፈንዲ ሙተቂ) ==========
ከኢትዮጵያዊያን ወላጆች ተወልደው የምዕራቡ ዓለም (አውሮጳ እና አሜሪካ) ዜጋ ሆነው የሚኖሩ ሰዎቻችን በስነ-ጽሑፍ እና በመዝናኛው ኢንዱስትሪ ነጥሮ የመውጣት ጥረቶችን ሲያደርጉ እንደነበረ ይታወቃል።

ነገር ግን ብዙዎቹ ለአጭር ጊዜ ታይተው ከፍ ካለ ደረጃ ላይ ሳይደርሱ በዚያው ይጠፋሉ። ሁለት ወጣቶች ግን ይህንን እቀባ ሰብረው በመውጣት ከምዕራብ ሀገራት አልፎ በመላው ዓለም የሚያበሩ ደማቅ ከዋክብት ለመሆን ችለዋል።

እነዚህ ትውልደ ኢትዮጵያዊን Dinaw Mengistu ኣና Ruth Negga ይባላሉ። እስኪ የ2ቱንም ማንነት በአጭሩ-
-----
1. ዲናው መንግሥቱ - በዚህ ዘመን ብዙ አንባቢዎች ካሏቸው የአሜሪካ ደራሲዎች አንዱ ነው።

= የተወለደው በ1978 (እኤአ) በአዲስ አበባ ከተማ ሲሆን ከ2 ዓመቱ ጀምሮ የአሜሪካ ነዋሪ እና የዚያ ሀገር ዜጋ ነው።

= ከታዋቂው ጆርጅ ታውን ዩኒቨርሲቲ የመጀመሪያ ዲግሪ፣ ከኮሎምቢያ ዩኒቨርሲቲ የማስትሬት ዲግሪ አግኝቷል።

= ለብዙ ዓመታት በዩኒቨርሲቲዎች ሲያስተምር ቆይቷል። ከዚህ ጎን ለጎን ደግሞ በተለያዩ ጋዜጦችና መጽሔቶች ላይ ይጽፍ ነበር።

= ከአንባቢያን ጋር ያስተዋወቀውን የመጀመሪያውን የልብ ወለድ መጽሐፍ ያሳተመው በ2007 ነው። መጽሐፉ The Beautiful Things That Heaven Bears የሚል ርእስ ያለው ሲሆን ታዋቂውን New York Times ጋዜጣ ጨምሮ የተለያዩ ፕሬሶች መልካም ሂሶችን በመጻፍ አወድሰውታል።
ይህ መጽሐፍ ከ5 ተቋሞች የሚሰጡ የስነ-ጽሑፍ ሽልማቶችን ተሸልሟል። ከ3.4 ሚሊዮን የሚበልጡ የመጽሐፉ ቅጂዎች ተሽጠዋል።

= የዲናው መንግሥቱ ሁለተኛ መጽሐፍ የታተመው በ2011 ነው። መጽሐፉ How To Read The Air የሚል ርእስ አለው።
ይህኛውም መጽሐፍ በብዙ ጋዜጦችና መጽሔቶች የተወደሰ ሲሆን እስከ አሁን ድረስ 2.8 ሚሊዮን የመጽሐፉ ቅጂዎች ተሽጠዋል። መጽሐፉ የሶስት ታዋቂ ሽልማቶች አሸናፊ ነው።

= 3ኛው እና 4ኛው የዲናው መንግሥቱ መጻሕፍት "All Our Names" እና "Someone Like Us" የሚሉ ርእሶች አሏቸው።
እነዚህ መጻሕፍት እንደ መጀመሪያዎቹ ብዙ የተባለላቸው ባይሆኑም ከተለያዩ ተቋሞች ሽልማቶችን አስገኝተውለታል። እያንዳንዳቸውም የአንድ ሚሊዮን ቅጂ ሽያጭ አስመዝግበዋል።

= ዲናው በመጽሐፎቹ ባገኘው እውቅና የተነሳ ስነ-ጽሑፍ ተኮር በሆኑ የተለያዩ ማህበሮችና ፋውንዴሽኖች በቦርድ አባልነት እና በስራ አስፈጻሚነት ተመርጦ እየሰራ ነው።

በታህሳስ 2025 ደግሞ የታዋቂው Pen America ፕሬዚዳንት ሆኖ ተመርጦ የነበረ ሲሆን ባለፈው ሀምሌ ወር ፕሬዚዳንትነቱን በፈቃዱ ትቷል።
-----
2. ሩት ነጋ - በሆሊውድ ፊልሞች የትወና ተሳትፎ የተሳካላት ወጣት ትውልደ ኢትዮጵያዊት ናት።

= የተወለደችው በ1982 በአዲስ አበባ ከተማ ሲሆን አባቷ ኢትዮጵያዊ፣ እናቷ የአየርላንድ ዜጋ ናቸው። አባቷ የሰባት ዓመት ህጻን ሳለች በመኪና አደጋ ሲሞት ከእናቷ ጋር ወደ አየርላንድ ሄዳ በዚያ ሀገር አድጋለች። በዜግነትም አየርላንዳዊት ናት።

= ሩት በደብሊን ከተማ ካለው የትሪኒቲ ኮሌጅ በዲግሪ ተመርቃለች።

= ሩት ትወናን የጀመረችው በቴአትሮች ውስጥ በመሳተፍ ነው። በማስከተል በ2003 Capital Letters በተሰኘ የአየርላንድ ፊልም በመሳተፍ ብቃቷን አስመስክራለች።

በዚህና በሌሎች ፊልሞቿ ያሳየችውን የትወና ችሎታዋን ያዩ ታዋቂ የአየርላንድ ዲሬክተሮችም በፊልሞቻቸው ውስጥ እንድትሳተፍ ጋበዘዋት ወደ ፊልም ኢንዱስትሪው ሙሉ በሙሉ ገብታለች።

= ሩት ከአየርላንድ ፊልሞች በማስከተል በልዩ ልዩ የአየርላንድ እና የብሪታኒያ ተከታታይ ፊልሞች ወደ መሳተፉ ነበር ያመራችው። ከነዚህ ፊልሞች መካከል Doctors, Criminal Justice እና Agents of S.H.E.L.D የተሰኙት ይጠቀሳሉ።

