Keranio Media ቀራኒዮ ሚዲያ

27/09/2026

10/06/2026

#ኦርቶዶክስ #ኢትዮጵያ #አርሲ

29/03/2026

ኒቆዲሞስ፡ የሌሊቱ ምስጢርና የነፍስ ዳግም ልደት

​የዓብይ ጾም ሰባተኛው ሳምንት "ኒቆዲሞስ" ይባላል። ይህ ሳምንት በጾሙ መጨረሻና በሕመማት ሳምንት መጀመሪያ መካከል ያለ፣ የብርሃንና የጥልቅ እውነትን ፍለጋ ሂደት ሲሆን ታሪኩ የሚጀምረው በዝምታ በተዋጠችው የኢየሩሳሌም ሌሊት ነው።............
​ኢየሩሳሌም ተኝታለች። ነገር ግን የአይሁድ መምህርና የሸንጎ አባል የሆነው ኒቆዲሞስ እንቅልፍ አልወሰደውም። በልቡ ውስጥ የሚነድ ጥያቄ አለ፤ ያ ጥያቄ ደግሞ "ይህ ድንቅ ተአምራትን የሚያደርግና በሥልጣን የሚያስተምር ሰው ማነው?" የሚል ነበር። ኒቆዲሞስ ክብሩንና ማዕረጉን የሚወድ ሰው ቢሆንም፣ እውነቱን ለማግኘት ግን ጥማቱ በረታበት። በቀን ቢመጣ አይሁድ እንደሚቃወሙት ያውቃል፤ በመሆኑም ክብሩንና ፍርሃቱን ተሸክሞ በሌሊት ጨለማ ተሰውሮ ወደ ጌታ መጣ።

​ኒቆዲሞስ ጌታችን ባለበት ስፍራ ደርሶ፣ በትሕትና እንዲህ አለው፦ "መምህር ሆይ! እግዚአብሔር ከእርሱ ጋር ካልሆነ በቀር አንተ የምታደርጋቸውን እነዚህን ምልክቶች ሊያደርግ የሚችል ማንም የለምና መምህር ሆነህ ከእግዚአብሔር ዘንድ እንደ መጣህ እናውቃለን።"

ጌታችን ግን የኒቆዲሞስን ውጫዊ ምስጋና አልተቀበለም፤ ይልቁንም ወደ ነፍሱ ጥልቀት ገባ። ኒቆዲሞስ የመጣው ስለ ተአምራቱ ሊጠይቅ ነበር፤ ጌታ ግን የነገረው ስለ መንግሥተ ሰማያት መግቢያ መንገድ ነበር። እንዲህም አለው፦

​"እውነት እውነት እልሃለሁ፤ ሰው ዳግመኛ ካልተወለደ በቀር የእግዚአብሔርን መንግሥት ሊያይ አይችልም።"

​የሕግ መምህሩ ኒቆዲሞስ ግራ ተጋባ። በሥጋዊ አእምሮው አስቦ እንዲህ ሲል ጠየቀ፦ "ሰው ካረጀ በኋላ እንዴት ሊወለድ ይችላል? ዳግመኛ ወደ እናቱ ማኅፀን ገብቶ መወለድ ይችላልን?" ጌታችንም የሰማያዊውንና የመንፈሳዊውን ዓለም በር ከፈተለት፦

​"ሰው ከውኃና ከመንፈስ ካልተወለደ በቀር ወደ እግዚአብሔር መንግሥት ሊገባ አይችልም። ከሥጋ የተወለደ ሥጋ ነው፥ ከመንፈስም የተወለደ መንፈስ ነው።"

