06/05/2026
❗COMUNICADO DA COMISIÓN DE FESTAS DE CABALEIROS❗e RECORDO VIRXE DO CARMEN 2025🤩.
Queremos comunicar á veciñanza que, despois de dous anos formando parte da Comisión de Festas da nosa parroquia, as cinco persoas que actualmente a integramos tomamos a decisión de deixar esta responsabilidade.
Foron dous anos de traballo, dedicación, esforzo e moitas horas investidas para intentar sacar adiante unhas festas das que todos e todas puidésemos sentirnos orgullosos. Fixémolo sempre coa mellor vontade, con ilusión e co único obxectivo de manter viva unha tradición que forma parte da identidade da nosa parroquia.
A nosa decisión non nace dunha falta de ganas nin dunha perda de ilusión. Ao contrario, a ambición por facer unhas boas festas segue estando aí. Pero tamén é necesario ser sinceros: organizar unhas festas require tempo, apoio, colaboración e medios económicos suficientes. E a realidade é que, cos recursos dispoñibles e coa participación económica actual, resulta cada vez máis difícil achegarse ao nivel doutras festas veciñas, nas que a implicación e as achegas son moi diferentes.
Cómpre lembrar que formar parte da Comisión de Festas é algo voluntario e aberto a calquera persoa da parroquia que queira colaborar. Por iso, durante este tempo intentouse buscar relevo, pero polo momento non hai persoas dispostas a asumir esta responsabilidade. Esta falta de voluntarios é tamén unha mostra clara da dificultade que supón hoxe en día sacar adiante unha comisión deste tipo.
Por todo isto, consideramos que agora a continuidade das festas queda en mans da veciñanza e tamén do Concello, que deberá valorar que decisión quere asumir ante esta situación e que solución se pode ofrecer para que a parroquia non perda as súas festas.
Pola nosa parte, a pesar das dificultades, só podemos agradecer a todas aquelas persoas que si colaboraron, apoiaron, axudaron ou confiaron en nós ao longo destes dous anos.
Agardamos que esta situación sirva tamén para reflexionar sobre a importancia de apoiar, colaborar e valorar o traballo das persoas que, de maneira totalmente voluntaria, dedican o seu tempo a manter vivas as festas da parroquia.
Moitas grazas a todos e todas.
A Comisión de Cabaleiros Festas de Cabaleiros