ከዚህ ሌላ በBBC Three ቻነል ላይ ይተላለፍ በነበረው Personal Affairs የተሰኘ ተከታታይ ፊልም ላይ ተሳትፋለች።

= ከዚሁ ጎን ሩት በ2015 በወጣው Iona የተሰኘ የ85 ደቂቃ ፊልም ውስጥ ዋና ገጸ-ባሕሪ ሆና ያሳየችው ትወና British Academy Scotland Awards ለተባለ ታዋቂ ሽልማት አሳጭቶአት ነበር።

= በብሪታኒያ ቴሌቪዥኖች እና ፊልሞች እንደዚህ የታየችው ሩት ነጋ ወደ አሜሪካው የሆሊውድ መንደር ያመራችው በ2016 ነበር። ለመጀመሪያ ጊዜ የተሳተፈችበት የሆሊውድ ፊልም Loving ይሰኛል።

ሩት በፊልሙ ላይ ዋና አክትረስ ሆና ነበር የተሳተፈችው። ይህ ፊልም በሽያጭ በኩል ብዙ ገቢ ያላስገባ ቢሆንም ከፊልም ሐያሲዎች ከፍተኛ ሙገሳ ተሰጥቶታል። የተለያዩ ፕሬሶች የሰጡትን ነጥቦች አንድ ላይ ደምሮ የፊልሞችን የቅቡልነት ደረጃ የሚያስቀምጠው Rotten Tomatoes የተሰኘው ድረ-ገጽ ለፊልሙ 88% ሰጥቶታል።

ሩት ነጋ በሆሊውድ ፊልሞች ውስጥ ያላት ተሳትፎ የተሳካ እንዲሆን መንገድ የከፈተላት ይህ የመጀመሪያ ፊልሟ ነው። ሩት በዚህ ፊልም ባሳየችው ብቃት ለኦስካር ሽልማት ታጭታ ነበር።

= ሩት ባለፉት አስር ዓመታት ውስጥ ከአስር በሚበልጡ ታዋቂ የሆሊውድ ፊልሞች ላይ ተሳትፋለች። በእነዚህ ፊልሞች ከሳሙኡል ኤል ጃክሰን፣ ብራድ ፒት፣ ዳንኤል ሌቪ እና ሌሎች ታዋቂ አክተሮች ጋር ተጣምራ ሰርታለች።

= ይህቺ ጎበዝ ትውልደ ኢትዮጵያዊት አክትረስ በትወና ብቃቷ በተለያዩ ተቋማት የሚሰጡ ሽልማቶችን አሸንፋለች። በተለይም Loving በተሰኘው ፊልም ሳቢያ ኦስካር፣ ጎልደን ጎሎብ፣ ብሪቲሽ አካዳሚ አዋርድ የተሰኙትን ዝነኛ ሽልማቶች ጨምሮ በቁጥር ሃምሳ ለሚሆኑ ሌሎች ሽልማቶች ታጭታ ነበር።
----
ስለሶስተኛው ወጣት ትውልደ ኢትዮጵያዊ (The Weeknd) በቀጣዩ ክፍል እናወጋችኋለን።

-----
(አፈንዲ ሙተቂ... ነሐሴ 2/2018... በሸገር ተጻፈ)

06/08/2026

ይህ በምስሉ ላይ የሚታየው ካሊፎርኒያ ውስጥ በሚገኝ አንድ እስር ቤት የሚገኝ ሰው ነው ።
======== (በዋሲሁን ተስፋዬ) =======
ይህ ታራሚ በወህኒ ቤት አንድ ስራ አለ ሲባል ከማንም ቀድሞ የሚገኝ ነው።
የመጸዳጃ ቤት መስመሮች ሲበላሹ፡ የፍሳሽ ማስወገጃ ትቦዎች ሲደፈኑ፡ ወህኒ ቤቱን ማፅዳት ሲያስፈልግ ቀድሞ ይገኝና በሰአት 13 ሳንቲም ሂሳብ እየተከፈለው ይሰራል ።....
በንደዚህ ሁኔታ በቀን ለሁለት ወይም ለአንድ ሰአት እየሰራ የሚከፈለውን 13 ሳንቲም አጠራቅሞ ለአንድ ጉዳይ ለማዋል አስቧል ።....
በዚህ ሁኔታ ለወራት ከሰራ በኋላ አጠቃላይ የሰራው ሲደመር 136 ሰአት በ13 ሳንቲም ሂሳብ ተባዝቶ 17 ዶላር ከ74 ሳንቲም እንደደረሰ ሲያውቅ ሂሳብ ወደ የሚከፍሉት የወህኒ ቤቱ ሰራተኞች ቢሮ ሄደ።

ለወራት የሰራበት 17 ዶላር ከ74 ሳንቲም፡ በጋዛ ለሚገኙ ፍልስጤማውያን የሰብአዊ እርዳታ ለሚያሰባስብ ድርጅት እንዲላክለት መፈለጉን ገልጾ ገንዘቡ ወደሚፈልገው የእርዳታ አሰባሳቢ ድርጅት አካውንት ገባለት ።.....
ይህ የታራሚው ልብ የሚነካ መልካም ልግስና ከወህኒ ቤቱ አልፎ the guardian, TRT world እና በመሰል ታላላቅ ሚዲያዎች ሽፋን አገኘ፡ በኢንስታግራም፡ ትዊተርና ፌስቡክ ሺህዎች ተቀባበሉት።

ብዙዎች ፡ እጅግ አድካሚ በሆነ ስራ ላይ እየተሳተፈ በሰአት የሚከፈለውን 13 ሳንቲም ለወራት አጠራቅሞ ያደረገውን የሰብአዊነት ስራ እንደሰሙ፡ በስሙ Go Fund Me ተከፍቶ ከእስር ቤት ሲወጣ የሚቋቋምበት ከአንድ መቶ ሺህ ዶላር በላይ ተሰበሰበለት ።....
ያለበት ሁኔታ ሳይገድበው ስለፍልስጥኤም ልቡ የራራው ታራሚ ያደረገው መልካም ነገር፡ መልሶ ከፈለው።...
በምንም አይነት ሁኔታ ውስጥ ሆኖ ስለፍልስጤማውያን ለማዘን የሚያስፈልገው ሰው መሆን ብቻ ነው ።