​በዚያች ሌሊት ኒቆዲሞስ የታደሰ ማንነትን ምስጢር ተማረ። ሰውነት በሥጋ ብቻ ሳይሆን በመንፈስ ዳግመኛ መፈጠር እንዳለበት ተገነዘበ። ሊቁ ቅዱስ ያሬድ ይህንን " ሃሌ ሉያ ሃሌ ሉያ ሃሌ ሉያ ሃሌ ሉያ ሃሌ ሉያ ሖረ ኀቤሁ ዘስሙ ኒቆዲሞስ ወይቤሎ ለኢየሱስ ረቢ ሊቅ ንሕነ ነአምን ብከ ከመ እምኀበ አብ መጻእከ ከመ ትኩን መምህረ ዕጓለ አንበሳ ሰከብከ ወኖምከ አንሥአኒ በትንሣኤከ" እያለ በጣዕመ ዜማው ሲያዜመው፣ እኛም እንደ ኒቆዲሞስ ከዓለም ጫጫታ ርቀን በሌሊት ጸሎት ወደ ጌታ እንድንቀርብ ያሳስበናል።

​፩ . ከምስጢር ተማሪነት ወደ ታማኝ ምስክርነት

​የኒቆዲሞስ ታሪክ በዚያች ሌሊት አላበቃም። ያ በሌሊት ተሸሽጎ የመጣው መምህር፣ ቆይቶ ጌታችን በአይሁድ ሸንጎ ፊት ሲከሰስ "ሕጋችን አስቀድሞ ሳይሰማው ይፈርዳልን?" ብሎ በድፍረት ተከራከረ። ከሁሉም በላይ ደግሞ በዕለተ ዓርብ ሁሉም ደቀ መዛሙርት በፈሩና በሸሹ ጊዜ፣ ኒቆዲሞስ ግን ከዮሴፍ ጋር ሆኖ መቶ ንጥር የሚያህል የከርቤና የዓልባላ ቅልቅል ይዞ በመምጣት የጌታን ሥጋ በክብር ገነዘ። በሌሊት ተሸሽጎ የጀመረው ጉዞ፣ በመስቀሉ ስር በይፋ ፍቅርን በመግለጽ ተፈጸመ።

​💡 ከኒቆዲሞስ የምንማረው ታላቅ ቁምነገር፦

​የትሕትና መንገድ፦ ኒቆዲሞስ ትልቅ መምህር ቢሆንም፣ እውነትን ፍለጋ ግን እንደ ተማሪ በጌታ እግር ስር ተቀመጠ። እኛስ ለማወቅ ምን ያህል ትሁት ነን?

​ከኃጢአት ጨለማ መውጣት፦ ሌሊቱ የኃጢአታችንና የድንቁርናችን ምሳሌ ነው። ኒቆዲሞስ ከሌሊቱ ጨለማ ወጥቶ ወደ ዓለም ብርሃን እንደመጣ፣ እኛም በዚህ ጾም ከጨለማ ሥራችን ተለይተን ወደ ብርሃኑ መቅረብ ይገባናል።

​የአዲስ ልደት ፍሬ፦ ንስሐና ጥምቀት ዳግመኛ የምንወለድባቸው መንገዶች ናቸው። ካረጀው የጥል፣ የቂምና የክፋት ማንነት ወጥተን አዲስ ፍጥረት ለመሆን ይህ ሳምንት የመጨረሻው ጥሪ ነው።

​ማጠቃለያ፦

ኒቆዲሞስ የእያንዳንዳችን ነፍስ ምሳሌ ነው። ሁላችንም በውስጣችን እውነትን እንጠማለን። ጌታችን ደግሞ ዛሬም በቃሉ "ና! ዳግመኛ ተወለድ፤ አዲስ ሰው ሁን" ይለናል። ይህ ሳምንት የአሮጌው ማንነታችን ማብቂያ፣ የአዲሱ መንፈሳዊ ሕይወታችን ጅማሬ ይሁንልን።

​መልካም የኒቆዲሞስ ሳምንት!

ከገነተ ጽጌ ሚድያ የተወሰደ።
#ኪዳንሚዲያ #ተዋሕዶ #ኦርቶዶክሳዊ #መዝሙር

18/03/2026

#ኪዳንሚዲያ #ተዋሕዶ #ኦርቶዶክሳዊ #መዝሙር

Keranio Media ቀራኒዮ ሚዲያ

17/03/2026

#ኪዳንሚዲያ #ተዋሕዶ #ኦርቶዶክሳዊ #መዝሙር

10/03/2026

የመምህር ዘለዓለም ወንድሙ የአሸኛኘትና የስንብት መርሐ ግብርን አስመልክቶ ጋዜጣዊ መግለጫ ተሰጠ
መጋቢት 1 ቀን 2018 ዓ.ም ።

