Waldaa Abbootii Alangaa Oromiyaa/ Oromia Public Prosecutors Association

18/01/2026

Guyyaa 11/05/2018
Waldaa Abbootii Alangaa Naannoo Oromiyaa

Waldaan Abbootii Alangaa Naannoo Oromiyaa Abbootii Alangaafi uummata biyya keenyaa Amantaa Kiristaanaa hordofan hundaan baga maatii keessan wajjin Ayyaana Cuuphaa bara 2018 nagaan geessan jechaa:
Ayyaanichi:
Kan Gammachuu
Kan Jaalalaa
Kan Tokkummaa
Kan Milkii
Kan Fayyaa fi Nagaa
akka isiniif ta’u hawwa!!

Ayyaana Gaarii!!

Waldaa Abbootii Alangaa Naannoo Oromiyaa

17/01/2026

07/01/2026

Guyyaa 29/04/2018
Waldaa Abbootii Alangaa Naannoo Oromiyaa

Waldaan Abbootii Alangaa Naannoo Oromiyaa Abbootii Alangaa fi uummata biyya keenyaa Amantaa Kiristaanaa hordofan hundaan baga maatii keessan hundaa wajjin guyyaa yaadannoo dhalachuu Gooftaa fi Fayyisaa keenyaa Iyyasuus Kiristtoosiin nagaan geessan jechaa:
Ayyaanichi:
Kan Gammachuu
Kan Jaalalaa
Kan Tokkummaa
Kan Milkii
Kan Fayyaa fi Nagaa
akka isiniif ta’u hawwa!!!

Ayyaana Gaarii!!

Waldaa Abbootii Alangaa Naannoo Oromiyaa

10/12/2025

Guyyaa Mudde 1 bara 2018
Godina Shawaa Lixaatti Abbaa Alangaa Aanaa Ejersa Lafoo kan ta'e Obbo Shibbiruu Guutaa Magarsaa gaafa 29/03/2018 waaree booda harmee isaa Godina Shawaa Kibba Lixaa Aanaa Bachoo Magaalaa Tullu Boolloo jiraatan dubbisee konkolaataadhaan Magaalaa Tullu Boolloo irraa gara Aanaa Dandii Magaalaa Giinciitti bakka hojii isaatti deebi'uuf osoo deemaa jiruu qaama hidhatee bosona jiruun butamee fudhatamuu isaa odeeffannoo fi ragaan Waldaa Abbootii Alangaa Oromiyaa qaqqabee itti dhiheenyaan hordofuun qulqulleeffannerra. Obbo Shibbiruu Guutaa Abbaa Alangaa Aanaa qaroo dhabeessa ta'uun Onkoloolessa bara 2016 sirna haqaatti erga makamee haqummaa, naamusaa fi kabaja ol'aanaan hawaasa isaa tajaajilaa kan jiruu fi hojii idilee isaa seeraa fi seera qofarratti hundaa'uun hojjachaa kan jiru fi Abbaan Alangaa bilisummaa ogummaatiin uummata kan tajaajilu waan ta'eef, dabalataanis Abbaan Alangaa kun qaroo dhabeessa akkaataa seera biyyattii fi seera idil-addunyaatiin eegumsiifi deeggarsi addaa taasifamuufii qabu ta'ee osoo jiruu butamee fudhatamuun isaa fudhatama seeraa fi duudhaa Uummataa hin qabu. Keessuma Konveenshiniin Dhaabbata Mootummoota Gamtoomanii waa'ee Mirgoota Namoota Qaama Miidhamtootaa Eeguuf bahe, addatti keewwata 11 jalatti, haala balaa, waraanaa fi rakkisaa keessatti yoo ta'ees, Qaamoleen hundi nageenyaa fi eegumsa qaama miidhamtootaaf taasisuu akka qaban ni dirqisiisa. Kanaaf, Abbaan Alangaa kun qaama miidhamaa qaroo dhabeessa ta'uun qaama kamirraayyuu nama eegumsaa fi kunuunsa addaa barbaadu ta'uun hubatame, Qaamni Abbaa Alangaa kana seeraan ala butee fudhate akka gadi lakkisu waamicha dhiyeessaa; gochaa al-seerummaa, duudhaa fi safuu Uummata keenyaan faallaa akkaasii Abbootii Alangaa bilisummaa ogummaatiin hojii olaatummaa seeraa fi haqa uummataa mirkaneessuu hojjetan irratti raawwatamu Waldaan Abbootii Alangaa Oromiyaa cimsee kan balaaleeffatu ta'uu ibsaa.