04/08/2026

ጸሐፊያንና የብዕር ስማቸው

04/08/2026

ተዋናይ፣የግጥምና ዜማ ደራሲ እና ድምፃዊ-ማስረሻ ሽፈራው ...1943 - 1994 ዓ.ም... (በኤሊያስ ማዳ)
======================
መቼም አንዳንድ ሰዎች ስምና ስራቸው ካለፉ በኋላ ነው የሚታወቀው።

እኔ ማስረሻ ሽፈራውን የማስታውሰው በኢትዮጵያ ቴሌቭዥን ሲተላለፍ በነበረው "ጎጆ መውጫ" በተባለ ተከታታይ ድራማ ላይ የአብዬ ይመርን ገፀ-ባህሪ ሲጫወት ነው።

ከእድሜው በላይ የሆኑትን እኚያን ሽማግሌ ገፀባህሪ የተጫወተበት መንገድ መቼም የሚረሳ አይደለም።

በተረፈ ሰሞኑን ስለ ቆዩ ሙዚቃዎቻችንና ሙያተኞች ስፈታትሽ ይሄን- 'ማስረሻ ሽፈራው' -የተባለ ስም ከሙዚቃ ጋር ተያይዞ አገኘሁትና አብዝቶ ደነቀኝ።ለካ ሰውየው ከታላላቅ ድንቅ ዘፈኖች ጀርባ በግጥምና ዜማ ድርሰት ያለ ድንቅ ሰው ነው።ማስረሻ ሽፈራው ድምፃዊም ነበር።
ውልደቱ ጎንደር-አዘዞ ነው-1943ዓ.ም።በ1951 ወደ አዲስ አበባ መጣ።በ1963 ዓ.ም ወደ ሀረር ሄዶ-በሶስተኛ ክፍለ ጦር ኦርኬስትራ በሲቪል ድምፃዊነት ተቀጠረ።

እስከ 1968 ዓ.ም በቆየበት በእዚያ ወቅት የራሱን አንድ፣የተስፋዬ ለሜሳን ሁለት ስራዎች በአጠቃላይ ሶስት ዘፈኖችን ተጫውቷል።

አብሮት የተቀጠረውን ሌላኛው የግጥምና ዜማ ደራሲ ተስፋዬ ለሜሳ ለስራው ትልቅ አስተዋጽኦ እንዳደረገለት ይመሰክራል። ["ኑሮዬን ባየሽው" ፣ "የግሌ ነሽ" እና ስቀን ስንጫወት" ማስረሻ ሽፈራው የተጫወታቸው ስራዎች ናቸው።]
በመቀጠልም ከድምፃዊ አያሌው መስፍን ተራማጅ የሙዚቃ ቡድን ጋር የተወሰኑ ጊዜያት ሰራ።በመጨረሻም ህይወቱ እስካለፈበት ድረስ በሀገር ፍቅር ቴአትር ቤት ሲሰራ ቆየ።ከቴአትር ቤቱ ስራ ጎን ለጎን ለበርካታ ድምፃውያን በርካታ ስራዎችን አበርክቷል።
ከሰራቸው ግጥምና ዜማዎች ውስጥ ጥቂቶቹ የሚከተሉት ናቸው።
፩.ለጥላሁን ገሰሰ - 1979 አልበም
1.ይህቺ ናት ጨዋታ [ዜማ] ግጥም-ፅጌ ገብረ አምላክ
፪.ለሂሩት በቀለ - 1978 ዓ.ም 'ነፍስ ነገር' አልበም
1ፍቅር ነው ፍቅር
2.ስውሩ መውደዴ
፫.ለኤፍሬም ታምሩ - 1977 ዓ.ም አልበም
1የድንገት እንግዳ-[ዜማ]-ግጥም፦ይልማ ገ/አብ
፬.ለፀሀይ ዮሐንስ - 1975 ዓ.ም 'ፍንጭቷ' አልበም
1.ፍንጭቷ-ግጥም-[አዝማች ግጥም-ልዑል አማረ]
2.ገላዬዋ -ግጥምና ዜማ
3.እኔ የማደንቀው-ግጥምና ዜማ
፭.ለሀመልማል አባተ
1.ናፍቄሐለሁና ማሬዋ- 1976/7 የመጀመሪያ አልበም
2.የተረሳ ፍቅር-1979-'እንካ ጥቅሻ' አልበም
3.የኔን'ማ -1983 አልበም
፮.አረጋኸኝ ወራሽ - 1987 አልበም
1.ሰው እኮ ነው ለሰው-[ግጥም]-ዜማ-ሞገስ ተካ
2.እስቲ ሰው ላኪብኝ-ከይልማ ጋር [ግጥም]-ዜማ-ሞገስ ተካ
፯.ፀጋዬ እሸቱ -
1.እንዴት ውዬ ልደር
2.የቁም ሞት
3.ማን እንደ አንቺ- አልበም-'2 የመስቀል ወፎች'-ፀጋዬ እሸቱ ከፍቅርዓዲስ ነቃጥበብ ጋር
፰.ለተፈራ ነጋሽ - 1987 ዓ.ም አልበም
1.ከልብ ወዲያ-ግጥም-ዜማ፦ሞገስ ተካ
(ቀድሞ ለጥላሁን ገሰሰ ተሰርቶ የነበረ)
2.ጎኔን ላሳርፈው-[ግጥም] ዜማ፦ሞገስ ተካ
እንዲሁም ለተሾመ ወልዴ፣ሃይለየሱስ ግርማ፣ንግስት ሃዋዝና ሌሌች ድምፃዊያንም በርካታ ግጥምና ዜማዎችን ሰጥቷል።
[ለግጥም ጥናት አድራጊዎች ግጥሙን እንድትመረምሩ እመክራለሁ-መቼም ድንቅ ናቸው።]
የመድረክ ተውኔቶቹ
፩.ህልም ነው-መላኩ አሻግሬ-ደራሲና አዘጋጅ
፪.የገጠሯ ፋና-አያልነህ ሙላቱ-ደራሲና አዘጋጅ
፪.የፊት እድፍ-አያልነህ ሙላቱ-ደራሲና አዘጋጅ
፬.ፅናት-ደራሲ-ጥላሁን ጉግሳ፣አዘጋጅ፦ተፈሪ አለሙ
፭.ጉዴ ፈላ፦መሪ ተዋናይ ሆኖ የሰራበት
የሬዲዮ ተከታታይ ድራማ
፩.ወደ ሃብት ጉዞ-ሃይሉ ፀጋዬ-ደራሲና አዘጋጅ
የቲቪ ድራማ
፩.ጎጆ መውጫ-ድርሰት፦በምናቡ ከበደ፣የፊልም ፅሁፍና ዝግጅት፦ሰለሞን አበራ
እነዚህን ታላላቅ ስራዎችን የሰጠን ታላቅ ሰው የህክምና አጥቶ በችግር ውስጥ እንደቆየ ጥቅምት 29 ቀን በ1994 ዓ.ም በ51 አመቱ አርፎ በፈረንሳይ አቦ ቤተክርስቲያን ተቀብሯል።
ብዙ ምንጭ😊፦ስለ አርቲስቱ ስራዎች ከተሰናዳው ከሸገር FM ስንክሳር ዝግጅት-አዘጋጅና አቅራቢ፦መኮንን ወልደ አረጋይ።
ብዙ ሳላውቅህ በብዙ ጥዑም ስራዎችህ እድሜዬን ላስዋብከው ታላቅ ሰው ክብርና ምስጋናዬ ከልብ ነው።ነፍስህ ከደጋጎች ጎን ትሁን።