"እመኒ ሐየውነ ወእመኒ ሞትነ ለእግዚአብሔር ንሕነ።"
"እንግዲህ በሕይወት ሆነን ብንኖር ወይም ብንሞት የጌታ ነን።" ሮሜ 14÷8
ሐዋርያው ቅዱስ ጳውሎስ እንዲህ እንዳለ
በሕይወቱ ዘመን ሁሉ በክርስቶስ ኖሮ ከክርስቶስ ጋር ለመኖር ናፍቆ የሄደውን የወንድማችንን እና የመምህራችንን ዘለዓለም ወንድሙን እንዲህ እንሸኘው ይኼንን ጋዜጣዊ መግለጫ እንሰጣለን።
መምህራችን መምህር ዘለዓለም ወንድሙ የእረፍት ዜናው ከተሰማበት ጊዜ አንስቶ መላው ኦርቶዶክሳውያን በሙሉ በጥልቅ ሐዘን ውስጥ ገብተዋል። መምህር ዘለዓለም ወንድሙ ቅድስት ኦርቶዶክሳዊት ቤተክርስቲያንን በታማኝነት ያገለገለ የሕይወት ዘመኑን ሙሉ መልካም የሆነ፤ ክርስቲያናዊ ጠባዩን ያልቀየረ ለብዙዎቹ ምሳሌና አርአያ ሆኖ የኖረ የወንጌልን ችቦ በመላው ዓለም ያቀጣጠለ ታላቅ መምህር ነው ። ስለዚህ ይኼንን ወንድማችንን በልዩ ስነ ሥርዓት የሕይወት ዘመን መልካም አገልግሎቱን ታሳቢ በማድረግ እና የቤርስቲያኒቱን ክብር በሚመጥን መልኩ በታላቅ የአሸኛኘት ስነ ሥርዓት ለመሸኘት በመንበረ ፓትርያርክ ጠቅላይ ቤተክህነት እና በአዲስ አበባ ሀገረ ስብከት ይሁንታ ኮሚቴ ተዋቅሮ ሥራዎችን ሲሠራ ቆይቷል።
ከዚህ በመነሳት የአሸኛኘት ስነ ሥርዓቱ ከቦሌ ዓለም አቀፍ አየር ማረፊያ ጀምሮ እስከ መንበረ ጸባኦት ቅድስት ሥላሴ ካቴድራል ድረስ ስርዓቱን የጠበቀ ይሆን ዘንድ አሸኛኘቱ የሚከተሉትን ሂደቶች የሚከተል መሆኑን እናሳውቃለን።
1. የመምህር ዘለዓለም ወንድሙ አስከሬን ረቡዕ መጋቢት 2 ቀን 2018 ዓ ም ከአሀገረ አሜሪካ ተነስቶ ጉዞ ወደ ኢትዮጵያ የሚያደርግ ይሆናል።
2. ሐሙስ መጋቢት 3 ቀን 2018 ዓ ም አስከሬኑ ከጠዋቱ 12 :00 ላይ አዲስ አበባ ቦሌ ዓለም አቀፍ አየር ማረፊያ ይደርሳል። በዛም በብፁዓን አበው ሊቃነ ጳጳሳት እየተመራ የወንድማችን ወዳጅ ዘመዶች የአዲስ አበባ ሀገረ ስብከት የገዳማትና አድባራት ሊቃውንት ጥቅ ድርባቸውን ለብሰው አቀባበል የሚያደርጉለት ይሆናል። በቦሌ ዓለም አቀፍ ማረፊያ የሚገኙት የተመረጡ እና ፈቃድ የተሰጣቸው አካላት ብቻ ናቸው።
3. ከጠዋቱ 1:00 ሰዓት ጀምሮ ከብሌ ዓለም አቀፍ ኤርፖርት ጀምሮ እስከ ቦሌ ደ/ሳሌም መድሐኔዓለም ድረስ በሊቃውንተ ቤተክርስቲያን በሰንበት ትምህርት ቤት ዘማርያን እና በምእመናን ታጅቦ ወደ ቦሌ ደ/ሳሌም መድሐኔዓለም ካቴድራል ጉዞ ያደርጋል።
4. በቦሌ ደብረ ሳሌም መድሐኔዓለም ካቴድራል አጭር ቆይታ ካደረገ በኋላ ቀጥታ በመለከት ድምጽ ነጋሪት እየተጎሰመ በአዲስ አበባ ሀገረ ስብከት ሊቃውንት በመምህራነ ወንጌል በሰንበት ትምህርት ቤት ወጣት ዘማርያን እና በበርካታ ምእመናን ታጅቦ ከጠዋቱ 3:00 ጀምሮ እስከ 5:00 ሰዓት ድረስ መስቀል አደባባይ ይደረሳል
5. ከጠዋቱ 5:00 ሰዓት ጀምሮ በመስቀል አደባባይ የተለያዩ የአሸኛኘት መርሐግብሮች የሚከናወኑ ይሆናል ።