06/12/2025

Sadaasa 27, Bara 2018
Ibsa Waldaa Abbootii Alangaa Naannoo Oromiyaa Irraa Kenname (WAAO)
Akkuma beekamu, Waldaan Abbootii Alangaa Oromiyaa taatee tibba darbe miseensota isaa , Abbootii Alangaa Naannoo irratti raawwatame ilaalchisee irra deddeebiin balaaleffachuun ibsa baaseen, Abbootiin Alangaa sadii hidhattootaan butamanii fi ugguramanii harka isaanii akka turan, Abbootiin Alangaa bu’uura Qajeeltoo Ogummaa Abbaa Alangummaa Idila Addunyaa, Biyyaa fi Naannoo keenyaan miseensa dhaaba siyaasaa kamiyyuu irraa bilisa akka ta’anii fi ogummaan Abbaa Alangummaa hojii olaantummaa seeraa mirkaneessuu fi mirgaa fi dantaa lammiilee qixa sirriin kabachiisuu fi hojiirra oolchuu akka ta’e ibsuun, Abbootiin Alangaa sadeen Obbo Addisuu Laggaas, Obbo Alamaayyoo Massalaa fi Obbo Yirgaaleem Mitikkuu qaamni ugguree jiru nageenya lubbuu fi fayyaa qaamaan haalduree tokko malee to’annoo isaanii jalaa karaa nagaan akka gadi lakkifamaniif waamicha dhiyyeessaa turuu fi qaamoleen dhimmi ilaallatus Abbootiin Alangaa kun karaa nagaan akka gadi lakkifamaniif tumsa akka taasisan gaafachaa turuun isaa ni yaadatama.
Bu’uura kanaan, Abbaan Alangaa Obbo Addisuu Laggaas guyyuma butaman sana miidhaa qaamaa cimaa lubbuu isaaniif sodaachisu irra gahuun bosona keessatti guyyoota shaniif bakka namni hin arginetti gatamee miidhama ol’aanaa keessa erga turaniin booda, qaamoleen Nageenyaa Mootummaa hordoffii taasisaniin Abbaa Alangaa kana bakka itti miidhaman bosona keessaa kaasuun Mana Yaalaa dhiyeenyatti argamutti yaalii dursaa akka argatu taasisuun yeroo ammaa kanaatti miidhaa olaanaa isaan irra gaheen Hospitaala ol'aanaatti yaalamaa kan jiranii fi haalli fayyummaa isaanii haala gaariirra akka jiru Waldichi itti dhiyeenyaan hordofuun mirkaneeffatee jira.
Abbootii Alangaa ugguramanii to'annaa jala turan Obbo Alamayyoo Massalaa fi Obbo Yirgaaleem Mitikkuu ilaalchisees Waldichii haala isaan keessa jiran itti dhiyeenyaan hordofaa kan ture yemmuu ta'u, odeeffannoo dhugaafi qabatamaa guyyaa har'aa argateen Abbootiin Alangaa kun harka hidhattootaa keessaa karaa nagaan gadi lakkifamuu mirkaneeffatee jira. Haaluma kanaan guyyaa har’aa, Sadaasa 27, bara 2018 ganama Abbootiin Alangaa kunneen lamaan nagaan Magaalaa Naqamtee gahanii jiru. Waldichis miseensota isaa sadeen lubbuun argachuu fi gadi lakkifamuu isaanii ilaalchisee gammachuu guddaan kan itti dhagahame ta’uu ibsuu barbaada. Itti aansee Abbootiin Alangaa kun to’annoo jalaa akka gadi lakkifamanii fi gara maatii isaaniitti nagaan akka deebi’aniif, akkasumas kan miidhamee bosona keessatti gatamee ture lubbuun akka baraaramu qaamolee hojjechaa turaniif galata guddaa dhiyeessee jira. Miseensonni keenyaa fi qaamoleen garaagaraa Abbootiin Alangaa keenya to’annoo seeraan alaa jalaa karaa nagaan akka gadi lakkifamaniif, waamichaa fi dhiibbaa garaagaraa taasisaa turtaniif Waldaan Abbootii Alangaa Oromiyaa galata guddaa isiniif qaba..
Dhuma irratti, Waldichi Abbaa Alangaa Naannoo Obbo Naggasaa Kabbadaa Fayyee ajjeeffamaniif irra deebiin gadda guddaa itti dhagahame ibsaa; qaamni ilaallatu hundi deeggarsa barbaachisu maatii isaaniif akka taasisu waamicha dhiyeessa. Dabalataanis, qaamni kamiyyuu hubachuu fi qalbeeffachuu kan qabu, akkuma kanaan dura ibsaa turre, Abbaan Alangaa ogeessa seeraa qaama siyaasa kamiyyuu irraa bilisa ta’ee ogummaa seeraa qabuun olaantummaa seeraa fi haqa uummataa mirkaneessuuf hojjetu akka ta’e hubachuun, Abbootii Alangaa Naannichaa Oromiyaa guutuu keessatti ramadamuun hojii ogummaa Abbaa Alangummaa isaanii hojjetan irratti gochaan seeraan alaa walfakkaataan akkasii akka hin raawwatamneef, maqaa waldichaatiin irra deebiin hubachiisuu barbaadna.
Waldaa Abbootii Alangaa Naannoo Oromiyaa
Sadaasa 27, bara 2018
Finfinnee