28/07/2026

የምክክር ነገር (7)
==========
ሰንደቅ ዓላማ
---------- (በዶ/ር እንዳለማው አበራ) - - - - -
የሰንደቅ ዓላማ ጉዳይ የውዝግብ ርዕስ የሆነው ከምርጫ 97 በኋላ መሆኑን እናስታውሳለን፡፡

ከምርጫው ማግስት ኢሕአዴግ የተቃዋሚ ፖለቲከኞችን ቅስቀሳ ለማሰናከል በማለም ‘አርማ የሌለውን ሰንደቅ ዓላማ መጠቀም ወንጀል ነው’ ብሎ ካወጀ በኋላ ነው ጉዳዩ ከተገቢው በላይ የተካረረው፡፡

ከዚያ አዋጅ በኋላ የመጣው የብሽሽቅ ዘመቻ ስር የሰደደውን እውነት ሳይሆን ወቅታዊውን ፍረጃ ተከትሎ የአንዱ ወገን መሆንን የሚያሳይ ብቻ ነው የሚመስለኝ፡፡

ለማስታወስ ያህል…

ባድሜ ላይ የተውለበለበችው ሰንደቅ ዓላማ አርማ እንዳልነበራት በጊዜው ያየነው ሰዎች አንዘነጋውም፡፡ በደርግ የመጨረሻ ቀናት አምቦ አካባቢ ከተደረገው ውጊያ በኋላ አንድ የአካባቢው ወጣት እንባ እየተናነቀው፡ ጮክ ብሎ “ወያኔዎች ባንዲራችንን የጨው መቋጠሪያ አደረጓት” እያለ ሲናገር በቴሌቪዥን አይተናል፡፡

ጣልያን ከተባረረ በኋላ አንዳንድ የትግራይ አባቶች በጠርሙስ ውስጥ ከትተው መሬት ውስጥ ቀብረው ያቆዩዋትን ሰንደቅ ዓላማ አውጥተው ደስታቸወን ገልጸዋል እየተባለ ሲነገርም ሰምተናል፡፡

በነገራችን ላይ …

ዳንኤል ክብረት ሐምሌ 2016 ያሳተመው መጽሐፍ ("የትርክት ዕዳና በረከት") በምክክሩ መድረክ የብልጽግና አቋም ምን መሆን እንዳለበት አስቀድሞ ለማስገንዘብ በቡድን የተሠራ ጥራዝ መስሎ ተሰምቶኛል፡፡ የምክክር ነገር አየሩን በሞላበት ሰሞን መጽሐፉ ወደ ገበያ መውጣቱን ለዚህ ግምት መነሻ አድርጌ ወስጀዋለሁ፡፡

በዚሁ መጽሐፍ ሰንደቅ ዓላማን አስመልክቶ በተረከበት ክፍል በስህተት የዘለላቸው ሁለት ነጥቦች አሉ፡፡

አንደኛው በንጉሡና በደርግ ዘመን የሰንደቅ ዓላማ አጠቃቀም ምን ይመስል ነበር የሚለውን ጥያቄ ሳይመልስ ማለፉ ሲሆን ሁለተኛው ደግሞ የቀለማቱ ትርጉም በደርግ ጊዜ መቀየሩን አለመግለጹ ነው፡፡ (ትዝ እንደሚለኝ የተቀየረው የቢጫው ቀለም ትርጉም ነው፡፡

ቃል በቃል ባላስታውሰውም በትርጉሙ ውስጥ 'ለሃይማኖትና ለንጉሥ ታማኝነት’ የሚለው ‘በሀገር ፍቅር’ ተተክቷል፡፡) የሰንደቅ ዓላማውን አመጣጥ ታሪክ በተመለከተ ያሰፈረው ግን ትምህርት ሰጪ መሆኑ አይካድም፡፡

ከዚህ ቀደም ሰንደቅ ዓላማን የተመለከቱ ሁለት አጫጭር ጽሑፎች ለጥፌ ነበር፡፡ ከዚህ በታች ያለው በእነዚህ ጽሑፎች ያቀረብኩትን አስተያየት የሚያጠቃልል ነው፡፡

የማዕከላዊ መንግሥትና የክፍለ ሀገር ሰንደቅ ዓላማ መኖሩን እደግፋለሁ፡፡

1. አረንጓዴ ቢጫ ቀይ ቀለማቱን አሁን ባለው አቀማመጥ ማስቀጠል አለብን እላለሁ፡፡

የእነዚህ ቀለማት ትርጉም ከኢትዮጵያ አልፎ አፍሪካዊ ቃናም እንዳለው መዘንጋት የለብንም፡፡ ቅርብ ጊዜ (February 2026) ከድረገጽ የጠፋው CIA Factbook የእኛን ሰንደቅ ዓላማ ቀለማት “The African Tricolor” በማለት ይገልጻቸዋል፡፡ ይህ ምልከታ ለእኛ ዲፕሎማሲያዊ ስንቅ ነውና ብናቆየው ይጠቅመናል እንጅ አይጎዳንም፡፡ (እንዲያው ለነገሩ… እኛ ቀለም ብንቀይር የእኛውን የኮረጁት አፍሪካዊያን ወንድሞቻችን ምን ይሰማቸው ይሆን?!)