20/02/2026

#ተዋሕዶ #ኦርቶዶክሳዊ #መዝሙር

20/02/2026

I got over 20,000 reactions on my posts last week! Thanks everyone for your support! 🎉

15/02/2026

“መልእክተ ቅዱስ ፓትርያርክ”
በስመ አብ ወወልድ ወመንፈስ ቅዱስ ኣሐዱ አምላክ አሜን !!
በሀገር ውስጥና በልዩ ልዩ ክፍለ ዓለማት የምትገኙ ሕዝበ ክርስቲያን በሙሉ፡-
በመዋዕለ ጾሙ ሰይጣንንና መስሓቲ ተግባሩን ድል በማድረግ ድል እንድንነሣ ያደረገን ጌታችን ኣምላካችንና መድኃኒታችን ኢየሱስ ክርስቶስ እንኳን ለሁለት ሺሕ ዓሥራ ስምንት ዓመተ ምሕረት ጾመ ኣርብዓ በሰላም ኣደረሰን አደረሳችሁ!!
‹‹ወልበሱ ወልታ እግዚአብሔር በዘትክሉ ተቃውሞቶ ለመናግንተ ሰይጣን፤ የሰይጣንን ሽንገላ መቃወም ትችሉ ዘንድ የእግዚአብሔርን ጋሻ ልበሱ›› (ኤፌ.፮፥፲፩)፤
እኛ ሰዎች ቀዋሚና ምሕረት የለሽ ጠላት እንዳለን እናውቃለን፤ ይህ ጠላት ሰይጣን፣ ዲያብሎስ፣ክፉ መንፈስ፣ ርኩስ መንፈስ ተብሎ እንደሚጠራም ቅዱስ መጽሓፍ ነግሮናል፤ዲያብሎስ ከጥንት ጀምሮ በክፉ ሽንገላው ሰዎችን ሲጥል ኖሮኣል፤ ኣሁንም ከዚህ ክፉ ተግባሩ ኣልታቀበም፤ ለወደፊቱም ይታቀባል ተብሎ ኣይጠበቅም፤ ጌታችን በዚህ ዓለም በሥጋ በተገለጠ ጊዜም ይህ ክፉና ርኩስ መንፈስ በሽንገላ ቃሉ ጌታችንን ሊጥል ያልተሳካ ሙከራ አድርጎኣል፡፡
ርኩሱ መንፈስ ጾም መንፈሳዊ ኃይልን እንደሚያቀዳጅ ያውቃልና፣ ጌታችን ምንም ሳይበላና ሳይጠጣ ኣርባ ቀንና ኣርባ ሌሊት መጾሙን ተመልክቶ፣ በሽንገላ ቃሉ ሊጥለው ሙከራ አድርጎኣል፤ ይህንን ያደረገበት ዋና ምክንያትም ጾም መንፈሳዊ ኃይል መሆኑን በውል ያውቃልና በጾም ኃይል ከእጄ ያመልጣል ብሎ በማሰቡ ነው፤ ይሁን እንጂ ሰይጣን የሰውን ደካማ ጠባይ በመጠቀም ያስለመደው ሽንገላ፣በተዋሕዶ ሰውም ኣምላክም በሆነው ጌታችን ላይ ሊሳካለት ባለመቻሉ ተሸንፎና ተስፋ ቆርጦ ሊሄድ ችሎኣል፡፡
የተወደዳችሁ ሕዝበ ክርስቲያን ልጆቻችን!