30/11/2025

Sadaasa 20, Waamicha Waldaa Abbootii Alangaa Naannoo Oromiyaa irraa

Akkuma beekamu, Abbootii Alangaa Naannoo Oromiyaa kan ta'an:1. Obbo Alamaayyoo Messelee, 2. Obbo Addisuu Laggaas fi 3. Obbo Yirgaalem Mitikkuu gaafa Sadaasa 17 bara 2018, guyyaa keessaa tilmaamaan sa'aatii 9:00 booda, Godina Wallagga Bahaa Aanaa Jimmaa Arjoo Ganda Haraa jedhamee waamamutti Abbootiin Alangaa kun hojii mootummaatiif gara Magaalaa Naqamteetti deemaa osoo jiranii qaama hidhatee bosona keessa socho'uun butamanii waan turaniif akka gadi lakkifaman Waldaan Abbootii Alangaa Naannoo Oromiyaa waamicha dhiheessuun isaa ni yaadatama. Haata'u malee, Abbootiin Alangaa kun hanga yoonaatti gadi kan hin lakkifamneefi odeeffannoo harka hidhattootaatti ugguramanii jiraachuu mirkaneeffatee jira. Sababa kana irraan kan ka'e maatiin, firoottaniifi hiriyoonni isaanii yaaddoofi naasuu guddaa keessa kan jiranidha. Abbaan Alangaa ogeessa seeraa qaama siyaasaa kamirraayyuu bilisa ta'ee ogummaa seeraa qabuun ol'aantummaa seeraa fi haqa uummataa mirkaneessuuf hojjetu ta'ee osoo jiruu, gochaan humnaan butamuu fi ugguranii tursiisuu irratti raawwatamuun isaa gochaa fudhatama hin qabnee fi furmaata hatattamaa barbaaduudha. Abbootiin Alangaa Naannoo kun quuqama guddaadhaan haqummaafi qulqullummaan uummata isaanii tajaajilaa kan jiranidha. Kanaafuu, qaamni Abbootii Alangaa Naannoo kana ugguree jiru, dhugaafi haqaan uummata isaanii tajaajilaa kan jiran ta'uu fi gochaa loltummaa keessatti hirmaannaa kan hin qabne ta'uun hubatamee, ariitiin to'annaa jalaa nagaan akka gadi lakkisu Waldaan Abbootii Alangaa Naannoo Oromiyaa maqaa Abbootii Alangaa Naannichaatiin irra deebiin waamicha ni dhiheessa.

Waldaa Abbootii Alangaa Naannoo Oromiyaa

Sadaasa, 20 Bara 2018

27/11/2025

27/11/2025

27/11/2025

Guyyaa 18-03-2018

Biiroo Abbaa Alangaa Waliigalaa Oromiyaatti Abbootii Alangaa Naannoo kan ta'an:1. Obbo Naggasaa Kabbadaa, 2. Obbo Alamaayyoo Messelee, 3. Obbo Addisuu Laggaas fi 4. Obbo Yirgaalem Mitikkuu guyyaa kaleessaa, gaafa Sadaasa 17/03/2018, guyyaa keessaa tilmaamaan sa'aatii 9:00 booda Godina Wallagga Bahaa Aanaa Jimmaa Arjoo Ganda Haraa jedhamee waamamutti Abbootiin Alangaa kun hojii mootummaatiif gara Magaalaa Naqamteetti deemaa osoo jiranii qaama hidhatee bosona keessa jiruun butamanii erga to'annaa jala oolfamaniin booda Obbo Naggasee Kabbadee Fayyee haala sukaneessaan ajjeesuudhaan Abbootii Alangaa sadan hafanii jiran immoo fudhatanii deemanii hanga yoonaatti eessa akka jiran akka hin beekamne odeeffannoon Waldaa Abbootii Alangaa Naannoo Oromiyaa erga qaqaabeen booda Waldichi itti dhiheenyaan hordofaa kan jirudha. Waldaan Abbootii Alangaa Naannoo Oromiyaa ajjeechaa sukkaneessaa Abbaa Alangaa Naannoo Obbo Naggasaa Kabbadaa irratti raawwatametti gaddaa guddaatu itti dhagahamee jira. Waldaan Abbootii Alangaa Naannoo Oromiyaa gochaa seeraan alaa Abbootii Alangaa Naannoo kana irratti raawwatame cimsee kan balaleeffatudha. Ajjeechaan sukkaneessaa fi seeraan alaa butamuun Abbootii Alangaa kana irratti raawwatamuun isaa bilisummaa ogummaa Abbaa Alangaa kan sarbu ta'uu bira darbee gochaa ol'aantummaa seeraa cabsu akka ta'e ni hubata. Abbaan Alangaa ogeessa seeraa qaama siyaasaa kamirraayyuu bilisa ta'ee ogummaa seeraa qabuun ol'aantummaa seeraa fi haqa uummataa mirkaneessuuf hojjetu ta'ee osoo jiruu ajjechaan fi butamuun irratti raawwatamuun isaa gochaa fudhatama hin qabnee fi balaaleffamuu qabudha. Qaamni Abbootii Alangaa lubbuun hafan kana seeraan ala to'atee jiru hatattamaan to'annaa jalaa nagaan akka gadi lakkisu Waldaan Abbootii Alangaa Naannoo Oromiyaa waamicha ni dhiheessa.