�MANIFESTO DA PLATAFORMA EN DEFENSA DA SANIDADE PÚBLICA DO CONDADO �
Na Plataforma En Defensa da Sanidade Pública do Condado unímonos para defender unha sanidade pública e de calidade; movidas pola convicción de que o acceso á sanidade é un dereito humano básico, que debe garantirse en condicións de igualdade para todas as persoas. A diminución da calidade do Sistema Público de Saúde implica un r
ecorte dos nosos salarios. Polo tanto, se o goberno non garante un servizo de calidade o noso salario indirecto vese reducido: estamos recibindo menos polo noso traballo. Para recuperar unha sanidade pública de calidade, trasladámoslle ao SERGAS as seguintes reivindicacións:
• Reducir as listaxes de espera para citas, cirurxías e probas diagnósticas.
• Reducir as listaxes de agarda para medicina de familia a un máximo de 24h.
• Recuperar as consultas presenciais na Atención Primaria.
• Dotar aos centros de saúde públicos do persoal sanitario e non sanitario necesario, asegurando que se cubran as baixas e vacacións. Por exemplo, no centro de saúde de Mondariz precísase un novo médico de cabeceira. En Ponteareas, débese alcanzar a cifra de 15 médicos e médicas.
• Abrir as consultas do centro de saúde de Salvaterra tamén pola tarde, para a conciliación familiar.
• Reforzar o persoal sanitario no PAC de Ponteareas, incluíndo un pediatra.
• Implantar a unidade de raios en Ponteareas en quenda de mañá e tarde que atenda tamén o resto do Condado.
• Implantar o Servizo de Saúde Mental en Ponteareas.
• Retomar as campañas de prevención da saúde e educación na saúde para persoas con enfermidades crónicas.
• Cubrir as entradas dos Centros de Saúde para os tempos de espera.
• Implantar a enfermería escolar nos institutos do Condado.
• Aumentar o orzamento dedicado á Atención Primaria dos centros de saúde públicos. Nos últimos anos a sanidade pública degradouse considerablemente:
• non debemos consentir que nos dean citas para o médico de cabeceira ou para realizar probas diagnósticas con semanas de espera;
• non debemos consentir que nos consulten as doenzas por teléfono;
• non debemos consentir a insuficiencia de persoal para tramitar as citas;
• non debemos consentir que ao chegar a Urxencias todos os equipos médicos estean ocupados nun desprazamento;
• non debemos consentir unha dotación de ambulancias insuficiente;
• non debemos consentir que continúen degradando a sanidade pública. Denunciamos que esta degradación é deliberada para beneficiar ao sector sanitario privado. O mal funcionamento da sanidade pública provoca que cada vez máis persoas recorran á sanidade privada. A xestión privatizadora da Xunta favorece o negocio privado a costa de suprimir un dereito fundamental. O modelo sanitario de Rueda e o PP é inxusto. Con este modelo só teñen acceso a unha sanidade de calidade quen a poida pagar. Como consecuencia, a esperanza de vida de moitas persoas é menor só polo feito de ser pobre. Con este modelo só gañan as empresas privadas dedicadas a sanidade. Este é o obxectivo real das políticas neoliberais do PP: desposuírnos dos nosos dereitos para favorecer o beneficio privado. Somos conscientes de que as nosas reivindicacións non son fáciles de acadar. Para cambiar as políticas da Xunta, son necesarias mobilización permanente e loita. É así como conseguiremos que moitas persoas se informen sobre os plans privatizadores do PP, obrigándoo a cambialos para non perder o apoio electoral. Por este motivo, agradecemos a asistencia ás nosas mobilizacións pero, sobre todo, chamamos a todas as persoas e colectivos conscientes a que se unan á Plataforma ou secunden as súas convocatorias para, deste xeito, aumentar a nosa capacidade de que esta mensaxe chegue a máxima xente posible. Só así evitaremos o desmantelamento dun ben esencial para levar unha vida con dignidade.