የጌታችን ድል አድራጊነት ያስተማረን ብዙ ነገር አለ፤በዚህ ተግባራዊ ትምህርቱ እኛ ጥንተ ጠላታችን ዲያብሎስን ድል የምናደርግባቸው ሁለት መሣሪያዎችን በዋናነት አሳይቶናል፤ እነሱም የእግዚአብሔርን ጋሻ መልበስና በጾም መንፈሳዊ ኃይልን መቀዳጀት ናቸው፡፡
ሁሌም እንደምንማረው በውስጣችን ሁለት ተቃራኒ ነገሮች ኣሉ፤ እነሱም ፍትወተ ሥጋና ፍትወተ መንፈስ ናቸው፤ እነኝህ ሁለት ነገሮች ኣንዱ ላንዱ ፍጹም ተቃራኒ መሆናቸውን ቅዱስ መጽሓፍ እንዲህ በማለት ያስረዳል፡-‹‹ እስመ ሥጋኒ ይፈቱ ዘኢይፈቱ መንፈስ፤ ወመንፈስኒ ይፈቱ ዘኢይፈቱ ሥጋ፤ ወይትኣበዩ በበይናቲሆሙ ከመ ኢትግበሩ ዘትፈቅዱ፤ ወባሕቱ እብለክሙ በመንፈስ ሑሩ ወፍትወተ ሥጋክሙ ኢትግበሩ፣ማለትም ሥጋ መንፈስ የማይወደውን ይወዳል፤ መንፈስም ሥጋ የማይወደውን ይወዳል፤ እርስ በርሳቸውም ይቀዋወማሉ፤ስለዚህም የምትወዱትን ልታደርጉ ኣትችሉም፤ ነገር ግን እላለሁ በመንፈስ ተመላለሱ የሥጋን ምኞት ግን ከቶ ኣትፈጽሙ››(ገላ.፭÷፲፮‐፲፰)፡፡
እነኝህ የውስጣችን ጠባዮች በዚህ ደረጃ እርስ በርስ የሚቃረኑ መሆናቸው ለምናስተውላቸው በግልጽ የሚታወቁ ናቸው፤ ከዚህ አንጻር ሰይጣን ይህንን ክፍተት ተጠቅሞ የሥጋችንን ፍላጎት እንድንከተል ይገፋፋናል፤ መሳሪያዎቹ ደግሞ ፍቅረ መባልዕት፣ ፍቅረ ንዋይና ፍቅረ ሢመት ናቸው፤ ይህም በመሆኑ ነው ሰይጣን፣ በነዚህ ጌታችንን ሊሸነግለው የሞከረ፤ይሁንና ጌታችን እነኝህን የሽንገላ መሣሪያዎች ሰባብሮ ጥሎኣቸዋል፤የጣላቸውም በጾምና በእግዚአብሔር ቃል ነው፤
ጾም መጾም ማለት ከፍቅረ መባልዕት፣ ከፍቅረ ንዋይና ከፍቅረ ሢመት ፍላጎት ጨርሶ መራቅ ማለት ነው፤ ይህንን ኣደረግን ማለት ደግሞ ሥጋችን የማይወደውን፣መንፈሳችን ግን የሚወደውን ነገር ኣደረግን ማለት ነው፤ ይህ ሲሆን ሰይጣን ከሰረ፤ ድልም ሆነ ማለት ነው፤ በዚህ መንፈሳዊ ኃይል ዲያብሎስ ተሸንፎና ተስፋ ቆርጦ ይሄዳል፡፡
ከዚህ ኣኳያ እኛም በቃለ እግዚአብሔር እየተመራን የምንጾምበት ምክንያት የሥጋችንን ፍላጎት በመግራት ለነፍሳችን ፍላጎት ለማደርና በዚህ ኃይለ መንፈስ ሰይጣንን በማሸነፍ የእግዚአብሔር ቤተ ሰብ ለመሆን ነው፡፡
የተከበራችሁ ሕዝበ ክርስቲያን ልጆቻችን!