2. አርማው በሕዝብ ተሳትፎ ይመረጥ፡፡

በዚህ መንገድ በንጉሡና በደርግ ዘመን የተሠራውን “ስህተት” እናርም፡፡ ሞዐ አንበሳንም ሆነ የደርጉን ዘመን ሁለት አርማዎች መርጠው ያስቀመጡት የዘመኑ ገዥዎች ብቻ እንደነበሩ ይታወሳል፡፡ (ትናንት ያነበብነውን በሰንደቅ ዓላማው መሐል አደይ አበባን እንደ አርማ እናስቀምጣት የሚል አስተያየት እደግፋለሁ፡፡ የበለጠ አሳታፊ እንዲሆን ግን ሌሎች አማራጮችም ቀርበው አብዛኛው ሕዝብ በቀጥታ ወይም በተወካዮቹ በኩል የመረጠው አርማ ሥራ ላይ ቢውል የተሻለ ይመስለኛል፡፡)

3. ሰፊው ሕዝብ አርማ የሌለውን ሰንደቅ ዓላማ መያዝ ይፈቀድለት፡፡

ለዚህ አሠራር ያለፉት መንግሥታት ልምድ ትክክል ነበር ብዬ አምናለሁ፡፡ በሐዘን፣ በደስታ፣ በሰልፍ አደባባዮች፣ በስፖርት ማዘውተሪያ ስፍራዎችና በት/ቤቶች ሳይቀር የሚውለበለበው አርማ የሌለው ሰንደቅ ዓላማ ነበር፡፡

አርማ የሌለው ሰንደቅ ዓላማ በቤት ውስጥም ሊዘጋጅ እንደሚችል እናስታውስ፡፡ ይህ አማራጭ ኢኮኖሚያዊ አንድምታም እንዳለው ግልጽ ይመስለኛል፡፡

4. በታላላቅ መ/ቤቶች፣ ኤምባሲዎች፣ በአምባሳደር መኪኖች፣ በመርከቦች፣ ወዘተ. አርማ ያለው ሰንደቅ ዓላማ ይውለብለብ፡፡

5. የክፍለ ሀገር ሰንደቅ ዓላማ ሕዝቡ በመረጠው መንገድ ይዘጋጅ፡፡ ለመነሻ ያህል

5..1. በአረንጓዴ፣ ቢጫ፣ ቀዩ ላይ የራሱን አርማ ማስፈር፤
5..2. ራሱ የመረጠውን የቀለም ቅንብር ሰንደቅ ዓላማ ማድረግ፤
5..3. ሌላም አማራጭ ካለ በነፃነት መጠቀም፤

መልካም ቀን!

27/07/2026

...እስከ መቼ?... ከሃሳብ ወደ ሃሳብ እየዘለልን? ያዋጣል?
===== (Source: Kefelegh Hailu) =====
ብዙዎቻችን አንድ ቀን እተገብረዋለሁ! የምንለው በጣም አሪፍ አሪፍ የሆነ ሃሳብ (Idea) አለን። ነገር ግን ሃሳቡን ወደ ሥራ ሳናውለው ሌላ ቀን፣ ሌላ ወር፣ ሌላ ዓመት እየተተካ ይሄዳል...

እስቲ እውነቱን እንነጋገር፤ “ይሄን እሠራለሁ፣ ይሄን አደርጋለሁ” እያልን ሳንጀምረው ቀናት፣ ወራት ብሎም ዓመታት አልነጎዱብንም?

ታዲያ ይህ የሚሆነው ለምን ይሆን?

ከምክንያቶቹ አንዱና ዋናው፦ ሁልጊዜም ከሃሳብ ወደ ሃሳብ (Idea to Idea) ስለምንዘል አይመስላችሁም ? !

ይህ ሂደት ደግሞ የእንቁራሪት ዝላይ ዓይነት ነው—ወደ ላይ እንጂ ወደፊት አይራመድም! ውጤት አልባ የሆነ ዝላይ!

ታዲያ መሆን ያለበት እንዴት ነው?

ትክክለኛው መንገድ ከሃሳብ ወደ ትግበራ፤ ከትግበራ ደግሞ መልሶ ወደ ሃሳብ እየተሸጋገሩ መሄድ ነው።

👉 Idea ➡️ Practice ➡️ Idea

ዝም ብሎ ከሃሳብ ወደ ሃሳብ መዝለል ዋጋ የለውም! (የለፋህበትን ያህል ውጤት አያመጣም)።

እንዴት?

ሃሳብህን ስትተገብር የሆነ ውጤት ታያለህ። ይህ ውጤት በሁለት ዋና ዋና ነገሮች ይከፈላል፦

1ኛ Product (ዋናው ውጤት)፦ ባቀድነውና በተገበርነው መሠረት የምናገኘው ቀጥተኛ ውጤት ነው።

2ኛ By-product (ግብረ-መልስ / Feedback)፦ የትግበራችን ውጤት የሆነው ግብረ-መልስ (Feedback) ነው።

ይህ ግብረ-መልስ (Feedback) ለቀጣዩ ሃሳባችንና ትግበራችን እጅግ በጣም ጥሩ ግብዓት በመሆን፣ ሌላ የተሻለ ውጤት (Product) እንድናወጣ ያገለግለናል።

በአጭሩ፦ «አስብ ➡️ ተግብር ➡️ አስብ ➡️ ተግብር...»
ልክ እንደ Wheel and Steering Model ማለት ነው! 🔄

👇 እናንተስ ምን ታስባላችሁ? ለብዙ ጊዜ ሳትተገብሩት የቀረ ሃሳብ አላችሁ? እስቲ ልምዳችሁን በኮመንት አጋሩን !

