14/08/2025
COMUNICADO DA ASOCIACIÓN LEMBRANZA DA VILA
Desde a Asociación Lembranza da Vila queremos comunicar que este ano decidimos facer unha pausa na organización da actividade cultural Cita coa Historia. Foi unha decisión meditada, tomada coa intención de coller folgos, reflexionar e preparar con máis forza unha nova edición para o vindeiro ano.
Este pequeno descanso nace da vontade de continuar ofrecendo un evento á altura do que merece a nosa vila. Queremos volver cunha proposta renovada, chea de ilusión, con novas ideas que sigan poñendo en valor a nosa historia, o noso patrimonio e a nosa identidade como pobo.
Cita coa Historia non sería posible sen o esforzo colectivo de todas as persoas que formamos parte da asociación, sen a colaboración desinteresada de entidades, asociacións e veciñas e veciños que cada ano fan medrar esta celebración. Por iso, queremos aproveitar para dar as grazas de corazón a todas e todos os que, edición tras edición, facedes posible que A Vila se transforme e reviva o seu pasado con orgullo e emoción.
Tamén agradecemos o apoio constante do Concello das Pontes e, sobre todo, o cariño e a participación da cidadanía e das persoas visitantes que nos acompañan nesta viaxe no tempo.
Agardamos con moita ilusión volver encontrarnos o próximo ano, para seguir facendo memoria e celebrando, xuntas e xuntos, o que fomos, o que somos e o que queremos seguir sendo.
Grazas por estar aí. Vémonos pronto.
Asociación Lembranza da Vila