የጾም ዋና ዓላማ ሥጋዊ ፍላጎትን መግራት፣ በምትኩ ደግሞ መንፈሳዊ ፍላጎትን ማጐልበት እንደሆነ ተነግሮናል፤ በመሆኑም ይህንን መርሕ ጠብቀን መጾም ግዴታችን ይሆናል፤ ዛሬ ባለንበት ዓለም ሥጋዊ ፍላጎታችን ያየለበት፣መንፈሳዊ ፍላጎታችን ግን የተዳከመበት ዘመን ላይ እንገኛለን፤ ከፍቅር ይልቅ ጥላቻ፣ ከኣንድነት ይልቅ መለያየት፣ ከመራራት ይልቅ ጭካኔ፣ ከእምነት ይልቅ ክሕደትና ኣስመሳይነት በዓለማችን ላይ የበላይነቱን ይዞ መገኘቱ ለዚህ ማሳያ ነው፡፡
ይሁንና ዓለም ቢሰማም ባይሰማም፣ ሓቁም ጠቃሚውም የመንፈስን ፍላጎት ማጐልበት ስለሆነ የመንፈስ ፍሬዎች የሆኑትን ማለትም፣ ፍቅርን ሰላምን፣ ኣንድነትን፣ ርኅራኄንና፣ ሃይማኖትን፣ ማስፈን ምርጫችን ልናደርግ ይገባል፤ ቤተክርስቲያንም እንድንጾም የምታስተምረን እነዚህን ለመተግበር ጾም ፍቱን መሳሪያ ሆኖ ስለሚገኝ ነው፡፡
ከዚህ አንጻር የጾም ዓላማውና ግቡ ጽኑዕ ሃይማኖትን፣ እውነተኛ ፍቅርን፣ ዘላቂ ሰላምን፣ ልባዊ ኣንድነትን፣ የማይናወጽ ፍትሕንና እኩልነትን፣ ወሰን የሌለው ርኅራኄን በውስጣችን፣ ብሎም በዓለማችን ማሥረጽ እንደሆነ በውል ተገንዝበን ጾሙን መጾም ይገባል፤ልንለብሳቸው የሚገቡ እነዚህ የመንፈስ ፍሬዎች የእግዚአብሔር ጋሻዎች ናቸውና፡፡ ይህንን ካደረግን እንደ ጌታችን የሰይጣንን ሽንገላ በጣጥሰን በመጣል በኣስተማማኝ ሁኔታ ድል ማድረግ እንችላለን፤ የተጠራነውም ለዚሁ ነው፡፡
በመጨረሻም፡-
የሕዝባችንና የሀገራችን የራስ ምታት ሆኖ የሚገኘውን ያለመግባባት ዝንባሌ ለመቅረፍ ከልብ በመጸለይ፣ እንደዚሁም የተራቡትን በማጒረስ፣ የታረዙትን በማልበስ፣ የተጠሙትን በማጠጣት፣ የተጣሉትን በማስታረቅ፣ ፍትሕ ለተነፈጉትም እውነተኛ ፍትሕን በመስጠት፣ መዋዕለ ጾሙን እንድንጾመው በእግዚአብሔር ስም ኣባታዊ መልእክታችንን እናስተላልፋለን።
“እግዚአብሔር ኢትዮጵያንና ሕዝቦችዋን ይባርክ”

ወስብሓት ለእግዚአብሔር አሜን!

አባ ማትያስ ቀዳማዊ
ፓትርያርክ ርእሰ ሊቃነ ጳጰሳት ዘኢትዮጵያ ሊቀ ጳጳስ
ዘአኲስም ወዕጨጌ ዘመንበረ ተክለ ሃይማኖት፡፡


የካቲት ፱ ቀን ፳፻፲፰
አዲስ አበባ ኢትዮጵያ
#ተዋሕዶ #ኦርቶዶክሳዊ #መዝሙር

14/02/2026

#ተዋሕዶ #ኦርቶዶክሳዊ #መዝሙር