24/07/2026

የግመሏን አቅም የሚፈትነው የሸክሙ ብዛት ሳይሆን - ሚዛን ማጣቱ ነው።
========================
...... (ምንጭ:- በደበበ አበበ)
የአረቦቹ ተረት እንዲህ ሲል ይጀምራል፤ አንድ በረሃን አቋርጦ የሚነግድ አዛውንት ሲራራ ነጋዴ ለረዥሙ የበረሃ ጉዞው ግመሉን እበጃጅቶ እያዘጋጀ ነበር።

አጠገቡ ቆመው አባታቸውን በስስት ይመለከቱ የነበሩ ልጆቹ እንደሁሌው በግመሉ ጀርባ ላይ የእህል፣ የጨውና የቅመማ ቅመም ከረጢቶችን ሲጭን በመገረም ያንሾካሹኩ ነበር። ለእነርሱ በግመሏ ላይ የሚጫነው ሸክም/ የንግድ ሸቀጣሸቀጥ ከአቅሟ በላይ ሆኖ ታይቷቸዋል።

ታላቁ ልጅ በመገረም ወደ ግመሏ እየጠቆመ “አባቴ ሆይ፣ ይህን ያህል ከባድ ሸክም ግመሏ መሸከም ይቻላታልን?" ሲል በልጅ አንደበት በሀዘኔታ ስሜት ተቆርቁሮ አባቱን ጠየቀ።

አዛውንቱ ሲራራ ነጋዴ ልጁ ላቀረበው ምክንያታዊ መሰል ጥያቄው መልስ ሳይሰጥ ከረጢቶቹን በማንቀሳቀስ ግመሏ ላይ ያለውን ጭነት ወደ አንድ ወገን አዛባው። በዚህን ጊዜ ሚዛኗን መጠበቅ ያልቻለችው ግመል ጥቂት እርምጃ እንኳን መራመድ ሳትችል ተደነቃቅፋ በጉልበቷ በርከክ ብላ ወደቀች።

አዛውንቱ ወደወደቀችው ግመል ተጠግቶ ከግመሏ አንድም ከረጢት ሳይቀንስ የተጫነችውን ሸክም ፈትቶ እንደገና ሚዛን ጠብቆ በእኩል አስተካክሎ አሰረ።
ግመሏም ተንበርክካ ከወደቀችበት በቀላሉ ተነስታ ጉዞዋን ተረጋጋታ ቀጠለች።

የዚህን ጊዜ አዛውንቱ ሲራራ ነገዴ፤ በሀዘኔታ ስሜት ውስጥ ሆነው አባታቸውን እና ግመሏን በማፈራረቅ ወደሚመለከቱት ሕፃናቱ ዞሮ እስከዛሬ በአረቡ ዓለም ተጠቃሽ የሆነ የጥበብ ቃል ተናገራቸው “የግመሏን አቅም የሚፈትነው የሸክሙ ብዛት ሳይሆን ሚዛን ማጣቱ ነው።”

የኢትዮጵያ ሀገራዊ የምክክር ጉባኤ ዓላማ ለዘመናት በሕዝቡ ዘንድ የቆዩና ያለመግባባትና የልዩነት መነሻ የሆኑ ትርክቶች፣ ጥያቄዎች፣ ልዩነቶችና አላራምድ ያሉ ሳንኮች ላይ ተመካክሮ ዘላቂ ተስፋዎችን ፣ መዳረሻዎችን እና ራዕዮችን ግብ ያደረጉ የመፍትሄ ሀሳቦችን ማዋለድ ነው።

ከ4 ሺህ በላይ ተሳታፊዎች እየተሳተፉበት ያለው የምክክር መድረክ እያንዳንዱ ሰው ሀሳቡን በነፃነትና ኃላፊነት መንፈስ የሚያቀርብበት ሲሆን የሌሎችን ሀሳብ ደግሞ በትዕግስት የሚያዳምጥበት፣ ጥያቄዎችን የሚያነሳበት፣ ማብራሪያዎችን የሚጠይቅበት፣ እንዲሁም በማስረጃና በምክንያት የተደገፉ አስተያየቶችን የሚያቀርብበት ነው።

ይህ ሂደት ልዩነቶቻችንን እንደ ግጭት ምንጭ ሳይሆን እንደ መማማሪያና የመግባቢያ ዕድል መፍጠሪያነት እንዲታዩ ያግዛል።

በሂደቱ ተመካካሪዎች ሀሳብን በአንድ ጊዜ ምክር አያፀድቁም ፤ከዚያ ይልቅ በቀረቡት ሀሳቦች ላይ ይወያያሉ፣ ይመረምራሉ፣ ያሻሽላሉ፣ ይጠናከራሉ። በዚህም የተለያዩ እይታዎችና አመለካከቶችን ያካተቱበትና ሰፊ ድጋፍ ሊያገኙ የሚችሉ ምክረ ሀሳቦችን በየደረጃው ይቀርፃሉ።

የአገር ግንባታ፣ የመንግስት አወቃቀር፣ የከተሞቻችን ዘላቂ ተስፋ፣ ዘላቂ ሰላም፣ የፖለቲካ ሥርዓት፣ የሕገ መንግሥት ጉዳዮች፣ የፍትሕ ሥርዓት፣ የሰብዓዊ መብቶችና ነፃነቶች፣ የማንነትና የግንኙነት ጉዳዮች፣ የሙስና፣ የልማትና የኢኮኖሚ ጥያቄዎች እንዲሁም ሌሎች ሀገራዊ ጉዳዮች በውይይት መድረኩ ላይ ቀርበዋል።

እነዚህ እና ሌሎች እዚህ ያልተጠቀሱና በምክክሩ የቀረቡ ሰፋፊ ጉዳዮችም በሽማግሌው ግመል ላይ እንደተጫኑ ዋጋ ያላቸው ሸክሞች ናቸው።

በመሆኑም፤ሀገራዊ ምክክሩን የሚያሳካው በምክክሩ የቀረቡ ሰፋፊ ጉዳዮች ብዛት ወይ ክብደት ሳይሆን፡ ሁሉም የውይይት አጀንዳዎች በሚዛናዊነት ሲታዩና በፍትሃዊነት ሲመከርባቸው ነው።
እንዲሁም ሁሉም በሂደቱ ያሉ ድምፆች በመደመጣቸው እና ልዩነቶችን በመከባበር ለመፍታት በመቻሉም ጭምር ነው። ምክንያቱም ሚዛኑን ያጣ ሸክም ትንሽም ቢሆን አደነቃቅፎ መጣሉ አይቀርም ።

ከዚህ አንፃር፤ የኢትዮጵያ ሀገራዊ ምክክር ዋና ፈተና የሚነሱ ጉዳዮች ብዛት ወይም ክብደት ሳይሆን የምክክሩ ሂደት በምን ያህል የማስተዋል ሚዛናዊነት፣ የመደማመጥ ባህልና ሁሉን የሚያካትት መፍትሔ የመፈለግ ቁርጠኝነት ይሆናል ማለት ነው።
ስለዚህ የኢትዮጵያን ሸክም ማቅለል ስንል ሚዛን እያስተካከሉ መጓዝንም ይጨምራል ማለት ነው።

በሌላኛው ገፅታም፤ ስለ ሀገራዊ ምክክሩ በሚቀርቡ ሀሳቦች በሁለት የተለያዩ ጽንፎች ላይ ተንጠላጥለዋል። የመጀመሪያው ፤ ምክክሩ የሚያመጣው ለውጥ የለም- ሁሉም ከንቱና ነፋስን እንደ መከተል ነው የሚል ነው።
በሌላው ጫፍደግሞ ከምክክሩ በኋላ ሁሉም ልዩነቶቻችን ይጠፋሉ፣ ሁሉም ሸክሞቻችን በአንድ ጀምበር ይቀላሉ ወይም በሚዛናቸው ይሆናሉ የሚል የተጋነኑ ተስፋዎች ናቸው።

በእኔ እይታ ሁለቱም አቀራረቦች ያቀረብኩትን የግመሏን ተረት እንድጠቅስ ያስገደዱኝ ናቸው።አሁን ባለው የኢትዮጵያ ነባራዊ ሁኔታ ከባድ ሸክም እንዳለ መካድ ትክክል አይሆንም።

ነገር ግን ሸክሙ ከባድ ስለሆነ ጭራሽ መጓዝ ከቶ አይቻልም ማለት ደግሞ ተገቢ አይሆንም። ግመሏን የጣላት ሸክሙ አልነበረም፤ የሚዛኑ መዛባት እንጂ።

በሌላኛው ፅንፍም ከምክክሩ በኋላ ሁሉም ነገር ፍጹም የሆነ መፍትሄን ይጎናፀፋል ብሎ መጠበቅም unnatural የሆነ ከተጨባጭ እውነታና አመክንዮ ላይ የተመሰረተ አይሆንም። ሰው አይደለም ከሌላው ጋር ከራሱም የቀደመ እና አሁናዊ ሀሳብ ጋር እየተጋጨ ነው የሚቀጥለው። Conflict by itself is natural, normal & dynamicity of life beautify the journey & a good pace maker leading to positive change.

ለመደምደሚያ በክርስትና እምነት ከሚጠቀሱ የሐዋርያው ጳውሎስ ምርጥ መልዕክቶች መካከል ከርዕሰ ጉዳዩ ጋር የሚገናኙ ሁለቱን እናስታውስ:-

ሐዋርያው ጳውሎስ በባህል፣ በሕግ፣ በአምልኮና አመለካከት ልዩነቶች ተከፋፍለው ወደ ነበሩት ለሮሜ ሰዎች በሰደደው መልዕክቱ - ‘በአንድ ልብ እርስ በርሳችሁ ተስማሙ’ (ሮሜ 12፥16) በማለት ሁሉም አንድ ዓይነት እንዲያስቡ ሳይሆን ይልቁንም ልዩነቶቻቸውን እያከበሩ: በትሕትና: በመከባበርና በፍቅር እንዲኖሩ መክሯቸዋል።

ለገላቲያ ሰዎች በፃፈው ደብዳቤ ደግሞ የጋራ ችግሮቻቸውን በመወራረፍ ሳይሆን በመተጋገዝ ማቅለል እንደሚኖርባቸው ሲያስተምር እንዲህ ብሏል፦ አንዱም የሌላውን ከባድ ሸክም ይሸከም (ገላትያ 6፥2)።

የወንድም ደበበን ጽሑፍ እንዴት እንደወደድኩት ...

23/07/2026

Celebrating my 5th year on Facebook. Thank you for your continuing support. I could never have made it without you. 🙏🤗🎉

23/07/2026

"ሐምሌ 16 ለበኩሬ ልደት ሻማ እናበራ ነበር፡ እንዳልጠበቅን ሆኖ በዝክር ሳይቀየር"
===============
የታመመ ወዳጄን ማለዳ ከሕክምና አድርሼ እየተመለስኩኝ የማላውቀው እንደ ኃይለኛ ነፋስ ዥው የሚያደርግ መንፈስ ተናጥቆ ተጫነኝ።

እንዴ ምነው ምን ሆንኩኝ? አልሁ ለራሴ ... የሆነ የሰውነቴ ኬሚካል (dopamine level) ወርዶ አቅም እንደማጣት እስኪሰማኝ ድረስ።

ለካ ሐምሌ 16 በዕለተ ኪዳነ ምህረት የበኩር ልጄ፡ እንዲህ ልባችንን በሰበረ አጋጣሚ ገና በማለዳ ዕድሜዋ ወደ አምላኳ እቅፍ ሄዳ ባይሆን ኖሮ ለልደቷ ሻማ የምናበራበት ቀን ነበር።

ያላወቅሁት እንደ ፍም ተዳፍኖ የቆየ ትካዜ ወረረኝ። በሰውነቴ የኃይል ሰጪ ኬሚካል እንዳነሰው ያደረገኝን ሰበብ ያወቅሁት ረፋድ ላይ ነው።

በወግ ማዕረግ የጉዞ ሀዲድ መያዣ ዋዜማሽ ሻንጣ ገፍተሽ ከበራፍ ልትደርሺ ደጅ ደጁን በናፍቆት ስናይ፡ ልዕልት አለላዬ ተነጠቅሽና ዓይን በከደነ ሙሽርነት ከሳጥን ተከቶ በመታጀብ ከኪዳነ ምህረት ማረፍን መረጥሽ።

ይሁና! የእሱ ፈቃድ ነው ብለን በምልሰት ከተውሽልን ደማቅ ጣፋጭ ትዝታ ጋር ብቻ ቀርተናል... ያው አለን -ነገር ዓለሙ ለዛውን ተገፎ በቁዘማ - የመምጫ ማህደራችን ተመዝዞ እስክንመጣ ድረስ።

በቃ - ወለተ ኪዳኔ ቤቲ... ዛሬ በዕለተ ልደትሽ በኪ/ምህረት ዕለቱን አስቀድሼ አሰብኩሽ! ካለሽበት የአባትሽ እቅፍ ፍፁም ዕረፍተ ነፍስ ይሁንልሽ!

ዛሬ በትካዜ በተጦለበ ቀኔ የወዳጄ ሁኔታ ደግሞ ልቤን ነካው። የዘመኑ ዲጂታል ፈጠራ በሽታን በዝርዝር መለየት ከማስቻሉ ማግስት አሁን አይነቱ በዝቷል በሽታው። ጎበዝ እባካችሁን ከምንም በላይ ጤናን ለምኑ!

ዛሬ ይኸው የቆየ አንድ ወዳጄን በየሳምንቱ ሐሙስ ማለዳ ለኩላሊት እጥበት ሆስፒታል አደርሰዋለሁ - ከ1 አመት ተኩል በላይ።

ከትናንት በስቲያ ደግሞ ግብር ልንከፍል ከነበሩት መሀል 2 ጎልማሶች ወንድና ሴት በየበኩላቸው ራሳቸውን እስኪስቱ ትንፋሽ አጥሯቸው ተዝለፈለፉና ተደናግጠን የምናደርግላቸው ሁሉ ግራ ገባን።

ሰው ዘወትር ውሎ መሽቶ በነጋ ቁጥር ማለዳ ላይ ከአልጋ ከነትንፋሹ እና ቆሞ መራመድ በሚችል ቁመና መነሳት እኮ ትልቅ እድል መሆኑን ልንረዳ ይገባል። የእግዚያብሔር ቀለብ "ተመስገን" ብቻ እኮ ነው - ሌላ አይፈልግም የምትለው ቅድመ አያቴ ትዝ አለችኝ።

በጨነቀኝ ሰአት አንድ ልማድ አለኝ፡ ዞር ብዬ ከአንድ ጥግ "ለምን" እና "እንዴት" ጥያቄዎችን ይዤ ከራሴ ጋር ጉባኤ እሰየማለሁ።
The human person as a mechanical being" - የሚል ርዕሰ ጉዳይ ነው ከአዕምሮዬ የመጣው። የሰው ልጅ በፈጣሪ ታዕምር እንዴት እንደተበጀ መፈላሰም ሲጠናወተኝ ዘወትራ በጥበቡ እደመማለሁ።

በተለይ የአካላዊ ሥርአታቱ (ከምግብ ማብላላት፡ የአተነፋፈስ፡ የደም ዝውውር፡ የነርቭ፡ የአጥንት ጅማት፡ የሰውነት ኬሚካል፡ የስነ ተዋልዶ እና የመጸዳጃ ሥርአት ተደማምረው ሜካኒካዊ በሆነው ግንዛቤ የሰው ልጅ በጥቂቱ ሂደታቸው የተቀናጀ ከ11 ያላነሱ ውስብስብ ፋብሪካዎች ሊወጣው እንደሚችል አስብሁ።
ይህን ሁሉ ፋብሪካ ጌታ አስማምቶ - ተተኝቶ በሰላም ማለዳ በደህና ከመነሳታችን በላይ ምን ተአምር አለ።

ሰው የሰራው አንዱ ፋብሪካ በየማለዳው መአት ጣጣ ይዞ ይመጣል ለቀን ብልሽቱ ሰበብ። መለዋወጫ እቃ አጥቶ ስራ አቁሞ እስከሚከርም ድረስ።
እናም ከምናጉረመርምበት ይልቅ እግዚያብሔርን ከማለዳ እስከ ሌሊት የምናመሠግንበት እጅግ ብዙ ምክንያቶች አለን።

ስጨነቅና ሳዝን አልኸኛው የልቤ ክፍል ከፀሎት በእኩያነት ከነገረ ሕይወት እስከ ምስጥጢ በመመራመር አዕምሮዬ ሀሳቤ ይጠመዳል።

አንዳንዴ ደግሞ በቀን የጀማ ጨዋታና ሳቅ እንዲሁም ሌሊት በእንቅልፍ መሀል ከሁካታውም ከፀጥታውም ጀርባ ሁሉ ድንገት የቴአትር ቤት መጋረጃ ለትዕይንት ጅማሮ ቀስ ብሎ እንደሚከፈተው ሁሉ፡ የበኩሬ 'ድንገቴ' እንግዳ ትሆንብኛለች።

ትዝታዋ ገጽ በገጽ የጋራ መሳሳቅ አጣሚዎቻችን ሁሉ እየተገለጠ ትኩረቴ ይሰረቃል።

ኋላ ላይ ልቤ በአፅናኝ ጥቅሶች ማረፍ ይሻል። ከምወዳቸው መካከል - "አብዝቶ የሰበሰበም አልተረፈውም፡ ጥቂት የሰበሰበም አልጎደለበትም" የሚለው እና "የቆመ የመሠለው እሱ፡ እንዳይወድቅ ይጠንቀቅ!"-የሚሉቱ የቅዱስ መጽሐፉ ጥቅሶች የሚገርሙኝ ቀኑ ለቀኑ ላያሳጣን ሁሉ ከልኩም ላይደርስ መጨነቅ ሳናበዛ በትህትና እንድንኖር የሚያስታውሱን ናቸው።

ያዘኑ ልቦች የሚፅናኑ የሚያርፉበትን የንስሐና የፍስሐ ካሳ ዘመን ያድለን!

Bethel E Geletu Foundation

09/08/2026

06/08/2026

04/08/2026

04/08/2026

28/07/2026

27/07/2026

24/07/2026

23/07/2026

23/07/2026

Address

Website

Alerts

Shortcuts

Share

Listing takedown request